ຫວ່າງແລ້ວນີ້, ຢູ່ຮ່າໂນ້ຍ, ທ່ານນາງປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ຫງວຽນເຟືອງງາ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ Azerbaijan ປະຈຳ ຫວຽດນາມ Shovgi Mehdizade ເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ Azerbaijan (1992 - 2022).
ບັນດາຜູ້ແທນຖ່າຍຮູບເປັນທີ່ລະນຶກ. ພາບ: VUFO
ທີ່ການພົບປະ, ທ່ານນາງປະທານ VUFO ຫງວຽນເຟືອງງາ ໄດ້ສະແດງຄວາມປິຕິຊົມຊື່ນຕໍ່ບັນດາຜົນງານທີ່ສອງປະເທດບັນລຸໄດ້ໃນຂົງເຂດການພົບປະແລກປ່ຽນປະຊາຊົນ, ທ່ານນາງປະທານ ຫງວຽນເຟືອງງາ ເຊື່ອໝັ້ນວ່າ ດ້ວຍຄວາມສາມາດ, ທ່າແຮງບົ່ມຊ້ອນ, ຄວາມມານະພະຍາຍາມ ແລະ ຄວາມຕັດສິນໃຈຂອງທັງສອງປະເທດ, ການພົວພັນຫວຽດນາມ - Azerbaijan ຈະສືບຕໍ່ບັນລຸໄດ້ບັນດາຜົນງານໃໝ່ໃນອະນາຄົດ.
ຕາມທ່ານປະທານສະມາຄົມມິດຕະພາບຫວຽດນາມ - Azerbaijan ດັ້ງເທ໊ວິງ ແລ້ວ, ການພົວພັນມິດຕະພາບລະຫວ່າງຊາວຫວຽດນາມ ແລະ Azerbaijan, ລະຫວ່າງທ້ອງຖິ່ນຫວຽດນາມ ແລະ ທ້ອງຖິ່ນ Azerbaijan ໄດ້ຮັບການເພີ່ມພູນຄູນສ້າງນັບມື້ນັບພັດທະນາກວ່າ. ທ່ານ ດັ້ງເທ໊ວິງ ປາດຖະໜາວ່າ ສອງຝ່າຍຈະສືບຕໍ່ມີຫຼາຍຂໍ້ລິເລີ່ມ, ສົມທົບກັນເຄື່ອນໄຫວຢ່າງຕັ້ງໜ້າ ເພື່ອປະກອບສ່ວນຮັດແໜ້ນນ້ຳໃຈມິດຕະພາບລະຫວ່າງປະຊາຊົນສອງປະເທດ.
ທ່ານເອກອັກຄະລັດຖະທູດ Shovgi Mehdizade ໃຫ້ຮູ້ວ່າ: ໃນໄລຍະຜ່ານມາ, Azerbaijan ໄດ້ບຳລຸງສ້າງນັກສຶກສາ ແລະ ນັກຊ່ຽວຊານຫວຽດນາມ ເປັນຈຳນວນຫຼວງຫຼາຍ. Azerbaijan ຍັງເກັບຮັກສາເອກະສານຫຼາຍຢ່າງກ່ຽວກັບການຢ້ຽມຢາມ Baku ຂອງປະທານໂຮ່ຈີມິນ ເພື່ອເຜີຍແຜ່ໃຫ້ລຸ້ນໜຸ່ມ. ປີ 2023, Azerbaijan ຈະຈັດຕັ້ງການເຄື່ອນໄຫວສະເຫຼີມສະຫຼອງ 100 ປີ ແຫ່ງ ວັນຄ້າຍວັນເກີດຂອງທ່ານອະດີດປະທານາທິບໍດີ Heydar Aliyev ແລະ 40 ປີແຫ່ງການຢ້ຽມຢາມຫວຽດນາມ ຂອງປະທານາທິບໍດີ Heydar Aliyev ໃນບົດບາດ ເປັນຫົວໜ້າຄະນະຂອງໂຊຫວຽດ.
ບູນມີ
