 |
ພາບປະກອບ
ໜັງສືພິມ DW ຂອງເຢຍລະມັນ ໃຫ້ຂໍ້ສັງເກດວ່າ: “ປະຊາຊົນຫວຽດນາມ ພວມປະຕິບັດທຸກສິ່ງທຸກຢ່າງທີ່ສາມາດເປັນໄປໄດ້, ເພາະວ່າເຂົາເຈົ້າເຊື່ອໝັ້ນຕໍ່ລັດຖະບານຂອງຕົນໃນວິກິດການນີ້ ແລະເຊື່ອໝັ້ນຕໍ່ຜົນສໍາເລັດຂອງການສູ້ຮົບຕ້ານພະຍາດ Covid-19”. ສຳນັກຂ່າວສານເຊັກໂກ ໄດ້ຄັດສະເໜີຄຳປາໄສຂອງທ່ານ Marcel Winter, ປະທານກິຕິມະສັກ ສະມາຄົມມິດຕະພາບ ເຊັກໂກ - ຫວຽດນາມ, ໂດຍໄດ້ຕີລາຄາວ່າ ປະຊາຄົມຊາວຫຽດນາມ ແມ່ນປະຊາຄົມຊາວຕ່າງປະເທດໜຶ່ງດຽວຢູ່ ເຊັກໂກ ທີ່ໃຫ້ການໜູນຊ່ວຍໂຮງໝໍ, ກຳລັງຕ່າງໆ ແລະ ປະຊາຊົນເຊັກໂກ ນັບທັງດ້ານວັດຖຸຸ ແລະ ການເງິນ ໃນບັ້ນປ້ອງກັນ ແລະສະກັດກັ້ນໂລກລະບາດນີ້. ສ່ວນເວັບໄຊ parliamenlisty.cz ກໍໄດ້ລົງບົດຂຽນຍ້ອງຍໍຊົມເຊີຍຄວາມສາມັກຄີຂອງປະຊາຄົມຊາວຫວຽດນາມຢູ່ເຊັກໂກ ທີ່ມີຕໍ່ປະຊາຊົນປະເທດປະຈຳຖິ່ນ.
 |
ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເປັນປະທານການປະຊຸມອອນລາຍຂອງຄະນະປະຈໍາລັດຖະບານ ກັບ 5 ນະຄອນໃຫຍ່. (ພາບ: VGP)
ຕອນເຊົ້າວັນທີ 29 ມີນາ, ຢູ່ຮ່າໂນ້ຍ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ເປັນປະທານການປະຊຸມອອນລາຍຂອງຄະນະປະຈໍາລັດຖະບານ ກັບ 5 ນະຄອນໃຫຍ່ ນັ້ນແມ່ນ ຮ່າໂນ້ຍ, ນະຄອນໂຮ່ຈີມິນ, ດ່າໜັງ, ເກີ່ນເທີ ແລະ ຫາຍຟ່ອງ. ກ່າວຄໍາເຫັນໄຂການປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ຊີ້ແຈ້ງວ່າ, 5 ນະຄອນດັ່ງກ່າວ ລ້ວນແຕ່ແມ່ນບັນດາຕົວເມືອງໃຫຍ່, ມີປະຊາກອນຫຼາຍ ແລະ ມີການພົວພັນແລກປ່ຽນເຊິ່ງກັນແລະກັນຫຼາຍ. ສະນັ້ນ, ມີຄວາມສ່ຽງຕິດເຊື້ອສູງທີ່ສຸດ ແລະ ເວລາທີ່ດີທີ່ສຸດເພື່ອສະກັດກັ້ນການລະເບີດຂອງໂລກລະບາດຍັງເຫຼືອ 2 ອາທິດ, ທ່ານນາຍົກລັດຖະມົນຕີສະເໜີທ້ອງຖິ່ນຕ່າງໆ ຈົ່ງປະກອບຄໍາເຫັນໃຫ້ແກ່ລັດຖະບານ, ຄະນະຊີ້ນໍາແຫ່ງຊາດ ກ່ຽວກັບບັນດາມາດຕະການປ້ອງກັນ ແລະ ສະກັດກັ້ນໂລກລະບາດ ເພື່ອແນໃສ່ແກ້ໄຂບັນຫາດັ່ງກ່າວໄດ້ຢ່າງແທດເໝາະກັບສະພາບການຕົວຈິງກວ່າ. ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ຕີລາຄາສູງຂະແໜງສາທາລະນະສຸກ, ບັນດາທ້ອງຖິ່ນ ທີ່ໄດ້ສຸມໃສ່ການປິ່ນປົວໃຫ້ແກ່ຄົນເຈັບ, ໂດຍສະເພາະແມ່ນບັນດາກໍລະນີເຈັບໜັກ ແລະ ປັດຈຸບັນຍັງບໍ່ທັນມີຜູ້ເສຍຊີວິດຍ້ອນໂລກລະບາດດັ່ງກ່າວ.
ຢູ່ແຂວງອຽນບ໊າຍ, ທາງແຂວງໄດ້ແຕ່ງຕັ້ງ 7 ຄະນະ ລົງໄປກວດກາວຽກງານປ້ອງກັນ ແລະ ສະກັດກ້ັນໂລກລະບາດໂຄວິດ - 19 ຢູ່ເມືອງ, ນະຄອນແຫ່ງຕ່າງໆໃນທົ່ວບໍລິເວນແຂວງ, ສ້າງແຜນການຈັດຕັ້ງການຝຶກຊ້ອມແຍກຕົວຢູ່ເຂດຊຸມຊົນ; ວຽກງານຄຸມຄ້ອງບໍລິຫານ, ກວດຄົນເຂົ້າບໍລິເວນ ແລະ ຜັນຂະຫຍາຍການສ້າງສໍາເນົາເອກະສານສາທາລະນະສຸກ; ຈັດຕັ້ງການເຮັດອະນາໄມສີດຢາຂ້າເຊື້ອ... ສ່ວນຢູ່ແຂວງກວ໋າງນາມ ໄດ້ຕົກລົງຢຸດຕິທຸກການເຄື່ອນໄຫວທີ່ບໍ່ຈໍາເປັນໃນບໍລິເວນແຂວງ ແລະ ທຸກການເຄື່ອນໄຫວທີ່ເຕົ້າໂຮມກັນຫຼາຍຄົນໄວ້ໂດຍຊົ່ວຄາວ. ນອກຈາກນັ້ນ, ທ່ານ ເລຈີ໊ແທັງ ປະທານຄະນະກໍາມະການປະຊາຊົນ ແຂວງກໍໄດ້ປະກາດໃຊ້ຈົດໝາຍທາງການ ວ່າດ້ວຍການສັ່ງປິດປະຕູດ່ານຊາຍແດນທັງໝົດໃນເສັ້ນຊາຍແດນ ຫວຽດນາມ - ລາວ ໂດຍຊົ່ວຄາວ ນັບແຕ່ວັນທີ 28 ມີນາ ຫາວັນທີ 20 ເມສາ.
（ໄຊພອນ）
