ຕອນຄ່ຳວັນທີ 10 ທັນວາ, ຢູ່ນະຄອນຫຼວງ ມົດສະກູ (ສະຫະພັນ ລັດເຊຍ), ສະຖານທູດ ຫວຽດນາມ ແລະ ຫ້ອງການທີ່ປຶກສາຝ່າຍປ້ອງກັນຊາດ ຫວຽດນາມ ປະຈຳ ລັດເຊຍ ໄດ້ສົມທົບກັນຈັດຕັ້ງພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ ແລະ 35 ປີແຫ່ງວັນບຸນປ້ອງກັນຊາດທົ່ວປວງຊົນ.
ໃນບັນຍາກາດອັນສະຫງ່າຜ່າເຜີຍ, ບັນດາຜູ້ແທນໄດ້ທວນຄືນໄລຍະທາງພັດທະນາຂອງກອງທັບປະຊາຊົນ ຫວຽດນາມ ໃນ 80 ປີຜ່ານມາ. ທ່ານເອກອັກຄະລັດຖະທູດ ຫວຽດນາມ ປະຈຳ ສະຫະພັນ ລັດເຊຍ ດັ້ງມິງຄອຍ ໃຫ້ຮູ້ວ່າ ໃນ 8 ທົດສະວັດຜ່ານມາ, ກອງທັບປະຊາຊົນ ຫວຽດນາມ ພ້ອມກັບທົ່ວພັກ ແລະ ທົ່ວປວງຊົນໄດ້ສ້າງບັນດາໄຊຊະນະອັນສະຫງ່າລາສີໃນພາລະກິດປົດປ່ອຍປະເທດຊາດ, ສ້າງສາ ແລະ ປົກປັກຮັກສາປະເທດຊາດ.
 |
| ທ່ານເອກອັກຄະລັດຖະທູດ ດັ້ງມິງຄອຍ ກ່າວຄຳປາໄສທີ່ພິທີ. (ພາບ: ສຳນັກຂ່າວສານ ຫວຽດນາມ) |
ໃນຕະຫຼອດໄລຍະການສ້າງຕັ້ງ, ຕໍ່ສູ້ ແລະ ເຕີບໂຕ, ກອງທັບປະຊາຊົນ ຫວຽດນາມ ໄດ້ຮ່ວມເດີນທາງພ້ອມກັບສາຍພົວພັນຕິດພັນກັນລະຫວ່າງ ຫວຽດນາມ ແລະ ສະຫະພາບ ໂຊວຽດ, ປະຈຸບັນແມ່ນສະຫະພັນ ລັດເຊຍ.
2 ປະເທດກະກຽມສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນ, ໃນນັ້ນ ນັບແຕ່ໄລຍະສົງຄາມປົກປັກຮັກສາປະເທດຊາດທີ່ຍິ່ງໃຫຍ່ໃນປີ 1941-1945, ບັນດາທະຫານອາສາສະໝັກສາກົນ ຫວຽດນາມ ໄດ້ຕໍ່ສູ້ ແລະ ເສຍສະຫຼະຊີວິດເພື່ອປົກປ້ອງ ມົດສະກູ.
ປະເທດຊາດ ແລະ ປະຊາຊົນ ຫວຽດນາມ ໄດ້ດຳລົງຊີວິດຢູ່ໃນຄວາມສັນຕິພາບນັບແຕ່ປີ 1975 ພາຍຫຼັງສົງຄາມ 30 ປີ, ໃນນັ້ນ ກອງທັບ ແລະ ປະຊາຊົນ ຫວຽດນາມ ບໍ່ເຄີຍລືມການຊ່ວຍເຫຼືອທີ່ຈິງໃຈ ແລະ ຊອບທຳຈາກອະດີດສະຫະພາບ ໂຊວຽດ ແລະ ສະຫະພັນ ລັດເຊຍ, ພິເສດ ແມ່ນບັນດານັກຊ່ຽວຊານ ແລະ ທີ່ປຶກສາດ້ານການທະຫານ.
ທ່ານຫົວໜ້າກົມໃຫຍ່ການຮ່ວມມືການທະຫານສາກົນ ພົນຕີ Aleksandr Kshimovsky ໄດ້ສະແດງຄວາມຊົມເຊີຍຢ່າງສຸດອົກສຸດໃຈໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ, ຢືນຢັນວ່າ ກອງທັບປະຊາຊົນ ຫວຽດນາມ ໄດ້ສືບທອດມູນເຊື້ອໄຊຊະນະຢ່າງສຳເລັດຜົນແຕ່ມື້ທໍາອິດຂອງການສ້າງຕັ້ງກັບ“ອ້າຍກົກ” ຂອງກອງທັບ - ພົນເອກ ຫວໍຫວຽນຢາບ, ຜູ້ທີ່ບໍ່ເຄີຍຫວັ່ນໄຫວຕໍ່ຄວາມຫຍຸ້ງຍາກ. ກຳລັງແຮງຄວາມສາມັກຄີ, ແຮງງານທີ່ປະດິດຄິດສ້າງ, ຄວາມກ້າຫານ, ສະຕິປັນຍາ ແລະ ຈິດໃຈຕໍ່ສູ້ຂອງກອງທັບ ໄດ້ກາຍເປັນບ່ອນອີງອັນໝັ້ນແກ່ນໃຫ້ປະເທດຊາດ.
ທ່ານພົນຕີ Kshimovsky ຢັ້ງຢືນມູນເຊື້ອການໜູນຊ່ວຍ ຫວຽດນາມ ນັບແຕ່ສະໄໝສະຫະພາບ ໂຊວຽດ, ມາຮອດປະຈຸບັນ, ເມື່ອປະຈຸບັນ ຫວຽດນາມ ແມ່ນຄູ່ຮ່ວມມືຍຸດທະສາດ ແລະ ໄສ້ເນື້ອເຊື່ອໃຈຂອງສະຫະພັນ ລັດເຊຍ ຢູ່ອາຊີຕາເວັນອອກສ່ຽງໃຕ້ ເວົ້າສະເພາະ ແລະ ອາຊີ - ປາຊີຟິກ ເວົ້າລວມ.
ໂດຍກໍ່ໃນຕອນຄ່ຳວັນທີ 10 ທັນວາ, ຢູ່ນະຄອນຫຼວງ ນິວເດລີ (ອິນເດຍ), ທ່ານເອກອັກຄະລັດຖະທູດ ຫວຽດນາມ ປະຈຳ ອິນເດຍ ຫງວຽນແທ່ງຫາຍ ໄດ້ເປັນປະທານທີ່ພິທີສະເຫຼີມສະຫຼອງ. ທ່ານເນັ້ນໜັກວ່າ 80 ປີຜ່ານມາ, ກອງທັບປະຊາຊົນ ຫວຽດນາມ ຍາມໃດກໍ່ແມ່ນກຳລັງທະຫານທີ່ຈົງຮັກພັກດີ ແລະ ໄວ້ເນື້ອເຊື່ອໃຈຂອງພັກ, ລັດ ແລະ ປະຊາຊົນ.
 |
| ທ່ານ ນາຍພົນເຮືອໂທ Tarun Sobti ຮອງຫົວໜ້າເສນາທິການກອງທັບເຮືອ ອິນເດຍ ກ່າວຄຳປາໄສທີ່ພິທີ. (ພາບ: ສຳນັກຂ່າວສານ ຫວຽດນາມ) |
ທ່ານເອກອັກຄະລັດຖະທູດ ໄດ້ຢ້ຳຄືນການໜູນຊ່ວຍຂອງ ອິນເດຍ ທີ່ມີຕໍ່ ຫວຽດນາມ ໃນຂະບວນການຕໍ່ສູ້ຍາດເອົາເອກະລາດ ກໍ່ຄືຄວາມມານະພະຍາຍາມມຸ່ງໝັ້ນເດີນຕາມສັນຕິພາບ ແລະ ການພັດທະນາ, ເນັ້ນໜັກເຖິງສາຍພົວພັນມິດຕະພາບທີ່ເລິກເຊິ່ງ, ຍາວນານລະຫວ່າງ ຫວຽດນາມ ແລະ ອິນເດຍ ໄດ້ພັດທະນາຢ່າງບໍ່ຢຸດຢັ້ງ, ພິເສດແມ່ນໃນຂົງເຂດປ້ອງກັນຊາດ ແລະ ປ້ອງກັນຄວາມສະຫງົບ.
2 ຝ່າຍໄດ້ຜັນຂະຫຍາຍຖະແຫຼງການວິໄສທັດຮ່ວມກ່ຽວກັບການພົວພັນຄູ່ຮ່ວມມືດ້ານປ້ອງກັນປະເທດ ອິນເດຍ - ຫວຽດນາມ ມຸ່ງໄປເຖິງປີ 2030 ຢ່າງມີປະສິດທິຜົນ, ສືບຕໍ່ຊອກຮູ້ບັນດາທິດທາງການຮ່ວມມືໃໝ່ໃນບັນດາຂົງເຂດຄື: ຮັກສາສັນຕິພາບ, ກູ້ໄພໄພທຳມະຊາດ, ຄວາມໝັ້ນຄົງທາງທະເລ.
ທ່ານເອກອັກຄະລັດຖະທູດເຊື່ອໝັ້ນວ່າ, ດ້ວຍການຮ່ວມມືກັນ, ຫວຽດນາມ ແລະ ອິນເດຍ ສາມາດສ້າງອະນາຄົດແຫ່ງຄວາມວັດທະນາຖາວອນ, ສັນຕິພາບ ແລະ ສະຖຽນລະພາບໃນພາກພື້ນ ແລະ ໃນໂລກ.
ທ່ານ ນາຍພົນເຮືອໂທ Tarun Sobti ຮອງຫົວໜ້າເສນາທິການກອງທັບເຮືອ ອິນເດຍ ໃຫ້ຮູ້ວ່າ ເຫດການທີ່ລະນຶກນີ້ ບໍ່ພຽງແຕ່ແມ່ນຂີດໝາຍຫຼັກໝາຍທີ່ສຳຄັນໃນປະຫວັດສາດຂອງ ຫວຽດນາມ ເທົ່ານັ້ນ, ຫາກຍັງເຊີດຊູບັນດາການປະກອບສ່ວນອັນເລິກເຊິ່ງ, ໃຫຍ່ຫຼວງຂອງກອງທັບປະຊາຊົນຫວຽດນາມ ເພື່ອພື້ນຖານເອກະລາດ, ຄວາມໝັ້ນຄົງ ແລະ ວັດທະນາຖາວອນຂອງຊາດ.
ຢູ່ ອົດສະຕາລີ, ວັນທີ 9 ທັນວາ, ສະຖານທູດ ຫວຽດນາມ ແລະ ຫ້ອງການທີ່ປຶກສາຝ່າຍປ້ອງກັນຊາດ ຫວຽດນາມ ປະຈຳ ອົດສະຕາລີ ໄດ້ຈັດຕັ້ງພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 35 ປີແຫ່ງວັນບຸນປ້ອງກັນຊາດທົ່ວປວງຊົນ.
ທ່ານ ຟ້າມຮຸ່ງເຕີມ ເອກອັກຄະລັດຖະທູດ ຫວຽດນາມ ປະຈຳ ອົດສະຕາລີ ໄດ້ຮັບຮູ້ບັນດາການພົວພັນຄູ່ຮ່ວມມືທີ່ຫວຽດນາມ ໄດ້ພັດທະນາກັບບັນດາປະເທດໃນໂລກ, ໃນນັ້ນມີ ອົດສະຕາລີ. ທ່ານກ່າວວ່າ ບັນດາການພົວພັນເຫຼົ່ານີ້ມີຄວາມສຳຄັນບໍ່ພຽງແຕ່ປັບປຸງກຳລັງປ້ອງກັນຊາດຂອງ ຫວຽດນາມ ເທົ່ານັ້ນ, ຫາກຍັງຊ່ວຍເພີ່ມທະວີຄວາມໝັ້ນຄົງ ແລະ ຄວາມເປັນປົກກະຕິຂອງພາກພື້ນ.
 |
| ງານສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ ແລະ 35 ປີແຫ່ງວັນບຸນປ້ອງກັນຊາດທົ່ວປວງຊົນ ຢູ່ນະຄອນ Canberra ຂອງ ອົດສະຕາລີ (ພາບ: ສຳນັກຂ່າວສານ ຫວຽດນາມ) |
ການຮ່ວມມືດ້ານປ້ອງກັນຊາດ ແລະ ການທະຫານ ຫວຽດນາມ - ອົດສະຕາລີ ພວມສືບຕໍ່ເສີມຂະຫຍາຍບັນດາໝາກຜົນທີ່ບັນລຸໄດ້ ແລະ ສືບຕໍ່ເປີດກວ້າງບັນດາເນື້ອໃນ ແລະ ແບບຢ່າງເພື່ອແນໃສ່ເປົ້າໝາຍພັດທະນາການພົວພັນລະຫວ່າງກຳລັງປະກອບອາວຸດຢ່າງໝັ້ນແກ່ນ, ຍາວນານ, ປະກອບສ່ວນເພີ່ມທະວີ ແລະ ປັບປຸງການພົວພັນຄູ່ຮ່ວມມືຍຸດທະສາດ ຫວຽດນາມ - ອົດສະຕາລີ.
ເນື່ອງໃນໂອກາດນີ້, ກະຊວງປ້ອງກັນປະເທດ ຫວຽດນາມ ກໍ່ໄດ້ສະແດງຄວາມຂອບໃຈຢ່າງເລິກເຊິ່ງຕໍ່ກະຊວງປ້ອງກັນປະເທດ ແລະ ປະຊາຊົນ ອົດສະຕາລີ ກ່ຽວກັບການໜູນຊ່ວຍສຳລັບກຳລັງຮັກສາສັນຕິພາບຂອງ ຫວຽດນາມ; ຄະນະນັກຮົບເກົ່າ ອົດສະຕາລີ ແລະ ມະຫາວິທະຍາໄລ New South Wales ກ່ຽວກັບໂຄງການຫັນຂໍ້ມູນກ່ຽວກັບທະຫານ ຫວຽດນາມ ທີ່ຫາຍສາບສູນໃນສົງຄາມເປັນດິຈິຕອນ...
 | ຫຼາຍການເຄື່ອນໄຫວທີ່ແທດຈິງຊຸກຍູ້ການພົວພັນປະຊາຊົນ ລະຫວ່າງ ຫວຽດນາມ - ອິນເດຍ ຍສໝ - ວັນທີ 15 ສິງຫາ, ຢູ່ແຂວງບິ່ງເຢືອງ, ສະມາຄົມມິດຕະພາບ ຫວຽດນາມ - ອິນເດຍ ແຂວງບິ່ງເຢືອງ (ສະມາຄົມ) ໄດ້ຈັດກອງປະຊຸມໃຫຍ່ ຄັ້ງທີ II ອາຍຸການ 2024 – 2029. ທ່ານ ນາງ ຫວູຖິເວີນເຮືອງ ສືບຕໍ່ໄດ້ຮັບຄວາມໄວ້ວາງໃຈໃຫ້ດຳລົງຕຳແໜ່ງປະທານສະມາຄົມໃນອາຍຸການນີ້. |
 | ສະມາຄົມມິດຕະພາບ ຫວຽດນາມ - ອິນເດຍ: ເປັນຂົວເຊື່ອມຕໍ່ອັນໜັກແໜ້ນໃຫ້ແກ່ການພົວພັນລະຫວ່າງ 2 ປະເທດ ຍສໝ - ສະມາຄົມມິດຕະພາບ ຫວຽດນາມ - ອິນເດຍ ແມ່ນອົງການນຳໜ້າໃນການຊຸກຍູ້ການພົວພັນມິດຕະພາບລະຫວ່າງປະຊາຊົນສອງປະເທດ. ໂດຍການຈັດຕັ້ງບັນດາການເຄື່ອນໄຫວພົບປະແລກປ່ຽນວັດທະນະທຳ, ງານວາງສະແດງ, ກອງປະຊຸມ, ການສຳມະນາ, ພິມຈຳໜ່າຍປຶ້ມແນະນຳກ່ຽວກັບ ອິນເດຍ... ສະມາຄົມໄດ້ປະກອບສ່ວນເພີ່ມທະວີຄວາມເຂົ້າໃຈ ແລະ ປັບປຸງການພົວພັນມິດຕະພາບລະຫວ່າງ ຫວຽດນາມ ແລະ ອິນເດຍ. |
ແທັງຮັ່ງ
