ຫວຽດນາມຊອກຫາທ່າແຮງສະເພາະຂອງຕົນໃນແຜນທີ່ AI ທົ່ວໂລກ

ຕາມບົດລາຍງານ Stanford AI Index 2026 ທີ່ສະຖາບັນປັນຍາປະດິດທີ່ເນັ້ນມະນຸດເປັນໃຈກາງ ຂອງມະຫາວິທະຍາໄລ Stanford ເຜີຍແຜ່ໃນເດືອນ 4, ການລົງທຶນເອກະຊົນທົ່ວໂລກໃສ່ AI ໃນປີ 2025 ບັນລຸປະມານ 581,7 ຕື້ USD, ເພີ່ມຂຶ້ນ 130%. ໃນນັ້ນ, ສະຫະລັດອາເມລິການຳໜ້າດ້ວຍ 285,9 ຕື້ USD. ຈີນບັນລຸ 12,4 ຕື້ USD ຖ້ານັບສະເພາະການລົງທຶນເອກະຊົນ, ຍັງບໍ່ລວມແຫຼ່ງກຳລັງຈາກບັນດາກອງທຶນຂອງລັດຢ່າງຄົບຖ້ວນ.

ຂະໜາດການລົງທຶນນີ້ສະແດງໃຫ້ເຫັນວ່າ AI ບໍ່ໄດ້ຈຳກັດຢູ່ໃນຂອບເຂດຂອງຂະແໜງເຕັກໂນໂລຊີໜຶ່ງອີກຕໍ່ໄປ ແຕ່ໄດ້ກາຍເປັນປັດໄຈສຳຄັນຕໍ່ຄວາມສາມາດແຂ່ງຂັນຂອງຊາດ.

ການແຂ່ງຂັນຢູ່ເບື້ອງຫຼັງບັນດາຮູບແບບ AI

ປັດຈຸບັນ, ສະຫະລັດອາເມລິກາຍັງຄົງຮັກສາທ່າໄດ້ປຽບດ້ານແຫຼ່ງທຶນ, ບັນດາກຸ່ມບໍລິສັດເຕັກໂນໂລຊີ, ລະບົບນິເວດທຸລະກິດເລີ່ມຕົ້ນ ແລະ ຄວາມສາມາດດຶງດູດຜູ້ມີຄວາມສາມາດສູງ. ໃນຂະນະດຽວກັນ, ຈີນເລືອກຜະສົມຜະສານແຫຼ່ງກຳລັງຂອງລັດກັບການຄົ້ນຄວ້າ, ວິສາຫະກິດ ແລະ ການນຳໃຊ້ AI ໃນຂະໜາດໃຫຍ່.

ຊ່ອງຫວ່າງດ້ານເຕັກໂນໂລຊີລະຫວ່າງສອງປະເທດ ທີ່ໜ້າສັງເກດ ພວມຫຍໍ້ເຂົ້າຢ່າງວ່ອງໄວ. Stanford AI Index 2026 ບັນທຶກວ່າ ບັນດາຮູບແບບ AI ຊັ້ນນຳຂອງສະຫະລັດອາເມລິກາ ແລະ ຈີນ ສັບປ່ຽນຕຳແໜ່ງນຳໜ້າຢ່າງຕໍ່ເນື່ອງນັບແຕ່ຕົ້ນປີ 2025.

ການປ່ຽນແປງນີ້ສະແດງໃຫ້ເຫັນວ່າ ການແຂ່ງຂັນດ້ານ AI ບໍ່ແມ່ນພຽງແຕ່ເລື່ອງທີ່ຝ່າຍໜຶ່ງຊະນະ ແລະ ອີກຝ່າຍໜຶ່ງເສຍໄຊ, ແຕ່ຈະເປັນຂະບວນການແຂ່ງຂັນໄລຍະຍາວດ້ານເຕັກໂນໂລຊີ, ແຫຼ່ງກຳລັງ ກໍຄືຄວາມສາມາດໃນການນຳ AI ເຂົ້າສູ່ການປະຕິບັດຕົວຈິງ.

ຜົນກະທົບຈາກການພັດທະນາຂອງຕະຫຼາດ AI ພວມຂະຫຍາຍອອກນອກຂອບເຂດຂອງຂະແໜງເຕັກໂນໂລຊີ.

ຢູ່ເບື້ອງຫຼັງການແຂ່ງຂັນດ້ານຮູບແບບ AI ຍັງແມ່ນການແຂ່ງຂັນດ້ານຊິບ, ຄວາມສາມາດໃນການຄຳນວນ, ສູນຂໍ້ມູນ, ພະລັງງານໄຟຟ້າ ແລະ ຄວາມສາມາດໃນການຄວບຄຸມບັນດາເຕັກໂນໂລຊີຫຼັກ.

ດັ່ງນັ້ນ, ການພັດທະນາຂອງ AI ສ້າງຜົນກະທົບທີ່ກ້າວໄກເກີນຂອບເຂດຂະແໜງເຕັກໂນໂລຊີ. ຄວາມຕ້ອງການສູນຂໍ້ມູນທີ່ເພີ່ມຂຶ້ນ ໄດ້ດຶງໃຫ້ຄວາມຕ້ອງການດ້ານໄຟຟ້າ, ຊິບ, ເຄືອຂ່າຍ ແລະ ໂຄງລ່າງເພີ່ມຂຶ້ນຕາມ. ບັນດານັກລົງທຶນບໍ່ພຽງແຕ່ຊອກຫາວິສາຫະກິດທີ່ພັດທະນາຮູບແບບ AI ເທົ່ານັ້ນ ແຕ່ຍັງເອົາໃຈໃສ່ບັນດາຫົວໜ່ວຍທີ່ສະໜອງໂຄງລ່າງໃຫ້ແກ່ລະບົບນິເວດທັງໝົດ.

ຖ້າເບິ່ງ AI ພຽງແຕ່ເປັນຊອບແວ ຫຼື ແອັບພລິເຄຊັນໃໝ່, ຫວຽດນາມຈະຍາກທີ່ຈະຮັບຮູ້ຂະໜາດຂອງການແຂ່ງຂັນນີ້ໄດ້ຢ່າງຄົບຖ້ວນ.

ບໍ່ຈຳເປັນຕ້ອງແຂ່ງຂັນສ້າງ “ຍັກໃຫຍ່” ໜຶ່ງຂຶ້ນມາ

ບົດຮຽນໜຶ່ງທີ່ຫວຽດນາມຕ້ອງຖອດຖອນຈາກບັນດາປະເທດ ແມ່ນບໍ່ຄວນເອົາຄວາມສາມາດດ້ານ AI ຂອງປະເທດໄປຜູກຕິດກັບການຕ້ອງສ້າງຮູບແບບຂະໜາດໃຫຍ່ທຽບເທົ່າບັນດາບໍລິສັດຊັ້ນນຳຂອງໂລກ.

ເສັ້ນທາງນີ້ຕ້ອງການແຫຼ່ງທຶນຈຳນວນຫຼາຍ, ໂຄງລ່າງດ້ານການຄຳນວນສະເພາະ ແລະ ຄວາມສາມາດດຶງດູດຜູ້ມີຄວາມສາມາດສູງຈາກທົ່ວໂລກ. ບໍ່ແມ່ນທຸກປະເທດຈະຕ້ອງການ ຫຼື ມີເງື່ອນໄຂພຽງພໍທີ່ຈະເລືອກເສັ້ນທາງນັ້ນ.

ບັນຫາທີ່ສຳຄັນກວ່າແມ່ນການກຳນົດວ່າ ຫວຽດນາມສາມາດສ້າງຄຸນຄ່າໄດ້ໃນຂົງເຂດໃດແດ່. ສິ່ງນັ້ນອາດເປັນການນຳໃຊ້ AI ໃນການຜະລິດ, ກະສິກຳ, ໂລຈິສຕິກ, ການເງິນ, ສາທາລະນະສຸກ, ການສຶກສາ; ບັນດາວິທີແກ້ໄຂສຳລັບວິສາຫະກິດສົ່ງອອກ; ຫຼື ຜະລິດຕະພັນປະມວນຜົນພາສາຫວຽດນາມ, ພາສາຂອງບັນດາເຜົ່າ ແລະ ບັນຫາສະເພາະຂອງອາຊີຕາເວັນອອກສ່ຽງໃຕ້.

ຜະລິດຕະພັນໜຶ່ງທີ່ແກ້ໄຂບັນຫາສະເພາະໄດ້ດີ ແລະ ສາມາດຈຳໜ່າຍຢູ່ຫຼາຍປະເທດ ບາງຄັ້ງສາມາດສ້າງຄຸນຄ່າທາງເສດຖະກິດໄດ້ຫຼາຍກວ່າໂຄງການ AI ທີ່ມີຄວາມທະເຍີທະຍານສູງ ແຕ່ບໍ່ສາມາດຊອກຫາຕະຫຼາດໄດ້.

ດັ່ງນັ້ນ, ເມື່ອເຂົ້າຮ່ວມຕະຫຼາດ AI, ຫວຽດນາມບໍ່ຈຳເປັນຕ້ອງກາຍເປັນປະເທດທີ່ສ້າງເຕັກໂນໂລຊີໃຫຍ່ທີ່ສຸດ, ແຕ່ຕ້ອງກຳນົດໃຫ້ໄດ້ວ່າຂົງເຂດໃດທີ່ຕົນສາມາດເຮັດໄດ້ດີ ແລະ ຕະຫຼາດໂລກພວມມີຄວາມຕ້ອງການ.

ຊອກຫາຊ່ອງຫວ່າງຈາກບັນດາທ່າໄດ້ປຽບທີ່ມີຢູ່ແລ້ວ

ຫວຽດນາມບໍ່ໄດ້ເລີ່ມຕົ້ນຈາກເລກ 0. ຍຸດທະສາດແຫ່ງຊາດວ່າດ້ວຍການຄົ້ນຄວ້າ, ພັດທະນາ ແລະ ນຳໃຊ້ AI ຮອດປີ 2030 ໄດ້ວາງເປົ້າໝາຍໃຫ້ກາຍເປັນສູນກາງການປ່ຽນແປງໃໝ່ສ້າງສັນ ແລະ ພັດທະນາບັນດາວິທີແກ້ໄຂ AI ໃນພາກພື້ນ ແລະ ສາກົນ.

ບັນຫາໃນປັດຈຸບັນບໍ່ແມ່ນຢູ່ທີ່ວ່າມີຍຸດທະສາດຫຼືບໍ່, ແຕ່ແມ່ນການຫັນຍຸດທະສາດໃຫ້ກາຍເປັນຄວາມສາມາດ ແລະ ບັນດາຜະລິດຕະພັນທີ່ມີຢູ່ໃນຕະຫຼາດ.

ຫວຽດນາມມີທ່າໄດ້ປຽບດ້ານຊັບພະຍາກອນມະນຸດດ້ານເຕັກໂນໂລຊີ, ການພັດທະນາຊອບແວ, ເສດຖະກິດການຜະລິດ ແລະ ຕະຫຼາດພາຍໃນ, ພ້ອມທັງຕັ້ງຢູ່ໃນພາກພື້ນອາຊີຕາເວັນອອກສ່ຽງໃຕ້ທີ່ມີຄວາມຕ້ອງການ AI ສູງ.

ໃນເງື່ອນໄຂທີ່ບໍ່ສາມາດແຂ່ງຂັນໂດຍກົງກັບສະຫະລັດອາເມລິກາດ້ານແຫຼ່ງທຶນ ຫຼື ຈີນດ້ານຂະໜາດ, ຫວຽດນາມຕ້ອງເລືອກຊ່ອງຫວ່າງທີ່ເໝາະສົມ ເຊັ່ນ: AI ໃນການຜະລິດ, ໂລຈິສຕິກ, ກະສິກຳ, ການທ່ອງທ່ຽວ, ການບໍລິການລູກຄ້າຫຼາຍພາສາ ແລະ ການສະໜັບສະໜູນວິສາຫະກິດຂະໜາດກາງ ແລະ ນ້ອຍ.

ເປົ້າໝາຍສຳຄັນແມ່ນສ້າງຜະລິດຕະພັນທີ່ສາມາດຈຳໜ່າຍອອກຕ່າງປະເທດ. ຖ້າ AI ຖືກຈຳກັດຢູ່ພຽງແຕ່ຕະຫຼາດພາຍໃນ, ຫວຽດນາມກໍຍັງບໍ່ທັນໄດ້ເຂົ້າຮ່ວມຕະຫຼາດ AI ທົ່ວໂລກຢ່າງແທ້ຈິງ.

ວັນທີ 18/8 ຢູ່ຮ່າໂນ້ຍ, ຊຸດຝຶກອົບຮົມ “ປັນຍາປະດິດ: ຈາກຂໍ້ມູນເຖິງການຕັດສິນໃຈ” ໄດ້ຮັບການປະສານຈັດຕັ້ງໂດຍກົມການຕ່າງປະເທດ ແລະ ການທູດວັດທະນະທຳ, ກົມຈັດຕັ້ງພະນັກງານ (ກະຊວງການຕ່າງປະເທດ) ຮ່ວມກັບມູນນິທິອາຊີ.

ນຳໃຊ້ຄຸນຄ່າຈາກຂໍ້ມູນ

ນອກຈາກຊິບ ແລະ ສູນຂໍ້ມູນແລ້ວ, ຊັບສິນອີກຢ່າງໜຶ່ງທີ່ມີບົດບາດສຳຄັນບໍ່ໜ້ອຍໄປກວ່າກັນໃນການແຂ່ງຂັນດ້ານ AI ກໍຄືຂໍ້ມູນ.

ຫວຽດນາມມີຂໍ້ມູນໃນຫຼາຍຂົງເຂດ ເຊັ່ນ: ການຜະລິດ, ກະສິກຳ, ການຄົມມະນາຄົມ, ຕົວເມືອງ, ການຄ້າ, ສາທາລະນະສຸກ ແລະ ການສຶກສາ. ເມື່ອໄດ້ຮັບການສ້າງໃຫ້ເປັນມາດຕະຖານ, ທຳຄວາມສະອາດ, ເຊື່ອມໂຍງ ແລະ ຄຸ້ມຄອງຢ່າງຖືກຕ້ອງ, ແຫຼ່ງຂໍ້ມູນນີ້ສາມາດກາຍເປັນວັດຖຸດິບສຳຄັນສຳລັບ AI.

ແນວໃດກໍຕາມ, ຄຸນຄ່າຂອງຂໍ້ມູນຕ້ອງຄຽງຄູ່ກັບກົນໄກການນຳໃຊ້ທີ່ຈະແຈ້ງ, ຮັບປະກັນສິດຄວາມເປັນສ່ວນຕົວ ແລະ ຄວາມປອດໄພດ້ານຂໍ້ມູນ. ນີ້ກໍເປັນບັນຫາທີ່ຫວຽດນາມຕ້ອງລະມັດລະວັງເປັນພິເສດ.

ຖ້າຂໍ້ມູນທີ່ມີຄຸນຄ່າທີ່ສຸດຖືກນຳຂຶ້ນສູ່ບັນດາແພລດຟອມພາຍນອກ ໃນຂະນະທີ່ຫວຽດນາມບໍ່ສາມາດຄວບຄຸມວິທີການຈັດເກັບ, ນຳມາໃຊ້ປະໂຫຍດ ແລະ ນຳໃຊ້ຂໍ້ມູນເຫຼົ່ານັ້ນ, ທ່າໄດ້ປຽບອາດປ່ຽນເປັນການເພິ່ງພາອາໄສຢ່າງວ່ອງໄວ.

ນຳ AI ເຂົ້າສູ່ເສດຖະກິດ ແລະ ຕະຫຼາດສາກົນ

ຈຸດສຸມຄວນປ່ຽນຈາກຄຳຖາມ “ຈະພັດທະນາ AI ແນວໃດ” ໄປສູ່ “ຈະນຳ AI ເຂົ້າສູ່ເສດຖະກິດ ແລະ ຕະຫຼາດສາກົນແນວໃດ”.

ກ່ອນອື່ນໝົດ, ຫວຽດນາມຕ້ອງເລືອກບາງຂົງເຂດທີ່ມີທ່າໄດ້ປຽບ ແລະ ມີຄວາມຕ້ອງການຕົວຈິງ ເພື່ອສຸມໃສ່ຊັບພະຍາກອນ, ແທນທີ່ແຕ່ລະທ້ອງຖິ່ນ, ແຕ່ລະຂະແໜງຈະມີໂຄງການ AI ຂອງຕົນເອງ ແຕ່ຂາດຄວາມສາມາດໃນການເຊື່ອມໂຍງ ແລະ ຂະຫຍາຍ.

ຕໍ່ມາແມ່ນການກໍ່ສ້າງໂຄງລ່າງດ້ານການຄຳນວນ ແລະ ຂໍ້ມູນໃນທິດທາງນຳໃຊ້ຮ່ວມກັນ, ຈຳກັດການລົງທຶນແບບກະແຈກກະຈາຍ. ສູນຂໍ້ມູນ, ພະລັງງານໄຟຟ້າ ແລະ ໂຄງລ່າງດິຈິຕອນ ຕ້ອງໄດ້ຄຳນຶງເຖິງໄປພ້ອມກັນ ເພາະການພັດທະນາຂອງ AI ຈະເຮັດໃຫ້ຄວາມຕ້ອງການພະລັງງານນັບມື້ນັບເພີ່ມຂຶ້ນ.

ອີກຂໍ້ຮຽກຮ້ອງໜຶ່ງແມ່ນການສ້າງກົນໄກໃຫ້ວິສາຫະກິດຕັ້ງໂຈດໃຫ້ບັນດາມະຫາວິທະຍາໄລ ແລະ ສະຖາບັນຄົ້ນຄວ້າ. ລັດສາມາດສະໜັບສະໜູນດ້ານໂຄງລ່າງ, ຂໍ້ມູນ, ກົນໄກທົດລອງ ແລະ ແຫຼ່ງທຶນເບື້ອງຕົ້ນ, ໃນຂະນະທີ່ວິສາຫະກິດຮັບຜິດຊອບນຳຜະລິດຕະພັນອອກສູ່ຕະຫຼາດ.

ການທູດເສດຖະກິດກໍເປັນອີກໜຶ່ງຂໍ້ຕໍ່ທີ່ຕ້ອງຄຳນຶງເຖິງ. ບັນດາອົງການຕາງໜ້າຂອງຫວຽດນາມຢູ່ຕ່າງປະເທດສາມາດມີບົດບາດເປັນຂົວຕໍ່ໃຫ້ວິສາຫະກິດຊອກຫາຄູ່ຮ່ວມມືດ້ານເຕັກໂນໂລຊີ, ນັກລົງທຶນ, ຊ່ຽວຊານ ແລະ ຕະຫຼາດ. ຖ້າຜັນຂະຫຍາຍໄດ້ດີ, ສາຍພົວພັນສາກົນສາມາດກາຍເປັນແຫຼ່ງກຳລັງໂດຍກົງໃຫ້ແກ່ຂະແໜງ AI.

ຫຼີກລ້ຽງການແຂ່ງຂັນດ້ານຈຳນວນ ແລະ ຂະໜາດການລົງທຶນ

ຄວາມໄວໃນການພັດທະນາຂອງ AI ບໍ່ໄດ້ໝາຍຄວາມວ່າທຸກການລົງທຶນໃນຂົງເຂດນີ້ຈະສ້າງກຳໄລ. ໃນໄລຍະຫຼ້າສຸດ, ຕະຫຼາດສາກົນເລີ່ມປາກົດຄວາມກັງວົນກ່ຽວກັບລະດັບການປະເມີນມູນຄ່າ, ຕົ້ນທຶນການລົງທຶນໂຄງລ່າງ ແລະ ຄວາມສາມາດໃນການຄືນທຶນ.

ສະຖາບັນຈັດອັນດັບຄວາມໜ້າເຊື່ອຖື Fitch Ratings ເຕືອນວ່າ ຄື້ນການລົງທຶນ AI ອາດກາຍເປັນຄວາມສ່ຽງຕໍ່ຕະຫຼາດສິນເຊື່ອ ຖ້າຄວາມຄາດຫວັງດ້ານກຳໄລບໍ່ບັນລຸຕາມທີ່ຄາດໄວ້.

ນີ້ແມ່ນຄຳເຕືອນທີ່ຫວຽດນາມຕ້ອງເອົາໃຈໃສ່ ເພື່ອບໍ່ໃຫ້ AI ກາຍເປັນການແຂ່ງຂັນດ້ານຈຳນວນໂຄງການ, ຈຳນວນເງິນລົງທຶນ ຫຼື ຈຳນວນສູນຂໍ້ມູນ.

ນອກຈາກນັ້ນ ຍັງມີຄວາມສ່ຽງຈາກການເພິ່ງພາເຕັກໂນໂລຊີ. ບັນດາຮູບແບບ AI ທີ່ກ້າວໜ້າທີ່ສຸດໃນປັດຈຸບັນແມ່ນສຸມຢູ່ໃນກຳມືຂອງວິສາຫະກິດ ແລະ ປະເທດຈຳນວນໜ້ອຍ. ໃນອະນາຄົດ, ຄວາມສາມາດໃນການເຂົ້າເຖິງເຕັກໂນໂລຊີເຫຼົ່ານີ້ອາດໄດ້ຮັບຜົນກະທົບຈາກນະໂຍບາຍການສົ່ງອອກ, ການແຂ່ງຂັນດ້ານພູມສາດການເມືອງ ແລະ ບັນດາຂໍ້ຮຽກຮ້ອງດ້ານຄວາມໝັ້ນຄົງ.

ດັ່ງນັ້ນ, ຫວຽດນາມຕ້ອງເປີດກວ້າງເພື່ອຮັບເອົາເຕັກໂນໂລຊີ, ພ້ອມກັນນັ້ນກໍສ້າງຄວາມສາມາດເພິ່ງຕົນເອງໃນບາງຂອດສຳຄັນ ລວມມີ ຂໍ້ມູນ, ຄວາມປອດໄພດ້ານຂໍ້ມູນ, ຄວາມສາມາດໃນການຄຳນວນ, ຊັບພະຍາກອນມະນຸດ ແລະ ຄວາມສາມາດໃນການພັດທະນາ, ເຊື່ອມປະສານບັນດາຮູບແບບ AI.

ການເພິ່ງຕົນເອງບໍ່ໄດ້ໝາຍຄວາມວ່າຕ້ອງເຮັດທຸກຢ່າງແຕ່ເລີ່ມຕົ້ນ, ແຕ່ແມ່ນການບໍ່ປ່ອຍໃຫ້ການຕັດສິນໃຈຈາກພາຍນອກສາມາດເຮັດໃຫ້ລະບົບພາຍໃນປະເທດທັງໝົດຕົກຢູ່ໃນສະພາບຕັ້ງຮັບ.

ຊັບພະຍາກອນມະນຸດຕັດສິນຄວາມສາມາດໃນການເປັນເຈົ້າ AI

ທຸກຍຸດທະສາດ AI ໃນທີ່ສຸດກໍກັບຄືນມາຫາບັນຫາມະນຸດ. ຫວຽດນາມສາມາດຊື້ເຄື່ອງແມ່ຂ່າຍ, ເຊົ່າບໍລິການຄອມພິວຕິງ, ເຂົ້າເຖິງບັນດາຮູບແບບ AI ແລະ ນຳເຂົ້າອຸປະກອນໄດ້, ແຕ່ບໍ່ສາມາດຊື້ຄວາມສາມາດດ້ານການຄົ້ນຄວ້າ, ການປະດິດສ້າງ ແລະ ຄວາມສາມາດໃນການເປັນເຈົ້າເຕັກໂນໂລຊີໄດ້ຢ່າງຍືນຍົງ.

ດັ່ງນັ້ນ, ການຝຶກອົບຮົມຊັບພະຍາກອນມະນຸດດ້ານ AI ຕ້ອງຖືກເບິ່ງໃນຂອບເຂດທີ່ກວ້າງກວ່າການຝຶກອົບຮົມນັກຂຽນໂປຣແກຣມ. ຫວຽດນາມຕ້ອງການນັກຄົ້ນຄວ້າ, ວິສະວະກອນ, ຊ່ຽວຊານດ້ານຂໍ້ມູນ, ຊ່ຽວຊານດ້ານຜະລິດຕະພັນ, ນັກບໍລິຫານ ແລະ ຜູ້ທີ່ເຂົ້າໃຈທັງເຕັກໂນໂລຊີ ແລະ ຕະຫຼາດ.

AI ສາມາດປ່ຽນແປງຫຼາຍອາຊີບການງານ, ແຕ່ປະເທດທີ່ມີກຳລັງແຮງງານຮູ້ຈັກນຳໃຊ້ AI ເພື່ອສ້າງຜະລິດຕະພາບໃໝ່ ຈະມີໂອກາດຫຼາຍກວ່າປະເທດທີ່ພຽງແຕ່ຖື AI ເປັນເຕັກໂນໂລຊີໜຶ່ງທີ່ຊື້ມາເພື່ອນຳໃຊ້.

ການແຂ່ງຂັນດ້ານ AI ຫາກໍເລີ່ມຕົ້ນ. ຫວຽດນາມບໍ່ຈຳເປັນຕ້ອງແລ່ນໃຫ້ໄວທີ່ສຸດ ແລະ ກໍບໍ່ຄວນແລ່ນຕາມທຸກທິດທາງ. ສິ່ງທີ່ຈຳເປັນແມ່ນກຳນົດໃຫ້ຈະແຈ້ງວ່າຕົນເອງພວມມີຫຍັງ, ໂລກຕ້ອງການຫຍັງ ແລະ ຊ່ອງຫວ່າງໃດທີ່ສາມາດຫຍໍ້ເຂົ້າໄດ້ດ້ວຍຄວາມສາມາດພາຍໃນປະເທດເອງ.

ເປົ້າໝາຍສຸດທ້າຍບໍ່ແມ່ນການມີໂຄງການ AI ໃຫ້ຫຼາຍ, ແຕ່ແມ່ນການສ້າງບັນດາວິສາຫະກິດ AI ທີ່ສາມາດສ້າງຜະລິດຕະພັນ, ລາຍຮັບ ແລະ ຄຸນຄ່າໃນຕະຫຼາດສາກົນ. ເມື່ອນັ້ນ AI ຈຶ່ງຈະກາຍເປັນແຮງຂັບເຄື່ອນໃໝ່ຂອງເສດຖະກິດຢ່າງແທ້ຈິງ ແທນທີ່ຈະເປັນພຽງທ່າອ່ຽງເຕັກໂນໂລຊີທີ່ພວມຖືກຕິດຕາມ.

ຊຸກຍູ້ສາຍພົວພັນການຮ່ວມມື ລະຫວ່າງ ກວາງນິງ ແລະ Hokkaido ຍສໝ - ວັນທີ 23 ມິຖຸນາ, ທ່ານເລຂາຄະນະພັກແຂວງ, ຫົວໜ້າຄະນະຜູ້ແທນສະພາແຫ່ງຊາດແຂວງ ກວາງນິງ ກວ່ານມິງເກືອງ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ Takebe Tsutomu, ທີ່ປຶກສາພິເສດພັນທະມິດສະມາຊິກສະພາແຫ່ງຊາດມິດຕະພາບ ຍີ່ປຸ່ນ - ຫວຽດນາມ, ທີ່ປຶກສາພິເສດຂອງມະຫາວິທະຍາໄລ ຮ້າລອງ.

Saint Petersburg ມຸ່ງມາດປາດຖະໜາຢາກຂະຫຍາຍການຮ່ວມມືດ້ານນິຕິກຳ, ການສຶກສາ ແລະ ການແລກປ່ຽນປະຊາຊົນ ກັບ ຫວຽດນາມ ຍສໝ - ວັນທີ 26 ມິຖຸນາ, ພາຍໃນຂອບເຂດການເດີນທາງໄປເຄື່ອນໄຫວວຽກງານເຂົ້າຮ່ວມເວທີປາໄສນິຕິກຳສາກົນ Saint Petersburg ຄັ້ງທີ XIV, ທ່ານ ຫວາງແທັງຕຸ່ງ ລັດຖະມົນຕີກະຊວງຍຸຕິທຳ ໄດ້ເຮັດວຽກຮ່ວມກັບການນຳຄະນະພົວພັນຕ່າງປະເທດ Saint Petersburg ແລະ ຕາງໜ້າອົງການກົດໝາຍຂອງນະຄອນ. ສອງຝ່າຍໄດ້ເຫັນດີເປັນເອກະພາບສືບຕໍ່ຊຸກຍູ້ການຮ່ວມມືອັນແທ້ຈິງລະຫວ່າງ Saint Petersburg ກັບບັນດາທ້ອງຖິ່ນ, ອົງການ, ຈັດຕັ້ງຂອງ ຫວຽດນາມ, ປະກອບສ່ວນເຮັດໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນຣັດເຊຍ ເລິກເຊິ່ງຂຶ້ນຕື່ມ.