 |
ຫວຽດນາມ ຊ່ວຍລົດຂົນສົ່ງເມໄປສະນີ 2 ຄັນແກ່ລາວ
ການມາຢ້ຽມຢາມລາວຄັ້ງນີ້ສອງກະຊວງ ໄດ້ພົບປະເນື່ອງຈາກລັດຖະບານສອງປະເທດເຫັນໄດ້ຄວາມໝາຍຄວາມສຳຄັນຂອງບົດບາດວຽກງານໂທລະຄົມມະນາຄົມ ແລະ ICT ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມພາຍໃນປະເທດ ແລະ ໃນລະດັບສາກົນ. ການພົບປະສອງຝ່າຍຄັ້ງນີ້ໄດ້ຈັດຂຶ້ນທີ່ໂຮງແຮມລາວພລາຊາ ນະຄອນຫຼວງວຽງຈັນ ເຊິ່ງທ່ານ ທັນສະໄໝ ກົມມະສິດ ໄດ້ຕີລາຄາສູງຕໍ່ການມາຢ້ຽມຢາມຂອງ ທ່ານ ຫງວຽນ ແມງ ຮຸ່ງ ໃນຊຸມປີຜ່ານມາ ກະຊວງ ປທສ ໄດ້ໄປຢ້ຽມຢາມ ແລະ ແລກປ່ຽນບົດຮຽນນຳ ສສ ຫວຽດນາມຫຼາຍຄັ້ງການຮ່ວມມືລະຫວ່າງສອງກະຊວງແມ່ນມີຢ່າງຕໍ່ເນື່ອງ ແລະ ຫຼາຍລະດັບ ເປັນຕົ້ນ ການຮ່ວມມືລະຫວ່າງສູນອິນເຕີເນັດແຫ່ງຊາດ ແລະ ສູນເຄືອຄ່າຍຂໍ້ມູນຂ່າວສານ ສສ ຫວຽດນາມ ໃນວຽກງານການຄຸ້ມຄອງອິນເຕີເນັດສູງສຸດແຫ່ງຊາດ ການໃຫ້ທຶນການສຶກສາ ນອກຈາກການຮ່ວມມືສອງຝ່າຍແລ້ວ ສອງກະຊວງຍັງໄດ້ມີການຮ່ວມມືໃນຂົງເຂດວຽກງານໂທລະຄົມມະນາຄົມ ແລະ ICT ລະດັບອາຊຽນໃນນາມຕົວແທນຜູ້ຮັບຜິດຊອບຢ່າງເປັນທາງການຂອງຂະແໜງການໃນອາຊຽນ.
ໃນການຢ້ຽມຢາມລາວຄັ້ງນີ້ ສອງຝ່າຍໄດ້ເຊັນບົດບັນທຶກຄວາມເຂົ້າໃຈລະຫວ່າງສູນບໍລິຫານລັດດ້ວຍເອເລັກໂຕຣນິກ ແລະ VNPT Group ລະຫວ່າງສູນລາວເຊີດ ແລະ ອົງການຄຸ້ມຄອງຄວາມປອດໄພຂໍ້ມູນຂ່າວສານ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ ແລະ ລະຫວ່າງໄປສະນີຂອງສອງປະເທດພ້ອມນັ້ນຍັງແລກປ່ຽນບົດຮຽນ ແລະ ຂໍການສະໜັບສະໜູນໃນການກະກຽມທີ່ລາວຈະເປັນເຈົ້າພາບ TEMIN 19 ໃນເດືອນຕຸລາ 2019 ແລະ ເພື່ອຍົກລະດັບພະນັກງານເຝິກອົບຮົມໄລຍະສັ້ນ ແລະ ໄລຍະຍາວດ້ານໂທລະຄົມມະນາຄົມ ແລະ ICT ໂດຍສະເພາະດ້ານຄຸ້ມຄອງ ແລະ ພັດທະນາວຽງການ ICT ພ້ອມນີ້ໃນໂອກາດມາຢ້ຽມຢາມລາວຄັ້ງນີ້ບໍລິສັດໄປສະນີຫວຽດນາມຍັງໄດ້ມອບລົດຂົນສົ່ງເມໄປສະນີຈຳນວນ 2 ຄັນ ມູນຄ່າປະມານ 500 ລ້ານກີບ ຫຼື 62.132 ໂດລາສະຫະລັດ ໃຫ້ລັດວິສາຫະກິດໄປສະນີລາວຕື່ມອີກເພື່ອນຳໃຊ້ເຂົ້າໃນວຽກງານຂົນສົ່ງໄປສະນີໃຫ້ມີຄວາມວ່ອງໄວທັນເວລາ.
ສຳລັບລາວເຮົາ ການພັດທະນາໂທລະຄົມມະນາຄົມ ແລະ ICT ຍັງປະເຊີນກັບສິ່ງທ້າທາຍຫຼາຍດ້ານ ແລະ ມີຄວາມຈຳເປັນຕ້ອງມີການແລກປ່ຽນບົດຮຽນ ແລະ ປະສົບການກັບບັນດາປະເທດ ທັງພາກພື້ນ ແລະ ສາກົນ ເພື່ອນຳມາດັດປັບໝູນໃຊ້ເຂົ້າໃນການພັດທະນາວຽກງານໂທລະຄົມມະນາຄົມ ແລະ ICT ໃຫ້ມີປະສິດທິຜົນ ແນໃສ່ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງລາວຫຼາຍຂຶ້ນກວ່າເກົ່າ ທັງສ້າງເງື່ອນໄຂໃຫ້ລາວເຮົາສາມາດເຊື່ອມໂຍງກັບພາກພື້ນ ແລະ ສາກົນ.
（ແຫຼ່ງຂໍ້ມູນ： www.vientianemai.net）
