 |
ປະທານສະພາແຫ່ງຊາດ ຕ້ອນຮັບກຳມະການກົມການເມືອງ, ຜູ້ປະຈຳການ ຄະນະເລຂາທິການສູນກາງພັກກອມມູນິດຫວຽດນາມ.(ພາບ: ຂປລ)
ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ສະຫາຍ ເຈິ່ນກວັກ ເວືອງ ທີ່ໄດ້ນຳພາຄະນະ ເດີນທາງມາຢ່ຽມຢາມ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງ ຊາດ ລາວ-ຫວຽດນາມ ໃຫ້ໄດ້ຮັບການພັດທະນາ ແລະ ແໜ້ນແຟ້ນຍິ່ງຂຶ້ນໄປເລື້ອຍໆ. ພ້ອມທັງສະແດງຄວາມຂອບໃຈ ຕໍ່ລັດຖະບານ ກໍຄື ປະຊາຊົນຫວຽດນາມ ທີ່ໄດ້ໃຫ້ການ ສະໜັບສະໜູນ ຊ່ວຍ ເຫລືອແກ່ ສປປ ລາວ ໃນທຸກຂົງເຂດວຽກງານຕະຫລອດມາ. ພ້ອມດຽວກັນນັ້ນ, ທັງສອງຝ່າຍ ໄດ້ແຈ້ງໃຫ້ກັນຊາບ ກ່ຽວກັບ ສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ ແລະ ແລກປ່ຽນຄຳຄິດຄຳເຫັນ ກ່ຽວກັບທິດທາງການສືບຕໍ່ ເສີມຂະຫຍາຍການພົວພັນ ຮ່ວມມືໃນຕໍ່ໜ້າ ໃຫ້ເກີດດອກອອກຜົນຍິ່ງໆຂຶ້ນ.
ສະຫາຍ ເຈິ່ນກວັກ ເວືອງ ກໍໄດ້ສະແດງຄວາມຂອບໃຈ ຕໍ່ ສະຫາຍ ນາງ ປານີ ຢາທໍ່ຕູ້ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ແຈ້ງຈຸດປະສົງຂອງການເດີນ ທາງມາຢ້ຽມຢາມ ສປປ ລາວ ໃນຄັ້ງນີ້, ໃຫ້ທ່ານປະທານສະພາແຫ່ງຊາດ ຮັບຊາບ. ພ້ອມທັງຕີລາຄາສູງ ຕໍ່ການພົວພັນຮ່ວມມື ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ຕະຫລອດໄລຍະທີ່ຜ່ານມາ ແລະ ອື່ນໆ.
（ແຫຼ່ງຂໍ້ມູນ： ຂປລ）
