| ມານະພະຍາຍາມນຳການພົວພັນມິດຕະພາບ ແລະ ການຮ່ວມມື ລະຫວ່າງ EU - ຫວຽດນາມ ພັດທະນາຂຶ້ນສູ່ລະດັບສູງໃໝ່ | |
| ເປີດກາລະໂອກາດຫຼາຍຢ່າງໃນການຮ່ວມມື, ລົງທຶນ ລະຫວ່າງ ຫວຽດນາມ - ກຳປູເຈຍ |
 |
| ຄະນະຜູ້ແທນຂັ້ນສູງນະຄອນຫຼວງຮ່າໂນ້ຍ ນຳໜ້າໂດຍ ທ່ານເລຂາຄະນະພັກນະຄອນ ດິງຕຽນຢຸງ ເຈລະຈາກັບເຈົ້າຄອງນະຄອນຫຼວງພະນົມເປັນ ທ່ານ Khuong Sreng (ພາບ: TTXVN) |
ຕອນບ່າຍວັນທີ 27 ເມສາ, ຢູ່ນະຄອນຫຼວງພະນົມເປັນ, ໃນຂອບເຂດການຢ້ຽມຢາມລາຊະອານາຈັກກຳປູເຈຍ, ຄະນະຜູ້ແທນຂັ້ນສູງນະຄອນຫຼວງຮ່າໂນ້ຍ ນຳໜ້າໂດຍ ທ່ານເລຂາຄະນະພັກນະຄອນ ດິງຕຽນຢຸງ ໄດ້ມີການເຈລະຈາກັບເຈົ້າຄອງນະຄອນຫຼວງພະນົມເປັນ ທ່ານ Khuong Sreng.
ຕາມສຳນັກຂ່າວສານຫວຽດນາມປະຈຳນະຄອນຫຼວງພະນົມເປັນແລ້ວ, ເຂົ້າຮ່ວມກອງປະຊຸມກໍ່ມີ ທ່ານເອກອັກຄະລັດຖະທູດ ຫວຽດນາມ ປະຈຳ ກຳປູເຈຍ ຫງວຽນຮຸຍຕັງ.
ຕາງໜ້າສະພານະຄອນຫຼວງພະນົມເປັນ, ເຈົ້າຄອງນະຄອນ ທ່ານ Khuong Sreng ໄດ້ໃຫ້ການຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນຂັ້ນສູງນະຄອນຫຼວງຮ່າໂນ້ຍ ຢ່າງສຸດໃຈ, ຢືນຢັນວ່າ ນີ້ແມ່ນການຢັ້ງຢືນສາຍພົວພັນອັນດີງາມລະຫວ່າງສອງພັກ, ລັດຖະບານ ແລະ ປະຊາຊົນສອງປະເທດ, ໂດຍສະເພາະແມ່ນການຮ່ວມມືອັນຍາວນານລະຫວ່າງສອງນະຄອນຫຼວງ.
ໂດຍແນະນຳຫຍໍ້ກ່ຽວກັບການປ່ຽນແປງໃໝ່ຂອງເສດຖະກິດ-ສັງຄົມຂອງພະນົມເປັນໃນຊຸມປີມໍ່ໆມານີ້, ທ່ານເຈົ້າຄອງກຳປູເຈຍເນັ້ນໜັກເຖິງການພັດທະນາຢ່າງເຂັ້ມແຂງໃນທຸກດ້ານຂອງນະຄອນໃຫຍ່ສຸດຂອງກຳປູເຈຍກ່ຽວກັບການເຕີບໂຕ GDP , ຂະບວນການຫັນເປັນຕົວເມືອງຢ່າງວ່ອງໄວ ແລະ ຄວາມຕ້ອງການຂອງນະຄອນກ່ຽວກັບການພັດທະນາການທ່ອງທ່ຽວ ແລະ ການຄົມມະນາຄົມຂົນສົ່ງ.
ການຢ້ຽມຢາມ ກຳປູເຈຍ ຂອງທ່ານເລຂາຄະນະພັກ ຮ່າໂນ້ຍ ດິງຕຽນຢຸງ ໄດ້ດຳເນີນໃນໂອກາດທີ່ 2 ປະເທດມີບັນດາການເຄື່ອນໄຫວສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ (24 ມິຖຸນາ 1967-24 ມິຖຸນາ 2022). ການພົວພັນຖານ “ບ້ານໃກ້ເຮືອນຄຽງທີ່ດີ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານ”.
ດ້ວຍຄວາມປາດຖະໜາຢາກສືບຕໍ່ເພີ່ມພູນຄູນສ້າງນ້ຳໃຈສາມັກຄີ, ມິດຕະພາບ, ທີ່ການພົບປະ, ເຈົ້າຄອງນະຄອນ ທ່ານ Khuong Sreng ເນັ້ນໜັກວ່າ ປະຊາຊົນ ກຳປູເຈຍ ບໍ່ເຄີຍລືມຄຸນງາມຄວາມດີບັນດາທະຫານອາສາສະໝັກ ຫວຽດນາມ ທີ່ໄດ້ຊ່ວຍປະເທດຊາດຫຼຸດພົ້ນອອກຈາກລະບອບດັບສູນເຊື້ອຊາດ Pol Pot, ພິເສດແມ່ນປະຊາຊົນນະຄອນຫຼວງພະນົມເປັນ ໄດ້ຮັບການໜູນຊ່ວຍສະບຽງອາຫານຈາກທະຫານຫວຽດນາມ ເພື່ອຊ່ວຍຜ່ອນຄາຍຄວາມອຶດຫິວໃນມື້ທີ່ມີຄວາມຫຍຸ້ງຍາກພາຍຫຼັງປະເທດຊາດໄດ້ຮັບການປົດປ່ອຍໃນປີ 1979.
ໂດຍສະແດງຄວາມຊົມເຊີຍ ກຳປູເຈຍ ທີ່ບັນລຸໄດ້ບັນດາຜົນງານອັນໃຫຍ່ຫຼວງໃນການຮັກສາສະຖຽນລະພາບດ້ານການເມືອງ, ຄວາມໝັ້ນຄົງ, ການພັດທະນາເສດຖະກິດ - ສັງຄົມ ແລະ ຍົກສູງທີ່ຕັ້ງບົນເວທີສາກົນຢ່າງບໍ່ຢຸດຢັ້ງ, ທ່ານເລຂາທິການໃຫຍ່ ດິງຕຽນຢຸງ ໄດ້ຕີລາຄາສູງບັນດາມາດຕະການຮັບມືຂອງກຳປູເຈຍ ໃນການແຜ່ລະບາດຂອງພະຍາດໂຄວິດ-19, ການຜັນຂະຫຍາຍການສັກວັກແຊງບັນລຸໄດ້ອັດຕາທີ່ສູງແຖວໜ້າໃນພາກພື້ນ ແລະ ບັນດາໝາກຜົນທີ່ຕັ້ງໜ້າພາຍຫຼັງການເປີດປະຕູເສດຖະກິດຄືນໃໝ່ທັງໝົດ.
ໂດຍເຕື້ອງເຖິງຄວາມມານະພະຍາຍາມຟື້ນຟູເສດຖະກິດພາຍຫຼັງໂລກລະບາດໂຄວິດ-19, ທ່ານເລຂາຄະນະພັກນະຄອນ ດິງຕຽນຢຸງ ເນັ້ນໜັກວ່າ: ຫວຽດນາມ ເວົ້າລວມ ແລະ ຮ່າໂນ້ຍ ເວົ້າສະເພາະ ໄດ້ ແລະ ພວມຜັນຂະຫຍາຍຫຼາຍມາດຕະການແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ປັບປຸງວິສາຫະກິດ, ປັບປຸງສະພາບແວດລ້ອມແຫ່ງການລົງທຶນ ແລະ ດຶງດູດແຫຼ່ງການລົງທຶນຈາກຕ່າງປະເທດ ແລະ ພາຍໃນ; ພ້ອມກັນນັ້ນ, ກໍໃຫ້ບຸລິມະສິດຈັດສັນງົບປະມານຂອງເມືອງເພື່ອລົງທຶນເຂົ້າໃນບັນດາກິດຈະກຳ ແລະ ໂຄງການທີ່ສຳຄັນ ແລະ ລົງທຶນໃຫ້ຫລາຍກວ່າອີກໃນຂົງເຂດທີ່ຮັບປະກັນການພັດທະນາຂອງນະຄອນຫຼວງແບບຍືນຍົງ.
ຮ່າໂນ້ຍ ມຸ່ງໄປເຖິງການກາຍເປັນນະຄອນ: ສີຂຽວ, ອະລະຍະທຳ, ສີວິໄລ, ທັນສະໄໝ, ມີຄວາມສາມາດແກ່ງແຍ້ງໃນພາກພື້ນ ແລະ ສາກົນ, ເຊື່ອມໂຍງເຂົ້າກັບທົ່ວໂລກ, ຮັກສານາມະຍົດນະຄອນເພື່ອສັນຕິພາບ.
ທີ່ການພົບປະ, ທ່ານເຈົ້າຄອງນະຄອນ Khuong Sreng ແລະ ເລຂາຄະນະພັກນະຄອນ ດິງຕຽນຢຸງ ໄດ້ເຫັນດີເປັນເອກະສັນຈະພ້ອມກັນຊອກຮູ້ທິດທາງການຮ່ວມມືລະຫວ່າງ 2 ນະຄອນຢ່າງແທດຈິງ, ຮັບປະກັນປະສິດທິຜົນໃນສະພາບປົກກະຕິໃໝ່; ຊຸກຍູ້ການຮ່ວມມືດ້ານການລົງທຶນ - ທ່ອງທ່ຽວລະຫວ່າງວິສາຫະກິດຂອງສອງນະຄອນຫຼວງ.
2 ຝ່າຍເຫັນດີເປັນເອກະພາບໝູນໃຊ້ຮ່າແຮງບັນດາເຂດມໍລະດົກວັດທະນະທຳ - ປະຫວັດສາດ ເພື່ອດຶງດູດນັກທ່ອງທ່ຽວຂອງແຕ່ລະປະເທດມາຢ້ຽມຢາມ.
ຮ່າໂນ້ຍ ໃຫ້ຄຳໝັ້ນສັນຍາຈະຮັບນັກສຶກສາ ກຳປູເຈຍ ໄປຮ່ຳຮຽນຢູ່ບັນດາມະຫາວິທະຍາໄລຢູ່ຫວຽດນາມຕື່ມອີກ.
2 ຝ່າຍເຫັນດີເປັນເອກະສັນເພີ່ມທະວີການແລກປ່ຽນ ແລະ ແບ່ງປັນຂໍ້ມູນຂ່າວສານ ແລະ ປະສົບການໃນການຄຸ້ມຄອງຕົວເມືອງ, ການພົບປະມິດຕະພາບປະຊາຊົນ, ພິເສດແມ່ນຊາວໜຸ່ມ, ໄວໜຸ່ມລະຫວ່າງສອງນະຄອນຫຼວງ; ຍູ້ແຮງການໂຄສະນາເຜີຍແຜ່ ແລະ ສຶກສາໃຫ້ລຸ້ນໜຸ່ມກ່ຽວກັບການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງ ຫວຽດນາມ ແລະ ກຳປູເຈຍ...
ກ່ອນໜ້ານັ້ນ, ໃນຂອບເຂດການຢ້ຽມຢາມກຳປູເຈຍ, ທ່ານເລຂາຄະນະພັກນະຄອນ ດິງຕຽນຢຸງ ໄດ້ເຂົ້າຢ້ຽມຂ່ຳນັບທ່ານປະທານພັກປະຊາຊົນ, ນາຍົກລັດຖະມົນຕີ ກຳປູເຈຍ Samdech Techo Hun Sen; ທ່ານປະທານກິດຕິມະສັກ ພັກປະຊາຊົນກຳປູເຈຍ, ປະທານສະພາແຫ່ງຊາດ Samdech Heng Samrin; ທ່ານຮອງປະທານພັກປະຊາຊົນກຳປູເຈຍ, ປະທານສະພາສູງ Samd Say Chhum./.
ບຸນຄົງ
