ວັນທີ 5 ທັນວາ, ຢູ່ນະຄອນຫຼວງພະບາງ, ປະເທດລາວ, ໄດ້ດໍາເນີນກອງປະຊຸມລັດຖະມົນຕີແຮງງານ ແລະສະຫວັດດີການສັງຄົມ ລາວ-ຫວຽດນາມ ຄັ້ງທີ 8. ກອງປະຊຸມໂດຍທ່ານນາງ ຄໍາໃບ ຂັດຕິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມລາວ ກັບທ່ານ ດ່າວງອັກຢຸງ ລັດຖະມົນຕີກະຊວງແຮງງານ-ທະຫານເສຍອົງຄະ ແລະສັງຄົມຫວຽດນາມ ເປັນປະທານຮ່ວມ.
 |
| ທ່ານນາງ ຄໍາໃບ ຂັດຕິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມລາວ ກັບທ່ານ ດ່າວງອັກຢຸງ ລັດຖະມົນຕີກະຊວງແຮງງານ-ທະຫານເສຍອົງຄະ ແລະສັງຄົມຫວຽດນາມ ລົງນາມການຮ່ວມມືລະຫວ່າງສອງກະຊວງ ໄລຍະ 2023-2025. ພາບ: vov.vn |
ທີ່ກອງປະຊຸມ, ທ່ານລັດຖະມົນຕີ ດ່າວງອັກຢຸງ ໄດ້ສະເໜີໃຫ້ ລາວ ສືບຕໍ່ສ້າງເງື່ອນໄຂເພື່ອຮັບເອົາແຮງງານຫວຽດນາມ ມາເຮັດວຽກຢູ່ໂຄງການລົງທຶນ, ໂຄງການກໍ່ສ້າງຢູ່ ລາວ. ລັດຖະມົນຕີສອງທ່ານ ໄດ້ເຫັນດີເປັນເອກະພາບນຳກັນວ່າ ໃນໄລຍະຈະມາເຖິງ, ສອງຝ່າຍຈະສືບຕໍ່ເອົາໃຈໃສ່ເປັນພິເສດເຖິງການປະຕິບັດບັນດາເນື້ອໃນຂອງສັນຍາ, ເພີ່ມທະວີການຈັດຕັ້ງກອງປະຊຸມເຕັກນິກກ່ຽວກັບເນື້ອໃນລະອຽດເພື່ອສາມາດແລກປ່ຽນຢ່າງລະອຽດກວ່າ, ຮັບໃຊ້ໃຫ້ແກ່ວຽກງານສ້າງກົດໝາຍ ແລະນະໂຍບາຍຂອງສອງປະເທດ. ບັນດາຫົວໜ່ວຍຂອງສອງກະຊວງ, ພະແນກແຮງງານທະຫານເສຍອົງຄະ ແລະສັງຄົມ ແລະໂຮງຮຽນ... ສືບຕໍ່ສົມທົບກັນຢ່າງແໜ້ນແຟ້ນ, ຊຸກຍູ້ການລະດົມແຫຼ່ງກໍາລັງແນໃສ່ເພີ່ມທະວີພັດທະນາແຫຼ່ງຊັບພະຍາກອນມະນຸດທີ່ສາມາດຕອບສະໜອງຕາມມາດຕະຖານຂອງພາກພື້ນ ແລະສາກົນ.
ລັດຖະມົນຕີສອງທ່ານ ຢັ້ງຢືນວ່າຈະຫັນການຮ່ວມມືລະຫວ່າງສອງປະເທດເປັນຫຼາຍຮູບຫຼາຍແບບ ແລະເປີດກວ້າງໃນວຽກງານອຸປະຖຳຊ່ວຍເຫຼືອສັງຄົມ, ເບິ່ງແຍງດູແລເດັກ, ໜູນຊ່ວຍຄົນພິການ ແລະຜູ້ອາຍຸສູງ...
ສິ້ນສຸດກອງປະຊຸມ, ລັດຖະມົນຕີສອງທ່ານ ໄດ້ລົງນາມໃນບົດບັນທຶກກອງປະຊຸມລັດຖະມົນຕີແຮງງານ ແລະສະຫວັດດີການສັງຄົມ ລາວ-ຫວຽດນາມ ຄັ້ງທີ 8, ໃນນັ້ນ ໄດ້ສຸມໃສ່ບັນດາເນື້ອໃນລະອຽດເພື່ອຜັນຂະຫຍາຍແຜນການຮ່ວມມື ໄລຍະ 2023-2025.
ບູນມີ
