 |
| ທ່ານນາຍົກລັດຖະມົນຕີ ຟ້າມມິງຈິງ ເຂົ້າຮ່ວມກອງປະຊຸມ (ພາບ: TTXVN) |
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ໄດ້ເນັ້ນໜັກເຖິງບົດບາດຍຸດທະສາດຂອງເຂດອະນຸພາກພື້ນແມ່ນ້ຳຂອງເປີດກວ້າງ ໃນວິວັດການເຊື່ອມໂຍງເຂົ້າກັບສາກົນ ແລະ ການເຕີບໂຕເສດຖະກິດຢ່າງແຮງຢູ່ ອາຊີ.
ທ່ານນາຍົກລັດຖະມົນຕີ ຢັ້ງຢືນບັນດາຜົນງານຂອງການຮ່ວມມື ເຂດອະນຸພາກພື້ນແມ່ນ້ຳຂອງເປີດກວ້າງ ໄດ້ໜູນຊ່ວຍຢ່າງມີປະສິດທິຜົນໃຫ້ແກ່ວິວັດການສ້າງປະຊາຄົມອາຊຽນ, ກຳນົດທິດໂຄງປະກອບພາກພື້ນດ້ວຍການຖືອາຊຽນ ເປັນໃຈກາງ ແລະ ຊຸກຍູ້ການພົວພັນຄູ່ຮ່ວມມືຍຸດທະສາດ ລະຫວ່າງ ອາຊຽນ - ຈີນ ໃຫ້ນັມມື້ນັບພັດທະນາ ແລະ ເຂົ້າສູ່ລວງເລິກ.
ທ່ານນາຍົກລັດຖະມົນຕີ ສະເໜີວ່າ ການຮ່ວມມືກັບ ເຂດອະນຸພາກພື້ນແມ່ນ້ຳຂອງເປີດກວ້າງ ໃນໄລຍະຈະມາເຖິງ ຕ້ອງໃຫ້ບຸລິມະສິດໃຫ້ແກ່ 6 ເນື້ອໃນຫຼັກ, ໃນນັ້ນ ຕ້ອງສຸມໃສ່ເຂົ້າໃນການສະກັດກັ້ນ, ຄວບຄຸມ, ຍູ້ໂລກລະບາດໂຄວິດ - 19 ໃຫ້ຖອຍໄປ, ພ້ອມທັງສ້າງກົນໄກສົມທົບກັນເພື່ອຮັບມືກັບບັນດາພະຍາດຕິດແປດໃນອະນາຄົດ.
ທ່ານນາຍົກລັດຖະມົນຕີ ຖືວ່າ ຕ້ອງຮັບປະກັນລະບົບສະໜອງໃນພາກພື້ນ ບໍ່ໃຫ້ຖືກຕັດຂາດໃນສະພາບການໂລກລະບາດໂຄວິດ - 19, ເປີດ “ແລວທາງສີຂຽວ” ຢູ່ບັນດາດ່ານຊາຍແດນ ເພື່ອທັງສ້າງຄວາມສະດວກໃນການຈໍລະຈອນໃຫ້ແກ່ຄົນ ແລະ ສິນຄ້າຜ່ານດ່ານຊາຍແດນ, ຈຳກັດການນຳໃຊ້ບັນດາຮົ້ວກີດຂວາງທາງການຄ້າ. ບັນດາປະເທດສືບຕໍ່ຍູ້ແຮງການຫັນເປັນດີຈີຕອນ ເພື່ອປະກອບສ່ວນສ້າງກຳລັງໜູນໃໝ່ໃຫ້ແກ່ການເຕີບໂຕ, ຟື້ນຟູເສດຖະກິດ ແລະ ຮັດແຄບໄລຍະຫ່າງໃນການພັດທະນາບົນພື້ນຖານພັດທະນາໂຄງລ່າງດີຈີຕອນ.
ທ່ານນາຍົກລັດຖະມົນຕີ ຟ້າມມິງຈິງ ຢັ້ງຢືນຄຳໝັ້ນສັນຍາຂອງ ຫວຽດນາມ ຈະສືບຕໍ່ປະກອບສ່ວນຢ່າງມີປະສິດທິຜົນເຂົ້າໃນການປະຕິບັດບັນດາເປົ້າໝາຍ ແລະ ວິໄສທັດລວມຂອງ ເຂດອະນຸພາກພື້ນແມ່ນ້ຳຂອງເປີດກວ້າງ ແລະ ບັນດາປະເທດບ້ານໃກ້ເຮືອນຄຽງ ໃນການສ້າງ ເຂດອະນຸພາກພື້ນແມ່ນ້ຳຂອງເປີດກວ້າງ ທີ່ນັບມື້ນັບເປີດກ້ວາງ, ປອດໄພ, ມີສັນຕິພາບ, ວັດທະນາຖາວອນ ແລະ ພັດທະນາແບບຍືນຍົງ.
ກອງປະຊຸມໄດ້ຮັບຮອງຖະແຫຼງການລວມ ແລະ ເຫັນດີເປັນເອກະພາບຈັດຕັ້ງກອງປະຊຸມສຸດຍອດເຂດອະນຸພາກພື້ນແມ່ນ້ຳຂອງເປີດກວ້າງ ຄັ້ງທີ 8 ຢູ່ ຈີນ ໃນປີ 2024.
ບຸນຄົງ
