ກ່າວຄຳເຫັນທີ່ກອງປະຊຸມ, ທ່ານ ຮວ່າງນາມ ຮອງປະທານຄະນະກຳມະການປະຊາຊົນແຂວງ ໃຫ້ຮູ້ວ່າ: ແລວເສດຖະກິດຕາເວັນອອກ - ຕາເວັນຕົກ ມີບົດບາດສຳຄັນໃນແຜນຍຸດທະສາດເຊື່ອມຕໍ່ບັນດາທ້ອງຖິ່ນຂອງ 4 ປະເທດທີ່ມີຜົນປະໂຫຍດໂດຍກົງໃນອະນຸພາກພື້ນແມ່ນ້ຳຂອງ. ລັດຖະບານຂອງບັນດາປະເທດ ໃນແລວເສດຖະກິດຕາເວັນອອກ - ຕາເວັນຕົກ ໄດ້ເອົາໃຈໃສ່ເຖິງຊຸກຍູ້ການເຄື່ອນໄຫວພົບປະແລກປ່ຽນດ້ານເສດຖະກິດ, ວັດທະນະທຳ, ໂດຍສະເພາະແມ່ນການຖືການພັດທະນາດ້ານການຄ້າ, ການບໍລິການ, ການທ່ອງທ່ຽວ ເປັນກຳລັງໜູນ, ທັງເປັນເປົ້າໝາຍຍຸດທະສາດການພັດທະນາ.
ຕາມທ່ານ ຮວ່າງນາມ ແລ້ວ, ນອກຈາກບັນດາໝາກຜົນທີ່ບົນລຸໄດ້ແລ້ວນັ້ນ, ການຮ່ວມມືພັດທະນາການທ່ອງທ່ຽວບົນແລວເສດຖະກິດຕາເວັນອອກ-ຕາເວັນຕົກ, ການຮ່ວມມື ແລະ ການຮ່ວມສຳພັນລະຫວ່າງບັນດາຫົວໜ່ວຍ, ບໍລິສັດທ່ອງທ່ຽວຂອງກວາງຈີ ກັບລາວ ແລະ ໄທແລ້ວ ແມ່ນຍັງບໍ່ທັນສົມກັບບັນດາຄວາມສາມາດບົ່ມຊ້ອນ, ທ່າແຮງດ້ານການທ່ອງທ່ຽວຂອງແຕ່ລະທ້ອງຖິ່ນ ແລະ ແຕ່ລະຂົງເຂດ. ການຮ່ວມມື ແລະ ການຮ່ວມສຳພັນດ້ານການທ່ອງທ່ຽວ ເບິ່ງຄືວ່າຖືກຂາດຕອນເກືອບ 3 ປີ ໃນໄລຍະຖືກຜົນກະທົບຈາກພະຍາດໂຄວິດ-19.
 |
| Đảo Cồn Cỏ của Quảng Trị (Ảnh minh họa) ເກາະ ໂກນກໍ ຂອງກວາງຈີ (ພາບປະກອບ) |
ເພື່ອເພີ່ມທະວີການຮ່ວມມືພັດທະນາການທ່ອງທ່ຽວລະຫວ່າງແຂວງກວາງຈີ ກັບ ລາວ ແລະ ພາກຕາເວັນອອກສ່ຽງເໜືອຂອງໄທ, ທ່ານ ຮວ່າງນາມ ໄດ້ສະເໜີໃຫ້ສະມາຄົມການທ່ອງທ່ຽວບັນດາແຂວງໃນລາວ ແລະ ພາກຕາເວັນອອກສ່ຽງເໜືອໄທ ເອົາໃຈໃສ່ ແລະ ເຊື່ອມຕໍ່ກັບນັກທ່ອງທ່ຽວເຂົ້າມາທ່ຽວທະເລ ແລະ ບັນດາແຫຼ່ງທ່ອງທ່ຽວທີ່ມີສື່ສຽງຂອງແຂວງກວາງຈິ.
ທີ່ກອງປະຊຸມສຳມະນາ, ຜູ້ຕາງໜ້າສະມາຄົມການທ່ອງທ່ຽວແຂວງກວາງຈີ ໄດ້ແບ່ງປັນ ແລະ ແນະນຳກ່ຽວກັບຄວາມສາມາດບົ່ມຊ້ອນ, ທ່າແຮງບັນດາປາຍທາງໃນບໍລິເວນແຂວງ, ໂດຍສະເພາະແມ່ນແນະນຳບາງລາຍການທ່ອງທ່ຽວ “ລົງຕົວຈິງການທ່ອງທ່ຽວທະເລ ກວາງຈີ” ສອງວັນໃນທ້າຍອາທິດ ຫຼື ລາຍການທ່ອງທ່ຽວ “3 ວັນ 2 ຄືນ” ເພື່ອໂຄສະນາເຜີຍແຜ່ແລະ ເຊື່ອມຕໍ່ກັບວິສາຫະກິດລາວ ແລະ ໄທ ເພື່ອດຶງດູດນັກທ່ອງທ່ຽວ ເຂົ້າມາທ່ອງທ່ຽວ.
ຄະນະຈັດຕັ້ງ ໄດ້ເຊື້ອເຊີນຜູ້ຕາງໜ້າວິສາຫະກິດທ່ອງທ່ຽວລາວ ແລະ ໄທ ໄປສຳຫຼວດຄວາມເປັນໄປໄດ້ ແລະ ມີຄວາມປາດຖະໜາ, ສະເໜີ, ປະກອບຄຳເຫັນເພື່ອຍົກສູງຄຸນນະພາບ ແລະ ການຫັນເປັນຫຼາກຫຼາຍຂອງບັນດາຜະລິດຕະພັນທ່ອງທ່ຽວທີ່ແຂວງກວາງຈີ ຫາກໍ່ນຳເຂົ້າຜັນຂະຫຍາຍ.
ໃນກອງປະຊຸມດັ່ງກ່າວ, ເພື່ອກ້າວໄປສູ່ການຮ່ວມມືພັດທະນາການທ່ອງທ່ຽວ ລະຫວ່າງແຂວງກວາງຈິ ກັບບັນດາແຂວງ, ນະຄອນຂອງລາວ ແລະ ໄທ, ສູນການສົ່ງເສີມການລົງທຶນ, ການຄ້າ ແລະ ການທ່ອງທ່ຽວ, ສະມາຄົມການທ່ອງທ່ຽວແຂວງກວາງຈິ ໄດ້ລົງນາມໃນບົດບັນທຶກຄວາມເຂົ້າໃຈ ເພື່ອສົ່ງເສີມ ແລະ ເຊື່ອມຕໍ່ການທ່ອງທ່ຽວກັບສະມາຄົມການທ່ອງທ່ຽວ, ການຄ້າ ແລະ ອຸດສາຫະກຳ ພາກຕາເວັນອອກສຽງເໜືອຂອງໄທ ແລະ ສະມາຄົມການທ່ອງທ່ຽວແຂວງສະຫວັນນະເຂດ.
ຄະນະຈັດຕັ້ງ ໄດ້ຈັດການວາງສະແດງ ແລະ ແນະນຳບັນດາຜະລິດຕະພັນ OCOP ທີ່ເປັນເອກະລັກຂອງແຂວງ ກວາງຈີ; ບັນດາລາຍການທ່ອງທ່ຽວ, ພ້ອມກັບບັນດານະໂຍບາຍຫຼຸດລາຄາຂອງບັນດາຮາກຖານດຳເນີນທຸລະກິດເພື່ອດຶງດູດເອົາລູກຄ້າ.
ອານຸໄຊ ສະຫວັດ
