| ດັກລັກ (ຫວຽດນາມ) ແລະ ຈັນທະບູລີ (ໄທ) ແບ່ງປັນປະສົບການ ໃນການພັດທະນາໝາກຖົ່ວລຽນ | |
| ຫວຽດນາມ - ໄທ ພະຍາຍາມບັນລຸວົງເງິນການຄ້າ 25 ຕື້ USD ໂດຍໄວ |
ໂດຍໄດ້ຮັບຄຳເຊີນຂອງທ່ານປະທານສະພາຜູ້ແທນລາດຊະດອນ ໄທ ວັນ ມູຫະມັດ ນໍ ມະທາ (Wan Muhamad Noor Matha), ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ແລະ ຄະນະຜູ້ແທນສະພາແຫ່ງຊາດ ຫວຽດນາມ ໄດ້ມີການຢ້ຽມຢາມ ໄທ ແຕ່ວັນທີ 7 ທັນວາ – 10 ທັນວາ.
ຕອນບ່າຍວັນທີ 7 ທັນວາ, ຢູ່ນະຄອນຫຼວງ ບາງກອກ, ປະເທດໄທ, ທ່ານປະທານສະພາຜູ້ແທນລາດຊະດອນ ໄທ ວັນ ມູຫະມັດ ນໍ ມະທາ ໄດ້ເປັນປະທານທີ່ພິທີຕ້ອນຮັບຢ່າງເປັນທາງການທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ແລະ ຄະນະຜູ້ແທນສະພາແຫ່ງຊາດ ຫວຽດນາມ. ພາຍຫຼັງພິທີຕ້ອນຮັບ, ສອງຝ່າຍໄດ້ມີການພົບປະເຈລະຈາ.
 |
ທ່ານປະທານສະພາຜູ້ແທນລາດຊະດອນ ໄທ ວັນ ມູຫະມັດ ນໍ ມະທາ ທີ່ການຕ້ອນຮັບທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ |
ທ່ານປະທານສະພາຜູ້ແທນລາດຊະດອນ ໄທ ວັນ ມູຫະມັດ ນໍ ມະທາ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຕີລາຄາສູງຄວາມໝາຍຂອງການຢ້ຽມຢາມລາຊະອານາຈັກ ໄທ ຄັ້ງທຳອິດຂອງທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ. ການຢ້ຽມຢາມ ໄດ້ຈັດໃນໂອກາດສະເຫຼີມສະຫຼອງ 10 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ ຫວຽດນາມ - ໄທ (2013-2023), ໄດ້ສ້າງກຳລັງແຮງໃຫ້ສາຍພົວພັນມິດຕະພາບ ແລະ ການຮ່ວມມືຍຸດທະສາດ, ໃນນັ້ນ ມີການຮ່ວມມືລັດຖະສະພາລະຫວ່າງສອງປະເທດໃຫ້ນັບມື້ນັບພັດທະນາຢ່າງເລິກເຊິ່ງ, ກວ້າງຂວາງ ແລະ ແທດຈິງ. ທ່ານປະທານສະພາຜູ້ແທນລາດຊະດອນ ໄທ ໄດ້ສະແດງຄວາມຊົມເຊີຍ ຫວຽດນາມ ທີ່ບັນລຸໄດ້ບັນດາຜົນງານສຳຄັນໃນການພັດທະນາເສດຖະກິດ - ສັງຄົມ, ການເຕີບໂຕເສດຖະກິດສູງ; ຢືນຢັນວ່າ ຫວຽດນາມ ແມ່ນຄູ່ຮ່ວມມືສຳຄັນຂອງ ໄທ ໃນພາກພື້ນ.
ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ໄດ້ສະແດງຄວາມປິຕິຊົມຊື່ນໃນການຢ້ຽມຢາມ ໄທ ຢ່າງເປັນທາງການ; ຂອບໃຈຝ່າຍ ໄທ ທີ່ໄດ້ຈັດການເຮັດວຽກຢ່າງຮອບດ້ານ ແລະ ສະຫງວນການຕ້ອນຮັບຢ່າງສົມກຽດ ແລະ ມີລອບຄອບຖີ່ຖ້ວນໃຫ້ແກ່ຄະນະຜູ້ແທນ. ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ໄດ້ສົ່ງຄຳຢື້ຢາມຖາມຂ່າວອັນສະໜິດສະໜົມຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ແລະ ການນຳຂັ້ນສູງຫວຽດນາມ ມາຍັງທ່ານປະທານສະພາຜູ້ແທນລາດຊະດອນ ໄທ; ຊົມເຊີຍທ່ານ ວັນ ມູຫະມັດ ນໍ ມະທາ ທີ່ໄດ້ຮັບເລືອກຕັ້ງໃຫ້ດຳລົງຕຳແໜ່ງປະທານສະພາຜູ້ແທນລາດຊະດອນ ໄທ; ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນຄູ່ຮ່ວມມືຍຸດທະສາດ ຫວຽດນາມ - ໄທ ໃຫ້ຫຼາຍຂຶ້ນ.
ການນຳສອງທ່ານ ໄດ້ສະແດງຄວາມປິຕິຊົມຊື່ນຕໍ່ການພັດທະນາຢ່າງເຂັ້ມແຂງຂອງການພົວພັນຄູ່ຮ່ວມມືຍຸດທະສາດ ຫວຽດນາມ - ໄທ ໃນທຸກຂົງເຂດ, ນັບແຕ່ການເມືອງ, ຄວາມໝັ້ນຄົງ, ການປ້ອງກັນຊາດ, ຕະຫຼອດເຖິງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ການຄົມມະນາຄົມ, ການສຶກສາບຳລຸງສ້າງ ແລະ ວັດທະນະທຳ. ພິເສດ, ຢູ່ອາຊຽນ, ໄທ ສືບຕໍ່ແມ່ນຄູ່ຮ່ວມມືການຄ້າໃຫຍ່ທີ່ສຸດ (ດ້ວຍວົງເງິນ 2 ສົ້ນໃນປີ 2022 ບັນລຸເກືອບ 22 ຕື້ USD) ແລະ ແມ່ນນັກລົງທຶນໃຫຍ່ອັນດັບ 2 ຂອງຫວຽດນາມ (ປະມານ 14 ຕື້ USD).
ການນຳສອງທ່ານໄດ້ເຫັນດີເປັນເອກະພາບກ່ຽວກັບບັນດາທິດທາງໃຫຍ່ເພື່ອສືບຕໍ່ເສີມຂະຫຍາຍບົດບາດຂອງອົງການນິຕິບັນຍັດສອງປະເທດໃນການເພີ່ມທະວີຄວາມໄວ້ເນື້ອເຊື່ອໃຈ, ອຳນວຍຄວາມສະດວກ ແລະ ຊຸກຍູ້ການຮ່ວມມືໃນທຸກຂົງເຂດລະຫວ່າງສອງປະເທດ; ຊຸກຍູ້ການແລກປ່ຽນຄະນະຜູ້ແທນ, ການພົວພັນຂັ້ນສູງ ແລະ ທຸກຂັ້ນ, ໃນທຸກຊ່ອງທາງຂອງພັກ, ລັດ, ລັດຖະບານ, ສະພາແຫ່ງຊາດ ແລະ ການພົບປະແລກປ່ຽນປະຊາຊົນ; ຜັນຂະຫຍາຍບັນດາກົນໄກຮ່ວມມືຢ່າງມີປະສິດທິຜົນ, ຕັ້ງໜ້າປະຕິບັດໂຄງການປະຕິບັດຜັນຂະຫຍາຍການພົວພັນຄູ່ຮ່ວມມືຍຸດທະສາດ ໄລຍະ 2022-2027 ໃຫ້ປະກົດຜົນເປັນຈິງ. 2 ຝ່າຍເຫັນດີເປັນເອກະພາບຈະມານະພະຍາຍາມນຳວົງເງິນການຄ້າສອງສົ້ນຂຶ້ນເຖິງ 25 ຕື້ USD ໂດຍໄວ ແລະ ມຸ່ງໄປສູ່ທິດທາງທີ່ສົມດູນກວ່າ, ສ້າງຄວາມສະດວກ ແລະ ຫຼຸດຜ່ອນສິ່ງກີດຂວາງດ້ານການຄ້າ; ສ້າງສະພາບແວດລ້ອມທີ່ສະດວກໃຫ້ບັນດາວິສາຫະກິດຂອງສອງປະເທດເປີດກວ້າງການລົງທຶນ ແລະ ດຳເນີນທຸລະກິດ.
ທ່ານປະທານສະພາຜູ້ແທນລາດຊະດອນ ໄທ ໄດ້ເຫັນດີເປັນເອກະພາບກັບທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ກ່ຽວກັບເລື່ອງ 2 ຝ່າຍສົມທົບກັນຢ່າງແໜ້ນແຟ້ນ, ສ້າງແລວທາງນິຕິກຳທີ່ສະດວກ ເພື່ອຊຸກຍູ້ການປະຕິບັດຍຸດທະສາດ “ສາມເຊື່ອມຕໍ່” ຢ່າງສຳເລັດຜົນ. ໃນນັ້ນ ກໍມີການເຊື່ອມຕໍ່ ແລະ ສ້າງລະບົບຕ່ອງໂສ້ການສະໜອງໃໝ່ ເພື່ອສ້າງຜະລິດຕະພັນທີ່ມີມູນຄ່າເພີ່ມສູງເຊັ່ນ ຜະລິດຕະພັນກະເສດ, ປະກອບສ່ວນຮັບປະກັນຄວາມໝັ້ນຄົງດ້ານສະບຽງອາຫານໃນພາກພື້ນ; ເຊື່ອມຕໍ່ບັນດາວິສາຫະກິດ ແລະ ທ້ອງຖິ່ນຂອງສອງປະເທດ, ເພີ່ມທະວີການເຊື່ອມຕໍ່ຄົມມະນາຄົມ, ຮ່ວມມືໃນການຫັນປ່ຽນເສດຖະກິດດີຈີຕອນຢ່າງມີປະສິດທິຜົນ ແລະ ປອດໄພ, ກໍ່ສ້າງພື້ນຖານເສດຖະກິດສີຂຽວ. ທ່ານປະທານສະພາຜູ້ແທນລາດຊະດອນ ໄທ ກໍ່ສະເໜີໃຫ້ 2 ຝ່າຍເພີ່ມທະວີການຮ່ວມມືໃນບັນດາຂົງເຂດທົ່ວໂລກຄື ການຕ້ານການປ່ຽນແປງຂອງດິນຟ້າອາກາດ, ການປົກປັກຮັກສາສິ່ງແວດລ້ອມ, ສາທາລະນະສຸກ ແລະ ການປ້ອງກັນພະຍາດ...
2 ຝ່າຍກໍ່ໃຫ້ຄຳໝັ້ນສັນຍາຊຸກຍູ້ການຮ່ວມມືໃນບັນດາຂົງເຂດສຳຄັນອື່ນໆຄື ການປ້ອງກັນຊາດ, ປ້ອງກັນຄວາມສະຫງົບ, ການຮ່ວມມືທາງທະເລ; ເພີ່ມທະວີການຮ່ວມມືດ້ານການສຶກສາ - ບຳລຸງສ້າງ, ວັດທະນະທຳ, ທ່ອງທ່ຽວ ແລະ ການະົບປະແລກປ່ຽນປະຊາຊົນ; ຊຸກຍູ້ໂຄງການສອນພາສາ ໄທ ແລະ ຫວຽດນາມ ຢູ່ແຕ່ລະປະເທດ; ພັດທະນາການເຊື່ອມຕໍ່ການທ່ອງທ່ຽວ "ສອງປະເທດ, ຈຸດໝາຍປາຍທາງດຽວ". ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ໄດ້ຕີລາຄາສູງການໜູນຊ່ວຍຂອງ ໄທ ໃນການກໍ່ສ້າງຖະໜົນ ຫວຽດນາມ ແລະ ສ້າງຕັ້ງສູນການສຶກສາຫວຽດນາມ ຢູ່ແຂວງ ອຸດອນທານີ; ທ່ານຫວັງວ່າ ໄທຈະສືບຕໍ່ໜູນຊ່ວຍ ແລະ ສ້າງເງື່ອນໄຂສະດວກໃຫ້ປະຊາຄົມຊາວ ຫວຽດນາມ, ບັນດາການເຄື່ອນໄຫວຂອງສະມາຄົມຊາວ ຫວຽດນາມ, ເປັນຕົ້ນແມ່ນວຽກງານປົກປັກຮັກສາ ແລະ ເສີມຂະຫຍາຍເຂດຮ່ອງຮອຍປະທານ ໂຮ່ຈີມິນ ຢູ່ ໄທ.
ໃນຂອບເຂດການຮ່ວມມືລະຫວ່າງສອງສະພາແຫ່ງຊາດ, ການນຳສອງປະເທດໄດ້ເຫັນດີເປັນເອກະພາບເພີ່ມທະວີການແລກປ່ຽນຄະນະຜູ້ແທນ, ເຄື່ອນໄຫວພົບປະແລກປ່ຽນບັນດາຊ່ອງທາງສະມາຊິກລັດຖະສະພາມິດຕະພາບ, ສະມາຊິກລັດຖະສະພາຍິງ, ສະມາຊິກລັດຖະສະພາໜຸ່ມ; ຈັດຕັ້ງການເຄື່ອນໄຫວແລກປ່ຽນປະສົບການໃນການສ້າງກົດໝາຍ; ປຶກສາຫາລື ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສລະຫວ່າງລັດຖະສະພາຫຼາຍຝ່າຍ; ຊຸກຍູ້ການເຄື່ອນໄຫວຕິດຕາມກວດກາການປະຕິບັດບັນດາສັນຍາ, ຂໍ້ຕົກລົງຮ່ວມມືສອງຝ່າຍທີ່ໄດ້ລົງນາມລະຫວ່າງສອງປະເທດ.
ໂດຍປຶກສາຫາລືກ່ຽວກັບບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ການນຳ 2 ທ່ານ ຢືນຢັນຈະສືບຕໍ່ເພີ່ມທະວີການປຶກສາຫາລື ແລະ ສົມທົບກັນຢ່າງແໜ້ນແຟ້ນລະຫວ່າງ 2 ປະເທດຢູ່ບັນດາເວທີປາໄສພາກພື້ນ ແລະ ສາກົນ; ເສີມຂະຫຍາຍຄວາມສາມັກຄີ ແລະ ບົດບາດໃຈກາງຂອງອາຊຽນ ໃນບັນດາບັນຫາພາກພື້ນ; ປະສານສົມທົບການຄຸ້ມຄອງ ແລະ ການນຳໃຊ້ແຫຼ່ງນ້ຳແມ່ນ້ຳຂອງແບບຍືນຍົງ; ຢືນຢັນຄືນໃໝ່ຄວາມສຳຄັນຂອງການຮັກສາຄວາມສາມັກຄີ ແລະ ຫຼັກໝັ້ນລວມຂອງ ອາຊຽນ ກ່ຽວກັບບັນຫາທະເລຕາເວັນອອກ.
ບົນພື້ນຖານການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືທີ່ບັນລຸໄດ້, ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ຖືວ່າ 2 ຝ່າຍຕ້ອງສົມທົບກັນເພື່ອຍົກລະດັບການພົວພັນລະຫວ່າງສອງປະເທດໃນໄລຍະຈະມາເຖິງ. ເນື່ອງໃນໂອກາດນີ້, ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ໄດ້ເຊື້ອເຊີນທ່ານປະທານສະພາຜູ້ແທນລາດຊະດອນ ໄທ ມາຢ້ຽມຢາມ ຫວຽດນາມ ໃນເວລາທີ່ເໝາະສົມ. ທ່ານປະທານສະພາຜູ້ແທນລາດຊະດອນ ໄທ ໄດ້ຕອບຮັບຄຳເຊີນດ້ວຍຄວາມດີໃຈ.
ສິ້ນສຸດການພົບພະເຈລະຈາ, ປະທານສະພາແຫ່ງຊາດສອງປະເທດໄດ້ລົງນາມໃນບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງສະພາແຫ່ງຊາດ ສາທາລະນະລັດ ສັງຄົມນິຍົມ ຫວຽດນາມ ແລະ ສະພາຜູ້ແທນລາດຊະດອນ ລາຊະອານາຈັກ ໄທ; ເປັນສັກຂີພະຍານທ່ານເລຂາທິການ, ຫົວໜ້າຫ້ອງວ່າການສະພາແຫ່ງຊາດ ຫວຽດນາມ ບຸ່ຍວັນເກື່ອງ ແລະ ທ່ານຮັກສາການແທນເລຂາທິການສະພາຜູ້ແທນລາດຊະດອນ ໄທ Arpath Sukhaunth ໄດ້ລົງນາມໃນບົດບັນທຶກຊ່ວຍຈຳການຮ່ວມມືລະຫວ່າງຫ້ອງວ່າການສະພາແຫ່ງຊາດສາທາລະນະລັດ ສັງຄົມນິຍົມ ຫວຽດນາມ ແລະ ຄະນະເລຂາສະພາຜູ້ແທນລາດຊະດອນ ລາຊະອານາຈັກ ໄທ.
ຕອນບ່າຍວັນທີ 7 ທັນວາ, ທ່ານນາງ Padipat Suntiphada ຮອງປະທານຜູ້ທີໜຶ່ງສະພາຜູ້ແທນລາດຊະດອນ ໄທ ໄດ້ນຳທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ແລະ ຄະນະຜ້ແທນໄປຢ້ຽມຢາມສຳນັກງານສະພາແຫ່ງຊາດ ໄທ.
ຕອນບ່າຍວັນທີ 7 ທັນວາ, ທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ແລະ ທ່ານປະທານສະພາຜູ້ແທນລາດຊະດອນ ໄທ ໄດ້ປູກຕົ້ນຢາງອິນເດຍ 2 ຕົ້ນ ຢູ່ຫໍປະຊຸມໃຫຍ່ ສະພາແຫ່ງຊາດໄທ. ຕົ້ນຢາງອິນເດຍສອງຕົ້ນນີ້ ໄດ້ນຳມາຈາກ ຫວຽດນາມ ໂດຍທ່ານປະທານສະພາແຫ່ງຊາດ ຫວຽດນາມ ເຫວືອງດິງເຫ້ວ ນຳໄປມອບໃຫ້ສະພາແຫ່ງຊາດ ໄທ. ຕົ້ນໄມ້ຊະນິດນີ້ມີພະລັງຊີວິດອັນເຂັ້ມແຂງ, ເປັນສັນຍາລັກໃຫ້ແກ່ສາຍພົວພັນລະຫວ່າງສະພາແຫ່ງຊາດ ຫວຽດນາມ ແລະ ສະພາແຫ່ງຊາດ ໄທ ກໍຄືສາຍພົວພັນລະຫວ່າງສອງປະເທດ.
ມິງດຶກ
