ການເຕີບໂຕແບບໃໝ່ຕ້ອງອີງໃສ່ເຕັກໂນໂລຊີ ແລະ ນະວັດຕະກຳ

ສາດສະດາຈານ, ປອ. ໂງຖັງເລີ້ຍ, ອາຈານອາວຸໂສ, ມະຫາວິທະຍາໄລເສດຖະກິດປະຊາຊົນໃນປະເທດ

ເມື່ອຫວນຄືນເບິ່ງ 40 ປີແຫ່ງການປ່ຽນແປງໃໝ່, ຕາມທ່ານສາດສະດາຈານ, ປອ. ແລ້ວ, ຜົນສຳເລັດພື້ນຖານຂອງເສດຖະກິດຫວຽດນາມມີຫຍັງແດ່ ແລະ ຜົນສຳເລັດໃດມີຄວາມໝາຍເປັນພິເສດຕໍ່ເສັ້ນທາງການພັດທະນາໃນໄລຍະຕໍ່ໄປ?

ສາດສະດາຈານ, ປອ. ໂງຖັງເລີ້ຍ: ຕາມການຄົ້ນຄວ້າຂອງຂ້າພະເຈົ້າ, ສາມາດກຳນົດໄດ້ວ່າ ມີສາມຜົນສຳເລັດໃຫຍ່ທີ່ສຸດພາຍຫຼັງ 40 ປີແຫ່ງການປ່ຽນແປງໃໝ່.

ປະການທີໜຶ່ງ, ຫວຽດນາມໄດ້ກາຍເປັນໜຶ່ງໃນບັນດາປະເທດທີ່ມີອັດຕາການເຕີບໂຕ GDP ສູງໃນໂລກ. ໂດຍສະເລ່ຍໃນໄລຍະ 40 ປີ, GDP ເພີ່ມຂຶ້ນ 6,4%/ປີ, ສູງເປັນສອງເທົ່າຂອງອັດຕາການເຕີບໂຕສະເລ່ຍຂອງໂລກ ແລະ ສູງກວ່າຫຼາຍເມື່ອທຽບກັບບັນດາປະເທດໃກ້ຄຽງ.

ປະການທີສອງ, ຈາກປະເທດທີ່ມີລາຍຮັບສະເລ່ຍຕໍ່ຫົວຄົນຕ່ຳ, ຫວຽດນາມໄດ້ກາຍເປັນປະເທດທີ່ມີລະດັບລາຍຮັບປານກາງສູງ ແລະ ພວມມຸ່ງໄປສູ່ເສດຖະກິດທີ່ມີລາຍຮັບສູງ.

ປະການທີສາມ, ບັນດາການປ່ຽນແປງໃນທາງບວກດ້ານຄວາມກ້າວໜ້າທາງສັງຄົມ ແລະ ການພັດທະນາມະນຸດ, ໂດຍສະເພາະການພັດທະນາມະນຸດ ແລະ ການຮັບປະກັນຄວາມເປັນທຳທາງສັງຄົມໃນການແຈກຢາຍລາຍຮັບ, ແມ່ນຂີດໝາຍໜຶ່ງ ແລະ ກໍແມ່ນພື້ນຖານສຳຄັນເພື່ອໃຫ້ຫວຽດນາມຫັນໄປສູ່ຮູບແບບການພັດທະນາໃໝ່.

ຫວຽດນາມພວມກ້າວເຂົ້າສູ່ກຸ່ມປະເທດທີ່ມີລາຍຮັບປານກາງສູງ ແລະ ວາງເປົ້າໝາຍກາຍເປັນປະເທດພັດທະນາ, ມີລາຍຮັບສູງໃນປີ 2045. ຕາມທ່ານສາດສະດາຈານ, ປອ. ແລ້ວ, ຈຳເປັນຕ້ອງມີການປ່ຽນແປງໃດແດ່ ເພື່ອຫັນເປົ້າໝາຍນີ້ໃຫ້ເປັນຈິງ ແລະ ຫຼີກລ່ຽງກັບດັກລາຍຮັບປານກາງ?

ສາດສະດາຈານ, ປອ. ໂງຖັງເລີ້ຍ: ຕາມທັດສະນະຂອງຂ້າພະເຈົ້າ, ເຖິງແມ່ນວ່າຫວຽດນາມບັນລຸອັດຕາການເຕີບໂຕ GDP ສູງ, ແຕ່ລະດັບການເຕີບໂຕດັ່ງກ່າວຍັງບໍ່ພຽງພໍທີ່ຈະສ້າງແຮງຊຸກຍູ້ຢ່າງແຂງແຮງຕໍ່ບັນດາດ້ານຂອງຄວາມກ້າວໜ້າ ແລະ ຄວາມເປັນທຳທາງສັງຄົມ.

ດັ່ງນັ້ນ, ຫວຽດນາມຍັງຕ້ອງສືບຕໍ່ມຸ່ງໝັ້ນເປົ້າໝາຍການເຕີບໂຕຢ່າງໄວວາ. ແຕ່ການເຕີບໂຕໄວບໍ່ໝາຍເຖິງການເຕີບໂຕໂດຍບໍ່ຄຳນຶງເຖິງຕົ້ນທຶນ, ຫາກຕ້ອງອີງໃສ່ບັນດາແຮງຂັບເຄື່ອນໃໝ່ ລວມມີ ເຕັກໂນໂລຊີ, ນະວັດຕະກຳ ແລະ ການຫັນເປັນດິຈິຕອນ.

ເພື່ອຫຼຸດຜ່ອນການເພິ່ງພາຊັບພະຍາກອນ ແລະ ອີງໃສ່ວິທະຍາສາດ, ເຕັກໂນໂລຊີ, ນະວັດຕະກຳຫຼາຍຂຶ້ນ ເພື່ອບັນລຸເປົ້າໝາຍການເຕີບໂຕສູງ, ຫວຽດນາມຄວນສຸມໃສ່ບັນຫາໃດແດ່?

ສາດສະດາຈານ, ປອ. ໂງຖັງເລີ້ຍ: ຕາມທັດສະນະຂອງຂ້າພະເຈົ້າ, ມີສີ່ບັນຫາທີ່ຈຳເປັນຕ້ອງປະຕິບັດ.

ປະການທີໜຶ່ງ, ຈຳເປັນຕ້ອງເລັ່ງຜົນກະທົບຂອງຜະລິດຕະພາບປັດໄຈລວມ (TFP), ໂດຍສະເພາະຍົກສູງອັດຕາປະກອບສ່ວນຂອງ TFP ເຂົ້າໃນການເຕີບໂຕ GDP. ໃນໄລຍະຜ່ານມາ, ອັດຕາການເຕີບໂຕຂອງ TFP ຍັງຕ່ຳ, ພຽງແຕ່ປະມານໜຶ່ງສ່ວນສາມຂອງອັດຕາການເຕີບໂຕສະເລ່ຍ. ຖ້າສາມາດເລັ່ງອັດຕາການເຕີບໂຕຂອງປັດໄຈຜະລິດຕະພາບລວມ, ອັດຕາການເຕີບໂຕໂດຍລວມຂອງເສດຖະກິດກໍຈະສູງຂຶ້ນ.

ປະການທີສອງ, ຈຳເປັນຕ້ອງປ່ຽນທັດສະນະກ່ຽວກັບການດຶງດູດ FDI. ໃນໄລຍະຜ່ານມາ, ການເຕີບໂຕຂອງເສດຖະກິດຫວຽດນາມເພິ່ງພາ FDI ຂ້ອນຂ້າງຫຼາຍ, ໃນຂະນະທີ່ຄຸນນະພາບຂອງກະແສທຶນນີ້ຍັງບໍ່ສູງເທົ່າທີ່ຄວນ.

ຕາມນັ້ນ, ຈຳເປັນຕ້ອງຫັນຈາກແນວຄິດສົ່ງເສີມການດຶງດູດການລົງທຶນ FDI ໄປສູ່ການສົ່ງເສີມການລົງທຶນຢູ່ກັບທີ່ສຳລັບບັນດາວິສາຫະກິດ FDI. ແທນທີ່ຈະເນັ້ນໜັກເກີນໄປໃສ່ດ້ານປະລິມານ, ຫວຽດນາມຕ້ອງຄັດເລືອກບັນດານັກລົງທຶນຍຸດທະສາດ, ຮັກສາພວກເຂົາໄວ້ ແລະ ສ້າງເງື່ອນໄຂໃຫ້ສືບຕໍ່ລົງທຶນຢູ່ຫວຽດນາມ.

ບົນພື້ນຖານນັ້ນ, ບັນດາວິສາຫະກິດ FDI ສາມາດຖ່າຍທອດເຕັກໂນໂລຊີໃຫ້ຫວຽດນາມ ແລະ ເພີ່ມທະວີການເຊື່ອມໂຍງກັບວິສາຫະກິດພາຍໃນປະເທດ ເພື່ອຮ່ວມກັນພັດທະນາ.

ປະການທີສາມ, ສຳລັບພາກເອກະຊົນ, ຈຳເປັນຕ້ອງເພີ່ມທະວີການເຊື່ອມໂຍງລະຫວ່າງບັນດາພາກສ່ວນທີ່ປະກອບເປັນພາກວິສາຫະກິດເອກະຊົນ. ໂດຍສະເພາະ, ບັນດາວິສາຫະກິດໃຫຍ່ຕ້ອງກາຍເປັນຫົວຈັກນຳພາ, ມີຄວາມສາມາດດຶງດູດບັນດາວິສາຫະກິດຂະໜາດກາງ, ຂະໜາດນ້ອຍ, ໂດຍສະເພາະວິສາຫະກິດຂະໜາດນ້ອຍ ແລະ ຈຸນລະວິສາຫະກິດ ໃຫ້ເຂົ້າຮ່ວມ ແລະ ພັດທະນາໄປພ້ອມກັນ.

ສຸດທ້າຍ, ຈຳເປັນຕ້ອງແບ່ງຂອບເຂດບົດບາດໃຫ້ຈະແຈ້ງລະຫວ່າງສາມພາກສ່ວນເສດຖະກິດ ຄື ພາກລັດ, ພາກເອກະຊົນ ແລະ FDI. ໃນນັ້ນ, ພາກລັດຕ້ອງຮັກສາບົດບາດນຳຢ່າງແທ້ຈິງ; ພາກເອກະຊົນຕ້ອງເປັນແຮງຂັບເຄື່ອນທີ່ສຳຄັນທີ່ສຸດຢ່າງແທ້ຈິງ; ສ່ວນພາກ FDI ແມ່ນແຫຼ່ງເສີມທີ່ສຳຄັນສຳລັບຫວຽດນາມ.

ຂໍຂອບໃຈທ່ານ!

ມອບໂອກາດໃຫ້ແມ່ຍິງກາຍເປັນແຮງຂັບເຄື່ອນແຫ່ງການເຕີບໂຕສີຂຽວ ຍສໝ - ພາຍໃດສະພາບການທີ່ ປະເທດ ຫວຽດນາມ ພວມຍູ້ແຮງການຫັນປ່ຽນເປັນດິຈິຕອນ, ການຫັນປ່ຽນເປັນສີຂຽວ ແລະ ການພັດທະນາເສດຖະກິດເອກະຊົນ, ແມ່ຍິງນັບມື້ນັບໄດ້ຢືນຢັນບົດບາດເປັນກຳລັງອັນສຳຄັນ. ເຖິງຢ່າງໃດກໍຕາມ, ເພື່ອເສີມຂະຫຍາຍທ່າແຮງບົ່ມຊ້ອນທັງໝົດທີ່ມີ, ຈຳເປັນຕ້ອງໄດ້ແກ້ໄຂບັນດາສິ່ງກີດຂວາງ ເພື່ອໃຫ້ແມ່ຍິງກາຍເປັນແຮງຂັບເຄື່ອນແຫ່ງການເຕີບໂຕສີຂຽວ ແລະ ການພັດທະນາທີ່ຍືນຍົງຢ່າງແທ້ຈິງ.

ຜັງເມືອງລວມນະຄອນຫຼວງ ຮ່າໂນ້ຍ ວິໄສທັດ 100 ປີ: ສຸມໃສ່ສ້າງຕັ້ງຮາກຖານການພັດທະນາຄັ້ງໃໝ່, ສ້າງຕັ້ງກຳລັງຂັບເຄື່ອນການເຕີບໂຕໃໝ່ ຍສໝ - ຕອນເຊົ້າ (ວັນທີ 29 ມິຖຸນາ), ຢູ່ທີ່ສູນກອງປະຊຸມແຫ່ງຊາດ, ຄະນະກຳມະການປະຊາຊົນນະຄອນ ຮ່າໂນ້ຍ ໄດ້ຈັດຕັ້ງກອງປະຊຸມປະກາດຜັງເມືອງລວມນະຄອນຫຼວງ ຮ່າໂນ້ຍ ວິໄສທັດ 100 ປີ ແລະ ສົ່ງເສີມການລົງທຶນ ປະຈຳປີ 2026.