ຕອນເຊົ້າວັນທີ 15 ມິຖຸນາ, ກຳປັ່ນ 251, ກອງພົນນ້ອຍ 127, ທະຫານເຂດ 5 ໄດ້ເຂົ້າທຽບທ່າກໍາປັ່ນທະຫານເຮືອເຂດ 5 (ກຽນຢາງ), ສິ້ນສຸດການລາດຕະເວນຮ່ວມ ຄັ້ງທີ 75 ກັບກຳປັ່ນ 1141, ຖານທັບທະເລ Ream, ທະຫານເຮືອກອງທັບລາດຊະວົງ ກຳປູເຈຍ.
 |
| ກຳປັ່ນທະຫານເຮືອຂອງສອງປະເທດໃນເສັ້ນທາງລາດຕະເວນ. ພາບ: thoidai.com.vn |
ກ່ອນໜ້ານັ້ນ, ວັນທີ 14 ມິຖຸນາ, ຢູ່ເຂດນໍ້າປະຫວັດສາດ ຫວຽດນາມ - ກຳປູເຈຍ, ກຳປັ່ນ 251 ແລະ ກຳປັ່ນ 1141 ໄດ້ດຳເນີນການລາດຕະເວນຮ່ວມປະຈໍາປີ ຄັ້ງທີ 75 ຕາມລະບຽບການສົມທົບກັນລາດຕະເວນຮ່ວມ ແລະສ້າງຊ່ອງທາງສື່ສານລະຫວ່າງທະຫານເຮືອປະຊາຊົນ ຫວຽດນາມ ແລະ ທະຫານເຮືອກອງທັບລາດຊະວົງ ກຳປູເຈຍ ໂດຍຜູ້ບັນຊາການທະຫານເຮືອສອງປະເທດລົງນາມໃນວັນທີ 14 ກັນຍາ 2002.
ຂະບວນການລາດຕະເວນ, 2 ຝ່າຍໄດ້ປະຕິບັດລະບຽບການເຄົາລົບກັນ ລະຫວ່າງກໍາປັ່ນບັນດາປະເທດ ອາຊຽນ (Hello ASEAN); ແລກປ່ຽນຂໍ້ມູນຂ່າວສານ; ການຝຶກແອບນໍາໃຊ້ທຸງນ້ອຍທີ່ຈັບດ້ວຍມື; ຝຶກແອບຄົ້ນຫາ ແລະກູ້ໄພ ແລະຝຶກແອບກົດແຫ່ງການປະພຶດວ່າດ້ວຍການປະສົບເຫດແບບບັງເອີນຢູ່ທະເລຂຂອງທະຫານເຮືອບັນດາປະເທດມະຫາສະໝຸດປາຊີຟິກຕາເວັນຕົກ (CUES).
ໃນຂອບເຂດການລາດຕະເວນ, ຜ່ານບັນດາຊ່ອງທາງສື່ສານ, ທະຫານເຮືອ ຫວຽດນາມ - ກຳປູເຈຍ ໄດ້ຕັ້ງໜ້າໂຄສະນາ, ຂົນຂວາຍຊາວປະມົງສອງປະເທດ ປະຕິບັດກົດໝາຍ ແລະກົດລະບຽບຢ່າງເຂັ້ມງວດ ເມື່ອຂຸດຄົ້ນສິນທະເລ, ບໍ່ລະເມີດອະທິປະໄຕຂອງປະເທດອື່ນ.
 |
| ຜູ້ບັນຊາການທະຫານເຮືອຫວຽດນາມ ມອບຂອງຂວັນໃຫ້ຜູ້ບັນຊາການທະຫານເຮືອກອງທັບລາດຊະວົງ ກຳປູເຈຍ. ພາບ: thoidai.com.vn |
ດ້ວຍການກະກຽມຢ່າງຮອບຄອບ ແລະສົມທົບກັນຢ່າງແໜ້ນແຟ້ນ, ການລາດຕະເວນຮ່ວມ ຄັ້ງທີ 75 ລະຫວ່າງທະຫານເຮືອ ຫວຽດນາມ ແລະ ທະຫານເຮືອກອງທັບລາດຊະວົງ ກຳປູເຈຍ ໄດ້ປະສົບຜົນສຳເລັດຢ່າງຈົບງາມ. ຜ່ານນັ້ນ, ກໍ່ປະກອບສ່ວນຮັກສາຄວາມເປັນລະບຽບຮຽບຮ້ອຍ, ສັນຕິພາບ, ສະຖຽນລະພາບ, ສ້າງເງື່ອນໄຂໃຫ້ປະຊາຊົນສອງປະເທດທໍາມາຫາກິນຢູ່ເຂດນໍ້າປະຫວັດສາດ; ພ້ອມກັນນັ້ນ, ກໍ່ປັບປຸງ ແລະພັດທະນາການຮ່ວມມື, ເພີ່ມທະວີຄວາມເຂົ້າໃຈ, ຄວາມໄວ້ເນື້ອເຊື່ອໃຈ ແລະການຊ່ວຍເຫຼືອເຊິ່ງກັນ ແລະກັນລະຫວ່າງທະຫານເຮືອຫວຽດນາມ ແລະ ທະຫານເຮືອກອງທັບລາດຊະວົງ ກຳປູເຈຍ.
ບູນມີ
