| ບັນດາການເຄື່ອນໄຫວໃນລາຍການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ - ລາວ - ກຳປູເຈຍ ຄັ້ງທີ 1 | |
| ກວດຜ່ານລາຍງານພົບປະແລກປ່ຽນມິດຕະພາບ ປ້ອງກັນຊາດເຂດຊາຍແດນ ຫວຽດນາມ-ລາວ-ກໍາປູເຈຍ ຄັ້ງທີ 1 |
ບັນດາປັດໄຈທໍາມະຊາດໄດ້ສ້າງທ່າຮ່ວມສໍາພັນອັນໜັກແໜ້ນ, ໝັ້ນແກ່ນ, ສ້າງເງື່ອນໄຂໃຫ້ແກ່ 3 ປະເທດ ຫວຽດນາມ-ລາວ-ກໍາປູເຈຍ ສາມາດຊ່ວຍເຫຼືອ, ເພີ່ມເຕີມໃຫ້ກັນເພື່ອພ້ອມກັນຍືນຍົງຄົງຕົວ, ພັດທະນາ ແລະປົກປ້ອງເຊິ່ງກັນ ແລະກັນ. ຕົວຈິງຂອງປະຫວັດສາດແຫ່ງການຕໍ່ສູ້ຍາດເອົາເອກະລາດແຫ່ງຊາດ ກໍຄືໃນພາລະກິດແຫ່ງການສ້າງສາ ແລະປົກປັກຮັກສາປະເທດຊາດ ໄດ້ພິສູດໃຫ້ເຫັນຄວາມສໍາຄັນຂອງນ້ຳໃຈສາມັກຄີ ຫວຽດນາມ - ລາວ - ກໍາປູເຈຍ ຕໍ່ກັບຊາຕາກໍາຂອງແຕ່ລະປະເທດ.
ແຫຼ່ງກໍາລັງແຮງທາງດ້ານວັດຖຸ ແລະຈິດໃຈ
 |
| ກໍາລັງແພດທະຫານຫວຽດນາມ ແລະລາວ ສົມທົບກັນກວດພະຍາດໂດຍບໍ່ເສຍຄ່າໃຫ້ປະຊາຊົນ ຢູ່ເມືອງຊານໄຊ, ແຂວງອັດຕະປື, ລາວ, ໃນວັນທີ 5 ທັນວາ 2023. ພາບ: qdnd.vn |
ໂດຍແມ່ນສາມປະເທດບ້ານໃກ້ເຮືອນຄຽງທີ່ສະໜິດສະໜົມ, ຫວຽດນາມ, ລາວ ແລະກໍາປູເຈຍ ມີການພົວພັນມິດຕະພາບທີ່ເປັນມູນເຊື້ອ, ມີຄວາມສະໜິດຕິດພັນກັນມາແຕ່ບູຮານນະການ. ຕາມທ່ານນາງ ຄໍາເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາຫວຽດນາມ ແລ້ວ, ການພົວພັນລະຫວ່າງ 3 ປະເທດບ້ານໃກ້ເຮືອນຄຽງທີ່ຕັ້ງຢູ່ແຫຼມອິນດູຈີນ, ມີພູຜາປ່າໄມ້ຕິດຈອດກັນ, ມີແມ່ນໍ້າລໍາເຊໄຫຼປ່ອງໃສ່ກັນ, ຮ່ວມກັນດື່ມນໍ້າແມ່ນໍ້າຂອງ ເຊິ່ງໄດ້ຮັບການທົດສອບໃນແປວໄຟແຫ່ງການປະຕິວັດຕ້ານສັດຕູໂຕດຽວກັນຂອງ 3 ຊາດ. ບໍ່ພຽງແຕ່ຄຽງບ່າຄຽງໄຫຼ່ກັນ, ແບ່ງທຸກແບ່ງສຸກນໍາກັນ ໃນພາລະກິດແຫ່ງການຕໍ່ສູ້ປົດປ່ອຍຊາດເທົ່ານັ້ນ, ຫວຽດນາມ, ລາວ ແລະກໍາປູເຈຍ ຍັງໄດ້ສະໜັບສະໜູນ, ຊ່ວຍເຫຼືອກັນເຊິ່ງກັນໃນພາລະກິດແຫ່ງການສ້າງສາ, ປົກປັກຮັກສາ ແລະພັດທະນາປະເທດຊາດ ໃນປັດຈຸບັນ ອີກດ້ວຍ.
3fpມີທັດສະນະອັນດຽວກັນ, ທ່ານພັນເອກ Rem Kann ທີ່ປຶກສາທູດຝ່າຍປ້ອງກັນຊາດກໍາປູເຈຍ ປະຈໍາ ຫວຽດນາມ ຖືວ່າ ນັບແຕ່ມີການກໍາເນີດ ແລະການນໍາພາຂອງພັກຄອມມູນິດອິນດູຈີນ, ຕໍ່ມາແມ່ນພັກຄອມມູນິດຫວຽດນາມ, ພັກປະຊາຊົນປະຕິວັດ ລາວ ແລະພັກປະຊາຊົນກໍາປູເຈຍ, ການພົວພັນລະຫວ່າງ 3 ປະເທດບ້ານໃກ້ເຮືອນຄຽງອັນສະໜິດສະໜົມນັບມື້ນັບພັດທະນາ ແລະໄດ້ຍົກສູງຂຶ້ນທາງດ້ານຄຸນນະພາບ. ມູນເຊື້ອປະຫວັດສາດແຫ່ງຄວາມສາມັກຄີ, ຄວາມສະໜິດຕິດພັນ ແລະການຊ່ວຍເຫຼືອເຊິ່ງກັນ ແລະກັນ ນັ້ນແມ່ນແຫຼ່ງກໍາລັງແຮງອັນໃຫຍ່ຫຼວງຕໍ່ກັບທັງ 3 ປະເທດ. ທ່ານພັນເອກ Rem Kann ໄດ້ເນັ້ນໜັກວ່າ: “ການພົວພັນທີ່ເປັນມູນເຊື້ອ, ຄວາມສາມັກຄີມິດຕະພາບ, ຄວາມສະໜິດຕິດພັນລະຫວ່າງ ຫວຽດນາມ-ລາວ-ກໍາປູເຈຍ ແມ່ນຊັບສົມບັດລວມອັນລໍ້າຄ່າ, ສ້າງເປັນກໍາລັງແຮງທາງດ້ານວັດຖຸ ແລະຈິດໃຈ ເພື່ອໃຫ້ 3 ປະເທດ ຍາມໃດກໍຄຽງບ່າຄຽງໄຫຼ່ກັນໃນພາລະກິດແຫ່ງການຕໍ່ສູ້ຍາດເອົາເອກະລາດໃນເມື່ອກ່ອນ ກໍ່ຄືໃນການສ້າງສາ, ປົກປັກຮັກສາ ແລະພັດທະນາ ປະເທດຊາດ ໃນປັດຈຸບັນ”.
ວັນບຸນໃຫຍ່
ບົນພື້ນຖານການພົວພັນອັນດີງາມລະຫວ່າງ 3 ປະເທດ, ການຮ່ວມມືລະຫວ່າງກອງທັບປະຊາຊົນຫວຽດນາມ, ກອງທັບປະຊາຊົນລາວ ແລະກອງທັບ ແຫ່ງລາຊະອານາຈັກ ກໍາປູເຈຍ ຍາມໃດກໍໄດ້ຮັບການເອົາໃຈໃສ່, ຊຸກຍູ້ຢູ່ສະເໝີ. ຕາມທ່ານນາງເອກອັກຄະລັດຖະທູດ ຄໍາເພົາ ເອີນທະວັນ ແລ້ວ, ການພົບປະປະຈໍາປີລະຫວ່າງລັດຖະມົນຕີກະຊວງປ້ອງກັນປະເທດ 3 ປະເທດ ຫຼື ການຝຶກຊ້ອມກູ້ຊີບ, ກູ້ໄພຮ່ວມຄັ້ງທໍາອິດລະຫວ່າງກອງທັບ 3 ປະເທດ ເມື່ອປີ 2022 ແມ່ນຕົວຢ່າງທີ່ລະອຽດ, ພົ້ນເດັ່ນກ່ຽວກັບການຮ່ວມມືດ້ານປ້ອງກັນຊາດ ຫວຽດນາມ - ລາວ - ກໍາປູເຈຍ.
 |
| ກໍາລັງແພດທະຫານຫວຽດນາມ ແລະກໍາປູເຈຍ ສົມທົບກັນກວດພະຍາດໂດຍບໍ່ເສຍຄ່າໃຫ້ປະຊາຊົນຢູ່ເມືອງ Oyadav, ແຂວງ Ratanakiri, ກໍາປູເຈຍ, ໃນວັນທີ 3 ທັນວາ 2023. ພາບ: qdnd.vn |
ໂດຍກໍານົດຄວາມສໍາຄັນຂອງການຮ່ວມມືດ້ານປ້ອງກັນຊາດໃນການພົວພັນລວມ, ກອງທັບປະຊາຊົນຫວຽດນາມ, ກອງທັບປະຊາຊົນລາວ ແລະກອງທັບແຫ່ງລາຊະອານາຈັກ ກໍາປູເຈຍ ໄດ້ສຸມໃສ່ສົມທົບກັນຢ່າງແໜ້ນແຟ້ນເພື່ອກະກຽມຈັດການພົບປະແລກປ່ຽນມິດຕະພາບປ້ອງກັນເຂດຊາຍແດນ ຫວຽດນາມ - ລາວ - ກໍາປູເຈຍ ຄັ້ງທີໜຶ່ງ. ທ່ານພັນເອກ Rem Kann ຖືວ່າ ດ້ວຍກິດຈະກໍາເຄື່ອນໄຫວທີ່ມີຄວາມໝາຍທີ່ໄດ້ຈັດຂຶ້ນໃນຂອບເຂດການພົບປະແລກປ່ຽນມິດຕະພາບ, ເຫດການນີ້ຈະນໍາການຮ່ວມມືລະຫວ່າງກອງທັບ 3 ປະເທດ ຫວຽດນາມ - ລາວ - ກໍາປູເຈຍ ຂຶ້ນສູ່ລະດັບສູງໃໝ່, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ສ້າງຄວາມຮັກແພງ, ມີໄມຕີຈິດມິດຕະພາບ, ມີນ້ຳໃຈສາມັກຄີ, ມີການຊຸກຍູ້ການຮ່ວມມືທີ່ແທດຈິງລະຫວ່າງກໍາລັງປົກປັກຮັກສາຊາຍແດນ 3 ປະເທດ, ອໍານາດການປົກຄອງທ້ອງຖິ່ນ ແລະປະຊາຊົນຢູ່ເຂດຊາຍແດນ, ຜ່ານນັ້ນ ກໍ່ປະກອບສ່ວນສ້າງເສັ້ນຊາຍແດນ ຫວຽດນາມ - ລາວ - ກໍາປູເຈຍ ແຫ່ງສັນຕິພາບ, ມິດຕະພາບ, ສະຖຽນລະພາບ, ຮ່ວມມື ແລະພັດທະນາ; ພ້ອມທັງສົ່ງສານກ່ຽວກັບນ້ຳໃຈສາມັກຄີມິດຕະພາບ, ການຊ່ວຍເຫຼືອເຊິ່ງກັນ ແລະກັນລະຫວ່າງລັດຖະບານ, ກອງທັບ ແລະປະຊາຊົນ 3 ປະເທດ.
ທ່ານນາງເອກອັກຄະລັດຖະທູດ ຄໍາເພົາ ເອີນທະວັນ ຢັ້ງຢືນວ່າ: “ນີ້ແມ່ນເຫດການສໍາຄັນ, ເປັນວັນບຸນໃຫຍ່ຂອງ 3 ກອງທັບ ເວົ້າສະເພາະ, ເວົ້າລວມແມ່ນ 3 ຊາດ. ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ - ລາວ - ກໍາປູເຈຍ ຄັ້ງທີໜຶ່ງ ໄດ້ຈັດຂຶ້ນຢູ່ເຂດຊາຍແດນຕິດຈອດກັນຂອງ 3 ປະເທດ ດ້ວຍການເຂົ້າຮ່ວມຂອງປະຊາຊົນທຸກຊັ້ນວັນນະ ເຊິ່ງແມ່ນພະຍານຫຼັກຖານທີ່ສະແດງໃຫ້ເຫັນນໍ້າໃຈອຸ້ມຊູຊ່ວຍເຫຼືອ, ຮັກແພງເຊິ່ງກັນ ແລະກັນລະຫວ່າງທະຫານ ແລະປະຊາຊົນ “ຄືປາກັບນໍ້າ”, ປະກອບສ່ວນປັບປຸງພື້ນຖານທົ່ວປວງຊົນປ້ອງກັນຊາດ, ສ້າງເຂດຊາຍແດນແຫ່ງສັນຕິພາບ, ມິດຕະພາບ, ຮ່ວມມື ແລະພັດທະນາ; ເພີ່ມທະວີຄວາມໄວ້ເນື້ອເຊື່ອໃຈ, ຄວາມເຂົ້າໃຈລະຫວ່າງ 3 ຊາດ; ເປັນຂີດໝາຍສໍາຄັນໃນການພົວພັນຕ່າງປະເທດດ້ານປ້ອງກັນຊາດ ແລະການທູດປະຊາຊົນລະຫວ່າງ 3 ປະເທດ. ນີ້ກໍແມ່ນໂອກາດເພື່ອໂຄສະນາໃຫ້ປະຊາຊົນຢູ່ພາຍໃນ ແລະຕ່າງປະເທດ ຮັບຮູ້ກ່ຽວກັບການພົວພັນມິດຕະພາບທີ່ເປັນມູນເຊື້ອລະຫວ່າງ 3 ປະເທດ, 3 ກອງທັບ ທີ່ຍາມໃດກໍຄຽງບ່າຄຽງໄຫຼ່, ຮ່ວມມື ແລະຊ່ວຍເຫຼືອເຊິ່ງກັນ ແລະກັນ, ຕໍ່ສູ້ສະກັດກັ້ນ ແລະທັບມ້າງທຸກກົນອຸບາຍຂອງບັນດາອິດທິກໍາລັງປໍລະປັກ ຫວັງແບ່ງແຍກການພົວພັນອັນດີງາມລະຫວ່າງ ຫວຽດນາມ - ລາວ - ກໍາປູເຈຍ”.
ແສງເດືອນ
