| ບັນດາອົງການຜູ້ຕາງໜ້າ ຫວຽດນາມ ຢູ່ຕ່າງປະເທດເຊື່ອມຕໍ່ແຫຼ່ງຊັບພະຍາກອນໜູນຊ່ວຍການພັດທະນານະຄອນ ໂຮ່ຈິມິນ | |
| ນະຄອນ ໂຮ່ຈິມິນ: ຄົນເຈັບທີ່ທຸກຍາກ, ຄົນເຈັບເປົ້າໝາຍນະໂຍບາຍຫຼາຍຄົນ ໄດ້ຮັບການໜູນຊ່ວຍການຜ່າຕັດໂດຍບໍ່ເສຍຄ່າ |
ດ້ວຍຫົວຂໍ້ “ສັນຕິພາບ - ຄວາມມຸ່ງມາດປາດຖະໜາຂອງບັນພະບຸລຸດ”, ກອງປະຊຸມ ໄດ້ສົ່ງສານເຖິງຊາວ ຫວຽດນາມ ທຸກຄົນທີ່ຢູ່ຫ່າງໄກຈາກບ້ານເກີດເມືອງນອນ ກ່ຽວກັບເລື່ອງຮັບຮູ້ຢ່າງຈະແຈ້ງເຖິງຄວາມສຳຄັນຂອງການສ້າງສັງຄົມທີ່ສັນຕິພາບ.
ການສຳມະນາ ໄດ້ດຳເນີນເນື່ອງໃນໂອກາດວັນຄ້າຍວັນເກີດປະທານ ໂຮ່ຈິມິນ, ຜູ້ນຳທີ່ຍິ່ງໃຫຍ່ຂອງປະຊາຊົນຫວຽດນາມ, ວິລະຊົນປົດປ່ອຍຊາດ ແລະ ນັກວັດທະນະທຳທີ່ດີເດັ່ນຂອງຫວຽດນາມ. ປະທານ ໂຮ່ຈີມິນ ແມ່ນຕົວແທນຂອງຊາດ ແລະ ເຕົ້າໂຮມສິ່ງຍອດຍິ່ງຂອງວັດທະນະທຳ ຫວຽດນາມ. ໃນຖານະເປັນນັກຮົບປະຕິວັດທີ່ມີກຳລັງແຮງໃນການຕໍ່ສູ້ປົດປ່ອຍຊາດ, ປະທານ ໂຮ່ຈີມິນ ກໍ່ແມ່ນສັນຍາລັກແຫ່ງສັນຕິພາບ ແລະ ມິດຕະພາບ. ກອງປະຊຸມ ແມ່ນເຫດການວັດທະນະທຳທີ່ມີຄວາມໝາຍເປັນພິເສດ, ບໍ່ພຽງແຕ່ສຳລັບປະຊາຄົມຊາວ ຫວຽດນາມ ທີ່ພວມດຳລົງຊີວິດ, ຮ່ຳຮຽນ, ຄົ້ນຄ້ວາ ແລະ ເຮັດວຽກຢູ່ ສ.ເກົາຫຼີ ເທົ່ານັ້ນ, ຫາກຍັງແມ່ນເພື່ອນມິດສາກົນທີ່ຮັກແພງຊາວ ຫວຽດນາມ ອີກດ້ວຍ.
 |
| ທ່ານເອກອັກຄະລັດຖະທູດ ຫວຽດນາມ ປະຈຳ ສ.ເກົາຫຼີ ຫວູໂຮ່ ກ່າວຄຳປາໄສທີ່ພິທີ. ພາບ: ດຶກຖາງ/ນັກຂ່າວ TTXVN ປະຈຳ ສ.ເກົາຫຼີ |
ການສຳມະນາ ໂດຍການສົມທົບຂອງອົງການລະຫວ່າງວັດທະນະທໍາ, ວິທະຍາສາດ ແລະ ສື່ສານສາກົນ ພ້ອມກັບຄະນະໂຄງການວັນປະເທດຊາດ ຫວຽດນາມ ຢູ່ ສ.ເກົາຫຼີ, ມະຫາວິທະຍາໄລ Sejong ແລະ ບັນດາສາຂາສະມາຄົມຊາວຫວຽດນາມ ຢູ່ ສ.ເກົາຫຼີ ຈັດຕັ້ງ ເພື່ອສືບຕໍ່ໄຕ້ແປວໄຟແຫ່ງ ລາກຮົ່ງ ໃຫ້ສະຫວ່າງຂຶ້ນ, ໄຕ້ຄວາມຮູ້ບຸນຄຸນຕໍ່ບັນພະບຸລຸດ, ກົກເຄົ້າເຫງົ້າກໍ. ຈິດວິນຍານແຫ່ງຄວາມກະຕັນຍູນີ້ ແມ່ນມູນເຊື້ອອັນລ້ຳຄ່າຂອງຊາວ ຫວຽດນາມ, ສ້າງກຳລັງແຮງດ້ານຈິດໃຈໃຫ້ແກ່ຊາວ ຫວຽດນາມ ຍາມໃດກໍ່ຜ່ານຜ່າທຸກຄວາມຫຍຸ້ງຍາກ, ສືບຕໍ່ສ້າງ “ຂົວ” ວັດທະນະທຳທີ່ໝັ້ນຄົງເຂັ້ມແຂງ, ສ້າງສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ເພື່ອນມິດສາກົນ, ພ້ອມກັນເຜີຍແຜ່ ແລະ ຕັ້ງຄຸນຄ່າວັດທະນະທຳ ແລະ ຄຸນງາມຄວາມດີຂອງຊາວ ຫວຽດນາມ ບົນພື້ນຖານການເຄົາລົບ ແລະ ເຊີດຊູບັນດາຄຸນຄ່າວັດທະນະທຳ, ຄຸນງາມຄວາມດີຂອງບັນດາປະເທດ/ປະຊາຊົນໃນທົ່ວໂລກ.
ກ່າວຄຳປາໄສທີ່ພິທີເປິດ, ທ່ານນາງ ຫງວຽນທິບິກອ໋ຽນ (ອ໋ຽນ Platz), ປະທານອົງການລະຫວ່າງວັດທະນະທຳ, ວິທະຍາສາດ ແລະ ສື່ສານສາກົນ ໃຫ້ຮູ້ວ່າ: ການສຳມະນາໃນປີນີ້ແມ່ນການເຄື່ອນໄຫວໃນຂອບເຂດໂຄງການວັນປະເທດຊາດ ຫວຽດນາມ ທົ່ວໂລກ ເພື່ອລະນຶກຄຸນງາມຄວາມດີຂອງບັນພະບຸລຸດ ແລະ ຜູ້ໄປກ່ອນສຳລັບການປະກອບສ່ວນໃຫ້ແກ່ສັນຕິພາບຂອງປະຊາຊົນ ຫວຽດນາມ; ການເຊື່ອມຕໍ່ດ້ານວັດທະນະທຳ ແລະ ວິຊາການລະຫວ່າງ ຫວຽດນາມ ແລະ ສ.ເກົາຫຼີ; ຮັກສາ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງບັນດານັກປັນຍາຊົນ, ນັກວິທະຍາສາດ ແລະ ປະຊາຊົນສອງປະເທດ ຫວຽດນາມ ແລະ ສ.ເກົາຫຼີ.
ກ່າວຄຳປາໄສທີ່ເຫດການ, ບັນດານັກປາຖະກະຖາທີ່ເປັນສາດສະດາຈານ ຫວຽດນາມ ຢູ່ມະຫາວິທະຍາໄລ Sejong ພ້ອມກັບທ່ານ ບັງເຊນ ໂຮ - ປະທານສະຫະພັນ ເທຄວັນໂດຕຳຫຼວດໂລກ - ລ້ວນແຕ່ມີຄວາມເຫັນເປັນເອກະພາບກັນວ່າ: ສັນຕິພາບບໍ່ພຽງແຕ່ແມ່ນຄວາມມຸ່ງມາດປາດຖະໜາຂອງປະຊາຊົນ ຫວຽດນາມ ເຊິ່ງແມ່ນປະເທດທີ່ໄດ້ຜ່ານສົງຄາມທີ່ໂຫດຮ້າຍມາຫຼາຍປີເທົ່ານັ້ນ, ແຕ່ຍັງເປັນຄວາມມຸ່ງມາດປາດຖະໜາ, ເປັນຂອງຂວັນອັນລ້ຳຄ່າທີ່ທຸກປະເທດ ແລະ ທຸກໆຄົນປາດຖະໜາຢາກມີ.
ທີ່ການສຳມະນາ, ບັນດານັກປາຖະກະຖາ ໄດ້ເນັ້ນໜັກວ່າ, ໃນປະຫວັດສາດນັບພັນປີແຫ່ງການສ້າງສາ ແລະ ປົກປັກຮັກສາປະເທດຊາດ, ປະຊາຊົນ ຫວຽດນາມ ໄດ້ປະສົບກັບຄວາມສູນເສຍ ແລະ ຄວາມເຈັບປວດຫຼາຍທີ່ສຸດ, ສະນັ້ນ ໄດ້ມານະພະຍາຍາມ ແລະ ຕໍ່ສູ້ເພື່ອເອກະລາດ ແລະ ສ້າງສາປະເທດຊາດໃຫ້ມີສັນຕິພາບ . ຊາວຫວຽດນາມ ທຸກຄົນເຂົ້າໃຈຢ່າງເລິກເຊິ່ງເຖິງຄຸນຄ່າສັນຕິພາບ. ດ້ວຍມູນເຊື້ອອັນສະໜິດສະໜົມ, ຮັກຫອມສັນຕິພາບ, ຫວຽດນາມ ຍາມໃດກໍ່ຄັດຄ້ານສົງຄາມທີ່ບໍ່ຍຸດຕິທຳ ແລະ ປາດຖະໜາໃຫ້ທຸກປະເທດ ແລະ ປະຊາຊົນໃນໂລກ ໄດ້ດຳລົງຊີວິດຢູ່ໃນສັນຕິພາບ. ຈິດວິນຍານນັ້ນບໍ່ມີວັນຢຸດຢູ່, ແຕ່ມັນມີພະລັງແຮງຈູງໃຈ ແລະ ແຜ່ລາມໄປໃນເລືອດຮ້ອນຂອງຊາວຫວຽດນາມ ທຸກຄົນ, ບໍ່ວ່າຈະຢູ່ໃສ.
ສະນັ້ນ, ໂດຍຜ່ານການສຳມະນາ, ປະຊາຄົມຊາວ ຫວຽດນາມ ອາໄສຢູ່ຕ່າງປະເທດ, ບັນດາປັນຍາຊົນ, ນັກວິທະຍາສາດ, ນັກສຶກສາ ຫວຽດນາມ ແລະ ເພື່ອນມິດ ສ.ເກົາຫຼີ ກໍປາດຖະໜາຢາກເຜີຍແຜ່ຄຸນຄ່ານັ້ນໄປທົ່ວໂລກ ຕາມອຸດົມການຂອງປະທານ ໂຮ່ຈີມິນ ຜູ້ຍິ່ງໃຫຍ່ ເພື່ອສັນຕິພາບ, ມິດຕະພາບ, ການຮ່ວມມື ແລະ ພ້ອມກັນພັດທະນາລະຫວ່າງບັນດາຊົນເຜົ່າ.
ມິງດຶກ
