| ເພີ່ມທະວີການຮ່ວມມືລະຫວ່າງປະຊາຊົນແຂວງ ລອງອານ ແລະ ປະຊາຊົນ ກູບາ | |
| ເພີ່ມທະວີການແລກປ່ຽນ ແລະ ການຮ່ວມມືລະຫວ່າງສະພາປະຊາຊົນນະຄອນຫຼວງຮ່າໂນ້ຍ ແລະ ນະຄອນຫຼວງວຽງຈັນ l |
ຂາດນ້ຳແມ່ນລຳບາກຫຼາຍ!
ຕາມການບອກເລົ່າຂອງປະຊາຊົນຢູ່ບ້ານ 6 (ຕາແສງ ແຄງເລີ່ມ ເມືອງ ອູ່ມິງ, ແຂວງ ກາເມົາ) ແລ້ວ: ນັບແຕ່ລະດູແຫ້ງແລ້ງທີ່ໜັກໜ່ວງໃນປີ 2016 ມາຮອດປະຈຸບັນ, ເມື່ອຮອດລະດູແລ້ງຂອງແຕ່ລະປີ ແມ່ນປະຊາຊົນຕ້ອງປະສົບກັບບັນຫາຂາດນ້ຳ. ຫຼາຍໆຄົວເຮືອນບໍ່ສາມາດເຈາະເອົານ້ຳໃຕ້ດິນໄດ້, ຫຼືເຖິງວ່າຈະເຈາະໄດ້ ກໍໃຊ້ບໍ່ໄດ້, ເພາະນ້ຳມີສານສົ້ມຫຼາຍ. ນັບທັງບັນດາຄົວເຮືອນທີ່ມີເງື່ອນໄຂສ້າງຖັງ, ຂຸດໜອງເພື່ອເກັບນ້ຳຈືດ, ເອົານ້ຳກັ່ນຕອງສານສົ້ມ ກໍ່ປະສົບກັບບັນຫາໄພແຫ້ງແລ້ງໃນປີນີ້.
ທ່ານນາງ ຮວິ່ງທິແຫຍ້ (ບ້ານ 6, ຕາແສງ ແຄງເລີ່ມ ເມືອງ ອູ່ມິງ, ແຂວງ ກາເມົາ) ເລົ່າວ່າ: “ເດືອນ ທັນວາ ຜ່ານມາຮອດປະຈຸບັນ, ນ້ຳດື່ມກໍບໍ່ພຽງພໍ, ຫາກຍັງເວົ້າເຖິງນ້ຳທີ່ໃຊ້ອາບນ້ຳ, ຊັກເຄື່ອງ, ອະນາໄມ. ບໍ່ມີເຂົ້າ ແມ່ນງ່າຍກວ່າ, ແຕ່ບໍ່ມີນ້ໍາ, ມັນຍາກຫຼາຍ. ໂດຍບໍ່ມີນ້ໍາດື່ມ, ຫຼາຍຄົນຕ້ອງດື່ມນ້ໍາບາດານ. ນ້ຳປະເພດນີ້ ປົນເປື້ອນດ້ວຍເກືອ, ສານສົ້ມ ຈຶ່ງມີລົດຊາດເຄັມ, ສົ້ມ ແລະ ດື່ມຍາກ, ແຕ່ຈຳຕ້ອງດື່ມ ເພາະຫຼາຍຄອບຄົວບໍ່ມີຄວາມສາມາດຊື້ໄດ້”.
 |
| ກຳປັ່ນ 470, ກອງທັບເຮືອເຂດ 5 ໄດ້ສະໜອງນ້ຳໃຫ້ປະຊາຊົນຢູ່ຕາແສງ ແຄງເລີ່ມ ເມືອງ ອູ່ມິງ. (ພາບ: ວັນດີ້ງ) |
ໂດຍຮ່ວມເດີນທາງພ້ອມກັນກັບອຳນາດການປົກຄອງທ້ອງຖິ່ນ ເພື່ອໜູນຊ່ວຍປະຊາຊົນຜ່ານຜ່າໄພແຫ້ງແລ້ງ, ພະນັກງານ, ນັກຮົບກອງທັບເຮືອເຂດ 5 ໄດ້ໜູນໃຊ້ທຸກນາທີ, ທຸກຊົ່ວໂມງ ເພື່ອນຳເອົານ້ຳຈືດມາໃຫ້ປະຊາຊົນ. ນັບແຕ່ວັນທີ 17 ເມສາ ມາຮອດປະຈຸບັນ, ນ້ຳຈືດນັບຮ້ອຍແມັດກ້ອນ ກໍໄດ້ຂົນສົ່ງເຂົ້າສູ່ດິນຕໍ່ແຜ່ນເພື່ອສະໜອງໃຫ້ປະຊາຊົນບັນດາບ້ານ ໂດຍກຳປັ່ນກອງທັບເຮືອເຂດ 5.
 |
| ນ້ຳຈືດໄດ້ສົ່ງເຖິງບ້ານປະຊາຊົນ ໂດຍພະນັກງານ-ນັກຮົບກອງທັບເຮືອເຂດ 5 ສົມທົບກັບອຳນາດການປົກຄອງທ້ອງຖິ່ນ. (ພາບ: ວັນດີ້ງ) |
ມື້ໃດກໍຄືກັນ, ພະນັກງານ, ນັກຮົບກອງທັບເຮືອເຂດ 5 ກໍຟ້າວຟັ່ງຂະຫຍັນປ່ຽນຜຽນກັນເຮັດວຽກນໍາເອົານໍ້າມາໃຫ້ປະຊາຊົນ. ມີຜູ້ເປີດຝາຖັງ, ມີຜູ້ເອົາກະຕຸກນໍ້າໃສ່ລົດໃຫ້ປະຊາຊົນເອົາກັບບ້ານ... ວຽກງານບໍ່ໄດ້ຢຸດ, ເຫື່ອໄຫຼອອກຕາມຫຼັງ ແລະ ໃບໜ້າ, ແຕ່ສາຍຕາຂອງທະຫານຍັງສົດໃສ, ເຕັມໄປດ້ວຍຄວາມສຸກ.
 |
| ນ້ຳຈືດໄດ້ສົ່ງເຖິງບ້ານປະຊາຊົນ ໂດຍພະນັກງານ-ນັກຮົບກອງທັບເຮືອເຂດ 5 ສົມທົບກັບອຳນາດການປົກຄອງທ້ອງຖິ່ນ. (ພາບ: ວັນດີ້ງ) |
ນອກຈາກການໜູນຊ່ວຍໃຫ້ແກ່ປະຊາຊົນແລ້ວ, ກອງບັນຊາການກອງທັບເຮືອ ເຂດ 5 ຍັງໄດ້ມອບຂອງຂວັນ 30 ພູດ (ແຕ່ລະພູດມີມູນຄ່າ 500.000 ດົ່ງ) ໃຫ້ບັນດາຄອບຄົວນະໂຍບາຍ.
 |
| ມອບຂອງຂວັນທີ່ມີຄວາມໝາຍຂອງກອງບັນຊາການກອງທັບເຮືອເຂດ 5 ໃຫ້ບັນດາຄອບຄົວຢູ່ຕາແສງ ແຄງຕ໋ຽນ |
ໃນໂອກາດນີ້, ໜ່ວຍບໍລິການ ຍັງໄດ້ສົມທົບກັບບໍລິສັດໃຫຍ່ທ່າກຳປັ່ນໃໝ່ ໄຊງ່ອນ ແລະ ຄະນະຂົນຂວາຍປະຊາຊົນ ພັກແຂວງ ກາເມົາ ມອບຖັງນໍ້າ (500 ລິດ) 150 ຖັງ ; ຕຸກນ້ຳດື່ມບໍລິສຸດ (20 ລິດ) 200 ຕຸກ ແລະ ຂອງຂວັນ 50 ພູດໃຫ້ບັນດາຄອບຄົວທຸກຍາກ, ດ້ອຍໂອກາດຢູ່ 3 ເມືອງຄື: ເຈີ່ນວັນເທີຍ, ອູ່ມິງ ແລະ ເຖີຍບິ່ງ ດ້ວຍຍອດມູນຄ່າເກືອບ 400 ລ້ານດົ່ງ.
 |
| ກອງທັບເຮືອເຂດ 5, ບໍລິສັດໃຫຍ່ທ່າກຳປັ່ນໃໝ່ ໄຊງ່ອນ ພ້ອມກັນກັບອົງການທີ່ມີໜ້າທີ່ ແຂວງ ກາເມົາ ມອບຂອງຂວັນໃຫ້ປະຊາຊົນ ກາເມົາ. (ພາບ: ວັນດີ້ງ) |
ແກ້ໄຂ "ໄພແຫ້ງແລ້ງ" ຂອງເຂດດິນແຫ້ງແລ້ງ
ປ້າ ເຈີ່ນທິກຸກ ຢູ່ຕາແສງ ແຄງບິ່ງດົງ (ເມືອງ ເຈີ່ນວັນເທີຍ, ແຂວງ ກາເມົາ) ເວົ້າວ່າ: ທະຫານກອງທັບເຮືອເຂດ 5 ໄດ້ນຳເອົານ້ຳຈືດມາໃຫ້, ຍັງໄດ້ມອບທັງຖັງນ້ຳນຳອີກ. ເຮືອນຂອງຂ້າພະເຈົ້າມີໄຫເກັບນ້ຳຈຳນວນໜຶ່ງ, ແຕ່ກໍ່ແຕກແຫງຕາມການເວລາ, ຄອບຄົວກໍ່ປະສົບກັບຄວາມຫຍຸ້ງຍາກ ສະນັ້ນ ບໍ່ມີເງິນປ່ຽນໄຫ.
ປ້າ ໄທບິກເຢິ່ນ ຢູ່ຕາແສງ ແຄງເລີ່ມ (ເມືອງ ອູ່ມິງ, ແຂວງ ກາເມົາ) ໃຫ້ເລົ່າວ່າ: ໂຊກດີທີ່ມີທະຫານກອງທັບເຮືອເຂດ 5 ພ້ອມກັນກັບບັນດາຜູ້ມີຄວາມເມດຕາ ໄດ້ນຳເອົານ້ຳຈືດມາໃຫ້, ເຮັດໃຫ້ປະຊາຊົນພວກຂ້າພະເຈົ້າບັນເທົາຄວາມຍາກລົງ. ທຸກຄົນບອກກັນໃຊ້ຢ່າງປະຢັດ, ໃຊ້ສຳລັບຄວາມຕ້ອງການທີ່ຈຳເປັນເຊັ່ນ: ກິນ, ດື່ມ.
 |
| ນ້ຳຈືດໄດ້ສົ່ງເຖິງບ້ານປະຊາຊົນ ໂດຍພະນັກງານ-ນັກຮົບກອງທັບເຮືອເຂດ 5 ສົມທົບກັບອຳນາດການປົກຄອງທ້ອງຖິ່ນ. (ພາບ: ວັນດີ້ງ) |
ຕາມທ່ານ ຫງວຽນມິງທົງ, ປະທານຄະນະກຳມະການປະຊາຊົນຕາແສງ ແຄງເລີ່ມ (ເມືອງ ອູ່ມິງ, ແຂວງ ກາເມົາ) ແລ້ວ: ຕາແສງ ແຄງເລີ່ມ ໄດ້ລົງທຶນກໍ່ສ້າງອ່າງສະໜອງນ້ຳເພື່ອຮັບໃຊ້ປະຊາຊົນ, ແຕ່ຍ້ອນໄພແຫ້ງແລ້ງແກ່ຍາວ, ຄວາມອາດສາມາດຂອງອ່າງເກັບນ້ຳແມ່ນບໍ່ພຽງພໍສໍາລັບຕາແສງທັງຫມົດ. ປະຊາຊົນປະສົບກັບຄວາມຫຍຸ້ງຍາກຫຼາຍຢ່າງໃນຊີວິດປະຈຳວັນ, ການຜະລິດ. ເພື່ອມີນ້ຳໃຊ້ຕຸກໜຶ່ງໃນຊີວິດປະຈຳວັນ, ປະຊາຊົນຕ້ອງໄປໄກພໍສົມຄວນ, ເຖິງແມ່ນຈະໄປໄກກໍບໍ່ມີນ້ຳໃຊ້ ເພາະນ້ຳສ້າງກໍ່ແຫ້ງແລ້ງ, ໜອງນ້ຳກໍ່ແຫ້ງ. ການໃຊ້ເງິນເພື່ອຊື້ນ້ຳໃຊ້ປະຈຳວັນ ແມ່ນແພງສົມຄວນ, ປະຊາຊົນທີ່ປະສົບກັບຄວາມຫຍຸ້ງຍາກບໍ່ສາມາດຊື້ໄດ້. ຍ້ອນຄວາມເອົາໃຈໃສ່ຂອງລັດ, ການໜູນຊ່ວຍຂອງພະນັກງານ, ນັກຮົບກອງທັບເຮືອເຂດ 5 ພ້ອມກັນກັບບັນດາຜູ້ມີຄວາມເມດຕາ, ນ້ຳໄດ້ມາຮອດເຮືອນປະຊາຊົນ. ທະຫານກໍໄດ້ຊ່ວຍປະຊາຊົນເອົາກະຕຸກນ້ຳມາໃຫ້ຮອດເຮືອນ, ປະຊາຊົນຮູ້ສຶກດີໃຈຫຼາຍ”
“ໄພແຫ້ງແລ້ງ, ຄວາມຮ້ອນທີ່ແກ່ຍາວໃນປີນີ້ ໄດ້ເຮັດໃຫ້ການຂາດນ້ຳນັບມື້ນັບຮ້າຍແຮງ. ສະນັ້ນ, ບັນດາຂອງຂວັນທີ່ແທດຈິງທີ່ສຸດຂອງກອງບັນຊາການກອງທັບເຮືອເຂດ 5 ແລະ ບໍລິສັດໃຫຍ່ທ່າກຳປັ່ນໃໝ່ ໄຊງ່ອນ ໄດ້ຊ່ວຍໃຫ້ປະຊາຊົນມີນ້ຳສະອາດ ແລະ ອຸປະກອນເກັບນ້ຳຈືດເພີ່ມຂຶ້ນ, ຮັບໃຊ້ຄວາມຕ້ອງການໃນການດຳລົງຊີວິດ, ຮັບປະກັນສຸຂະພາບຄອບຄົວ. ການກະທຳອັນດີງາມນີ້ ໄດ້ສະແດງໃຫ້ເຫັນນ້ຳໃຈທະຫານ - ປະຊາຊົນ ທີ່ຕິດພັນກັນ ແລະ ມູນເຊື້ອອັນດີງາມຂອງທະຫານລຸງໂຮ” - ທ່ານ ຈິ້ງແທງຮ່ຽນ, ປະທານຄະນະກຳມະການປະຊາຊົນຕາແສງ ແຄງບິ່ງດົງ (ເມືອງ ເຈີ່ນວັນເທີຍ, ແຂວງ ກາເມົາ) ໃຫ້ຮູ້.
 |
| ທ່ານ ພົນເຮືອເອກ ຫງວຽນຫິ້ວທວານ ກຳໄດ້ສະພາບການປະຕິບັດໜ້າທີ່ສະໜອງນ້ຳຂອງພະນັກງານ, ທະຫານຂອງກອງບັນຊາການຢູ່ຕາແສງ ບ້ຽນແບັກ (ເມືອງເຖີຍບິ່ງ, ແຂວງ ກາເມົາ). (ພາບ: ວັນດີ້ງ) |
ຕາມທ່ານ ພົນເຮືອເອກ ຫງວຽນຫິ້ວທວານ, ຜູ້ຮັບຜິດຊອບການເມືອງ ກອງທັບເຮືອເຂດ 5 ແລ້ວ: ຕໍ່ໄພແຫ້ງແລ້ງທີ່ແກ່ຍາວ, ຄະນະພັກ, ກອງບັນຊາການ ໄດ້ມີນະໂຍບາຍໜູນຊ່ວຍປະຊາຊົນແກ້ໄຂໄພແຫ້ງແລ້ງ ແລະ ຊົມໃຊ້ນ້ຳຈືດເພື່ອຮັບປະກັນຊີວິດການເປັນຢູ່. ນະໂຍບາຍນີ້ ໄດ້ຮັບການຫັນເປັນລະອຽດດ້ວຍແຜນການ ແລະ ແຂວງ ກາເມົາ ກຳລັງແມ່ນທ້ອງຖິ່ນທຳອິດໃນຂົງເຂດທີ່ມາໜູນຊ່ວຍ. ນັບແຕ່ນີ້ຮອດກາງເດືອນພຶດສະພາ, ກອງທັບເຮືອເຂດ 5 ຈະສືບຕໍ່ສົ່ງກຳປັ່ນ 4 ລຳ ກຽມພ້ອມທີ່ຈະໜູນຊ່ວຍບັນດາບໍລິເວນ, ທ້ອງຖິ່ນ ເມື່ອມີຄວາມຕ້ອງການ.
 |
| ທ່ານ ພົນເຮືອເອກ ຫງວຽນຫິ້ວທວານ ໄດ້ລົງຢ້ຽມຢາມ ແລະ ຊຸກຍູ້ປະຊາຊົນເຂດປະສົບໄພແຫ້ງແລ້ງຢູ່ຕາແສງ ແຄງເລີ່ມ. (ພາບ: ວັນດີ້ງ) |
ສະພາບໄພແຫ້ງແລ້ງໃນບໍລິເວນແຂວງ ກາເມົາ ຄາດວ່າຈະຍັງສືບຕໍ່. ໃນສະພາບການທີ່ຫຍຸ້ງຍາກ, ນ້ຳໃຈທະຫານປະຊາຊົນ ນັບມື້ນັບສະໜິດແໜ້ນກວ່າ. ການໜູນຊ່ວຍຂອງກອງທັບເຮືອ ແລະ ກຳລັງອື່ນໆ ໄດ້ປະກອບສ່ວນຊ່ວຍໃຫ້ປະຊາຊົນ ກາເມົາ ບັນເທົາຄວາມຫຍຸ້ງຍາກລຳບາກໃນຍາມແລ້ງ, ເຮັດໃຫ້ຊີວິດການເປັນຢູ່ຂອງຕົນມີຄວາມເປັນປົກກະຕິ, ຟື້ນຟູການຜະລິດ.
ມິງດຶກ
