| Vietjet ເປີດສາຍການບິນໂດຍກົງ ນະຄອນໂຮ່ຈີມິນ - ວຽງຈັນ ແລະ ປະກາດການຮ່ວມມືຮອບດ້ານກັບ Lao Airlines | |
| ກອງປະຊຸມຂັ້ນສູງ NAM ກ່ຽວກັບການຮັບມືກັບໂລກລະບາດໂຄວິດ-19 |
ຢູ່ຮ່າໂນ້ຍ, ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ຫງວຽນຊິງເຫຍີດເຕິ່ນ ໄດ້ມີການຕ້ອນຮັບ ແລະ ເຮັດວຽກກັບຄະນະຜູ້ແທນກະຊວງອຸດສາຫະກຳ ແລະ ການຄ້າ ລາວ ໂດຍທ່ານ ບຸນເຖິງ ດວງສະຫວັນ ເປັນຫົວໜ້າຄະນະ. ນີ້ແມ່ນໜຶ່ງໃນບັນດາການເຄື່ອນໄຫວ ເພື່ອແນ່ໃສ່ຫັນເປັນລະອຽດບັນດາເນື້ອໃນຂອງບົດບັນທຶກຊ່ວຍຈຳກ່ຽວກັບການຮ່ວມມືໃນຂົງເຂດຄຸ້ມຄອງທ້ອງຕະຫຼາດ ທີ່ກະຊວງອຸດສາຫະກຳ ແລະ ການຄ້າ ຫວຽດນາມ ແລະ ກະຊວງອຸດສາຫະກຳ ແລະ ການຄ້າ ລາວ ໄດ້ລົງນາມໃນເດືອນ ເມສາ ປີ 2024 ຢູ່ ວຽງຈັນ, ປະເທດ ລາວ.
ເຂົ້າຮ່ວມທີ່ການຕ້ອນຮັບ ແລະ ເຮັດວຽກ, ຝ່າຍ ຫວຽດນາມ ໄດ້ມີການນຳບັນດາຫົວໜ່ວຍຄື: ກົມໃຫຍ່ຄຸ້ມຄອງທ້ອງຕະຫຼາດ, ກົມຕະຫຼາດ ອາຊີ - ອາຟຣິກາ ແລະ ຜູ້ຕາງໜ້າບັນດາຫົວໜ່ວຍທີ່ກ່ຽວຂ້ອງຈຳນວນໜຶ່ງ. ໃນນັ້ນ, ໃນຄະນະຜູ້ແທນລາວ, ມີຜູ້ຕາງໜ້າບັນດາຫົວໜ່ວຍປະຕິບັດໜ້າທີ່ຢູ່ກະຊວງອຸດສາຫະກຳ ແລະ ການຄ້າ ລາວ.
 |
| ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫງວຽນຊິງເຫຍີດເຕິ່ນ ຕ້ອນຮັບ ແລະ ເຮັດວຽກກັບຄະນະຜູ້ແທນກະຊວງອຸດສາຫະກຳ ແລະ ການຄ້າລາວ ໂດຍທ່ານຮອງລັດຖະມົນຕີ ບຸນເຖິງ ດວງສະຫວັນ ເປັນຫົວໜ້າຄະນະ. |
ທີ່ການເຮັດວຽກ, ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ໄດ້ໃຫ້ການຕ້ອນຮັບຄະນະຜູ້ແທນກະຊວງອຸດສາຫະກຳ ແລະ ການຄ້າ ລາວ ໄປຢ້ຽມຢາມ ແລະ ເຮັດວຽກຢູ່ ຫວຽດນາມ. ທົບທວນຄືນໝາກຜົນການຢ້ຽມຢາມ ແລະ ເຮັດວຽກຢູ່ ລາວ ຂອງຄະນະຜູ້ແທນກະຊວງອຸດສາຫະກຳ ແລະ ການຄ້າ ຫວຽດນາມ ໃນເດືອນ ເມສາ 2024, ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ໃຫ້ຮູ້ວ່າ: ສອງຝ່າຍໄດ້ແລກປ່ຽນ ແລະ ບັນລຸໄດ້ບັນດາໝາກຜົນສຳຄັນໃນຫຼາຍຂົງເຂດ, ເປັນຕົ້ນແມ່ນການລົງນາມ ບົດບັນທຶກຊ່ວຍຈຳລະຫວ່າງກົມໃຫຍ່ຄຸ້ມຄອງທ້ອງຕະຫຼາດ (ກະຊວງອຸດສາຫະກຳ ແລະ ການຄ້າ ຫວຽດນາມ) ແລະ ກົມແຂ່ງຂັນທາງທຸລະກິດ ແລະ ກວດກາການຄ້າ (ກະຊວງອຸດສາຫະກຳ ແລະ ການຄ້າ ລາວ). ສະນັ້ນ, ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ເນັ້ນໜັກວ່າ: ກະຊວງອຸດສາຫະກຳ ແລະ ການຄ້າ ຫວຽດນາມ ຍິນດີຕ້ອນຮັບຝ່າຍ ລາວ ຢ່າງສູງ ໃນການຈັດຕັ້ງຄະນະຜູ້ແທນໄປເຮັດວຽກຢູ່ ຫວຽດນາມ ເພື່ອແນ່ໃສ່ຫັນເປັນລະອຽດບັນ ດາເນື້ອໃນຕາມບົດບັນທຶກຊ່ວຍຈຳ.
ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ໃຫ້ຮູ້ວ່າ: ການຮ່ວມມືດ້ານອຸດສາຫະກຳ ແລະ ການຄ້າແມ່ນເສົາຄ້ຳສຳຄັນໃນການພົວພັນລະຫວ່າງ ຫວຽດນາມ - ລາວ. ປີ 2023, ວົງເງິນການຄ້າສອງປະເທດ ຫວຽດນາມ - ລາວ ໄດ້ບັນລຸ 1,63 ຕື້ USD. 4 ເດືອນຕົ້ນປີ 2024, ຜົນບວກຂອງວົງເງິນການຄ້າຂອງ 2 ປະເທດບັນລຸ 620,6 ລ້ານ USD, ເພີ່ມຂຶ້ນ 10,6% ເມື່ອທຽບໃສ່ໄລຍະດຽວກັນຂອງປີ 2023. ສິນຄ້າສົ່ງອອກຕົ້ນຕໍຂອງ ຫວຽດນາມ ໄປ ລາວ ແມ່ນນ້ຳມັນແອັດຊັງ, ພາຫະນະຂົນສົ່ງ ແລະ ຜະລິດຕະພັນອາໄຫຼ່, ຜະລິດຕະພັນຈາກເຫຼັກກ້າ... ກົງກັນຂ້າມ ຫວຽດນາມ ນຳເຂົ້າຈາກ ລາວ ແມ່ນປະເພດສິນຄ້າຢາງພາລາ, ຖ່ານຫີນ, ໄມ້ ແລະ ຜະລິດຕະພັນຈາກໄມ້...
ຕາມທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ແລ້ວ, ປະຈຸບັນ 2 ປະເທດພວມຕັ້ງໜ້າຊຸກຍູ້ການພົວພັນຮ່ວມມື ແລະ ບັນລຸໄດ້ບັນດາໝາກຜົນສຳຄັນໃນຂົງເຂດພະລັງງານຄື: ການຮ່ວມມືດ້ານການຊື້-ຂາຍໄຟຟ້າ, ການຮ່ວມມືຊື້-ຂາຍຖ່ານຫີນ... ກ່ຽວກັບການຮ່ວມມືດ້ານການລົງທຶນ, ມາເຖິງປະຈຸບັນ, ວິສາຫະກິດ ຫວຽດນາມ ໄດ້ລົງທຶນຢູ່ ລາວ 245 ໂຄງການ, ໃນນັ້ນມີຫຼາຍໂຄງການລົງທຶນຂອງວິສາຫະກິດຫວຽດນາມ ຢູ່ ລາວ ພວມດຳເນີນໄປຢ່າງມີປະສິດທິຜົນ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມ, ສ້າງວຽກເຮັດງານທຳ, ລາຍຮັບໃຫ້ຄົນງານນັບພັນຄົນ, ເພີ່ມລາຍຮັບໃຫ້ແກ່ ງົບປະມານແຫ່ງລັດ ລາວ, ໂດຍສະເພາະແມ່ນຂົງເຂດໂທລະຄົມ, ການທະນາຄານ, ການປູກ ແລະ ປຸງແຕ່ງຢາງພາລາ, ການຜະລິດ ແລະ ປຸງແຕ່ງອາຫານ, ນ້ຳນົມ...
 |
| ທ່ານຮອງນາຍົກລັດຖະມົນຕີ ຫງວຽນຊິງເຫຍີດເຕິ່ນ ຊີ້ແຈ້ງວ່າ: ມີຫຼາຍວິທີແກ້ໄຂເພື່ອຊຸກຍູ້ການຮ່ວມມືໃນຂົງເຂດຄຸ້ມຄອງທ້ອງຕະຫຼາດລະຫວ່າງ ຫວຽດນາມ ແລະ ລາວ. |
ພິເສດ, ໃນຂົງເຂດຄຸ້ມຄອງທ້ອງຕະຫຼາດ, ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ໃຫ້ຮູ້ວ່າ, ສອງກະຊວງໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືໃນຂົງເຂດນີ້, ນີ້ແມ່ນຮາກຖານ, ພື້ນຖານເພື່ອໃຫ້ອຳນາດການປົກຄອງ 2 ປະເທດສົມທົບກັນໃນວຽກງານການປ້ອງກັນ ແລະ ຕ້ານການລະເມີດກົດໝາຍທຸລະກິດ ແລະ ການຄ້າ; ປົກປ້ອງສິດທິຜູ້ບໍລິໂພກຂອງແຕ່ລະປະເທດ.
ເພື່ອແນໃສ່ຫັນເປັນລະອຽດບົດບັນທຶກຊ່ວຍຈຳການຮ່ວມມື, ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ສະເໜີໃຫ້ກົມໃຫຍ່ຄຸ້ມຄອງທ້ອງຕະຫຼາດ (ກະຊວງອຸດສາຫະກຳ ແລະ ການຄ້າ ຫວຽດນາມ) ສົມທົບກັນຢ່າງຕັ້ງໜ້າກົມແຂ່ງຂັນທາງທຸລະກິດ ແລະ ກວດກາການຄ້າ (ກະຊວງອຸດສາຫະກຳ ແລະ ການຄ້າ ລາວ) ເພື່ອຈັດຕັ້ງປະຕິບັດເນື້ອໃນຂອງບົດບັນທຶກຊ່ວຍຈຳ ເພື່ອຊຸກຍູ້ການຮ່ວມມືໃນການຄຸ້ມຄອງລັດໃນການສະກັດກັ້ນ ແລະ ຕ້ານການລະເມີດກົດໝາຍໃນທຸລະກິດ ແລະ ການຄ້າ, ປົກປ້ອງສິດຜູ້ບໍລິໂພກ. ສອງຝ່າຍສືບຕໍ່ຈັດຕັ້ງຄະນະເຮັດວຽກເພື່ອສຶກສາ, ແລກປ່ຽນບົດຮຽນ ແລະ ສົມທົບກັນໃນການຄຸ້ມຄອງທ້ອງຕະຫຼາດ.
ໃນໄລຍະປະຕິບັດງານຢູ່ ຫວຽດນາມ, ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ຫວັງວ່າ ກົມໃຫຍ່ຄຸ້ມຄອງທ້ອງຕະຫຼາດ ຈະແບ່ງປັນປະສົບການໃນການປ້ອງກັນ ແລະ ຕ້ານບັນດາສິນຄ້າປອມ ແລະ ປົກປ້ອງຜູ້ບໍລິໂພກ ກັບກົມແຂ່ງຂັນທາງທຸລະກິດ ແລະ ກວດກາການຄ້າຂອງ ລາວ.
ເຫັນດີເປັນເອກະພາບກັບບັນດາຂໍ້ສະເໜີຂອງທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຫງວຽນຊິງເຫຍີດເຕິ່ນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ບຸນເຖິງ ດວງສະຫວັນ ໄດ້ຕີລາຄາສູງຄວາມສຳຄັນຂອງເນື້ອໃນຂອງບົດບັນທຶກຊ່ວຍຈຳ ທີ່ໄດ້ລົງນາມລະຫວ່າງ 2 ຫົວໜ່ວຍ, ພິເສດແມ່ນໃນສະພາບການເຊື່ອມໂຍງ ແລະ ການຄ້າເອເລັກໂຕນິກ ພວມພັດທະນາຢ່າງແຮງໃນປະຈຸບັນ.
ທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າລາວ ຫວັງວ່າ ກົມໃຫຍ່ຄຸ້ມຄອງທ້ອງຕະຫຼາດຈະແລກປ່ຽນປະສົບການໃນການປ້ອງກັນ ແລະ ຕ້ານສິນຄ້າປອມ ແລະ ປົກປ້ອງຜູ້ບໍລິໂພກກັບກົມແຂ່ງຂັນທາງທຸລະກິດ ແລະ ກວດກາການຄ້າຂອງລາວ; ໃນນັ້ນມີວິທີການຄຸ້ມຄອງໃນກິດຈະກໍາທຸລະກິດນໍ້າມັນ; ແບ່ງປັນໂຄງປະກອບ ແລະ ຮູບແບບການຈັດຕັ້ງຂອງກຳລັງຄຸ້ມຄອງຕະຫຼາດຫວຽດນາມ; ແບ່ງປັນວິທີແກ້ໄຂການຕ້ານການຄ້າຂາຍສິນຄ້າປອມ ແລະ ຄຸນນະພາບບໍ່ດີໃນສະພາບແວດລ້ອມແບບດັ້ງເດີມ ແລະ ເອເລັກໂຕນິກ...
ໂດຍແບ່ງປັນຂໍ້ມູນທີ່ການເຮັດວຽກ, ທ່ານ ພູວຽງ ພົງສາ - ຫົວໜ້າກົມແຂ່ງຂັນທຸລະກິດ ແລະ ກວດກາການຄ້າລາວ ໃຫ້ຮູ້ວ່າ: ໃນການເດີນທາງປະຕິບັດງານຢູ່ ຫວຽດນາມ ຄັ້ງນີ້, ກົມແຂ່ງຂັນທາງທຸລະກິດ ແລະ ກວດກາການຄ້າ ລາວ ປາດຖະໜາຢາກຊອກຮູ້ກ່ຽວກັບການປະຕິບັດຕົວຈິງຢູ່ບັນດາກົມຄຸ້ມຄອງທ້ອງຕະຫຼາດທ້ອງຖິ່ນ; ຮຽນຮູ້ກ່ຽວກັບວຽກງານສົມທົບກັບບັນດາຂະແໜງການທີ່ກ່ຽວຂ້ອງໃນການຄຸ້ມຄອງທ້ອງຕະຫຼາດ; ຮຽນຮູ້ການຄຸ້ມຄອງຜະລິດຕະພັນນ້ຳມັນ; ການຄຸ້ມຄອງຄຸນນະພາບຂອງສິນຄ້າໃນການຄ້າເອເລັກໂຕນິກ; ແບ່ງປັນ ແລະ ແລກປ່ຽນປະສົບການດ້ານການປົກປ້ອງຜູ້ບໍລິໂພກ...
 |
| ທ່ານ ເຈີ່ນຮຶວລິງ, ຫົວໜ້າກົມໃຫຍ່ຄຸ້ມຄອງທ້ອງຕະຫຼາດ (ກະຊວງອຸດສາຫະກຳ ແລະ ການຄ້າ ຫວຽດນາມ) ໄດ້ເຂົ້າຮ່ວມເຫດການ. |
 |
| ທ່ານ ພູວຽງ ພົງສາ, ຫົວໜ້າກົມແຂ່ງຂັນທາງທຸລະກິດ ແລະ ກວດກາການຄ້າຂອງລາວ ຫວັງວ່າຈະມີຫຼາຍໂອກາດເພື່ອຮຽນຮູ້ຮູບແບບການຈັດຕັ້ງຂອງກຳລັງການຄຸ້ມຄອງທ້ອງຕະຫຼາດ ຫວຽດນາມ. |
 |
| ການນຳກົມໃຫຍ່ຄຸ້ມຄອງທ້ອງຕະຫຼາດເຂົ້າຮ່ວມເຫດການ |
 |
| ທ່ານທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ໄດ້ຖ່າຍຮູບກັບ ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ລາວ |
 |
| ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ແລະ ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ໄດ້ຖ່າຍຮູບກັບຜູ້ຕາງໜ້າບັນດາຫົວໜ່ວຍກະຊວງອຸດສາຫະກຳ ແລະ ການຄ້າ 2 ປະເທດ. |
ມິງດຶກ
