ທີ່ການພົບປະ, ທ່ານ ໂຕງແທັງຫ໋າຍ, ກຳມະການຄະນະປະຈຳພັກແຂວງ, ຮອງປະທານຜູ້ປະຈຳການຄະນະກຳມະການປະຊາຊົນແຂວງ, ປະທານສະຫະພັນບັນດາອົງການຈັດຕັ້ງມິດຕະພາບແຂວງລາຍເຈົາ ໄດ້ແນະນຳເງື່ອນໄຂທຳມະຊາດ ແລະ ການພັດທະນາເສດຖະກິດ-ສັງຄົມ ໃນປີ 2022 ຂອງແຂວງໂດຍສັງເຂບ.
ຕາມນັ້ນແລ້ວ, ແຂວງລາຍເຈົາ ແມ່ນແຂວງພູດອຍ, ເຂດຊາຍແດນຢູ່ພາກຕາເວັນຕົກສ່ຽງເໜືອຂອງປະເທດ, ມີທີ່ຕັ້ງຍຸດທະສາດສຳຄັນພິເສດກ່ຽວກັບດ້ານການປ້ອງກັນປະເທດ, ປ້ອງກັນຄວາມສະຫງົບ, ມີຫຼັກໝາຍເລກທີ 17-18 ຢູ່ຍອດແມ່ນ້ຳດາ, ມີດ່ານຊາຍແດນສາກົນ ມາລູທ່າງ ແລະ ມີເສັ້ນທາງຄ້າຂາຍຫຼາຍສາຍກັບຈີນ. ລາຍເຈົາຍັງແມ່ນບ່ອນດຳລົງຊີວິດຂອງ 20 ຊົນເຜົ່າ, ໃນນັ້ນມີ 3 ຊົນເຜົ່າທີ່ມີລັກສະນະສະເພາະຄື: ກົງ, ມາງ, ລາຫູ...
 |
| ການເຮັດວຽກ (ພາບ: laichau.gov.vn) |
ປີ 2022, ເສດຖະກິດຂອງແຂວງສືບຕໍ່ຟື້ນຟູ ແລະ ພັດທະນາ, ຮັບປະກັນຊີວິດສັງຄົມ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ, ວັດທະນະທຳ - ສັງຄົມສືບຕໍ່ພັດທະນາ, ການປ້ອງກັນຊາດ - ປ້ອງກັນຄວາມສະຫງົບໄດ້ຮັບການປັບປຸງ ແລະ ມີຄວາມໝັ້ນຄົງ. ເສດຖະກິດຂະຫຍາຍຕົວດີສົມຄວນ ບັນລຸ 9,0%, ລື່ນກາຍ 1,3 ດັດຊະນີສ່ວນຮ້ອຍ ເມື່ອທຽບໃສ່ແຜນການປີ 2022 ທີ່ໄດ້ວາງອອກ. ຂົງເຂດວັດທະນະທຳ-ສັງຄົມ ສືບຕໍ່ມີຄວາມສົນໃຈ ແລະ ຈັດຕັ້ງປະຕິບັດຢ່າງມີປະສິດທິຜົນ...
ໂດຍລາຍງານໝາກຜົນການພົວພັນທາງການທູດປະຊາຊົນຂອງແຂວງລາຍເຈົາ, ຜູ້ຕາງໜ້າກະຊວງການຕ່າງປະເທດຫວຽດນາມ ໃຫ້ຮູ້ວ່າ: ໃນຊຸມປີມໍ່ໆມານີ້, ບັນດາຄະນະພັກ, ອຳນາດການປົກຄອງທຸກຂັ້ນ ຍາມໃດກໍ່ເອົາໃຈໃສ່, ຮັກສາ ແລະ ເປີດກວ້າງການທູດປະຊາຊົນດ້ວຍຫຼາຍຮູບແບບທີ່ເໝາະສົມ, ຊຸກຍູ້ການພັດທະນາການພົວພັນມິດຕະພາບ ແລະ ການຮ່ວມມືລະຫວ່າງປະຊາຊົນແຂວງລາຍເຈົາ ກັບປະຊາຊົນທ້ອງຖິ່ນໃນພາກພື້ນ ແລະ ໃນໂລກ. ທາງແຂວງກໍ່ເພີ່ມທະວີການເຄື່ອນໄຫວ ແລະ ການນຳໃຊ້ການໜູນຊ່ວຍຈາກບັນດາອົງການບໍ່ຂຶ້ນກັບລັດຖະບານຕ່າງປະເທດຢ່າງມີປະສິດທິຜົນ, ສ້າງແຫຼ່ງກຳລັງເພີ່ມເຕີມເພື່ອຊຸກຍູ້ການພັດທະນາເສດຖະກິດ - ສັງຄົມຂອງແຂວງ. ສະຫະພັນບັນດາອົງການມິດຕະພາບແຂວງລາຍເຈົາ ເອົາໃຈໃສ່ສົມທົບກັນປະຕິບັດວຽກງານການທູດປະຊາຊົນຢ່າງຕັ້ງໜ້າ, ປະກອບສ່ວນສຳຄັນເຂົ້າໃນການຍົກສູງປະສິດທິຜົນວຽກງານການຕ່າງປະເທດຂອງແຂວງ...
ກ່າວຄຳເຫັນທີ່ກອງປະຊຸມ, ທ່ານນາງປະທານ VUFO ຫງວຽນເຟືອງງາ ໄດ້ຕີລາຄາສູງບັນດາໝາກຜົນອັນຕັ້ງໜ້າຂອງແຂວງໃນການພັດທະນາເສດຖະກິດ - ສັງຄົມ ແລະ ການທູດປະຊາຊົນ. ທ່ານນາງສະເໜີໃຫ້ແຂວງລາຍເຈົາ ຊຸກຍູ້ການພົບປະແລກປ່ຽນປະຊາຊົນໃຫ້ຫຼາຍກ່ວາອີກ, ເພີ່ມທະວີການແຮກສ່ຽວລະຫວ່າງໝູ່ບ້ານກັບບັນດາທ້ອງຖິ່ນຂອງແຂວງຢຸນນານ (ຈີນ); ສົມທົບຢ່າງແໜ້ນແຟ້ນລະຫວ່າງການພົວພັນຕ່າງປະເທດຂອງພັກ, ການທູດແຫ່ງລັດ ແລະ ການທູດປະຊາຊົນ. ປ່ຽນແປງໃໝ່ ແລະ ຍົກສູງປະສິດທິຜົນການລະດົມການຊ່ວຍເຫຼືອບໍ່ຂຶ້ນກັບລັດຖະບານຕ່າງປະເທດ; ຕັ້ງໜ້າລະດົມແຫຼ່ງກຳລັງສາກົນເພື່ອພັດທະນາເສດຖະກິດ - ສັງຄົມຂອງແຂວງ…
ບຸນຄົງ
