ວັນທີ 30 ຕຸລາ ແມ່ນວັນສະເຫຼີມສະຫຼອງ 74 ປີແຫ່ງວັນມູນເຊື້ອທະຫານອາສາສະໝັກ ແລະຊ່ຽວຊານຫວຽດນາມ ຢູ່ລາວ (30-10-1949/30-10-2023).
ກ່ອນນີ້ 74 ປີ, ວັນທີ 30 ຕຸລາ 1949, ຄະນະປະຈຳສູນກາງພັກກອມມູນິດອິນດູຈີນ ໄດ້ຕົກລົງວ່າ: “ບັນດາກໍາລັງການທະຫານຫວຽດນາມ ຕໍ່ສູ້ ແລະປະຕິບັດງານຊ່ວຍເຫຼືອລາວ ຈັດຕັ້ງເປັນລະບົບສະເພາະໃນນາມວ່າ ທະຫານອາສາສະໝັກ”. ນີ້ບໍ່ພຽງແຕ່ແມ່ນຂີດໝາຍປະຫວັດສາດທີ່ສຳຄັນ, ຂີດໝາຍບາດກ້າວພັດທະນາ ແລະ ເຕີບໃຫຍ່ຂະຫຍາຍຕົວຂອງກຳລັງການທະຫານຢູ່ສະໜາມຮົບລາວ ເທົ່ານັ້ນ, ຫາກຍັງຢືນຢັນແນວທາງ, ທັດສະນະທີ່ຖືກຕ້ອງຂອງພັກ ໃນການປະຕິບັດໜ້າທີ່ສາກົນອີກດ້ວຍ. ນັບແຕ່ນັ້ນມາ, ວັນທີ 30 ຕຸລາ 1949 ໄດ້ຮັບຖືວ່າແມ່ນວັນມູນເຊື້ອຂອງທະຫານອາສາສະໝັກ ແລະ ຊ່ຽວຊານຫວຽດນາມ ຢູ່ລາວ.
 |
| ຮ່ວມສໍາພັນສູ້ຮົບ ລາວ-ຫວຽດ ໃນການຕໍ່ສູ້ຕ້ານລ່າເມືອງຂຶ້ນຝຣັ່ງ ປີ 1950. ພາບເອກະສານ: TTXVN |
ທະຫານອາສາສະໝັກ ແລະຊ່ຽວຊານຫວຽດນາມ ໄດ້ປະກອບສ່ວນຢ່າງໃຫຍ່ຫຼວງ, ສຳເລັດໜ້າທີ່ພ້ອມກັບກອງທັບ ແລະປະຊາຊົນລາວ ຍາດໄດ້ໄຊຊະນະຢ່າງສົມບູນໃນສົງຄາມຕໍ່ສູ້ຕ້ານພວກລ່າເມືອງຂຶ້ນຝຣັ່ງ ແລະພວກຈັກກະພັດອາເມລິກາ (1945 - 1975). ຜ່ານການສູ້ຮົບສອງຄັ້ງ, ໄດ້ມີພະນັກງານ, ນັກຮົບ ເຊິ່ງແມ່ນທະຫານອາສາສະໝັກ ແລະຊ່ຽວຊານຫວຽດນາມ ນັບໝື່ນຄົນ ໄດ້ເສຍສະຫຼະຊີວິດຢູ່ສະໜາມຮົບລາວ. ເພື່ອຮັບຮູ້ການອຸທິດສ່ວນ, ການເສຍສະຫຼະ, ການຊ່ວຍເຫຼືອອັນໃຫຍ່ຫຼວງຂອງທະຫານອາສາສະໝັກ ແລະຊ່ຽວຊານຫວຽດນາມ ຢູ່ລາວ, ທ່ານພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ ໄດ້ຢືນຢັນວ່າ: “ກອງທັບ ແລະປະຊາຊົນລາວ ຍາມໃດກໍ່ຈົດຈຳ ແລະຮູ້ບຸນຄຸນຕໍ່ການເສຍສະຫຼະອັນສູງສົ່ງຂອງທະຫານອາສາສະໝັກ ແລະຊ່ຽວຊານຫວຽດນາມ ຕໍ່ພາລະກິດຕໍ່ສູ້ປົດປ່ອຍຊາດໃນເມື່ອກ່ອນ, ກໍ່ຄືການປະກອບສ່ວນອັນໃຫຍ່ຫຼວງ ເຂົ້າໃນພາລະກິດປົກປັກຮັກສາ ແລະພັດທະນາປະເທດລາວ ໃນປະຈຸບັນ”.
ດ້ວຍບັນດາໝາກຜົນທີ່ບັນລຸໄດ້, ທະຫານອາສາສະໝັກ ແລະຊ່ຽວຊານການທະຫານຫວຽດນາມ ບໍ່ພຽງແຕ່ສຳເລັດໜ້າທີ່ເຊິ່ງພັກ, ລັດ ແລະກອງທັບປະຊາຊົນຫວຽດນາມ ມອບໃຫ້ເປັນຢ່າງດີເທົ່ານັ້ນ, ຫາກຍັງໄດ້ປະກອບສ່ວນອັນໃຫຍ່ຫຼວງເຂົ້າໃນການສ້າງສາຍພົວພັນອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ - ລາວ ແລະລາວ-ຫວຽດນາມ ໃນມື້ນີ້.
ໃນວິວັດແຫ່ງການປະຕິບັດໜ້າທີ່ສາກົນຢູ່ລາວ, ຄວາມຈົງຮັກພັກດີ, ບໍລິສຸດຜຸດຜ່ອງ, ຄວາມສຸດຈິດສຸດໃຈຕໍ່ເພື່ອນລາວ, ພ້ອມກັບການເສຍສະຫຼະ ແລະວິລະກຳອັນສະຫງ່າລາສີຂອງທະຫານອາສາສະໝັກ ແລະຊ່ຽວຊານການທະຫານ ໄດ້ສ້າງຄວາມຮັກແພງອັນດີງາມ, ເຊິ່ງການນໍາ ແລະປະຊາຊົນລາວ ຍາມໃດກໍ່ຈົດຈໍາ, ຖືນັ້ນແມ່ນສັນຍາລັກທີ່ອະມະຕະແຫ່ງສາຍພົວພັນທີ່ສັດຊື່ບໍລິສຸດຜຸດຜ່ອງ, ຫາຍາກຢູ່ໃນໂລກ ລະຫວ່າງສອງປະເທດ ລາວ-ຫວຽດນາມ.
ບູນມີ
