ໜັງສືພິມແຖວໜ້າສະວິດ ຕີລາຄາວ່າ ຫວຽດນາມ ແມ່ນເສືອຕົວໃໝ່ຂອງອາຊີ

15:18 | 11/10/2022

ຍສໝ - ໜັງສືພິມ Agefi, ໜັງສືພິມພາສາຝລັ່ງທີ່ມີຊື່ສຽງຂອງສະວິດ ທີ່ມີສຳນັກງານຕັ້ງຢູ່ ເຊີແນວ ສະບັບອອກຫວ່າງມໍ່ໆມານີ້ໄດ້ລົງບົດຂຽນດ້ວຍຫົວຂໍ້ວ່າ “ຫວຽດນາມ ແມ່ນເສືອຕົວໃໝ່ຂອງອາຊີ” ຂອງຜູ້ຂຽນ Guy Mettan, ໃນນັ້ນໄດ້ຕີລາຄາວ່າ: ປັດຈຸບັນ, ຫວຽດນາມໃດ້ກາຍເປັນໜຶ່ງໃນບັນດາພື້ນຖານເສດຖະກິດຫາກໍ່ພົ້ນເດັ່ນຂຶ້ນທີ່ມີບົດບາດສຳຄັນແຖວໜ້າຢູ່ອາຊີ.

	ເລຂາທິການ ສະມາຄົມມິດຕະພາບ ຝລັ່ງ - ຫວຽດນາມ: ບັນດາຜົນງານຂອງ ຫວຽດນາມ ໃນການຮັບປະກັນສິດທິມະນຸດ ແມ່ນບໍ່ສາມາດປະຕິເສດໄດ້
	ຫວຽດນາມ ແມ່ນສະຖານທີ່ລົງທຶນທີ່ນັບມື້ນັບ ດູດດື່ມແລະ ສຳຄັນຂອງບັນດາວິສາຫະກິດ ອາເມລິກາ

ໜັງສືພິມແຖວໜ້າສະວິດ ຕີລາຄາວ່າ ຫວຽດນາມ ແມ່ນເສືອຕົວໃໝ່ຂອງອາຊີ

ເຂດເຕັກໂນໂລຢີສູງ ຢູ່ນະຄອນໂຮ່ຈີມິນ

ໜັງສືພິມນີ້ໄດ້ໃຫ້ຂໍ້ສັງເກດວ່າ ໃນພາກພື້ນ ອາຊີຕາເວັນອອກສ່ຽງໃຕ້, ຫວຽດນາມ ແລະ ອິນໂດເນເຊຍ ພວມພົ້ນເດັ່ນຂຶ້ນຄືບັນດາປະເທດມະຫາອຳນາດເສດຖະກິດໃໝ່ຂອງ ອາຊີ ຢູ່ຄຽງຂ້າງ ສ.ເກາຫຼີ, ສິງກະໂປ. ໜັງສືພິມ Agefi ຢັ້ງຢືນວ່າ ຫວຽດນາມ ແລະ ອິນໂດເນເຊຍ ພວມມີການພົ້ນເດັ່ນຂຶ້ນທາງດ້ານເສດຖະກິດ ແລະ ຢັ້ງຢືນໄດ້ບົດບາດການເມືອງຂອງຕົນເທື່ອລະກ້າວ, ບໍ່ພຽງແຕ່ໃນພາກພື້ນອາຊີຕາເວັນອອກສ່ຽງໃຕ້ເທົ່ານັ້ນ ຫາກຍັງມີບົດບາດຕໍ່ບັນດາບັນຫາສຳຄັນຂອງໂລກອີກດ້ວຍ.

ຜູ້ຂຽນຖືວ່າ ຫວຽດນາມອາດຈະແມ່ນປະເທດໄດ້ຮັບຜົນປະໂຫຍດຫຼາຍທີ່ສຸດຈາກສະພາບການສາກົນໃໝ່, ນັບແຕ່ເດືອນມັງກອນ ປີ 2022, ເງິນລົງທຶນໂດຍກົງຈາກຕ່າງປະເທດ ເຂົ້າມາ ຫວຽດນາມ ຄາດວ່າ ບັນລຸ 11,57 USD, ເພີ່ມຂຶ້ນ 10,2%/ປີ ແລະ ແມ່ນລະດັບສູງທີ່ສຸດໃນ 5 ປີຜ່ານມາ, ການເຕີບໂຕ GDP ຂອງ ຫວຽດນາມ ຄາດວ່າຈະບັນລຸ 7,5% ໃນປີ 2022, ໃນຂະນະທີ່ໄພເງິນເຟີ້ ຄາດວ່າຈະຢູ່ໃນລະດັບ 3,8%. ຕົວເລກດັ່ງກ່າວໄດ້ຄັດສະເໜີຕາມບົດລາຍງານຂອງທະນາຄານໂລກ (WB) ທີ່ໄດ້ປະກາດໃນເດືອນສິງຫາຜ່ານມາ.

ໜັງສືພິມ Agefi ກໍ່ໄດ້ອ້າງຫຼັກຖານໂດຍຖືວ່າ ຫວຽດນາມ ຢືນຢູ່ອັນດັບທີ 5 ໃນຈຳນວນ 35 ຕະຫຼາດອາຊີກ່ຽວກັບລະດັບການເປີດຂອງພື້ນຖານເສດຖະກິດ, ດ້ວຍຄະແນນ 74,6/100, ສູງກວ່າລະດັບປານກາງຂອງອາຊີ (46) ແລະ ລະດັບປານກາງຂອງໂລກ (49,5) ແລະ ພວມພົ້ນເດັ່ນຂຶ້ນຄືເປັນສູນຜະລິດຢູ່ພາກພື້ນຕາເວັນອອກ ແລະ ອາຊີຕາເວັນອອກສ່ຽງໃຕ້, ເຊິ່ງໄດ້ຮັບການໜູນຊ່ວຍຈາກບັນດາຄວາມມານະພະຍາຍາມຫັນເສດຖະກິດເປັນເສລີຂອງລັດຖະບານ ແລະ ເຊື່ອມໂຍງເຂົ້າກັບລະບົບສະໜອງທົ່ວໂລກ, ຜ່ານບັນດາສັນຍາການຄ້າ ແລະ ດ້ວຍຖານະເປັນສະມາຊິກຂອງບັນດາກຸ່ມໃນພາກພື້ນ ແລະ ສາກົນ.

ຢູ່ອາຊີ, ຫວຽດນາມ ພຽງແຕ່ຢືນຢູ່ຖັດຈາກບັນດາພື້ນຖານເສດຖະກິດ ສິງກະໂປ, ຮົ່ງກົງ (ຈີນ), ມາເກົາ (ຈີນ) ແລະ ມາເລເຊຍ. ໃນທົ່ວໂລກ, ຫວຽດນາມ ຢືນຢູ່ອັນດັບທີ 20 ໃນ 201 ຕະຫຼາດ. ໃນເດືອນກໍລະກົດປີ 2022, ບໍລິສັດ Moody's ໄດ້ຍົກລະດັບການຄາດຄະເນການເຕີບໂຕ GDP ຂອງ ຫວຽດນາມ ຂຶ້ນເຖິງ 8,5%, ຄາດວ່າແມ່ນການເຕີບໂຕສູງທີ່ສຸດໃນພາກພື້ນ ອາຊີ - ປາຊີຟິກ. ຕາມການຄາດຄະເນໃໝ່ສຸດຈາກຫ້ອງທົດລອງການເຕີບໂຕຂອງມະຫາວິທະຍາໄລ Harvard (ອາເມລິກາ), ຫວຽດນາມ ຄາດວ່າຈະແມ່ນໜຶ່ງໃນບັນດາປະເທດພັດທະນາໄວທີ່ສຸດໃນທົດສະວັດຈະມາເຖິງ.

ໄປຄຽງຄູ່ກັນນັ້ນ, ໜັງສືພິມທີ່ມີຊື່ສຽງແຖວໜ້າຂອງສະວິດ ກໍ່ຕີລາຄາສູງຄວາມມານະພະຍາຍາມຂອງ ຫວຽດນາມ ເມື່ອສະໝັກເຂົ້າສະພາສິດທິມະນຸດ ສປຊ ພາຍຫຼັງທີ່ປະສົບຜົນສຳເລັດໃນການຮັບດຳລົງບົດບາດເປັນກຳມະການບໍ່ຖາວອນຂອງສະພາຄວາມໝັ້ນຄົງ ສປຊ ອາຍຸການ 2020 – 2021 ແລະ ຖືວ່າ ຄວາມຄ່ອງແຄ້ວ ແລະ ສະພາບການສົມດູນຈະມີຜົນປະໂຫຍດໃຫ້ແກ່ ຫວຽດນາມ ໃນໄລຍະຍາວ ໃນການພົວພັນສາກົນຕ່າງໆ.

ບຸນຄົງ