 |
ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ກ່າວຄໍາເຫັນອັດກອງປະຊຸມ (ພາບ: TTXVN)
ພາຍຫຼັງເກືອບໜຶ່ງເດືອນເຮັດວຽກຢ່າງຮີບດ່ວນ, ເຄັ່ງຄັດ, ປະຊາທິປະໄຕ ແລະ ດ້ວຍຄວາມຮັບຜິດຊອບ, ກອງປະຊຸມຄັ້ງທີ 6 ຂອງສະພາແຫ່ງຊາດ ຊຸດທີ XIV ໄດ້ສຳເລັດບັນດາວາລະກອງປະຊຸມ ແລະ ໄດ້ປິດລົງໃນຕອນເຊົ້າຂອງວັນທີ 20 ພະຈິກ.
ຂຶ້ນກ່າວປິດກອງປະຊຸມໂດຍແມ່ນ ທ່ານປະທານສະພາແຫ່ງຊາດ ຫງວ໋ຽນ ຖິກີມເງິນ ເຊິ່ງທ່ານໄດ້ກ່າວວ່າ: ດ້ວຍຄະແນນຄວາມໄວ້ວາງໃຈສູງ, ສະພາແຫ່ງຊາດໄດ້ເລືອກຕັ້ງເອົາ ເລຂາທິການໃຫຍ່ ຄະນະບໍລິຫານງານ ສູນກາງພັກຄອມມູນິດ ຫວຽດນາມ ທ່ານ ຫງວ໋ຽນ ຟູ້ຈ້ອງ ຂື້ນເປັນ ປະທານປະເທດ ແຫ່ງ ສສ ຫວຽດນາມ. ນີ້ແມ່ນເຫດການ-ການເມືອງທີ່ສຳຄັນຂອງ ສສ ຫວຽດນາມ, ເຊິ່ງໄດ້ຮັບການຕີລາຄາສູງຈາກ ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ.
ພ້ອມດຽວກັນນັ້ນ, ສະພາແຫ່ງຊາດໄດ້ເຊັນອະນຸມັດ ການສະເໜີຂອງ ນາຍົກລັດຖະມົນຕີ ກ່ຽວກັບ ຊັບພະຍາກອນມະນຸດ(ບຸກຄະລາກອນ)ໃນຄະນະລັດຖະບານ ເພື່ອຮັບປະກັນຄວາມຖືກຕ້ອງຕາມຂັ້ນຕອນ, ລະບຽບການຕາມຂໍ້ກຳນົດກົດໝາຍ.
ໃນກອງປະຊຸມນີ້,ສະພາແຫ່ງຊາດໄດ້ຜ່ານກົດໝາຍ 9 ສະບັບ ແລະ ປະກອບຄຳຄິດເຫັນ ໃສ່ກົດໝາຍ ອີກຈຳນວນ 6 ສະບັບ. ພິເສດ, ສະພາແຫ່ງຊາດໄດ້ເຊັນອະນຸມັດ ສົນທິສັນຍາຄູ່ຮ່ວມມືຮອບດ້ານ ແລະ ຄວາມກ້າວໜ້າຂ້າມ ມະຫາສະໝຸດປາຊີຟິກ (CPTPP) ພ້ອມກັບບັນດາເອກະສານທີ່ກ່ຽວຂ້ອງ ດ້ວຍຄວາມເຫັນດີເຫັນພ້ອມ ສູງ ແລະ ເປັນປະເທດທີ 7 ທີ່ເຊັນອະນຸມັດສົນທິສັນຍານີ້, ສິ່ງນັ້ນມີຄວາມໝາຍສຳຄັນສະແດງເຖິງຄວາມຕັ້ງໃຈດ້ານການເມືອງ ຂອງພັກ-ລັດຂອງ ຫວຽດນາມ ທີ່ມີຄວາມຕື່ນຕົວເປັນເຈົ້າການ ໃນການເຊື່ອມໂຍງ ກວ້າງຂວາງ ແລະ ເລິກເຊິ່ງ ຢູ່ໃນຂົງເຂດ ແລະ ໃນໂລກ, ຢັ້ງຢືນຖານະບົດບາດ ແລະ ໜ້າທີ່ ຂອງ ຫວຽດນາມ ຕໍ່ກັບປະຊາຄົມສາກົນ.
ສະພາແຫ່ງຊາດ ຕີລາຄາສູງ ການບໍລິຫານ ຢ່າງເອົາຈິງເອົາຈັງ ແລະ ໃກ້ຊິດຕິດແທດ ຂອງລັດຖະບານ, ຄວາມເປັນເຈົ້າການ, ບຸກບືນ, ປະສານສົມທົບຢ່າງມີປະສິດທິຜົນ ຂອງ ລະບົບການເມືອງ, ປະຊາຄົມວິສາຫະກິດ, ປະຊາຊົນທຸກຊັ້ນຄົນ ກ່ຽວກັບ ຜົນງານອັນພົ້ນເດັ່ນ ຂອງປີ 2018 ແລະ 3 ປີຜ່ານມາ; ພ້ອມດຽວກັນນັ້ນໄດ້ວິເຄາະ, ໄດ້ຍົກໃຫ້ເຫັນຂໍ້ຄົງຄ້າງ, ຂໍ້ຫຍຸ້ງຍາກ, ອຸປະສັກ ຄວາມທ້າທາຍ ຂອງ ພື້ນຖານເສດຖະກິດ, ນຳສະເໜີຫຼາຍມາດຕະການໃນການແກ້ໄຂລະອຽດ ແນໃສ່ສືບຕໍ່ພັດທະນາອັນຢັ້ງຢືນ. ບົນພື້ນຖານນັ້ນ, ສະພາແຫ່ງຊາດໄດ້ຕົກລົງ ແລະ ຜ່ານມະຕິຕົກລົງ 4 ສະບັບ ກ່ຽວກັບເສດຖະກິດ - ສັງຄົມ ແລະ ງົບປະມານແຫ່ງລັດ.
ສະພາແຫ່ງຊາດຮັບຮູ້ເຖິງ ຄວາມບາກບັ່ນ, ຄວາມຮັບຜິດຊອບຂອງລັດຖູູະບານ, ສານປະຊາຊົນສູງສຸດ, ໄອຍະການປະຊາຊົນສູງສຸດ, ບັນດາກະຊວງ, ຂະແໜງການໃນຈັດຕັ້ງປະຕິບັດບົດບາດ-ໜ້າທີ່ ທີ່ໄດ້ຮັບມອບໝາຍ ແລະ ຕີລາຄາສູງຄວາມຮັບຜິດຊອບ ຂອງບັນດາຜູ້ແທນ, ບັນດາອົງການຈັດຕັ້ງຂອງສະພາແຫ່ງຊາດໃນວຽກຕິດຕາມກວດກາ, ຕິດຕາມວຽກງານການຈັດຕັ້ງປະຕິບັດ ທີ່ ສະພາແຫ່ງຊາດໄດ້ມອບໝາຍໃຫ້.
ສະພາແຫ່ງຊາດໄດ້ປ່ອນບັດໄວ້ວາງໃຈ ຕໍ່ກັບບັນດາຜູ້ທີ່ ດຳລົງຕຳແໜ່ງ ທີ່ສະພາແຫ່ງຊາດ ເປັນຜູ້ແຕ່ງຕັ້ງ ຫຼື ເຊັນອະນຸມັດ. ນີ້ແມ່ນເນື້ອໃນຂອງການຕິດກວດກາພິເສດສຳຄັນ, ສະແດງເຖິງລະດັບຄວາມໄວ້ວາງໃຈ ແລະ ການຍອມຮັບ, ການຕີລາຄາ ອັນທ່ຽງທຳ, ພາວະວິໄສ ກ່ຽວກັບ ບັນດາຄວາມບຸກບືນ, ໝາກຜົນໄດ້ຮັບຕັ້ງແຕ່ຕົ້ນວາລະ ຮອດປະຈຸບັນຂອງບັນດາຜູ້ທີ່ໄດ້ຮັບບັດ ໄວ້ວາງໃຈ.
“ກອງປະຊຸມຄັ້ງທີ 6 ໄດ້ມີການປ່ຽນແປງໃໝ່, ຍົກສູງຄຸນນະພາບການເຄື່ອນໄຫວ ຂອງ ສະພາແຫ່ງຊາດ; ວຽກງານປຶກສາຫາລື, ການປະກອບຄຳຄິດຄຳເຫັນ ແລະ ອະທິບາຍຊີ້ແຈງ ສ້າງບັນຍາກາດການເຮັດວຽກທີ່ຟົດຟື້ນ, ມີປະຊາທິປະໄຕ, ມີຄວາມຮັບຜິດຊອບ, ດຶງດູດຄວາມສົນໃຈ, ຕິດຕາມຂອງປະຊາຊົນ ແລະ ຜູ້ທີ່ມີສິດເລືອກຕັ້ງ. ໝາກຜົນສຳເລັດ ຂອງ ກອງປະຊຸມ ແມ່ນ ຈະສ້າງຄວາມເຊື່ອໝັ້ນ ກ່ຽວກັບ ຄວາມສາມັກຄີ, ຄວາມເປັນເອກກະພາບກັນເພື່ອບຸກບືນ ຈັດຕັ້ງປະຕິບັດສຳເລັດ ບັນດາໜ້າທີ່ຮັບຜິດຊອບ ໃນປີຕໍ່ໄປ ແລະ ສະໄໝປີ 2016-2020”, ປະທານສະພາແຫ່ງຊາດ ຫງວ໋ຽນ ຖິກີມເງິນ ກ່າວ.
ປະທານສະພາແຫ່ງຊາດ ຫງວ໋ຽນ ຖິກີມເງິນ ເນັ້ນໜັກວ່າ: ສະພາບແຫ່ງຊາດຮັບຮູ້ ແລະ ຍອມຮັບ ເຖິງການເຂົ້າຮ່ວມຂອງບັນດາຜູ້ແທນສະພາແຫ່ງຊາດ ຢ່າງຕັ້ງໜ້າ, ປະກອບສະຕິປັນຍາ ແລະ ຈິງໃຈ; ໃນການກະກຽມຢ່າງລະອຽດລະອໍ, ເຂັ້ມງວດ, ດ້ວຍຄວາມເອົາໃຈໃສ ແລະ ເອົາຈິງເອົາຈັງ ແລະ ມີຄວາມຮັບຜິດຊອບ ຂອງບັນດາຫ້ອງການຂອງສະພາແຫ່ງຊາດ, ລັດຖະບານ ແລະ ບັນດາສຳນັກງານ, ອົງການຈັດຕັ້ງທີ່ກ່ຽວຂ້ອງ ໃນຂະບວນການ-ການກະກຽມ ແລະ ດຳເນີນກອງປະຊຸມ. ຂໍໃຫ້ບັນດາທ່ານບັນດາສະຫາຍ ຜູ້ແທນ ສືບຕໍ່ເສີມຂະຫຍາຍ, ລາຍງານຜົນກອງປະຊຸມໃຫ້ທັນການ, ເອົາໃຈໃສ່ໃນການຮັບຟັງແນວຄິດຈິດໃຈ, ຄວາມປາຖະໜາຂອງຜູ້ມີສິດເລືອກຕັ້ງ ແລະ ປະຊາຊົນ, ຄົ້ນຄວ້າ, ທຳຄວາມເຂົ້າໃຈ, ກຳໄດ້ສະພາບຕົວຈິງຂອງ ຊີວິດການເປັນຢູ່ໃນສັງຄົມ ເພື່ອສ່ອງແສງໃຫ້ທັນເວລາ, ສະເໜີແນະ ເຖິງສະພາແຫ່ງຊາດ, ລັດຖະບານ, ບັນອົງການຈັດຕັ້ງທີ່ກ່ຽວຂ້ອງ ແລະ ຕັ້ງໜ້າເປັນເຈົ້າການອີກຕື່ມໃນວຽກງານນິຕິບັນຍັດ ແລະ ວຽກງານການກວດສອບ.
ສະພາແຫ່ງຊາດ ຮຽກຮ້ອງມາຍັງຄະນະປະຈຳສະພາແຫ່ງຊາດ, ສະພາຊົນເຜົ່າ, ບັນດາຄະນະກຳມະການຂອງສະພາແຫ່ງຊາດ, ລັດຖະບານ, ແນວໂຮມແຫ່ງຊາດຫວຽດນາມ, ອົງການປົກຄອງທ້ອງຖິ່ນແຕ່ລະຂັ້ນ, ສານປະຊາຊົນສູງສຸດ, ໄອຍະການສຸງສຸດ, ອົງການກວດສອບແຫ່ງລັດ ແລະ ບັນດາຫ້ອງການ, ອົງການຈັດຕັ້ງທີ່ກ່ຽວຂ້ອງສືບຕໍ່ຕີລາຄາ, ຊີ້ນຳບໍລິຫານ, ຍົກສູງປະສິດທິຜົນການເຄື່ອນໄຫວຍິ່ງຂຶ້ນເພື່ອສ້າງບັນດາການປ່ຽນແປງໃໝ່ທີ່ເຂັ້ມແຂງໃນອານາຄົດ.
（ຫັດທະບູນ）
