ຫວຽດນາມ - ລາວ - ກໍາປູເຈຍ ຈັດການຝຶກຊ້ອມການແພດທະຫານຮ່ວມ

	ແຂ່ງຂັນປະຕິບັດໜ້າທີ່ຮັບໃຊ້ການພົບປະແລກປ່ຽນມິດຕະພາບດ້ານປ້ອງກັນຊາດຢູ່ເຂດຊາຍແດນຫວຽດນາມ - ລາວ - ກໍາປູເຈຍ
	ຮັບປະກັນຜົນສໍາເລັດໃຫ້ການພົບປະແລກປ່ຽນມິດຕະພາບດ້ານປ້ອງກັນຊາຍແດນ ຫວຽດນາມ - ລາວ - ກໍາປູເຈຍ

ພາຍຫຼັງສິ້ນສຸດການເຄື່ອນໄຫວທໍາອິດໃນຂອບເຂດການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນຫວຽດນາມ - ລາວ - ກໍາປູເຈຍ ຄັ້ງທຳອິດ, ຕອນເຊົ້າວັນທີ 14 ທັນວາ, ຄະນະຜູ້ແທນສາມປະເທດໄດ້ເປັນສັກຂີພິຍານການຝຶກຊ້ອມການແພດທະຫານລະຫວ່າງກອງທັບສາມປະເທດຢູ່ສາມແຍກດ່ານເກັບຄ່າທຳນຽມ ດ່ານສາກົນ ເບີ່ອີ (ເມືອງ ງອກໂຮ່ຍ, ແຂວງກອມຕູມ).

ລັດຖະມົນຕີ 3 ປະເທດ ຫວຽດນາມ - ລາວ - ກໍາປູເຈຍ ເຂົ້າຮ່ວມຊົມການຝຶກຊ້ອມ. ພາບ: qdnd.vn

ຄະນະຜູ້ແທນຫວຽດນາມ ນໍາໂດຍທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດ; ຄະນະຜູ້ແທນລາວ ນໍາໂດຍທ່ານພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ; ຄະນະຜູ້ແທນກຳປູເຈຍ ນໍາໂດຍທ່ານພົນເອກ Tea Seiha, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ.

ບັນຍາກາດທີ່ການຝຶກຊ້ອມ. ພາບ: qdnd.vn

ປະຈຸບັນ, ໄພທຳມະຊາດ, ໄພພິບັດໃນທົ່ວໂລກນັບມື້ນັບຜັນແປຢ່າງສັບສົນ, ຄາດເດົາໄດ້ຍາກ, ອັນໄດ້ກໍ່ຜົນສະທ້ອນອັນຮ້າຍແຮງໃຫ້ແກ່ເສດຖະກິດທົ່ວໂລກ ແລະຖືກໂດຍກົງແມ່ນປະຊາຊົນທີ່ດຳລົງຊີວິດຢູ່ເຂດຖືກຜົນສະທ້ອນ. ອາຊີຕາເວັນອອກສ່ຽງໃຕ້ ແມ່ນໜຶ່ງໃນບັນດາເຂດທີ່ເຄີຍເກີດໄພພິບັດທຳມະຊາດເຊັ່ນ ແຜ່ນດິນໄຫວ, ພາຍຸ, ນ້ຳຖ້ວມ, ດິນເຊາະເຈື່ອນ... ໄພທຳມະຊາດ, ໄພພິບັດຮ້າຍແຮງທີ່ເກີນຄວາມສາມາດຮັບມື, ກູ້ຊີບ-ກູ້ໄພຂອງປະເທດໜຶ່ງ, ຈຳເປັນຕ້ອງໄດ້ຮັບການໜູນຊ່ວຍຈາກສາກົນໃນການກູ້ຊີບ-ກູ້ໄພ, ແກ້ໄຂຜົນຮ້າຍຢ້ອນຫຼັງ. ລັດຖະບານຂອງບັນດາປະເທດອາຊຽນ ໄດ້ລົງນາມໃນສັນຍາອາຊຽນ ວ່າດ້ວຍການຄຸ້ມຄອງໄພພິບັດ ແລະການຮັບມືສຸກເສີນ, ມີຜົນສັກສິດແຕ່ວັນທີ 24 ທັນວາ 2009.

ໃນຊຸມປີຜ່ານມາ, ສາມປະເທດ ຫວຽດນາມ-ລາວ-ກຳປູເຈຍ ໄດ້ຕັ້ງໜ້າເຂົ້າຮ່ວມວຽກງານໜູນຊ່ວຍມະນຸດສະທຳ, ກູ້ຊີບ-ກູ້ໄພ ໃນພາກພື້ນ ແລະໃນໂລກ. ສາມປະເທດກໍ່ໄດ້ຈັດຕັ້ງການຝຶກຊ້ອມຮັບມືກັບໄພທຳມະຊາດ, ໄພພິບັດ, ໂລກພະຍາດ... ໂດຍສະເພາະໃນໄລຍະລະບາດພະຍາດໂຄວິດ-19, ກອງທັບສາມປະເທດກໍ່ໄດ້ສົມທົບກັນຢ່າງແໜ້ນແຟ້ນໃນການປ້ອງກັນ, ຕ້ານພະຍາດ ແລະໜູນຊ່ວຍປະຊາຊົນຂອງສາມປະເທດ.

ເພື່ອເປັນເຈົ້າການຮັບມືກັບໄພທຳມະຊາດ, ໄພພິບັດ; ປະຕິບັດຕາມການຊີ້ນຳຂອງລັດຖະມົນຕີກະຊວງປ້ອງກັນປະເທດ 3 ປະເທດ ຫວຽດນາມ - ລາວ - ກໍາປູເຈຍ, ກຳລັງການແພດທະຫານຂອງ 3 ປະເທດໄດ້ຈັດຕັ້ງການຝຶກຊ້ອມຮ່ວມ, ສົມທົບກັບກຳລັງການແພດທ້ອງຖິ່ນເພື່ອປິ່ນປົວຜູ້ປະສົບເຄາະຮ້າຍຈາກໄພພິບັດແຜ່ນດິນໄຫວແນໃສ່ຍົກລະດັບການຈັດຕັ້ງ, ການປະສານງານ, ການສົມທົບ ແລະກຽມພ້ອມເຂົ້າຮ່ວມການກູ້ຊ່ວຍດ້ານການແພດໃນພາກພື້ນ ແລະໂລກເມື່ອມີຄວາມຮຽກຮ້ອງຕ້ອງການ.