 |
| ບັນດາຜູ້ແທນເຂົ້າຮ່ວມພິທີ (ພາບ: baoquocte.vn) |
ເຂົ້າຮ່ວມພິທີມີ ທ່ານເອກອັກຄະລັດຖະທູດ ຫງວຽນວັນງຶ, ທ່ານຮອງລັດຖະມົນຕີກະຊວງການຕ່າງປະເທດ ເບລາຣຸດ N.N. Borisevich, ທ່ານຮອງລັດຖະມົນຕີກະຊວງຂໍ້ມູນຂ່າວ, ການຕິດຕໍ່ພົວພັນ ແລະ ຫັນເປັນຄອມພິວເຕີ ເບລາຣຸດ N.M. Gordeenko, ການນຳສະມາຄົມມິດຕະພາບ ແລະ ການພົວພັນແລກປ່ຽນວັດທະນະທຳກັບຕ່າງປະເທດຂອງ ເບລາຣຸດ, ສະມາຄົມມິດຕະພາບ ເບລາຣຸດ - ຫວຽດນາມ ພ້ອມກັບບັນດາສະມາຊິກ, ຕາງໜ້າກະຊວງວັດທະນະທຳ ເບລາຣຸດ ພ້ອມກັບພະນັກງານທຸກຖ້ວນໜ້າຂອງສະຖານທູດ, ຜູ້ຕາງໜ້າຄະນະບໍລິຫານງານສະມາຄົມຊາວຫວຽດນາມ ອາໄສຢູ່ ເບລາຣຸດ.
ກ່າວຄຳເຫັນທີ່ພິທີສະເຫຼີມສະຫຼອງ, ທ່ານເອກອັກຄະລັດຖະທູດ ຫງວຽນວັນງຶ ໄດ້ສັງເຂບບັນດາຂີດໝາຍສຳຄັນໃນປະຫວັດສາດ 30 ປີແຫ່ງການພົວພັນທາງການທູດ ລະຫວ່າງ ຫວຽດນາມ - ເບລາຣຸດ, ຍົກໃຫ້ເຫັນນ້ຳໃຈສາມັກຄີ ລະຫວ່າງສອງຊາດ ກໍ່ຄືບັນດາຄວາມມານະພະຍາຍາມຂອງການນຳ ແລະ ປະຊາຊົນສອງປະເທດ ເພື່ອພ້ອມກັນກໍ່ສ້າງ, ເພີ່ມພູນຄູນສ້າງ ແລະ ປັບປຸງການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືໃນຫຼາຍດ້ານທີ່ມີຕົ້ນກຳເນີດປະຫວັດສາດແຕ່ສະໄໝໂຊວຽດ.
ສອງປະເທດຮັກສາການພົວພັນດ້ານການເມືອງທີ່ມີຄວາມໄວ້ເນື້ອເຊື່ອໃຈ, ການພົບປະ, ແລກປ່ຽນຄະນະຜູ້ແທນທຸກຂັ້ນເປັນປະຈຳ, ສົມທົບກັນຢ່າງແໜ້ນແຟ້ນບົນເວທີສາກົນ.
ການຮ່ວມມືດ້ານເສດຖະກິດ - ການຄ້າໄດ້ມີບັນດາບາດກ້າວຫັນປ່ຽນຢ່າງຕັ້ງໜ້າ ເຊິ່ງສອງໂຄງການຮ່ວມມືລົງທຶນໃນຂົງເຂດການຜະລິດ, ປະກອບລົດບັນທຸກ ແລະ ອຸດສາຫະກຳສະບຽງອາຫານ ພວມໄດ້ຮັບການຜັນຂະຫຍາຍຢູ່ຫວຽດນາມ ແມ່ນພະຍານຫຼັກຖານຢ່າງຈະແຈ້ງທີ່ສຸດ.
ສອງຝ່າຍໄດ້ຍາດແຍ່ງທ່າໄດ້ປຽບຈາກສົນທິສັນຍາການຄ້າເສລີ ຫວຽດນາມ - ສະຫະພັນເສດຖະກິດ ອາຊີ - ເອີລົບ ເພື່ອຮັບໃຊ້ໃຫ້ແກ່ການເຄື່ອນໄຫວຂອງບັນດາບໍລິສັດຮ່ວມດຳເນີນທຸລະກິດ ແລະ ຊຸກຍູ້ການເຕີບໂຕວົງເງິນການຄ້າ. ການຮ່ວມມືໃນຂົງເຂດຕ່າງໆກໍ່ມີການພັດທະນາຢ່າງຕັ້ງໜ້າ.
ພ້ອມກັນຫວນຄືນໄລຍະທາງ 30 ປີ, ທ່ານຮອງລັດຖະມົນຕີກະຊວງການຕ່າງປະເທດ ເບລາຣຸດ N.N. Borisevich ຢັ້ງຢືນ ການພົວພັນທີ່ເປັນມູນເຊື້ອ ແລະ ຄວາມສາມາດບົ່ມຊ້ອນ ຮ່ວມມືໃຫຍ່ ຂອງ ເບລາຣຸດ ແລະ ຫວຽດນາມ.
ທ່ານ N.N. Borisevich ກໍ່ໍເນັ້ນໜັກວ່າ ສອງປະເທດໄດ້ຮ່ຽງບ່າຮ່ຽງໄຫຼ່ ໃນຕະຫຼອດໄລຍະ 30 ປີຜ່ານມາ ແລະ ຈະສືບຕໍ່ພ້ອມກັນມານະພະຍາຍາມເພື່ອຜ່ານຜ່າຜົນກະທົບຢ່າງຫຍໍ້ທໍ້ຈາກໂລກລະບາດໂຄວິດ - 19, ຍູ້ໄວການຮ່ວມມື ແລະ ຜັນຂະຫຍາຍບັນດາການເຄື່ອນໄຫວຮ່ວມມືທີ່ຄາດຄະເນໄວ້ ໂດຍໄວ.
ໃນບັນຍາກາດຢ່າງສົມກຽດ ແຕ່ກໍ່ມີຄວາມສະໜິດສະໜົມ ຂອງພິທີ, ທ່ານເອກອັກຄະລັດຖະທູດ ຫງວຽນວັນງຶ, ທ່ານຮອງລັດຖະມົນຕີການຕ່າງປະເທດ N.N. Borisevich ແລະ ທ່ານຮອງລັດຖະມົນຕີກະຊວງຂໍ້ມູນຂ່າວ, ການຕິດຕໍ່ພົວພັນ ແລະ ຫັນເປັນຄອມພິວເຕີ ເບລາຣຸດ N.M. Gordeenko ໄດ້ປະຕິບັດພິທີອອກຈຳໜ່າຍສະແຕມສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ ແລະ ເບລາຣຸດ ຢ່າງເປັນທາງການ.
ບັນດາຜູ້ແທນກໍ່ໄດ້ຮັບຊົມບັນດາລາຍການສະແດງສິລະປະທີ່ເປັນມູນເຊື້ອ ຂອງທັງສອງປະເທດ.
ບຸນຄົງ
