ນະຄອນ ໂຮ່ຈິມິນ: ພົບປະກັບອະດີດນັກຊ່ຽວຊານ ຫວຽດນາມ ເພື່ອຊ່ວຍເຫຼືອເພື່ອນມິດ ກຳປູເຈຍ

15:17 | 13/02/2025

ຍສໝ - ວັນທີ 8 ກຸມພາ, ຄະນະຕິດຕໍ່ພົວພັນອະດີດນັກຊ່ຽວຊານ ຫວຽດນາມ ຊ່ວຍເຫຼືອເພື່ອນມິດ ກຳປູເຈຍ ຢູ່ນະຄອນ ໂຮ່ຈີມິນ ໄດ້ຈັດຕັ້ງການພົບປະສະເຫຼີມສະຫຼອງ 95 ປີແຫ່ງວັນສ້າງຕັ້ງພັກກອມມູນິດ ຫວຽດນາມ ແລະ ຄົບຮອບ 46 ປີແຫ່ງວັນໄຊຊະນະໃນສົງຄາມປົກປັກຮັກສາຊາຍແດນຕາເວັນຕົກສ່ຽງໃຕ້ຂອງປະເທດຊາດ ແລະ ພ້ອມກັບກອງທັບປະຊາຊົນ ກໍາປູເຈຍ ເອົາຊະນະລະບອບດັບສູນເຊື້ອຊາດ.

	ກຳປັ່ນ SSEAYP ເຂົ້າທຽບທ່າກຳປັ່ນນະຄອນ ໂຮ່ຈິມິນ: ຂີດໝາຍສຳຄັນໃນການພົວພັນມິດຕະພາບພາກພື້ນ
	ນະຄອນ ໂຮ່ຈິມິນ ເຊີດຊູການປະກອບສ່ວນຂອງບັນດານັກປັນຍາຊົນຫວຽດນາມ ຢູ່ຕ່າງປະເທດ

ເຂົ້າຮ່ວມການພົບປະມີ ທ່ານ ເລຮົ່ງລຽມ, ຮອງປະທານສູນກາງສະມາຄົມມິດຕະພາບ ຫວຽດນາມ - ກຳປູເຈຍ ພ້ອມກັບບັນດາອະດີດນັກຊ່ຽວຊານ, ອະດີດທະຫານອາສາສະໝັກ ແລະ ສະມາຊິກສະມາຄົມມິດຕະພາບ ຫວຽດນາມ - ກຳປູເຈຍ ຈຳນວນຫຼວງຫຼາຍ.

ນະຄອນ ໂຮ່ຈິມິນ: ພົບປະກັບອະດີດນັກຊ່ຽວຊານ ຫວຽດນາມ ເພື່ອຊ່ວຍເຫຼືອເພື່ອນມິດ ກຳປູເຈຍ

ການພົບປະສະເຫຼີມສະຫຼອງ ຈັດຕັ້ງໂດຍຄະນະຕິດຕໍ່ພົວພັນຂອງອະດີດນັກຊ່ຽວຊານ ຫວຽດນາມ ຊ່ວຍເຫຼືອເພື່ອນມິດ ກໍາປູເຈຍ ຢູ່ນະຄອນໂຮ່ຈິມິນ. (ພາບ: htv.com.vn)

ກ່າວຄຳປາໄສທີ່ເຫດການ, ທ່ານ ເລຮົ່ງລຽມ ໄດ້ຮັບຮູ້ການປະກອບສ່ວນຂອງບັນດາອະດີດນັກຊ່ຽວຊານ, ອະດີດທະຫານອາສາສະໝັກ ຫວຽດນາມ ໃນການເພີ່ມພູນຄູນສ້າງສາຍພົວພັນມິດຕະພາບລະຫວ່າງ ຫວຽດນາມ - ກຳປູເຈຍ. ທ່ານໃຫ້ຮູ້ວ່າ ການພົວພັນລະຫວ່າງສອງປະເທດໄດ້ປັບປຸງ ແລະ ພັດທະນາຢ່າງບໍ່ຢຸດຢັ້ງ, ໃນນັ້ນ ການທູດປະຊາຊົນມີບົດບາດສຳຄັນ, ຄຽງຄູ່ກັບການທູດຂອງພັກ ແລະ ການຕ່າງປະເທດຂອງລັດ ປະກອບສ່ວນຮັບໃຊ້ຜົນປະໂຫຍດຂອງປະເທດຊາດ ແລະ ປົກປັກຮັກສາສັນຕິພາບ. ທ່ານເນັ້ນໜັກ ຄວາມຕ້ອງການຂອງການໂຄສະນາ, ການສຶກສາ ແລະ ການເຊື່ອມຕໍ່ລະຫວ່າງສອງປະເທດ.

ຫວນຄືນຄວາມຊົງຈຳກ່ຽວກັບໄລຍະແຫ່ງການຕໍ່ສູ້ອັນທຸກຍາກລຳບາກແຕ່ເຕັມໄປດ້ວຍຄວາມຮັກເພງ, ບັນດາອະດີດທະຫານອາສາສະມັກ ແລະ ນັກຊ່ຽວຊານ ຫວຽດນາມ ພ້ອມກັນຫວນຄືນຂະບວນການຊ່ວຍເຫຼືອກຳລັງຮັກຊາດ ກຳປູເຈຍ ສາມັກຄີກັນຕໍ່ສູ້ພາຍໃຕ້ຄັນທຸງຄວາມເປັນທຳຂອງແນວຮົບສາມັກຄີຊາດກູ້ຊາດ ກຳປູເຈຍ. ຍ້ອນການໜູນຊ່ວຍນີ້ ໄດ້ປະກອບສ່ວນສຳຄັນເຂົ້າໃນການໂຄ່ນລົ້ມລະບອບດັບສູນເຊື້ອຊາດ, ສະກັດກັ້ນຄວາມສ່ຽງທີ່ອາດຈະເກີດວິນາດສະກຳຂຶ້ນອີກ ແລະ ຟື້ນຟູປະເທດ ກຳປູເຈຍ ຄືນໃໝ່.

ບັນດາຜູ້ແທນໄດ້ຖ່າຍຮູບທີ່ລະນຶກ. (ພາບ: ສະມາຄົມມິດຕະພາບ ຫວຽດນາມ - ກຳປູເຈຍ ນະຄອນ ໂຮ່ຈີມິນ)

ທີ່ການພົບປະ, ບັນດາອະດີດນັກຊ່ຽວຊານ ກໍ່ສະແດງຄວາມຫວັງວ່າ ອຳນາດການປົກຄອງບັນດາຂັ້ນຈະສືບຕໍ່ເອົາໃຈໃສ່, ເບິ່ງແຍງຊີວິດການເປັນຢູ່ຂອງບັນດາຜູ້ທີ່ເຄີຍໄປປະຕິບັດໜ້າທີ່ສາກົນຢູ່ ກຳປູເຈຍ, ພ້ອມກັນນັ້ນ ກໍ່ມີບັນດານະໂຍບາຍໜູນຊ່ວຍປະຊາຄົນຊາວ ກຳປູເຈຍ ທີ່ມີເຊື້ອຊາດ ຫວຽດນາມ ໃຫ້ມີຊີວິດທີ່ໝັ້ນຄົງຕື່ມອີກ.

ເນື່ອງໃນໂອກາດນີ້, ຄະນະຕິດຕໍ່ພົວພັນອະດີດນັກຊ່ຽວຊານ ຫວຽດນາມ ຊ່ວຍເຫຼືອເພື່ອນມິດ ກຳປູເຈຍ ຢູ່ນະຄອນ ໂຮ່ຈີມິນ ໄດ້ບູລະນະຄະນະປະຈຳໃຫ້ສົມບູນ. ພິເສດ, ທ່ານ ເລຮົ່ງລຽມ ໄດ້ປະດັບຫຼຽນກາລະນຶກ “ເພື່ອນ້ຳໃຈມິດຕະພາບ ຫວຽດນາມ - ກຳປູເຈຍ” ແລະ ໃບຍ້ອງຍໍຂອງສູນກາງສະມາຄົມມິດຕະພາບ ຫວຽດນາມ - ກຳປູເຈຍ ໃຫ້ແກ່ບັນດາບຸກຄົນທີ່ມີຜົນງານດີເດັ່ນ, ຮັບຮູ້ບັນດາການປະກອບສ່ວນຢ່າງໝັ້ນຄົງໃນການເພີ່ມພູນຄູນສ້າງການພົວພັນສາມັກຄີລະຫວ່າງ 2 ປະເທດ.