 |
| ທ່ານນາງ ຫວູຈີມາຍ ຫົວໜ້າສະຖານກົງສູນໃຫຍ່ ຫວຽດນາມ ປະຈຳ Fukuoka ເຂົ້າຢ້ຽມຂ່ຳນັບທ່ານ ຜູ້ວ່າການ ແຂວງ Hattori Seitaro |
ມີວິສາຫະກິດ ຫຼາຍແຫ່ງຢູ່ Fukuoka ແລະ ເຂດ Kyushu, ຍີ່ປຸ່ນ ພວມມີຄວາມສົນໃຈຕໍ່ຕະຫຼາດ ຫວຽດນາມ
ຜູ້ວ່າການ Hattori Seitaro ມີຄວາມສົນໃຈພິເສດຕໍ່ໂຄງການເວທີປາໄສບັນດາວິສາຫະກິດ ຊາວຫວຽດນາມ ອາໄສຢູ່ຕ່າງປະເທດ ໃນທົ່ວໂລກ ຄັ້ງທີ 2 ຢູ່ Fukuoka.
ເຂົ້າຮ່ວມການເຮັດວຽກກັບທ່ານຫົວໜ້າສະຖານກົງສູນໃຫຍ່ ມີທ່ານ ຫງວຽນຢຸຍແອັງ, ປະທານສະມາຄົມຊາວຫວຽດນາມ ອາໄສຢູ່ Fukuoka, ທ່ານ ຫວູຮວ່າງດຶກ, ປະທານສະມາຄົມວິສາຫະກິດ ຫວຽດນາມ - ຍີ່ປຸ່ນ, ທ່ານນາງ ຫງວຽນທິມິງງວຽດ, ປະທານສະມາຄົມແມ່ຍິງ ຫວຽດນາມ ຢູ່ Kyushu
ທີ່ການເຮັດວຽກ, ທ່ານນາງ ຫວູຈີມາຍ ໄດ້ຂອບໃຈການໜູນຊ່ວຍ, ຊ່ວຍເຫຼືອ ແລະ ສ້າງເງື່ອນໄຂຂອງຜູ້ວ່າການ ແລະ ອຳນາດການປົກຄອງແຂວງ Fukuoka ຕໍ່ປະຊາຄົມຊາວຫວຽດນາມ ທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ Fukuoka.
ໃນສະພາບການປີນີ້ແມ່ນປີສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ຍີ່ປຸ່ນ ກໍ່ຄື 15 ປີແຫ່ງວັນສ້າງຕັ້ງການຮ່ວມມືລະຫວ່າງ ແຂວງ Fukuoka - ຮ່າໂນ້ຍ, ທ່ານນາງ ຫວູຈີມາຍ ຫົວໜ້າສະຖານກົງສູນໃຫຍ່ ມີຄວາມຫວັງວ່າອຳນາດການປົກຄອງແຂວງ ແລະ ສະຖານກົງສູນໃຫຍ່ ຈະພ້ອມກັນສົມທົບກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງ ທີ່ໄດ້ມີໃນແຜນການຄາດຄະເນໄວ້ນັ້ນ.
ທ່ານຫົວໜ້າສະຖານກົງສູນໃຫຍ່ ແຈ້ງໃຫ້ຊາບວ່າ ສະມາຄົມນັກທຸລະກິດ ຊາວຫວຽດນາມ ຢູ່ຕ່າງປະເທດຄາດວ່າ ຈະຈັດຕັ້ງເວທີປາໄສບັນດາວິສາຫະກິດຊາວຫວຽດນາມ ອາໄສຢູ່ຕ່າງປະເທດ ທົ່ວໂລກ ຄັ້ງທີ 2 ຢູ່ Fukuoka ໃນເດືອນຕຸລາ ປີ 2023. ໃນໂອກາດນີ້, ທ່ານຫົວໜ້າສະຖານກົງສູນໃຫຍ່ປາດຖະໜາຢາກໃຫ້ແຂວງຈະສົມທົບກັນເພື່ອໂຄສະນາ ແລະ ແນະນຳບັນດາຄວາມສາມາດບົ່ມຊ້ອນ, ທ່າແຮງຂອງ Fukuoka ກໍ່ຄືເຂດ Kyushu.
ສ່ວນທ່ານຜູ້ວ່າການ Hattori Seitaro ໄດ້ສະແດງຄວາມຍິນດີຕໍ່ທ່ານນາງ ຫວູຈີມາຍ ທີ່ໄດ້ດຳລົງຕຳແໜ່ງເປັນຫົວໜ້າສະຖານກົງສູນໃຫຍ່ ຫວຽດນາມ ປະຈຳ Fukuoka ແລະ ຜົນສຳເລັດໃນການຈັດບຸນເຕັດຫວຽດນາມ ຢູ່ Fukuoka ຢ່າງຈົບງາມ, ອັນໄດ້ສ້າງຄວາມປະທັບໃຈ, ຄວາມສົນໃຈ ບໍ່ພຽງແຕ່ສຳລັບປະຊາຄົມຊາວຫວຽດນາມ ຢູ່ທ້ອງຖິ່ນເທົ່ານັ້ນ ຫາກຍັງປະຊາຊົນປະຈຳຖິ່ນກໍ່ມີການເຂົ້າຮ່ວມຢ່າງສຸດຈິດສຸດໃຈນຳອີກ.
ທ່ານຜູ້ວ່າການ ມີຄວາມເອົາໃຈໃສ່ເປັນພິເສດເຖິງໂຄງການເວທີປາໄສບັນດາວິສາຫະກິດຊາວຫວຽດນາມ ອາໄສຢູ່ຕ່າງປະເທດໃນທົ່ວໂລກ ຄັ້ງທີ 2 ຢູ່ Fukuoka, ໃນສະພາບການທີ່ນັບມື້ນັບມີວິສາຫະກິດ ຢູ່ Fukuoka ແລະ ເຂດ ມີຄວາມສົນໃຈຕໍ່ຕະຫຼາດຫວຽດນາມ.
ທ່ານຜູ້ວ່າການຫວັງວ່າ ສະຖານກົງສູນໃຫຍ່ຈະພ້ອມກັບແຂວງສົມທົບກັນເພື່ອຈັດຕັ້ງເວທີປາໄສໃຫ້ສຳເລັດຜົນ, ນຳມາເຊິ່ງຜົນປະໂຫຍດຢ່າງມີປະສິດທິຜົນ, ແທດຈິງ, ຜ່ານນັ້ນ ກໍ່ປະກອບສ່ວນເຂົ້າໃນການພັດທະນາຮ່ວມມືດ້ານເສດຖະກິດ ລະຫວ່າງຍີ່ປຸ່ນ ແລະ ຫວຽດນາມ.
ນອກຈາກນັ້ນທ່ານຜູ້ວ່າການກໍ່ສະແດງຄວາມສົນໃຈຕໍ່ການແລກປ່ຽນຄະນະການນຳລະຫວ່າງນະຄອນຮ່າໂນ້ຍ ກັບ Fukuoka ແລະ ວິສາຫະກິດ ໃນປີ 2023.
ບຸນຄົງ
