 |
| ປະທານສະພາແຫ່ງຊາດຫວຽດນາມ ເວືອງດິນເຮັ້ວ (ພາບ:TTXVN) |
ໂດຍໄດ້ຮັບຄຳເຊີນຂອງທ່ານປະທານສະຫະພັນ ລັດຖະສະພາສາກົນ (IPU) Duarte Pacheco, ປະທານສະພາແຫ່ງຊາດ ໂອຕາລິດ Wolfgang Sobotka, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ໄດ້ນຳໜ້າຄະນະຜູ້ແທນ ສະພາແຫ່ງຊາດ ຫວຽດນາມ ເຂົ້າຮ່ວມກອງປະຊຸມ ປະທານສະພາແຫ່ງຊາດບັນດາປະເທດໃນໂລກ ຄັ້ງທີ 5 (WCSP5) ຢູ່ ສາທາລະນະລັດ ໂອຕາລິດ, ໃນລະຫວ່າງວັນທີ 5 – 7 ກັນຍາ 2021.
ກອງປະຊຸມດັ່ງກ່າວມີຫົວຂໍ້ “ການນຳພາຂອງລັດຖະສະພາ ເພື່ອການຮ່ວມມືຫຼາຍຝ່າຍຢ່າງມີປະສິດທິຜົນກວ່າ ແນໃສ່ນຳມາເຊິ່ງສັນຕິພາບ ແລະ ການພັດທະນາແບບຍືນຍົງໃຫ້ແກ່ປະຊາຊົນ ແລະ ໂລກ”. ໃນນັ້ນ ຈະມີບັນດາວາລະປຶກສາຫາລືກ່ຽວກັບບັນດາບັນຫາຄື: “ການຮັບມືກັບໂລກລະບາດໂຄວິດ - 19 ແລະ ສິ່ງທ້າທາຍ ສຳລັບກົນໄກຮ່ວມມືຫຼາຍຝ່າຍໃນການຕອບສະໜອງຄວາມຕ້ອງການຂອງປະຊາຊົນ”; “ຫຼຸດຜ່ອນຜົນກະທົບຂອງໂລກລະບາດໂຄວິດ - 19”; “ຕ້ານຂໍ້ມູນຂ່າວບໍ່ມີມູນຄວາມຈິງ….
ໃນຂອບເຂດຂອງກອງປະຊຸມ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ຈະມີບັນດາການເຄື່ອນໄຫວພົບປະສອງຝ່າຍກັບການນຳ ສະຫະພັນ ລັດຖະສະພາສາກົນ, ປະທານລັດຖະສະພາຈຳນວນໜຶ່ງ, ປະທານສະພາແຫ່ງຊາດ ໂອຕາລິດ, ຜູ້ຕາງໜ້າບັນດາອົງການຈັດຕັ້ງສາກົນ, ພົບປະກັບບັນດາວິສາຫະກິດ ໂອຕາລິດ…
ນອກຈາກນັ້ນ, ທ່ານປະທານສະພາແຫ່ງຊາດ ຫວຽດນາມ ເວືອງດິນເຮັ້ວ ຈະເຂົ້າຮ່ວມບັນດາວາລະປຶກສາຫາລືຫົວເລື່ອງສະເພາະ ກ່ຽວກັບບັນດາເນື້ອໃນສຳຄັນ ລວມມີການພັດທະນາແບບຍືນຍົງ, ເພີ່ມທະວີບົດບາດຂອງລັດທິຫຼາຍຝ່າຍໃນການຮ່ວມມືຕ້ານໂລກລະບາດໂຄວິດ -19 ແລະ ການຟື້ນຟູຫຼັງໂລກລະບາດ, ການຫັນປ່ຽນພື້ນຖານເສດຖະກິດ…
ຜ່ານການພົບປະຂັ້ນສູງລັດຖະສະພາ, ບັນດານັກສ້າງນິຕິກຳທົ່ວໂລກ ຈະປະກອບສຽງເວົ້າລວມ ພ້ອມກັບ ສປຊ ແກ້ໄຂບັນດາບັນຫາທົ່ວໂລກ. ຄາດວ່າ, ເຂົ້າຮ່ວມກອງປະຊຸມຄັ້ງນີ້ ຈະມີປະທານສະພາແຫ່ງຊາດ, ປະທານສະພາຕຳ, ສະພາສູງ 114 ທ່ານ, ຮອງປະທານສະພາແຫ່ງຊາດ 30 ທ່ານທີ່ມາຈາກ 104 ລັດຖະສະພາສະມາຊິກ ສະຫະພັນ ລັດຖະສະພາສາກົນ, ສະມາຊິກຮ່ວມສຳພັນ 7 ປະເທດ ແລະ ນັກສັງເກດການຂອງ 10 ປະເທດ.
ໄຊພອນ
