 |
 |
| ທ່ານ Ami Bera ປະທານອະນຸກຳມະການອາຊີ - ປາຊີຟິກ, ສະພາຕ່ຳ ອາເມລິກາ |
ຫວ່າງແລ້ວນີ້, ຢູ່ຮ່າໂນ້ຍ, ທ່ານລັດຖະມົນຕີການຕ່າງປະເທດ ຫວຽດນາມ ບຸຍແທັງເຊີນ ໄດ້ໃຫ້ການຕ້ອນຮັບຄະນະຜູ້ແທນສະພາຕ່ຳ ອາເມລິກາ ນຳໂດຍທ່ານ Ami Bera ປະທານອະນຸກຳມະການອາຊີ - ປາຊີຟິກ, ສະພາຕ່ຳ ອາເມລິກາ ເນື່ອງໃນໂອກາດຄະນະມາຢ້ຽມຢາມ ຫວຽດນາມ.
ທ່ານລັດຖະມົນຕີ ບຸຍແທັງເຊີນ ໄດ້ຕີລາຄາສູງເລື່ອງສອງຝ່າຍເພີ່ມທະວີການແລກປ່ຽນຄະນະຜູ້ແທນບັນດາຂັ້ນ, ໃນບັນດາຊ່ອງທາງ, ໃນນັ້ນມີຊ່ອງທາງສະພາແຫ່ງຊາດ, ທ່ານເນັ້ນໜັກວ່າຕ້ອງສືບຕໍ່ເພີ່ມທະວີ, ເປີດກວ້າງເຄືອຂ່າຍບັນດາສະມາຊິກລັດຖະສະພາ ອາເມລິກາ ໃຫ້ມີຄວາມເຫັນອົກເຫັນໃຈ ແລະ ສະໜັບສະໜູນ ຫວຽດນາມ. ທ່ານລັດຖະມົນຕີຢືນຢັນວ່າຫວຽດນາມສະໜັບສະໜູນອາເມລິກາເພີ່ມທະວີການຮ່ວມມືກັບພາກພື້ນ ເພື່ອປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.
 |
ສ່ວນບັນດາສະມາຊິກສະພາຕ່ຳໄດ້ຢືນຢັນວ່າ ສະພາແຫ່ງຊາດອາເມລິກາ ຖືຫວຽດນາມແມ່ນໜຶ່ງໃນບັນດາຄູ່ຮ່ວມມືແຖວໜ້າໃນພາກພື້ນ ແລະ ສະໜັບສະໜູນຫວຽດນາມທີ່ເຂັ້ມແຂງ, ມີເອກະລາດ ແລະ ວັດທະນາຖາວອນຢ່າງສະເໝີຕົ້ນສະເໝີປາຍ. ບັນດາສະມາຊິກສະພາຕ່ຳໄດ້ຢັ້ງຢືນວ່າຈະສວມບົດບາດຢ່າງຕັ້ງໜ້າໃນການເພີ່ມທະວີຄວາມເຫັນດີເຫັນພ້ອມໃນສະພາແຫ່ງຊາດ ແລະ ອຳນາດການປົກຄອງອາເມລິກາກ່ຽວກັບການສະໜັບສະໜູນການພັດທະນາການພົວພັນກັບ ຫວຽດນາມ.
ທີ່ການພົບປະ, 2 ຝ່າຍໄດ້ເນັ້ນໜັກວ່າ ການຮ່ວມມືໃນການແກ້ໄຂຜົນຮ້າຍຕາມມາພາຍຫຼັງສົງຄາມແມ່ນມີຄວາມໝາຍສຳຄັນທີ່ສຸດໃຫ້ແກ່ວິວັດການໄກ່ເກ່ຍປອງດອງ, ຮຳບາດແຜສົງຄາມ ແລະ ສ້າງຄວາມໄວ້ເນື້ອເຊື່ອໃຈລະຫວ່າງລັດຖະບານ ແລະ ປະຊາຊົນສອງປະເທດ. 2 ຝ່າຍໄດ້ເຫັນດີເປັນເອກະພາບຊຸກຍູ້ການຮ່ວມມືໃນບັນດາຂົງເຂດທີ່ຕ່າງຝ່າຍຕ່າງມີຜົນປະໂຫຍດຄື ວິທະຍາສາດ - ເຕັກໂນໂລຢີ, ການສຶກສາ - ບຳລຸງສ້າງ, ການປ່ຽນແປງຂອງດິນຟ້າອາກາດ, ການຫັນປ່ຽນພະລັງງານສະອາດ, ປັບປຸງສະພາບແວດລ້ອມແຫ່ງການລົງທຶນ, ຮັກສາຕ່ອງໂສ້ການສະໜອງ… 2 ຝ່າຍກໍ່ໄດ້ປຶກສາຫາລືກ່ຽວກັບບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ; ເປັນເອກະພາບເພີ່ມທະວີການຮ່ວມມືໃນຂອບການພົວພັນຄູ່ຮ່ວມມືຍຸດທະສາດ ອາເມລິກາ-ອາຊຽນ.
 |
 |
 |
ບຸນຄົງ
