| ສປປ.ລາວ ຈັດພິທີໂຮມຊຸມນຸມມິດຕິງ ສະເຫຼີມສະຫຼອງວັນໄຊຊະນະ ດ້ຽນບຽນຝູ ຄົບຮອບ 70 ປີ | |
| ສື່ມວນຊົນສາກົນຍ້ອງຍໍໄຊຊະນະ ດ້ຽນບຽນຝູ ຂອງ ຫວຽດນາມ |
ວັນທີ 6 ພຶດສະພາ, ສຳນັກຂ່າວສານ ກູບາ Prensa Latina ໄດ້ມີບົດຂຽນຍ້ອງຍໍ ທ່ານພົນເອກ ຫວໍງວຽນຢາບ ກັບການສູ້ຮົບປະຫວັດສາດ ເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນໄຊຊະນະ ດ້ຽນບຽນຝູ (7 ພຶດສະພາ 1954 – 7 ພຶດສະພາ 2024).
ຕາມບົດຂຽນແລ້ວ, ບັນດານັກຊ່ຽວຊານການທະຫານໃນທົ່ວໂລກຢືນຢັນຄືນໃໝ່ວ່າ ທ່ານພົນເອກ ຫວໍງວຽນຢາບ ແມ່ນໜຶ່ງໃນນັກຍຸດທະສາດ 10 ຄົນທີ່ພົ້ນເດັ່ນໃນຕະຫຼອດຍຸກສະໄໝ.
 |
| ບົດຂຽນຢູ່ໜ້າເວບ Prensa Latina ຍ້ອງຍໍການປະກອບສ່ວນຂອງທ່ານພົນເອກ ຫວໍງວຽນຢາບ ຕໍ່ໄຊຊະນະ ດ້ຽນບຽນຝູ. (ພາບໜ້າຈໍ) |
ນັກຊ່ຽວຊານການທະຫານສາກົນຫຼາຍຄົນ ຍັງເອີ້ນທ່ານພົນເອກ ຫວໍງວຽນຢາບ ວ່າ “Napoléon ແດງ”, ແຕ່ໜ້າເວບ Prensa Latina ກ່າວວ່າ ການປຽບທຽບນີ້ ບໍ່ເປັນທີ່ພໍໃຈ, ບໍ່ສົມຄວນກັບຖານະຂອງ “ອ້າຍໃຫຍ່” ຂອງກອງທັບປະຊາຊົນຫວຽດນາມ. ບົດຂຽນອະທິບາຍວ່າ Napoleón ແມ່ນຜູ້ພິຊິດ, ຍັງພົນເອກ ຫວໍງວຽນຢາບ ແມ່ນຜູ້ປົດປ່ອຍ. ບັນດາບັ້ນຮົບຕໍ່ຕ້ານຍີ່ປຸ່ນ, ຝຣັ່ງ ແລະ ອາເມລິກາ ທີ່ນຳພາໂດຍທ່ານພົນເອກ ແມ່ນມີຄວາມໝາຍຕັດສິນຕໍ່ເອກະລາດຂອງປະຊາຊົນ ອິນດູຈີນ.
ຕາມໜ້າເວບ Prensa Latina ແລ້ວ, ບັ້ນຮົບ ດ້ຽນບຽນຝູ ປີ 1954 ໄດ້ຈົດຊື່ ທ່ານພົນເອກ ຫວໍງວຽນຢາບ ເຂົ້າໃນປຶ້ມປະຫວັດສາດການທະຫານສະໄໝນັ້ນ. ກອງທັບຫົວເມືອງຂຶ້ນ ຝຣັ່ງ ຖືວ່າ ດ້ຽນບຽນຝູ ແມ່ນ “ປ້ອມປືນໃຫຍ່ບໍ່ສາມາດແຕະຕ້ອງໄດ້”, ແມ່ນ “ເຄື່ອງຈັກທີ່ບົດທຸກການໂຈມຕີຂອງ ຫວຽດມິງ”.
ແຕ່ເຖິງຢ່າງໃດກໍ່ຕາມ, ແທນໃຫ້ການບຸກໂຈມຕີເຊິ່ງໜ້າໃນໄລຍະສັ້ນ ທີ່ໄດ້ຮັບໝາກຜົນບໍ່ແນ່ນອນ, ບັນດາກຳລັງໂດຍທ່ານພົນເອກ ຫວໍງວຽນຢາບ ນຳໜ້າ ໄດ້ບຸກໂຈມຕີ “ກຸ່ມຖານທີ່ໝັ້ນທີ່ເຂັ້ມແຂງແບບບໍ່ເຄີຍມີມາກ່ອນຢູ່ ອິນດູຈີນ” ຕາມທິດນຳສູ້ຮົບໄດ້ປ່ຽນຈາກ “ສູ້ຮົບໄວ, ແກ້ໄຂຢ່າງວ່ອງໄວ ເປັນສູ້ຮົບທີ່ແນ່ນອນ, ກ້າວໄປຢ່າງແນ່ນອນ”. ພາຍຫຼັງກວ່າ 50 ວັນ ແລະ ຄືນແຫ່ງການຕໍ່ສູ້ຢ່າງກ້າຫານ, ກົນໄກ, ສ້າງສັນ, ກອງທັບ ແລະ ປະຊາຊົນຫວຽດນາມ ໄດ້ທຳລາຍເຂດທີ່ໝັ້ນ ດ້ຽນບຽນຝູ ທັງໝົດ.
ບົດຂຽນຕີລາຄາວ່າ ໄຊຊະນະ ດ້ຽນບຽນຝູ ບໍ່ພຽງແຕ່ສິ້ນສຸດສົງຄາມຕໍ່ຕ້ານພວກຫົວເມືອງຂຶ້ນທີ່ແກ່ຍາວເປັນເວລາ 9 ປີເທົ່ານັ້ນ, ຫາກຍັງແມ່ນພື້ນຖານທາງທິດສະດີ - ຕົວຈິງຢ່າງໝັ້ນຄົງໃຫ້ແກ່ບັນດາບັ້ນຮົບທີ່ຫວຽດນາມ ຕ້ອງປະເຊີນໜ້າ.
ໃນຂະນະນັ້ນ, ໄຊຊະນະດ້ຽນບຽນຝູ ໄດ້ສະແດງໃຫ້ເຫັນບັນດາປະເທດຫົວເມືອງຂຶ້ນເຫັນວ່າ, ກອງທັບທີ່ທຸກຍາກ, ໃສ່ເກີບໜັງທີ່ລຽບງ່າຍ, ໂດຍມາຈາກປະຊາຊົນທີ່ມີພື້ນຖານເສດຖະກິດກະສິກຳເກືອບຄືວ່າປະຖົມປະຖານທີ່ສຸດ, ກໍສາມາດຕີເອົາຊະນະປະເທດມະຫາອຳນາດທີ່ມີພື້ນຖານອຸດສາຫະກຳສົງຄາມເຕັກໂນໂລຢີສູງໄດ້.
ແຕ່ເຖິງຢ່າງໃດກໍ່ຕາມ, ທ່ານພົນເອກ ຫວໍງວຽນຢາບ ບໍ່ໄດ້ຮັບບໍ່ວ່າກຽດຕິຍົດໃດໆໃຫ້ແກ່ຕົນເອງ, ແຕ່ໄດ້ມອບຄວາມສະຫງ່າລາສີໃຫ້ແກ່ປະເທດຊາດ. ທ່ານຜູ້ບັນຊາການໃຫຍ່ຂອງກອງທັບປະຊາຊົນ ຫວຽດນາມ ເຄີຍອະທິບາຍວ່າ “ພວກຂ້າພະເຈົ້າ ຕ້ອງໃຊ້ອາວຸດຂະໜາດນ້ອຍຕໍ່ສູ້ກັບອາວຸດໃຫຍ່, ມີອາວຸດທີ່ຫຼ້າສະໄໝເພື່ອເອົາຊະນະບັນດາອາວຸດທີ່ທັນສະໄໝ” ແລະ ຢືນຢັນວ່າ “ປັດໄຈມະນຸດຕັດສິນໄຊຊະນະ”.
Prensa Latina ໄດ້ສະຫລຸບວ່າ ນັ້ນແມ່ນວິຖີຊີວິດທີ່ລຽບງ່າຍ ແລະ ອຸທິດຕົນຂອງຜູ້ບັນຊາການທະຫານທີ່ເກັ່ງກ້າສາມາດ, ວິລະຊົນແຫ່ງຊາດ ຫວູງວຽນຢາບ ເຊິ່ງໄດ້ສົ່ງແຮງບັນດານໃຈໃຫ້ທະຫານ ຫວຽດນາມ ຫຼາຍຄົນ.
ມິງດຶກ
