ຕອນເຊົ້າວັນທີ 15 ມີນາ, ທ່ານນາຍົກລັດຖະມົນຕີ ຟ້າມມິງຈິງ ໄດ້ເປັນປະທານກອງປະຊຸມທາງໄກທົ່ວປະເທດກ່ຽວກັບການທ່ອງທ່ຽວປີ 2023.
ເຂົ້າຮ່ວມກອງປະຊຸມມີທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ; ບັນດາລັດຖະມົນຕີ, ຫົວໜ້າບັນດາກະຊວງ, ອົງການທຽບເທົ່າກະຊວງ, ອົງການຂຶ້ນກັບລັດຖະບານ; ປະທານຄະນະກຳມະການປະຊາຊົນແຂວງ, ນະຄອນ; ຜູ້ຕາງໜ້າບັນດາອົງການຈັດຕັ້ງ, ສະມາຄົມ, ວິສາຫະກິດລົງທຶນທຸລະກິດທ່ອງທ່ຽວ ແລະ ບັນດາຂະແໜງການທີ່ກ່ຽວຂ້ອງ; ຜູ້ຊ່ຽວຊານດ້ານເສດຖະກິດ.
ຕາມກະຊວງວັດທະນະທຳ, ກິລາ ແລະ ທ່ອງທ່ຽວແລ້ວ, ກ່ອນເກີດໂລກລະບາດໂຄວິດ-19 (ປີ 2019), ຈຳນວນແຂກສາກົນມາຫວຽດນາມ ໄດ້ເພີ່ມຂຶ້ນ 2,3 ເທົ່າເມື່ອທຽບໃສ່ປີ 2015, ບັນລຸ 18 ລ້ານເທື່ອຄົນ, ເພີ່ມຂຶ້ນສະເລ່ຍ 22,7%/. ປີ. ໃນປີ 2019, ຈຳນວນນັກທ່ອງທ່ຽວສາກົນທີ່ມາຢ້ຽມຢາມ ຫວຽດນາມ ຢືນຢູ່ອັນດັບ 3 ຂອງພາກພື້ນ ອາຊຽນ (ຖັດຈາກໄທ ແລະ ມາເລເຊຍ). ໃນຂະນະນັ້ນ, ນັກທ່ອງທ່ຽວພາຍໃນປະເທດບັນລຸ 85 ລ້ານເທື່ອຄົນ, ເພີ່ມຂຶ້ນສະເລ່ຍ 10,5% ຕໍ່ປີ. ອັດຕາການປະກອບສ່ວນເຂົ້າໃນ GDP ທົ່ວປະເທດຂອງຂະແໜງການທ່ອງທ່ຽວແມ່ນສູງເຖິງ 9,2%.
 |
| ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: TTXVN) |
ໂລກລະບາດໂຄວິດ-19 ແຜ່ລະບາດໃນທົ່ວໂລກໄດ້ສົ່ງຜົນກະທົບຢ່າງໜັກໜ່ວງຕໍ່ຂະແໜງການທ່ອງທ່ຽວໃນໂລກ ກໍຄືຫວຽດນາມ. ປີ 2020, ທົ່ວປະເທດໄດ້ຮັບນັກທ່ອງທ່ຽວສາກົນພຽງ 3,7 ລ້ານເທື່ອຄົນ, ຮັບໃຊ້ນັກທ່ອງທ່ຽວພາຍໃນປະເທດ 56 ລ້ານເທື່ອຄົນ, ຫຼຸດລົງ 34% ເມື່ອທຽບໃສ່ໄລຍະດຽວກັນຂອງປີ 2019; ລາຍຮັບຈາກນັກທ່ອງທ່ຽວບັນລຸ 312.200 ຕື້ດົ່ງ, ຫຼຸດລົງ 57,8% ເມື່ອທຽບໃສ່ປີ 2019.
ພາຍຫຼັງຄວບຄຸມການແຜ່ລະບາດຂອງພະຍາດໂຄວິດ-19 ໄດ້ໂດຍພື້ນຖານ, ນັບແຕ່ວັນທີ 15 ມີນາ 2022, ລັດຖະບານໄດ້ຕັດສິນໃຈຈະເປີດການເຄື່ອນໄຫວການທ່ອງທ່ຽວທັງຫມົດ. ດ້ວຍທິດຊີ້ນຳທີ່ໃກ້ຊິດຂອງລັດຖະບານ, ທ່ານນາຍົກລັດຖະມົນຕີ, ການສົມທົບຂອງບັນດາກະຊວງ, ຂະແໜງການ ແລະ ຄວາມພະຍາຍາມຂອງທົ່ວຂະແໜງການ, ການເຄື່ອນໄຫວທ່ອງທ່ຽວນັບມື້ນັບຟົດຟື້ນ, ພິເສດແມ່ນການທ່ອງທ່ຽວພາຍໃນປະເທດ.
ປີ 2022, ຈຳນວນນັກທ່ອງທ່ຽວພາຍໃນປະເທດຈະບັນລຸ 101,3 ລ້ານເທື່ອຄົນ (ເພີ່ມຂຶ້ນຫຼາຍກວ່າ 150% ເມື່ອທຽບໃສ່ຄາດໝາຍ 60 ລ້ານເທື່ອຄົນ). ລວມຍອດລາຍຮັບຈາກນັກທ່ອງທ່ຽວບັນລຸ 495 ພັນຕື້ດົ່ງ, ລື່ນກາຍ 23% ເມື່ອທຽບໃສ່ກັບແຜນການ ແລະ ບັນລຸ 66% ເມື່ອທຽບໃສ່ລະດັບສະຖິຕິໃນປີ 2019. ຈຳນວນນັກທ່ອງທ່ຽວສາກົນມາ ຫວຽດນາມ ບັນລຸ 3,5 ລ້ານເທື່ອຄົນ (ຫຼຸດລົງ 80% ເມື່ອທຽບໃສ່ປີ 2019), ບັນລຸ 70% ຂອງແຜນການ…
ທີ່ກອງປະຊຸມ, ການນຳບັນດາກະຊວງ, ຄະນະ, ຂະແໜງການ, ທ້ອງຖິ່ນ ແລະ ວິສາຫະກິດໄດ້ປຶກສາຫາລື, ໄຈ້ແຍກສະພາບການ, ກາລະໂອກາດ, ຂໍ້ສະດວກ, ຄວາມຫຍຸ້ງຍາກ; ສາຍເຫດ, ບົດຮຽນປະສົບການໃນການພັດທະນາການທ່ອງທ່ຽວໃນໄລຍະຜ່ານມາ ແລະ ວິທີແກ້ໄຂໃນການພັດທະນາການທ່ອງທ່ຽວໃນໄລຍະຈະມາເຖິງ; ປະສົບການສາກົນໃນການພັດທະນາການທ່ອງທ່ຽວ... ບັນດາຜູ້ແທນໃຫ້ຮູ້ວ່າ: ຈຳນວນນັກທ່ອງທ່ຽວສາກົນມາ ຫວຽດນາມ ຍັງບໍ່ທັນບັນລຸໄດ້ຕາມຄາດໝາຍ, ສ່ວນໜຶ່ງແມ່ນບັນດາວິສາຫະກິດທ່ອງທ່ຽວ ຫວຽດນາມ ຍັງບໍ່ທັນເປັນເຈົ້າການ ແລະ ເຊື່ອມໂຍງກັບເຂົ້າຄືນຕະຫຼາດ, ຊຸກຍູ້ການຂຸດຄົ້ນບັນດາຕະຫຼາດໃໝ່, ຍັງລໍຄອຍ ແລະ ຂຶ້ນກັບຕະຫຼາດແບບດັ້ງເດີມ; ນະໂຍບາຍວີຊາ ຍັງບໍ່ທັນຕອບສະໜອງໄດ້ຕາມເງື່ອນໄຂການແກ່ງແຍ້ງ; ອຸດສາຫະກຳການທ່ອງທ່ຽວຍັງຂາດເຂີນແຮງງານທີ່ມີທັກສະ ແລະ ມີປະສົບການ; ການເຊື່ອມຕໍ່ລະຫວ່າງພາກພື້ນ, ທ້ອງຖິ່ນ ແລະ ບັນດາຂະແໜງຍັງຕ່ຳ; ຜະລິດຕະພັນການທ່ອງທ່ຽວບໍ່ມີຄວາມຫຼາກຫຼາຍ ແລະ ເປັນທີ່ດຶງດູດ…
ບັນດາຜູ້ແທນໄດ້ສະເໜີຜັນຂະຫຍາຍ, ປະຕິບັດມະຕິເລກທີ 08 ຂອງກົມການເມືອງໃຫ້ເປັນຢ່າງດີ, ໃນນັ້ນມີນະໂຍບາຍບຸລິມະສິດກ່ຽວກັບພາສາທີ່ດິນ, ລາຄາໄຟຟ້າໃຫ້ແກ່ບັນດາຮາກຖານດຳເນີນທຸລະກິດການທ່ອງທ່ຽວ, ສືບຕໍ່ໜູນຊ່ວຍ, ເພີ່ມທະວີງົບປະມານໃຫ້ແກ່ການໂຄສະນາ, ການສົ່ງເສີມການທ່ອງທ່ຽວ, ຊຸກຍູ້ບັນດາວິສາຫະກິດການທ່ອງທ່ຽວສາກົນໃນການລົງທຶນ, ດຳເນີນທຸລະກິດຢູ່ ຫວຽດນາມ, ເປີດກວ້າງເປົ້າໝາຍຍົກເວັ້ນວິຊາ, ກໍ່ສ້າງ, ຄຸ້ມຄອງການວາງແຜນກຳນົດການທ່ອງທ່ຽວ ດ້ວຍບັນດາຜະລິດຕະພັນການທ່ອງທ່ຽວທີ່ເປັນເອກະລັກສະເພາະໃຫ້ແກ່ແຕ່ລະເຂດພາກ, ຕິດພັນກັບວັດທະນະທຳ, ທິວທັດທຳມະຊາດ, ພື້ນຖານໂຄງລ່າງ, ດິນຟ້າອາກາດ, ໝູນໃຊ້ເຕັກໂນໂລຢີເຂົ້າການຄຸ້ມຄອງ, ນຳໃຊ້, ໂຄສະນາການທ່ອງທ່ຽວ, ຄວນມີໂຄງການແຫ່ງຊາດກ່ຽວກັບການພັດທະນາການທ່ອງທ່ຽວ…ເພື່ອສ້າງບາດກ້າວບຸກທະລຸ, ຍູ້ໄວການຟື້ນຟູ, ເພີ່ມຄວາມໄວໃນການພັດທະນາການທ່ອງທ່ຽວຢ່າງມີປະສິດທິຜົນ ແລະ ຍືນຍົງ.
ບຸນຄົງ
