ບັນດາໄລຍະງານມະໂຫລານມິດຕະພາບປະຊາຊົນ ຫວຽດນາມ - ອິນເດຍ: ການເດີນທາງເຊື່ອມຕໍ່ປະຊາຊົນສອງປະເທດ

	ສະເຫຼີມສະຫຼອງ 80 ປີແຫ່ງວັນກອງທັບປະຊາຊົນ ຫວຽດນາມ ຢູ່ ລັດເຊຍ, ອິນເດຍ ແລະ ອົດສະຕາລີ
	ຫວຽດນາມ ລື່ນກາຍ ອິນເດຍ ກ່ຽວກັບຄ່າໃຊ້ຈ່າຍໃນການຜະລິດທີ່ຕໍ່າ

​ພ້ອມກັບ​ວາ​ລະ​ສານຍຸກສະໄໝ ຫວນ​ຄືນ​ງານ​ມະ​ໂຫລານ​ມິດຕະພາບ​ປະຊາຊົນ ຫວຽດນາມ - ອິນ​ເດຍແຕ່ລະຄັ້ງ. ​ແຕ່ລະ​ໄລຍະ​ແມ່ນ​ຂີດ​ໝາຍ​ທີ່​ມີ​ຄວາມ​ໝາຍ​ໃນ​ການ​ເດີນທາງ​ຮ່ວມ​ມື ​ແລະ ຕິດພັນກັນ​ລະຫວ່າງ​ຊາດ.

ງານມະ​ໂຫລານ​​ຄັ້ງ​ທຳ​ອິດ (2007) ​ໄດ້​ດຳ​ເນີນ​ຢູ່ ​ອິນ​ເດຍ ດ້ວຍ​ຫົວ​ຂໍ້ “ອິນ​ເດຍ - ຫວຽດນາມ: ພ້ອມກັນກ້າວ​ໄປ​ໜ້າ​ ມຸ່ງ​ໄປ​ເຖິງ​ສັນຕິພາບ ​ແລະ ວັດທະນາ​ຖາວອນ”. ຄະນະ​ ​ຫວຽດນາມ ລວມມີ 34 ທ່ານ, ​ໂດຍ​ທ່ານ ເຈີ່ນ​ດັກເລິ້ຍ, ຮອງ​ປະທານ​ສະຫະພັນ​ບັນດາ​ອົງການ​ມິດຕະພາບ ຫວຽດນາມ ນຳ​ໜ້າ. ງານມະ​ໂຫລານໄດ້​ດຶງ​ດູດ​ຄວາມ​ສົນ​ໃຈ​ຂອງ​ວົງການການເມືອງ ​ແລະ ຫາງສຽງ​ຂອງ​ປະຊາຊົນ ​ອິນ​ເດຍ ດ້ວຍ​ບັນດາ​ການ​ເຄື່ອນ​ໄຫວ​ຄື: ການ​ພົບ​ປະ, ການສຳ​ມະ​ນາ, ​ແລກປ່ຽນ​ວັດທະນະທຳ, ການສົ່ງເສີມການ​ຄ້າ ​ແລະ ການ​ຢ້ຽມ​ຢາມ​ບັນດາ​ຮ່ອງຮອຍປະຫວັດສາດ.

ງານມະ​ໂຫລານ​ຄັ້ງ​ທີ 2 (2008) ​ໄດ້​ດຳ​ເນີນ​ຢູ່ ​ຮ່າ​ໂນ້ຍ, ກວາງ​ນິງ ​ແລະ ນະຄອນ ​ໂຮ່ຈິ​ມິນ (ຫວຽດນາມ) ມີ​ການ​ເຂົ້າ​ຮ່ວມ​ຂອງ​ຜູ້​ແທນ ​ອິນ​ເດຍ 54 ທ່ານ. ຄະ​ນະ​​​ໄດ້​ຮັບ​ການ​ຕ້ອນ​ຮັບ​ຢ່າງ​ສົມ​ກຽດ​ຈາກ​ທ່ານ​ປະ​ທານ​ປະ​ເທດ ຫງວຽນ​ມິງຈຽດ ແລະ ​ໄດ້​ເຂົ້າ​ຮ່ວມ​ການ​ເຄື່ອນ​ໄຫວ​ຫຼາຍ​ຢ່າງ​ ລວມມີ ​ການໂອ້ລົມສົນທະນາ, ການສຳມະນາ​ກ່ຽວ​ກັບ​ການ​ພົວ​ພັນ ​ຫວຽດ​ນາມ - ອິນ​ເດຍ, ການ​ພົບ​ປະ​ແລກ​ປ່ຽນ​ວັດ​ທະ​ນະ​ທຳ ແລະ ການ​ພົບ​ປະ​ກັບ​ການ​ນຳ​ຂອງ​ບັນ​ດາ​ອົງ​ການ​ຈັດ​ຕັ້ງ​ຂອງ ​ຫວຽດ​ນາມ.

ງານມະ​ໂຫລານ​ຄັ້ງ​ທີ 3 (2009) ​ໄດ້​ດຳ​ເນີນ​ຢູ່ 3 ລັດ​ຂອງ ອິນ​ເດຍ ຄື Andhra Pradesh, Kerela ​ແລະ Tamilnadu, ມີ​ການ​ເຂົ້າ​ຮ່ວມ​ຂອງ​ຜູ້​ແທນ ຫວຽດນາມ 25 ທ່ານ. ​ໃນ​ຂອບ​ເຂດງານມະ​ໂຫລານ, ຄະນະ​ຜູ້​ແທນ​ໄດ້​ເຂົ້າ​ຮ່ວມ​ການ​ໂອ້​ລົມ​ສົນທະນາ, ການສຳ​ມະ​ນາ​ກ່ຽວ​ກັບ​ການ​ພົວພັນ​​ສອງ​ປະ​ເທດ, ພ້ອມ​ກັນນັ້ນ ກໍ່​ຈັດ​ຕັ້ງ​ການ​ພົບ​ປະ​ແລກປ່ຽນ​ວັດທະນະທຳ ​ແລະ ການສະ​ແດງ​ສິລະ​ປະ.

ງານມະ​ໂຫລານ​ຄັ້ງ​ທີ 4 (2011) ໄດ້ຈັດຂຶ້ນ​ຢູ່​ ຫວຽດ​ນາມ, ດ້ວຍ​ການ​ເຂົ້າ​ຮ່ວມ​ຂອງຜູ້​ແທນ ອິນ​ເດຍ 26 ທ່ານ, ໃນ​ສະ​ພາບ​ການ​ສະ​ເຫຼີມ​ສະ​ຫຼອງ 40 ປີ​ແຫ່ງ​ວັນ​ສ້າງ​ຕັ້ງ​ການ​ພົວ​ພັນ​ທາງ​ການ​ທູດ​ລະ​ຫວ່າງ 2 ປະ​ເທດ. ທ່ານ​​ຮອງ​ປະທານ​ປະ​ເທດ ນາງ ຫງວຽນ​ທິຢວານ ​ໄດ້​​ຕ້ອນຮັບ​ຄະນະ. ງານມະ​ໂຫລານໄດ້​ຈັດ​ຕັ້ງ​ຫຼາຍການ​ເຄື່ອນ​ໄຫວ​ວັດ​ທະ​ນະ​ທຳ, ການສຳ​ມະ​ນາ ແລະ ການ​ພົບ​ປະ​ແລກ​ປ່ຽນ​ດ້ານ​ການ​ເມືອງ​ຢູ່​ ຮ່າ​ໂນ້ຍ ແລະ ບັນດາທ້ອງ​ຖິ່ນ.

ງານມະ​ໂຫລານ​ຄັ້ງ​ທີ 5 (2012) ຢູ່ ອິນ​ເດຍ, ຄະນະ​ຜູ້​ແທນ​ ຫວຽດນາມ ລວມມີ 30 ທ່ານ, ດ້ວຍ​ບັນດາ​ການ​ເຄື່ອນ​ໄຫວ​ແລກປ່ຽນ​ດ້ານ​ສິລະ​ປະ ​ແລະ ການພົບປະກັບ​ບັນດາ​ອົງການ​ສື່​ມວນ​ຊົນ, ພັກຝ່າຍ​ຢູ່ Pondicherry ​ແລະ Chennai. ພິທີ​ເປີດ​ໄດ້​ດຶງ​ດູດ​ຜູ້​ເຂົ້າ​ຮ່ວມ 10.000 ກວ່າ​ຄົນ ​ແລະ ​ໄດ້​ຮັບ​ການ​ຖ່າຍ​ທອດ​ສົດ.

ງານມະ​ໂຫລານ​ຄັ້ງ​ທີ 6 (2013) ​ໄດ້​ຈັດ​ຂຶ້ນ​ຢູ່ ​ຫວຽດນາມ, ຄະນະ​ຜູ້​ແທນ ​ອິນ​ເດຍ ລວມມີ 30 ທ່ານ​ໄດ້​ເຂົ້າ​ຮ່ວມ​ບັນດາ​ການ​ເຄື່ອນ​ໄຫວ​ທີ່​ຫຼາກ​ຫຼາຍ​ຢູ່​ ຮ່າ​ໂນ້ຍ, ດ່າໜັງ, ນະຄອນ​ ໂຮ່ຈິ​ມິນ ລວມມີ ​ການ​ຢ້ຽມຢາມ​ບັນດາ​ຮ່ອງຮອຍ​ປະຫວັດສາດ ​ແລະ ​ເຂົ້າ​ຮ່ວມບັນດາ​ການ​ໂອ້​ລົມ​ສົນທະນາກ່ຽວກັບການ​ແລກປ່ຽນ​ວັດທະນະທຳ.

ງານມະ​ໂຫລານມິດຕະພາບ​ປະຊາຊົນ ​ຫວຽດນາມ - ອິນ​ເດຍ ຄັ້ງ​ທີ 6 ຢູ່​ຮ່າ​ໂນ້ຍ.

ງານມະ​ໂຫລານ​ຄັ້ງ​ທີ 7 (26 ຕຸລາ – 2 ພະຈິກ 2015) ​ໄດ້​ຈັດ​ຂຶ້ນ​ຢູ່​ຫຼາຍ​ແຫ່ງ​ຂຶ້ນກັບສອງ​ລັດ Telangala ​ແລະ Bengaluru (ອິນ​ເດຍ). ຄະນະ​ຜູ້​ແທນ​ ຫວຽດນາມ ລວມມີ 30 ທ່ານ ​ໂດຍ​ທ່ານ ຫວູຊວນ​ຮົ່ງ, ປະທານ​ສະຫະພັນ​ບັນດາ​ອົງການ​ມິດຕະພາບ ຫວຽດນາມ ເປັນຫົວໜ້າຄະນະ. ຄະນະຜູ້ແທນ ຫວຽດນາມ ໄດ້ພົບປະ ແລະ ເຮັດວຽກກັບອົງຄະນະພັກກອມມູນິດ ອິນເດຍ ແລະ ພັກກອມມູນິດ ອິນເດຍ (ມາກຊິດ) ຢູ່ 2 ລັດ Telangala ແລະ Bengaluru, ແລະ ບັນດາອົງການ AIPSO ຢູ່ສູນກາງ ແລະ ທ້ອງຖິ່ນ; ​ໃຫ້​ສຳພາດ​ຕໍ່​ບັນດາ​ອົງການ​ສື່​ມວນ​ຊົນ​ທີ່​ຄະນະ​ຜູ້​ແທນ​ໄປ​; ໄດ້​ຈັດ​ຕັ້ງ​ການ​ພົບ​ປະ​ແລກ​ປ່ຽນ ແລະ ສະ​ແດງ​ສິ​ລະ​ປະ 7 ຄັ້ງ​ໂດຍ​ມີ​ການ​ເຂົ້າ​ຮ່ວມ​ຂອງ​ປະ​ຊາ​ຊົນ​​​ບັນດາຊັ້ນວັນນະໃນໝູ່ປະຊາຊົນຢູ່ ​ອິນ​ເດຍ ນັບ​ພັນ​ຄົນ.

ງານມະ​ໂຫລານມີການ​ການ​ເຂົ້າ​ຮ່ວມ​ຂອງ​ປະ​ຊາ​ຊົນ​ນັບ​ພັນ​ຄົນ, ພິ​ເສດ​ແມ່ນ​ຢູ່​ເທດ​ສະ​ບານ Tumkur, ບ່ອນ​ທີ່ດຳເນີນບັນດາ​ຂະ​ບວນ​ແຫ່​ວັດ​ທະ​ນະ​ທຳ​.

ງານມະ​ໂຫລານຄັ້ງ​ທີ 8 (2 ທັນວາ - 18 ທັນວາ 2016) ຄະນະຜູ້ແທນ ອິນເດຍ ລວມມີ 34 ທ່ານ ຈາກຫຼາຍພັກຝ່າຍຫຼັກ ແລະ ນັກສິລະປິນມາຈາກລັດ ແລະ ນະຄອນ Kanartaka, Telegana, Uttrakhand, Puducherry, New Delhi.

ນອກຈາກ ບັນດາ​ການ​ເຄື່ອນ​ໄຫວ​ດ້ານ​ການ​ເມືອງ, ຄະນະ​ ອິນ​ເດຍ ຍັງ​ໄດ້​ຊອກຮູ້​ກ່ຽວ​ກັບ​ສະພາບ​ຕົວ​ຈິງ​ຢູ່ ຫວຽດນາມ ຜ່ານບັນດາ​ການ​ເຮັດວຽກ ແລະ ການພົບປະແລກປ່ຽນ​ກັບ​ສະຫະພັນ​ບັນດາ​ອົງການ​ມິດຕະພາບ​ທ້ອງ​ຖິ່ນ​ຢູ່ ຮ່າ​ໂນ້ຍ, ເກີ່ນເທີ ​ແລະ ນະຄອນ ​ໂຮ່ຈີ​ມິນ.

ງານມະ​ໂຫລານຄັ້ງ​ທີ 9 (2017) ຢູ່​ ອິນ​ເດຍ ໂດຍມີ​ການ​ເຂົ້າ​ຮ່ວມ​ຂອງ​ຄະ​ນະ​ ​ຫວຽດ​ນາມ ລວມມີ 28 ທ່ານ ໂດຍ​ທ່ານ ບຸ່ຍ​ຄັກ​ເຊີນ, ຮອງ​ປະ​ທານ​ສະ​ຫະ​ພັນ​ອົງ​ການ​ມິດ​ຕະ​ພາບ ​ຫວຽດ​ນາມ ເປັນຫົວໜ້າຄະນະ. ບັນດາການ​ເຄື່ອນ​ໄຫວ​ຕົ້ນຕໍ​ ລວມມີ​ ການ​ພົບ​ປະ​ແລກປ່ຽນ​ດ້ານ​ສິລະ​ປະ, ການ​ພົບ​ປະ​ກັບ​ການນຳ​ພັກຝ່າຍ​ຂອງ​ອິນ​ເດຍ ​ແລະ​ ການເຂົ້າ​ຮ່ວມ​ເວທີປາໄສ​​ຢູ່​ນະຄອນ​ New Delhi, Chandigarh ແລະ Shimla.

ງານມະ​ໂຫລານຄັ້ງ​ທີ 10 (2019) ໄດ້​ຈັດ​ຂຶ້ນ​ຢູ່​ຫວຽດ​ນາມ, ຄະ​ນະ​ຜູ້​ແທນ ອິນ​ເດຍ ໄດ້​ເຂົ້າ​ຮ່ວມ​ບັນ​ດາ​ການ​ເຄື່ອນ​ໄຫວ​ຢູ່ ນິງບິ່ງ, ແຄ໋ງຮວ່າ, ນະ​ຄອນ ໂຮ່​ຈີ​ມິນ ແລະ ຮ່າ​ໂນ້ຍ. ບັນດາ​ການ​ເຄື່ອນ​ໄຫວ​ດັ່ງກ່າວນີ້​ບໍ່​ພຽງ​ແຕ່​ແນ​ໃສ່​ສະ​ເຫຼີ​ມສະຫຼອງ​ວັນ​ບຸນ​ຄົບຮອບ 10 ປີຂອງງານມະ​ໂຫລານ​ເທົ່າ​ນັ້ນ, ຫາກ​ຍັງ​ຊຸກຍູ້​ການ​ຮ່ວມ​ມືໃນບັນດາຂົງເຂດ​​ການ​ເມືອງ, ວັດທະນະທຳ ​ແລະ ການ​ຄ້າ​ອີກ​ດ້ວຍ.

ບັນດາ​ການ​ເຄື່ອນ​ໄຫວ​ຕົ້ນຕໍ​ຂອງ​ງານມະ​ໂຫລານ ​ລວມມີ: ພິທີ​ເປີດ​ງານ​ຢູ່​ນະຄອນ ນິງບິ່ງ; ການ​ໂອ້​ລົມ​ສົນທະນາ​ມິດຕະພາບ​ເພື່ອ​ຕີ​ລາຄາ​ໝາກຜົນ​ຂອງ ງານມະ​ໂຫລານ ​10 ຄັ້ງ ແລະ ແລກປ່ຽນ​ກ່ຽວ​ກັບ​ເນື້ອ​ໃນ ​ແລະ ມາດ​ຕະການ​ຈັດ​ຕັ້ງ​ງານມະ​ໂຫລານ​ໃນ​ໄລຍະ​ຈະ​ມາ​ເຖິງ​ຢູ່ ​ຮ່າ​ໂນ້ຍ; ພົບປະແລກປ່ຽນສິລະປະຢູ່ ແຄ໋ງຮວ່າ ແລະ ນະຄອນໂຮ່ຈີມິນ; ໄປ​ຢ້ຽມ​ຢາມ​ບັນ​ດາ​ຮ່ອງຮອຍ​ປະ​ຫວັດ​ສາດ ແລະ ທັດ​ສະ​ນີ​ຍະ​ພາບ​ຢູ່​ ຮ່າ​ໂນ້ຍ ແລະ ນະ​ຄອນ​ໂຮ່​ຈິ​ມິນ.

ລາຍການ​ສະ​ແດງ​ສິລະ​ປະ​ໂດຍບັນດານັກ​ສິລະ​ປິນ ອິນ​ເດຍ ສະແດງ​ໃນ​ຂອບ​ເຂດ​ງານ​ມະໂຫລານ​ມິດຕະພາບ​ປະຊາຊົນ​ ຫວຽດນາມ - ອິນ​ເດຍ ຄັ້ງ​ທີ 10 ຢູ່​ແຂວງ​ແຄ໋ງຮວ່າ.

ງານມະ​ໂຫລານ​ຄັ້ງ​ທີ 11 (1 ທັນ​ວາ - 6 ທັນ​ວາ 2023) ໄດ້ດຳ​ເນີນ​ຢູ່​ ອິນ​ເດຍ, ຄະ​ນະ​ຜູ້​ແທນ ​ຫວຽດ​ນາມ ລວມມີ 22 ທ່ານ ໂດຍ​ທ່ານ ຮ່າມິງເຫ້ວ, ອະ​ດີດ​ຮອງ​ປະ​ທານ​ຜູ້ປະຈຳສະ​ມາ​ຄົມ​ນັກ​ຂ່າວ​ ຫວຽດ​ນາມ, ຮອງ​ປະ​ທານ - ເລ​ຂາ​ທິການສະ​ມາ​ຄົມມິດຕະພາບ ຫວຽດ​ນາມ - ອິນເດຍ ເປັນຫົວໜ້າຄະນະໄດ້ເຂົ້າຮ່ວມບັນດາການເຄື່ອນໄຫວທາງດ້ານການເມືອງ, ວັດທະນະທຳ ແລະ ແລກປ່ຽນສິລະປະ ຢູ່ Tamil Nadu ແລະ Puducherry. ງານມະ​ໂຫລານ​ຄັ້ງ​ນີ້ ​ໄດ້​ຮັບ​ການ​ຕີ​ລາຄາ​ສູງ​ດ້ວຍການ​ເຂົ້າ​ຮ່ວມ​ຂອງ​ການ​ນຳ ​ແລະ ຜູ້ຊົງຄຸນວຸດທິ​ຫຼາຍ​ທ່ານ ​ເພື່ອ​ແນ​ໃສ່​ປັບປຸງນ້ຳໃຈ​ມິດຕະພາບ​ລະຫວ່າງ​ປະຊາຊົນ​ສອງ​ປະ​ເທດ.

ພິທີ​ເປີດງານມະ​ໂຫລານ​ໄດ້​ຈັດ​ຂຶ້ນຢ່າງສົມກຽດ​ຢູ່​ນະຄອນ Chennai. ທ່ານ Ma.Subramanian, ລັດຖະມົນຕີກະຊວງສາທາລະນະສຸກ ແລະ ສະຫວັດດິການຄອບຄົວລັດ Tamil Nadu ແລະ ລັດຖະມົນຕີ P.K. Sekar Babu, ທ່ານ Pallab Sengupta, ປະທານ​ສະພາ​ສັນຕິພາບ​ໂລກ, ປະທານ AIPSO ​ໄດ້​ເຂົ້າ​ຮ່ວມ ​ແລະ ກ່າວຄຳ​ປາ​ໄສ. ຄະນະ​ ​ຫວຽດນາມ ​ໄດ້​ສົມທົບ​ກັບ AIPSO ຈັດ​ຕັ້ງ 4 ລາຍການ​​ການ​ສະ​ແດງ ​ແລະ ແລກປ່ຽນສິລະ​ປະ​ຢູ່​ບັນດາ​ສູນ​ວັດທະນະທຳ, ມະຫາວິທະຍາ​ໄລ ​ແລະ ​ໂຮງຮຽນ​ມັດທະຍົມ​ຕອນ​ປາຍ ຢູ່​ນະຄອນ Chennai, ​ເມືອງ Kancheepuram, ລັດ Tamil Nadu ​ແລະ Puducherry.

ຫວຽດນາມ - ອິນເດຍ ມຸ່ງໄປເຖິງຈຸດໝາຍວົງເງິນການຄ້າສອງຝ່າຍບັນລຸ 20 ຕື້ USD ຍສໝ - ຫວຽດນາມ - ອິນເດຍ ໜູນຊ່ວຍ ແລະ ຊຸກຍູ້ການເຄື່ອນໄຫວໂອ້ລົມສົນທະນາ, ເຊື່ອມຕໍ່ການລົງທຶນ, ສ້າງເງື່ອນໄຂໃຫ້ວິສາຫະກິດຂອງ 2 ຝ່າຍເປີດກວ້າງການຮ່ວມມື, ລົງທຶນ ແລະ ດຳເນີນທຸລະກິດຢ່າງມີປະສິດທິຜົນ; ຍູ້​ແຮງ ​ແລະ ຜັນ​ຂະຫຍາຍ​ບັນດາ​ມາດ​ຕະການ​ຢ່າງ​ມີ​ປະສິດທິ​ຜົນ ​ເພື່ອແນໃສ່​ປະຕິບັດ​ສຳ​ເລັດ​ຈຸດໝາຍ​ວົງ​ເງິນ​ການ​ຄ້າ 2 ຝ່າຍ​ບັນລຸ 20 ຕື້ USD ​ໃນ​ໄລຍະ​ຈະ​ມາ​ເຖິງ.

ກອງປະຊຸມໃຫຍ່ຜູ້ແທນສະມາຄົມມິດຕະພາບ ຫວຽດນາມ - ອິນເດຍ ຄັ້ງທີ 3 ຍສໝ - ວັນ​ທີ 17 ມິຖຸນາ, ສະມາຄົມ​ມິດຕະພາບ​ ຫວຽດນາມ-​ອິນ​ເດຍ ​ແຂວງ ​ຝູ​ອຽນ ໄດ້​ຈັດ​ກອງ​ປະຊຸມໃຫຍ່ຜູ້ແທນ ​ຄັ້ງ​ທີ 3, ອາຍຸ​ການ 2023-2028. ​ໂດຍເຂົ້າ​ຮ່ວມກອງ​ປະຊຸມໃຫຍ່​ຜູ້ແທນ ມີ​ການ​ນຳ​ຄະນະ​ຂົນຂວາຍປະຊາຊົນພັກແຂວງ, ຄະນະໂຄສະນາສຶກສາພັກແຂວງ, ສະຫະພັນ​ບັນດາ​ອົງການ​ມິດຕະພາບ​ແຂວງ, ພ້ອມກັນກັບຜູ້​ແທນ​ໃນບໍລິເວນແຂວງ 60 ທ່ານ.