ທ່ານ ເຢື່ອງວັນຕຽນ ດຳລົງຕຳແໜ່ງປະທານສະມາຄົມມິດຕະພາບ ຫວຽດນາມ

ຍສໝ - ວັນທີ 18 ມັງກອນນີ້, ສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ໄດ້ຈັດກອງປະຊຸມໃຫຍ່ຄັ້ງທີ IV, ອາຍຸການ 2024 - 2029.

	ທ່ານນາຍົກລັດຖະມົນຕີ ຫວຽດນາມ: ນຳແຂວງ ຢຸນໜານ ແລະ ແຂວງ ລາວກາຍ ກາຍເປັນສູນເຊື່ອມຕໍ່ການຄ້າລະຫວ່າງຈີນ ກັບ ອາຊຽນ
	ທ່ານ ຫງວຽນວັນຫວູມິງ ດຳລົງຕຳແໜ່ງເປັນປະທານສະມາຄົມມິດຕະພາບ ຫວຽດນາມ - ໂຮນລັງ ແຂວງ ດົ່ງທາບ

ເຂົ້າຮ່ວມກອງປະຊຸມມີທ່ານ ນາງ ລັດຕະນາ ສີຫາລາດ, ຮອງເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຫວຽດນາມ; ທ່ານ ເຢື່ອງວັນຕຽນ, ປະທານຄະນະກຳມະການແນວໂຮມແຫ່ງຊາດ ຫວຽດນາມ ແຂວງ ໄທງວຽນ; ທ່ານນາງ ມາຍທິທຸຍງາ, ຮອງປະທານສະພາປະຊາຊົນແຂວງ ໄທງວຽນ.

ທ່ານ ເຢື່ອງວັນຕຽນ ດຳລົງຕຳແໜ່ງປະທານສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ.

ຄະນະບໍລິຫານງານສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ຊຸດທີ IV, ອາຍຸການ 2024 - 2029 ໄດ້ສະເໜີຕົວຕໍ່ກອງປະຊຸມ. (ພາບ: thainguyen.gov.vn)

ບົດລາຍງານທີ່ກອງປະຊຸມໄດ້ຊີ້ແຈ້ງວ່າ: ອາຍຸການ 2019 - 2024, ສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ໄດ້ຜັນຂະຫຍາຍຢ່າງຄົບຊຸດ ແລະ ມີປະສິດທິຜົນໃນບັນດາຂົງເຂດ, ສຳເລັດໜ້າທີ່ທີ່ໄດ້ວາງອອກ. ສະມາຄົມໄດ້ມີບາດກ້າວການພັດທະນາໃໝ່ກ່ຽວກັບຂອບຂະໜາດ, ການຈັດຕັ້ງຢູ່ທຸກຂັ້ນ; ປະຕິບັດວຽກງານໂຄສະນາຍົກສູງຄວາມຮັບຮູ້ໄດ້ເປັນຢ່າງດີ, ສຶກສາກ່ຽວກັບປະຫວັດສາດສາຍພົວພັນແບບພິເສດ ຫວຽດນາມ - ລາວ ໃຫ້ເຖິງພະນັກງານ, ສະມາຊິກສະມາຄົມ ແລະ ປະຊາຊົນຢ່າງເລີກເຊິ່ງ, ປະກອບສ່ວນປົກປັກຮັກສາ ແລະ ເພີ່ມພູນຄູນສ້າງສາຍພົວພັນອັນດີງາມລະຫວ່າງ ຫວຽດນາມ - ລາວ; ຈັດຕັ້ງບັນດາການເຄື່ອນໄຫວສະເຫຼີມສະຫຼອງບັນດາວັນບຸນໃຫຍ່ຂອງລາວ ແລະ ບັນດາເຫດການສຳຄັນໃນສາຍພົວພັນ ຫວຽດນາມ - ລາວ. ຜ່ານການເຄື່ອນໄຫວມິດຕະພາບ ໄດ້ມີຫຼາຍລາຍການຮ່ວມມືກ່ຽວກັບເສດຖະກິດ, ການສຶກສາ ແລະ ບຳລຸງສ້າງ. ນັບແຕ່ປີ 2012 ເປັນຕົ້ນມາ, ໄດ້ມີວິສາຫະກິດຂອງ ໄທງວຽນ 20 ກວ່າແຫ່ງໄດ້ລົງທຶນກໍ່ສ້າງອົງປະກອບໂຄງລ່າງ, ການບໍລິການ, ການທ່ອງທ່ຽວ, ພັດທະນາເສດຖະກິດຢູ່ລາວ. ຢູ່ແຂວງ ໄທງວຽນ, ປະຈຸບັນ ມີນັກສຶກສາລາວ ເກືອບ 1.200 ຄົນທີ່ພວມຮ່ຳຮຽນ ແລະ ຄົ້ນຄ້ວາຢູ່ບັນດາມະຫາວິທະຍາໄລ, ວິທະຍາໄລໃນບໍລິເວນແຂວງ.

ໃນອາຍຸການ 2024-2029, ສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ຈະສືບຕໍ່ຍູ້ແຮງການໂຄສະນາເຜີຍແຜ່ບັນດາແຜນນະໂຍບາຍ, ແນວທາງ, ນະໂຍບາຍຂອງພັກ, ກົດໝາຍຂອງລັດ ກ່ຽວກັບການພົວພັນພິເສດ ແລະ ການຮ່ວມມືຮອບດ້ານ ຫວຽດນາມ - ລາວ; ລະດົມສະມາຊິກສະມາຄົມ ແລະ ປະຊາຊົນເຂົ້າຮ່ວມບັນດາການເຄື່ອນໄຫວມິດຕະພາບ ຫວຽດນາມ - ລາວ; ຊຸກຍູ້ການຮ່ວມມື, ການລົງທຶນຮອບດ້ານໃນທຸກຂົງເຂດລະຫວ່າງ ໄທຫງວຽນ ແລະ ບາງແຂວງຂອງລາວ...

ກ່າວຄຳປາໄສທີ່ກອງປະຊຸມ, ທ່ານນາງ ມາຍທິທຸຍງາ ໄດ້ຍ້ອງຍໍບັນດາຜົນງານທີ່ສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ທີ່ບັນລຸໄດ້. ທ່ານນາງ ສະເໜີວ່າ ໃນອາຍຸການຕໍ່ໄປ, ສະມາຄົມ ຈົ່ງສືບຕໍ່ປັບປຸງ, ພັດທະນາອົງການ; ສຸມໃສ່ການກໍ່ສ້າງ ແລະ ບໍາລຸງລ້ຽງຖັນແຖວພະນັກງານຂອງສະມາຄົມໃຫ້ມີການເຄື່ອນໄຫວຢ່າງຕັ້ງໜ້າ, ເປັນແບບຢ່າງ, ຂະຫຍັນຂັນເຄື່ອນ, ມີຫົວຄິດປະດິດສ້າງ, ສຸມໃສ່ການປ່ຽນແປງໃໝ່ເນື້ອໃນ. ທ່ານນາງ ກໍ່ຮຽກຮ້ອງໃຫ້ບັນດາພະແນກ, ຂະແໜງການ, ອົງການ, ຫົວໜ່ວຍສົມທົບ, ໜູນຊ່ວຍ, ສ້າງເງື່ອນໄຂໃຫ້ສະມາຄົມມິດຕະພາບ ຫວຽດນາມ - ລາວ ປະຕິບັດບັນດາເປົ້າໝາຍ ແລະ ໜ້າທີ່ຂອງຕົນໃນອາຍຸການໃໝ່, ປະກອບສ່ວນປັບປຸງ ແລະ ຮັດແໜ້ນການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງແຂວງ ໄທງວຽນ ກັບບັນດາທ້ອງຖິ່ນ, ຫົວໜ່ວຍຂອງລາວ.

ຫຼາຍກົມກອງລວມໝູ່, ບຸກຄົນໄດ້ຮັບການຍ້ອງຍໍຍ້ອນມີການປະກອບສ່ວນໃນການພົວພັນທາງການທູດປະຊາຊົນລະຫວ່າງແຂວງ ໄທງວຽນ ແລະ ບັນດາທ້ອງຖິ່ນຂອງລາວ. (ພາບ: thainguyen.gov.vn)

ກອງປະຊຸມໄດ້ເລືອກຕັ້ງຄະນະບໍລິຫານງານສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ຊຸດທີ IV, ອາຍຸການ ປີ 2024 - 2029, ລວມມີ 25 ທ່ານ; ຄະນະປະຈຳສະມາຄົມ ລວມມີ 5 ທ່ານ ແລະ ຄະນະກວດກາ ລວມມີ 3 ທ່ານ. ປະທານຄະນະກຳມະການແນວໂຮມແຫ່ງຊາດ ຫວຽດນາມ ແຂວງ ໄທງວຽນ, ທ່ານ ເຢື່ອງວັນຕຽນ ໄດ້ຮັບເລືອກຕັ້ງໃຫ້ດຳລົງຕຳແໜ່ງປະທານສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ອາຍຸການ 2024 - 2029.

ເນື່ອງໃນໂອກາດນີ້, 7 ບຸກຄົນ ແລະ 4 ກົມກອງລວມໝູ່ໄດ້ຮັບໃບຍ້ອງຍໍຈາກທ່ານປະທານຄະນະກຳມະການປະຊາຊົນແຂວງ ໄທງວຽນ ຍ້ອນມີປະກອບສ່ວນຫຼາຍຢ່າງເຂົ້າໃນການເຄື່ອນໄຫວຍົກລະດັບການພົວພັນຮ່ວມມືຮອບດ້ານລະຫວ່າງແຂວງ ໄທງວຽນ ກັບບັນດາທ້ອງຖິ່ນ ແລະ ຫົວໜ່ວຍຂອງລາວ.

ພະນັກງານ ແຂວງ ຫຼວງນ້ຳທາ (ລາວ) ຈຳນວນ 175 ຄົນ ໄດ້ຮັບໃບຢັ້ງຢືນພາສາ ຫວຽດນາມ

ຍສໝ - ໃນໄລຍະ 7 ປີຜ່ານມາ, ພະແນກສຶກສາທິການ ແລະ ກິລາ ແຂວງ ຫຼວງນ້ຳທາ (ລາວ) ໄດ້ເປີດຫ້ອງຮຽນພາສາ ຫວຽດນາມ ຂັ້ນພື້ນຖານໃຫ້ແກ່ພະນັກງານ - ລັດຖະກອນພາຍໃນແຂວງ 7 ແຫ່ງ. ມາຮອດປະຈຸບັນ, ມີຜູ້ຮຽນ 175 ຄົນໄດ້ຮັບໃບຢັ້ງຢືນພາສາ ຫວຽດນາມ.