 |
ສະຫາຍ ທອງລຸນ ສີສຸລິດ ກໍາມະການກົມການ ເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ເຈິນເກີ້ມຕູ້ ເລຂາທິການສູນ ກາງພັກ, ປະທານຄະນະກຳມະການກວດກາ ສູນກາງພັກກອມມູນິດຫວຽດນາມ. (ພາບ:ອ່າຍຄຳ/ຂປລ)
ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ ສະຫາຍ ເຈິນເກີ້ມຕູ້ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ເຊິ່ງເປັນການຢ້ຽມຢາມ ຄັ້ງທໍາອິດ ນັບແຕ່ ສະຫາຍ ເຈິນເກີ້ມຕູ້ ໄດ້ຮັບຄວາມ ໄວ້ວາງໃຈຈາກພັກ, ລັດ ແລະ ປະຊາຊົນຫວຽດນາມ ມອບໝາຍໃຫ້ ດຳລົງຕໍາແໜ່ງ ເປັນປະທານຄະນະກວດກາສູນກາງພັກ ກອມມູນິດຫວຽດນາມ, ພ້ອມນີ້, ຍັງເປັນການປະກອບ ສ່ວນສຳ ຄັນ ເຂົ້າໃນ ການເພີ່ມທະວີ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ນັບມື້ແໜ້ນແຟ້ນ, ເລິກເຊິ່ງ ແລະ ເກີດດອກອອກຜົນຍິ່ງໆຂຶ້ນ.
ໃນໂອກາດດຽວກັນ, ສະຫາຍ ເຈິນເກີ້ມຕູ້ ກໍໄດ້ຕາງໜ້າຄະນະ ສະແດງຄວາມຂອບອົກຂອບໃຈ ມາຍັງ ສະຫາຍ ທອງລຸນ ສີສຸລິດ ທີ່ໄດ້ສະຫລະເວລາອັນມີຄຸນຄ່າ ໃຫ້ການຕ້ອມຮັບຢ່າງອົບອຸ່ນ, ພ້ອມທັງແຈ້ງໃຫ້ຊາບເຖິງຈຸດປະສົງ ຂອງ ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໂດຍສະເພາະແມ່ນຜົນການພົບປະສອງຝ່າຍ ກັບຄະນະກວດກາສູນກາງພັກ ປປ ລາວ.
（ແຫຼ່ງຂໍ້ມູນ： ຂປລ）
