 |
| ກວາງງາຍ: ຂົນຂວາຍ 151 ໂຄງການບໍ່ຂຶ້ນກັບລັດຖະບານ |
ຢູ່ກວາງງາຍ, ນັບແຕ່ປີ 2020 ມາຮອດປັດຈຸບັນ, ບັນດາອົງການບໍ່ຂຶ້ນກັບລັດຖະບານ ແລະ ນັກອຸປະຖຳຕ່າງປະເທດໄດ້ໜູນຊ່ວຍໃຫ້ແກ່ແຂວງປະຕິບັດ 151 ໂຄງການ, ລາຍການ ດ້ວຍຍອດມູນຄ່າໃຫ້ຄຳໝັ້ນສັນຍາບັນລຸກ່ວາ 7,8 ລ້ານ USD, ປະມານກ່ວາ 180,8 ຕື້ດົ່ງ. ໃນນັ້ນມີ ບ້ວງເງິນໜູນຊ່ວຍສາກົນສຸກເສີນ 11 ບ້ວງ ເພື່ອກູ້ຊ່ວຍໃຫ້ແກ່ປະຊາຊົນທີ່ຖືກຜົນສະທ້ອນຈາກພາຍຸນ້ຳຖ້ວມໃນປີ 2020, ດ້ວຍຍອດມູນຄ່າບັນລຸກ່ວາ 42,46 ຕື້ດົ່ງ.
151 ໂຄງການ, ລາຍການ ໂດຍບັນດາອົງການບໍ່ຂຶ້ນກັບລັດຖະບານ ແລະ ນັກອຸປະຖຳຕ່າງປະເທດໜູນຊ່ວຍປະຕິບັດຢູ່ທ້ອງຖິ່ນ ສ່ວນຫຼາຍສຸມໃສ່ບັນດາຂົງເຂດສາທາລະນະສຸກ, ການສຶກສາ, ໜູນຊ່ວຍພັດທະນາເສດຖະກິດ - ສັງຄົມ, ແກ້ໄຂບັນດາບັນຫາສາກົນ, ໜູນຊ່ວຍເດັກນ້ອຍ… ທ້ອງຖິ່ນຜັນຂະຫຍາຍໂຄງການ ເປັນຕົ້ນແມ່ນເຂດພູດອຍ ຂອງແຂວງ, ບາງແຂວງຢູ່ເຂດທົ່ງພຽງຂອງແຂວງ ທີ່ໄດ້ຮັບຜົນສະທ້ອນຈາກໄພທຳມະຊາດເປັນປະຈຳ.
ຜ່ານແຫຼ່ງໜູນຊ່ວຍຂອງບັນດາອົງການບໍ່ຂຶ້ນກັບລັດຖະບານຕ່າງປະເທດ, ບາງໂຄງການກໍ່ສ້າງພື້ນຖານໂຄງລ່າງກໍ່ໄດ້ຮັບການລົງທຶນກໍ່ສ້າງຄື: ໂຮງຮຽນ, ໂຄງການນ້ຳປະປາ… ໄດ້ສ້າງເງື່ອນໄຂສະດວກໃຫ້ແກ່ປະຊາຊົນໃນເຂດໂຄງການ ໄດ້ສຳຜັດກັບການບໍລິການສັງຄົມທີ່ດີກ່ວາເກົ່າ. ໄປຄຽງຄູ່ກັນນັ້ນ, ປະຊາຊົນໃນເຂດກໍ່ສ້າງໂຄງການກໍ່ຍັງໄດ້ຮັບການໜູນຊ່ວຍດ້ານເຕັກນິກ, ແຫຼ່ງເງິນທຶນ, ວັດຖຸອຸປະກອນ, ແນວພັນປູກ, ສັດລ້ຽງ… ເພື່ອພັດທະນາການຜະລິດ, ປັບປຸງຊີວິດການເປັນຢູ່.
ພ້ອມກັນນັ້ນ, ກໍ່ຍັງມີບັນດາໂຄງການ, ລາຍການໜູນຊ່ວຍຜ່າຕັດຫົວໃຈໃຫ້ແກ່ຄົນເຈັບທີ່ເປັນພະຍາດກ່ຽວກັບຫົວໃຈແຕ່ກຳເນີດ, ຜ່າຕັດສັນຍະກຳໃຫ້ແກ່ຄົນພິການ, ໜູນຊ່ວຍການປຸກສ້າງເຮືອນແຫ່ງຄວາມຮັກ… ກໍ່ຄືໄດ້ຊ່ວຍແກ້ໄຂບັນດາຄວາມຫຍຸ້ງຍາກໃຫ້ແກ່ປະຊາຊົນທຸກຍາກ, ນຳມາເຊິ່ງຄວາມເບີກບານມ່ວນຊື່ນ, ຄວາມຜາສຸກໃຫ້ແກ່ຜູ້ປະສົບກັບຄວາມຫຍຸ້ງຍາກໃນການດຳລົງຊີວິດ…
ໃນໄລຍະຈະມາເຖິງ, ການກຳນົດທິດການເຄື່ອນໄຫວໜູນຊ່ວຍອົງການບໍ່ຂຶ້ນກັບລັດຖະບານຕ່າງປະເທດຂອງແຂວງ ຈະສຸມໃສ່ແກ້ໄຂບາງຂົງເຂດ: ການສຶກສາ - ບຳລຸງສ້າງ, ສອນວິຊາຊີບ, ການແພດ, ກະສິກຳ, ປ່າໄມ້, ການຫາປາ ແລະ ພັດທະນາຊົນນະບົດ, ແກ້ໄຂບັນດາບັນຫາສັງຄົມ, ສິ່ງແວດລ້ອມ, ຮັບມືກັບການປ່ຽນແປງຂອງດິນຟ້າອາກາດ, ປ້ອງກັນ ຕ້ານໄພທຳມະຊາດ ແລະ ໜູນຊ່ວຍສຸກເສີນ, ແກ້ໄຂຜົນຕາມມາຂອງສົງຄາມ… ໃນນັ້ນ, ສຸມໃສ່ບໍລິເວນບັນດາເມືອງ: ເຊີນໄຕ, ບາເຕີ, ເຫງີຍແຮ່ງ, ຕືເຫງີຍ, ໂມ້ດຶກ, ບິ່ງເຊີນ, ລີເຊີນ ດ້ວຍ 63 ໂຄງການ, ລາຍການຂົນຂວາຍການໜູນຊ່ວຍຈາກຕ່າງປະເທດເຂົ້າແຂວງ ໃນໄລຍະ 2021 – 2025.
ບຸນຄົງ
