ສື່ມວນຊົນປະເທດລາວ ຕີລາຄາສູງຕໍ່ການຢ້ຽມຢາມສັນຖະວະໄມຕີຢ່າງເປັນທາງການຂອງ ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ

	ທ່ານເລຂາທິການໃຫຍ່, ປະທານປະເທດລາວ ສິ້ນສຸດການຢ້ຽມຢາມສັນຖະວະໄມຕີຫວຽດນາມ ຢ່າງຈົບງາມ
	ພິທີຕ້ອນຮັບທ່ານ ເລຂາທິການໃຫຍ່, ປະທານປະເທດລາວ ຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ

ໜັງສືພິມ PathetLao (ສື່ສິ່ງພິມຂອງສຳນັກຂ່າວສານປະເທດລາວ - KPL) ໃນວັນທີ 30 ມິຖຸນາໄດ້ລົງພິມເນື້ອໃນທັງໝົດຂອງ "ຖະແຫຼງການຮ່ວມ ລາວ - ຫວຽດນາມ" ແລະ ໄດ້ຈັດໜ້າໜັງສືພິມສ່ວນໃຫຍ່ ເພື່ອລົງພິມກ່ຽວກັບການຢ້ຽມຢາມນີ້.

ໜ້າທຳອິດຂອງບັນດາໜັງສືພິມໃຫຍ່ຂອງປະເທດລາວ ໃນວັນທີ 30 ມິຖຸນາ ໄດ້ພ້ອມກັນລົງບົດຂຽນ ກ່ຽວກັບການຢ້ຽມຢາມສັນຖະວະໄມຕີຢ່າງເປັນທາງການຂອງ ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ.

ໜັງສືພິມ Pasaxon (ປະຊາຊົນ), ໜັງສືພິມ Vientiane Times (ໜັງສືພິມວຽງຈັນຍຸກສະໄໝ), ໜັງສືພິມ VientianeMai (ວຽງຈັນໃໝ່)... ກໍ່ໄດ້ລົງພິມຖະແຫຼງການຮ່ວມ ລາວ - ຫວຽດນາມ ແລະ ມີຫລາຍບົດຂຽນ ໄດ້ຢືນຢັນ ການຢ້ຽມຢາມຂອງ ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ໃນຄັ້ງນີ້ ແມ່ນເພື່ອແນໃສ່ຢັ້ງຢືນຄືນໃໝ່ໃຫ້ຄຳໝັ້ນສັນຍາທີ່ຍາມໃດກໍ່ເປັນອັນໜຶ່ງອັນດຽວ ຂອງພັກ, ລັດ ແລະ ປະຊາຊົນລາວ ໃນການຮັກສາສາຍພົວພັນທີ່ເປັນມູນເຊື້ອ, ໝັ້ນແກ່ນ, ເລິກເຊິ່ງ, ໄວ້ເນື້ອເຊື່ອໃຈເຊິ່ງກັນ ແລະ ກັນ, ແລະ ຄວາມຜ່ອງໃສຂອງສາຍພົວພັນທີ່ຫາໄດ້ຍາກ ລະຫວ່າງ ສປປ.ລາວ ແລະ ສສ.ຫວຽດນາມ.

ບັນດາໜັງສືພິມ ໄດ້ສຸມໃສ່ພັນລະນາບັນດາເຫດການ ແລະ ການເຄື່ອນໄຫວຕ່າງໆຂອງ ທ່ານເລຂາທິການໃຫຍ່, ປະທານປະເທດລາວ ໃນການຢ້ຽມຢາມສັນຖະວະໄມຕີຢ່າງເປັນທາງການຢູ່ຫວຽດນາມຄັ້ງນີ້. ຕາມບັນດາໜັງສືພິມຂອງລາວແລ້ວ, ເພື່ອສືບຕໍ່ຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ, ທ່ານເລຂາທິການໃຫຍ່ ທອງລຸນ ສີສຸລິດ ຍັງໄດ້ມີຫຼາຍຂໍ້ສະເໜີຕໍ່ຜູ້ນຳຫວຽດນາມໃນການພົບປະຄັ້ງຕ່າງໆ.