ນັກສຶກສາລາວ ທີ່ ສປ ຈີນ ບໍ່ໄດ້ຕິດເຊື້ອ COVID-19

11:57 | 13/03/2020

ປັດຈຸບັນ, ນັກສຶກສາລາວ ຢູ່ປະເທດຕ່າງໆ ແມ່ນຍັງມີຄວາມປອດໄພ ຈາກສະພາບການແຜ່ລະບາດ ຂອງພະ ຍາດອັກເສບປອດ ເຊື້ອຈຸລະໂຣກສາຍພັນໃໝ່ COVID-19, ພ້ອມທັງໄດ້ຮັບການເອົາໃຈ ໃສ່ຕິດຕາມເບິ່ງແຍງ ທາງດ້ານຊີວິດ ການເປັນຢູ່ ຂອງພວກເຂົາຢ່າງໃກ້ຊິດ ຈາກເຈົ້າໜ້າທີ່ສະຖານ ທູດລາວ ທີ່ປະຈໍາຢູ່ປະເທດ ທີ່ເຂົາເຈົ້າໄປ ຮຽນເປັນຢ່າງດີ.

ນັກສຶກສາລາວ ທີ່ ສປ ຈີນ ບໍ່ໄດ້ຕິດເຊື້ອ COVID-19

ນັກສຶກສາລາວຈຳນວນ 43 ຄົນທີ່ ສປ ຈີນ ບໍ່ໄດ້ຕິດເຊື້ອ COVID-19. (ພາບ:pasaxon.org.la)

ທ່ານ ນາງ​ ແສງ​ເດືອນ ຫຼ້າຈັນທະ​ບູນ ລັດຖະມົນຕີ ກະຊວງ​ສຶກສາ​ທິ​ການ ແລະ ກິລາ ກ່າວ​ວ່າ: ພະຍາດ​ອັກເສບ​ປອດ ອັນ​ເນື່ອງ​ມາຈາກ​ ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (COVID-19) ໄດ້​ເລີ່ມ ລະ ບາດ​ເປັນ​ຄັ້ງ​ທໍາ​ອິດ​ຢູ່ເມືອງ​ອູ​ຮັ້ນ ແຂວງ​ຫູ​ເປີຍ ໃນ​ທ້າຍ​ເດືອນ ທັນວາ 2019, ຈາກ​ນັ້ນ​ຈຶ່ງ​ໄດ້ຂະຫຍາຍ​ໄປ​ເມືອງ​ອື່ນ ແຂວງ​ອື່ນ ມົນທົນ​ອື່ນ ແລະ ປະເທດ​ອື່ນ​ຢ່າງ​ໄວວາ, ຮອດ​ປັດຈຸບັນ​ໄດ້​ມີ 102 ປະເທດ ແລະ ເຂດ​ປົກຄອງ ທີ່​ມີ​ກໍລະນີ​ຜູ້​ຕິດເຊື້ອ ລວມ​ທັງ​ຫມົດ 109.873 ຄົນ, ມີ​ຜູ້​ເສຍ​ຊີວິດ 3.825 ຄົນ ແລະ ປິ່ນປົວ​ດີ​ແລ້ວ 62.217 ຄົນ, ເພື່ອ​ຈໍາ​ກັດ​ການ​ແຜ່​ລະບາດ​ຂອງ​ພະຍາດ​ໄປ​ບ່ອນ​ອື່ນ, ທາງ​ການ ສປ ຈີນ ໄດ້​ມີ​ມາດ​ຕະການ​ທີ່ເຂັ້ມ​ງວດ, ສັ່ງ​ປິດ​ເມືອງ​ອູ​ຮັ້ນ ຄົນ​ໃນ​ຫ້າມ​ອອກ, ຄົນ​ນອກ​ຫ້າມ​ເຂົ້າ, ສາມາດ​ເຂົ້າ​ໄດ້​ສະເພາະ​ບຸກ​ຄະລາ​ກອນ​ທາງ​ການ​ແພດ ແລະ ເຈົ້າ​ໜ້າທີ່​ທີ່​ກ່ຽວຂ້ອງ​ເທົ່າ​ນັ້ນ, ດ້ວຍ​ເຫດ​ນີ້​ ຈຶ່ງ​ເຮັດ​ໃຫ້ ນັກ​ສຶກສາ​ລາວ 42 ຄົນ ທີ່​ບໍ່​ໄດ້​ກັບ​ບ້ານ​ໃນ​ໄລຍະ​ປີ​ໃໝ່ ສປ ຈີນ ຍັງ​ຄ້າງ​ຢູ່​ຫໍ​ພັກ​ນັກຮຽນ ແລະ ມີ​ນັກຮຽນ​ອີກ​ໜຶ່ງ​ຄົນ​ທີ່​ໄປ​ຢາມ​ໝູ່​ໃນ​ໄລຍະ​ພັກ​ຮຽນ​ກໍ​ຕິດ​ຄ້າງ​ຢູ່ອູ​ຮັ້ນເຊັ່ນ​ກັນ ລວມ​ທັງ​ໝົດ​ເປັນ 43 ຄົນ, ໃນ​ນັ້ນ 22 ຄົນ​ໄປ​ຈາກ ນະຄອນຫຼວງ​ວຽງ​ຈັນ, 5 ຄົນ​ຈາກ​ແຂວງ​ຫຼວງ​ພະ​ບາງ, 3 ຄົນ​ຈາກ​ແຂວງ​ສະຫວັນ​ນະ​ເຂດ, 3 ຄົນ​ຈາກ ແຂວງ​ຈໍາ​ປາ​ສັກ ແຂວງ​ລະ 3 ຄົນ, ສໍາ​ລັບ​ແຂວງ​ຫຼວງ​ນ້ໍາ​ທາ, ແຂວງ​ບໍ​ລິ​ຄໍາ​ໄຊ ແລະ ແຂວງ​ຊຽງ​ຂວາງ ແຂວງ​ລະ 2 ຄົນ ແລະ ຈາກ​ແຂວງ​ໄຊ​ຍະ​ບູ​ລີ, ແຂວງ​ວຽງ​ຈັນ, ແຂວງ​ຜົ້ງ​ສາລີ ແລະ ແຂວງ​ສາລະ​ວັນ ແຂວງ​ລະ 1 ຄົນ. ນອກຈາກ​ນີ້​ ຍັງ​ມີ​ນັກ​ສຶກສາ​ເຮົາ​ທີ່​ບໍ່​ໄດ້​ກັບ​ບ້ານ​ທີ່​ຍັງ​ຢູ່​ແຂວງ​ອື່ນ​ຕື່ມຄື: ແຂວງ​ຫູ​ໜານ 26 ຄົນ, ຫຼຽວ​ໜິງ 1 ຄົນ, ກຸ້ຍ​ໂຈວ 58 ຄົນ, ເຫີ​ໜານ 1 ຄົນ, ວິທະຍາໄລ​ເຕັກນິກ ແລະ ການ​ອະນຸລັກ​ແມ່​ນ້ໍາ​ເຫືອງ 1 ຄົນ ຊຶ່ງ​ນັກ​ສຶກສາ​ເຫຼົ່າ​ນີ້​ບໍ່​ໄດ້​ຖືກ​ຈໍາ​ກັດ​ການ​ໄປ​ມາ​ຄື​ກັບ​ນັກ​ສຶກສາ​ຢູ່​ເມືອງ​ອູ​ຮັ້ນ ພ້ອມ​ດຽວ​ກັນ​ນີ້ ຂໍ​ແຈ້ງ​ໃຫ້​ທ່ານ​ຮູ້​ວ່າ​ບໍ່​ມີ​ນັກ​ສຶກສາ​ລາວ​ຈັກ​ຄົນ​ທີ່​ຕິດເຊື້ອ​ພະຍາດ​ອັກເສບ​ປອດ COVID-19.

ເຖິງ​ຢ່າງໃດ​ກໍຕາມ ເນື່ອງ​ຈາກ​ອູ​ຮັ້ນ​ເປັນ​ສູນ​ກາງຂອງ​ການ​ລະບາດ ມາດ​ຕະການ​ຕ່າງໆ​ຂ້ອນ​ຂ້າງ​ເຄັ່ງ​ຄັດ ໂດຍ​ສະເພາະ​ໃນ​ການ​ເຂົ້າ​ອອກ​ຫໍ​ພັກ, ການ​ຊື້​ອາຫານ​ການ​ກິນ, ອາຫານ​ບາງ​ຢ່າງ​ກໍ ຂາດຕະຫຼາດ, ການ​ເດີນທາງ​ໄປ​-​ມາ​ພົບ​ຄວາມ​ຫຍຸ້ງຍາກ ລວມ​ທັງ​ການ​ເຂົ້າ​ໄປ​ໃນ​ເຂດ​ທີ່​ພັກ​ອາໄສ ນັກ​ສຶກສາ​ຂອງ​ພະນັກງານ​ສະຖານທູດ​ກໍ​ພົບ​ຄວາມ​ຫຍຸ້ງຍາກ​ບໍ່​ສາມາດ​ເຂົ້າ​ໄດ້ ແລະ ໃນຕໍ່ໜ້າ​ຈະ​ພະຍາ ຍາມ​ສືບຕໍ່​ໃຫ້ການ​ຊ່ວຍເຫຼືອ ທ່ານ ພູທອນ ເມືອງ​ປາກ ຮອງ​ລັດຖະມົນຕີ​ກະຊວງ​ສາທາລະນະ​ສຸກ ຫົວໜ້າ​ກອງ​ເລຂາ​ຄະນະ​ສະເພາະ​ກິດ​ເພື່ອ​ປ້ອງ​ກັນ,ຄວບ​ຄຸມ ແລະ ຕອບ​ໂຕ້​ການລະບາດພະຍາດ COVID-19 ໄດ້​ຍົກ​ໃຫ້​ເຫັນ​ສະພາບ​ການ​ລະບາດ​ຂອງ​ ເຊື້ອ​ພະຍາດ​ດັ່ງກ່າວ, ມາດ​ຕະການ​ຢູ່ ສປປ ລາວ ໂດຍ​ໄດ້​ມີ​ການ​ເປີດ​ສາຍ​ດ່ວນ, ການ​ເພີ່ມ​ທະວີ​ການ​ເຝົ້າ​ລະວັງ​ຢູ່​ຈຸດ​ຜ່ານ​ແດນ, ຕິດຕາມ​ຜູ້ໂດຍສານ​ທີ່​ເຂົ້າ​ມາ ສປປ ລາວ, ແຍກ​ດ່ຽວ​ກໍລະນີ​ສົງໄສ, ກະກຽມ​ໂຮງໝໍ​ເພື່ອ​ຮອງ​ຮັບ, ກະກຽມ​ອຸປະກອນ​ການ​ແພດ ໃນ​ນັ້ນ​ສຳລັບ​ນັກ​ສຶກສາ ຈຳນວນ 43 ຄົນ​ກໍ​ໄດ້​ຕິດຕາມ​ສະພາບ​ໂດຍ​ໃຫ້​ມີ​ການ​ປ້ອງ​ກັນ​ເປັນ​ຢ່າງ​ດີ.

ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ແຈ້ງໃຫ້ຮູ້ ໃນວັນທີ 10 ມີນາ ນີ້ວ່າ: ຂະແໜງການສຶກສາ ຈະໄດ້ອອກຫລາຍມາດຕະການ ເພື່ອປ້ອງກັນຄວາມສ່ຽງ ການແຜ່ລະບາດຂອງ ພະຍາດອັກເສບປອດ ຈາກເຊື້ອຈຸລະ ໂຣກສາຍພັນໃໝ່ COVID-19 ຄື: ອອກແຈ້ງການໃຫ້ ສະຖາບັນການສຶກສາ ໃນຂອບເຂດທົ່ວປະເທດ ເຮັດອານາໄມທໍາຄວາມສະອາດ ໃນສະຖານການສຶກສາຂອງຕົນ ເພື່ອໃຫ້ປາສະຈາກເຊື້ອພະຍາດຕ່າງໆ, ພ້ອມແນະນໍາ ໃຫ້ຜູ້ບໍລິຫານໂຮງຮຽນ, ຄູອາຈານ ແລະ ຜູ້ປົກຄອງ ໃຫ້ຕິດຕາມອາການ ນັກຮຽນ-ນັກສຶກສາ ກໍຄື ລູກຫລານຂອງຕົນເອງຢ່າງໃກ້ຊິດ ຖ້າເຫັນວ່າມີອາການໄຂ້ ຕ້ອງໄປພົບແພດ ຫລື ໃຫ້ພັກຜ່ອນຢູ່ເຮືອນຊົ່ວຄາວ. ນອກນີ້, ແມ່ນຈະໃຫ້ໂຮງຮຽນແຫ່ງຕ່າງໆ ຈັດຕັ້ງກິດຈະກໍາປູກ ຈິດສໍານຶກ ເພື່ອປ້ອງກັນຕົນເອງຈາກພະຍາດ, ໂດຍສະເພາະການລ້າງມືໃຫ້ສະອາດ ແລະ ອອກແຮງງານຝຶກກາຍະບໍລິຫານ ເພື່ອຮ່າງກາຍໃຫ້ແຂງແຮງ, ຄຽງຄູ່ກັນນັ້ນ ກໍເອົາໃຈໃສ່ຜັນ ຂະຫຍາຍມາດ ຕະການປ້ອງກັນຕ່າງໆ ຂອງລັດຖະບານ ເພື່ອປ້ອງກັນພະຍາດດັ່ງກ່າວ ໃຫ້ສອດຄ່ອງກັບວຽກງານ ໃນຂະແໜງການສຶກສາ ແລະ ກິລາ ໃຫ້ມີປະສິດທິຜົນ.

(ໄຊພອນ)

ທ່ານອາດຈະມັກ

ເຫດການ