 |
| ບັນດາຜູ້ແທນຕັດຜ້າແຖບໄຂງານວາງສະແດງ (ພາບ: ຄະນະຈັດຕັ້ງ) |
ງານວາງສະແດງ “ເຕົ້າໂຮມສິ່ງຢອດຢ້ຽມທາງດ້ານວິຈິດສິນ ຫວຽດນາມ - ສ.ເກົາຫຼີ” ວາງສະແດງຜົນງານ 300 ຢ່າງຂອງນັກຈິດຕະກອນ ຫວຽດນາມ ແລະ ສ.ເກົາຫຼີ ໄດ້ໄຂຂຶ້ນຢ່າງເປັນທາງການໃນຕອນບ່າຍວັນທີ 27 ທັນວາ ຢູ່ ຫໍພິພິທະພັນຮ່າໂນ້ຍ.
ກ່າວຄຳເຫັນໄຂພິທີ, ຜູ້ຕາງໜ້າຄະນະຈັດຕັ້ງ, ທ່ານ ປອ. ຫງວຽນຕຽນລ້ວນ ອະທິການບໍດີມະຫາວິທະຍາໄລ ຫງວຽນຈາຍ, ຮອງປະທານສະມາຄົມມິດຕະພາບ ຫວຽດນາມ - ສ.ເກົາຫຼີ ໃຫ້ຮູ້ວ່າ ງານວາງສະແດງແມ່ນເຫດການທີ່ມີຄວາມໝາຍສຳຄັນເນື່ອງໃນໂອກາດສອງປະເທດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ (22/12/1992-22/12/2022).
ທ່ານ ຫງວຽນຕຽນລ້ວນ ສະແດງຄວາມເຊື່ອໝັ້ນວ່າ ງານວາງສະແດງ “ເຕົ້າໂຮມສິ່ງຢອດຢ້ຽມທາງດ້ານວິຈິດສິນ ຫວຽດນາມ - ສ.ເກົາຫຼີ” ຈະສືບຕໍ່ປະກອບສ່ວນຢັ້ງຢືນນ້ຳໃຈມິດຕະພາບອັນເລິກເຊິ່ງລະຫວ່າງປະຊາຊົນ ຫວຽດນາມ ແລະ ສ.ເກົາຫຼີ. ທ່ານ ປ.ອ ຫງວຽນຕຽນລ້ວນ ເນັ້ນໜັກວ່າ:
ໃນການຢ້ຽມຢາມ ສ.ເກົາຫຼີ ຂອງປະທານປະເທດ ຫງວຽນຊວັນຟຸກ ໃນຕົ້ນເດືອນທັນວາ ຜ່ານມາ, ການນຳຂັ້ນສູງສອງປະເທດໄດ້ປະກາດຍົກລະດົບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ.
ຢູ່ພິທີ, ທ່ານ ຫວູຕຽນລົກ, ປະທານສະມາຄົມມິດຕະພາບ ຫວຽດນາມ - ສ.ເກົາຫຼີ, ຢັ້ງຢືນວ່າ ການພົບປະແລກປ່ຽນປະຊາຊົນລະຫວ່າງສອງປະເທດພວມມີການພັດທະນາຢ່າງບໍ່ຢຸດຢັ້ງ, ມີຄວາມໝາຍສຳຄັນ, ແມ່ນຂົວເຊື່ອມຕໍ່ຢ່າງໜັ້ນແກ່ນໃຫ້ແກ່ການພົວພັນ ຫວຽດນາມ - ສ.ເກົາຫຼີ.
ໂດຍໃຫ້ຮູ້ວ່າ ຫວຽດນາມ ແລະ ສ.ເກົາຫຼີ ລ້ວນແຕ່ມີປະຊາຊົນປະມານ 200.000 ຄົນພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ປະເທດຂອງກັນ, ໃນນັ້ນມີຄອບຄົວຫວຽດ - ສ.ເກົາຫຼີ ປະມານ 80.000 ຄອບຄົວ, ມີປະມານ 70 ຄູ່ທ້ອງຖິ່ນໄດ້ສ້າງຕັ້ງການພົວພັນຮ່ວມມື, ເກືອບ 2000 ຖ້ຽວບິນ/ເດືອນເຊື່ອມຕໍ່ກັບບັນດາທ້ອງຖິ່ນສອງປະເທດ.
ສ່ວນສະມາຄົມວິຈິດສິນ ຫວຽດນາມ ອົງການຮ່ວມຈັດຕັ້ງ, ທ່ານປະທານ ເລືອງຊວັນດວານ ເນັ້ນໜັກວ່າ ງານວາງສະແດງດັ່ງກ່າວແມ່ນໜຶ່ງໃນບັນດາສິ່ງພິສູດຢ່າງແຮງທີ່ສຸດໃຫ້ແກ່ການປະສົມປະສານລະຫວ່າງວັດທະນະທຳສອງປະເທດ. ງານວາງສະແດງໄດ້ສ້າງໂອກາດພົວພັນແລກປ່ຽນວິຈິດສິນໃຫ້ແກ່ນັກສິລະປິນ ທັງຢູ່ພາຍໃນ ແລະ ຕ່າງປະເທດໃນອະນາຄົດຫຼາຍກ່ວາອີກ.
ບໍ່ພຽງແຕ່ມີຄວາມໝາຍສຳຄັນໃນການພົວພັນ ຫວຽດນາມ - ສ.ເກົາຫຼີ, ງານວາງສະແດງຍັງແມ່ນໂອກາດເພື່ອໂຄສະນາພາບພົດຊາວຫວຽດນາມ, ວັດທະນະທຳ ຫວຽດນາມ ໄປຍັງເພື່ອນມິດ ສ.ເກົາຫຼີ ແລະ ແມ່ນໂອກາດເພື່ອໃຫ້ປະຊາຊົນ ຫວຽດນາມ ທຸກຄົນຊອກຮູ້ກ່ຽວກັບວັດທະນະທຳ ສ.ເກົາຫຼີ ຜ່ານວິຈິດສິນ.
ບຸນຄົງ
