| ສາຍໃຈມິດຕະພາບຜ່ານ 5 ງານບຸນມະໂຫລານມິດຕະພາບປະຊາຊົນຫວຽດນາມ - ລາວ | |
| ການຮ່ວມມືດ້ານປ້ອງກັນຊາຍແດນລະຫວ່າງ ຫວຽດນາມ - ລາວ ຈະກາຍເປັນຈຸດພົ້ນເດັ່ນໃນການພົວພັນການຕ່າງປະເທດດ້ານປ້ອງກັນຊາຍແດນ |
ຕອນບ່າຍວັນທີ 5 ຕຸລາ, ຢູ່ຮ່າໂນ້ຍ, ທ່ານ ອວງຈູລຶວ ອະດີດກຳມະການສູນກາງພັກ, ອະດີດຮອງປະທານສະພາແຫ່ງຊາດ, ປະທານຄະນະກຳມະການສັນຕິພາບຫວຽດນາມ ໄດ້ມີການເຈລະຈາກັບທ່ານ ສົມມາດ ພົນເສນາ - ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະກຳມະການສັນຕິພາບ ແລະ ສາມັກຄີລາວ ໃນໂອກາດທີ່ ທ່ານ ສົມມາດ ພົນເສນາ ແລະ ຄະນະຜູ້ແທນຄະນະກຳມະການສັນຕິພາບ ແລະ ສາມັກຄີລາວ ໄດ້ມາຢ້ຽມຢາມ ແລະ ເຮັດວຽກຢູ່ ຫວຽດນາມ.
ທີ່ການພົບປະ, 2 ຝ່າຍໄດ້ແຈ້ງໃຫ້ກັນຊາບກ່ຽວກັບການພັດທະນາເສດຖະກິດ - ສັງຄົມຂອງແຕ່ລະປະເທດ, ໄດ້ແບ່ງປັນການຕີລາຄາສະພາບການສາກົນ ແລະ ພາກພື້ນ, ແລກປ່ຽນຄຳເຫັນກ່ຽວກັບສະພາບການເຄື່ອນໄຫວ ແລະ ການຮ່ວມມືລະຫວ່າງ 2 ຄະນະກຳມະການໃນຊຸມປີມໍ່ໆມານີ້.
 |
| ທັດສະນີຍະພາບກອງປະຊຸມ. |
ທ່ານ ທ່ານ ອວງຈູລຶວ ຢືນຢັນວ່າ: ຫວຽດນາມ ຍາມໃດກໍ່ຖືເປັນສຳຄັນ ແລະ ຕີລາຄາສູງບັນດາການເຄື່ອນໄຫວຮ່ວມມື ລະຫວ່າງຄະນະກຳມະການສັນຕິພາບຫວຽດນາມ ແລະ ຄະນະກຳມະການສັນຕິພາບ ແລະ ສາມັກຄີລາວ. ສອງຄະນະກຳມະການໄດ້ປະກອບສ່ວນຢ່າງຕັ້ງໜ້າ ແລະ ແທດຈິງເຂົ້າໃນການພົວພັນມິດຕະພາບທີ່ບໍລິສຸດຜຸດຜ່ອງ ແລະ ເລິກເຊິ່ງລະຫວ່າງ ຫວຽດນາມ - ລາວ. ສອງຝ່າຍໄດ້ສ້າງຕັ້ງກົນໄກການແລກປ່ຽນຄະນະຜູ້ແທນໝູນວຽນປະຈຳປີ; ແລກປ່ຽນຂໍ້ມູນຂ່າວສານຢ່າງເປັນປະຈຳ; ສົມທົບກັນຢ່າງແໜ້ນແຟ້ນ ໃນບັນດາການເຄື່ອນໄຫວຊຸກຍູ້ການແລກປ່ຽນ ແລະ ການຮ່ວມມືມິດຕະພາບລະຫວ່າງປະຊາຊົນສອງປະເທດ.
ໃນປີ 2020-2021, ຍ້ອນສະພາບການແຜ່ລະບາດຂອງພະຍາດ ໂຄວິດ - 19, ການແລກປ່ຽນຄະນະຜູ້ແທນບໍ່ສາມາດປະຕິບັດໄດ້, ສອງຄະນະກຳມະການໄດ້ຫັນປ່ຽນໄປສູ່ການແລກປ່ຽນທາງໂທລະສັບ, ການພົບປະທາງອອນລາຍ, ແລກປ່ຽນຈົດໝາຍ, ໂທລະເລກອວຍພອນ ແລະ ຢື້ຢາມຖາມຂ່າວໃນໂອກາດບຸນສຳຄັນຂອງສອງປະເທດ.
ໃນປີມິດຕະພາບຫວຽດນາມ - ລາວ, ລາວ - ຫວຽດນາມ 2022, ທ່ານ ອວງຈູລຶວ ໄດ້ສະເໜີໃຫ້ຄະນະກຳມະການ ສອງປະເທດ ເປັນເອກະພາບຕັ້ງໜ້າ ແລະ ເປັນເຈົ້າການກວ່າອີກ ເພື່ອໃຫ້ບັນດາການເຄື່ອນໄຫວຮ່ວມມືນັບມື້ນັບມີຄວາມຫຼາກຫຼາຍ, ແທດຈິງ ແລະ ມີປະສິດທິຜົນຂຶ້ນຕື່ມ.
ຄຽງຂ້າງການສືບຕໍ່ຮັກສາການພົບປະແລກປ່ຽນຄະນະຜູ້ແທນຂັ້ນສູງ, ສອງຄະນະກຳມະການກໍ່ຕ້ອງເພີ່ມທະວີການສົມທົບ ແລະ ສະໜັບສະໜູນເຊິ່ງກັນ ແລະ ກັນ ໃນບັນດາການເຄື່ອນໄຫວທາງການທູດປະຊາຊົນຫຼາຍຝ່າຍ ຄື: ເວທີປາໄສສັງຄົມໂລກ, ເວທີປາໄສປະຊາຊົນອາຊີ - ເອີລົບ, ເວທີປາໄສປະຊາຊົນອາຊຽນ...
ທ່ານ ອວງຈູລຶວ ກໍ່ໄດ້ສະເໜີໃຫ້ຄະນະກຳມະການສອງປະເທດ ສົມທົບກັນຢ່າງແໜ້ນແຟ້ນໃນຂອບເຂດການເຄື່ອນໄຫວຂອງສະພາສັນຕິພາບໂລກ, ໃນນັ້ນມີກອງປະຊຸມໃຫຍ່ຄັ້ງທີ 22 ທີ່ຈະຈັດຂຶ້ນຢູ່ຫວຽດນາມ ໃນເດືອນພະຈິກຈະມາເຖິງ; ແລກປ່ຽນຂໍ້ມູນຂ່າວສານ ກ່ຽວກັບສະພາບການຂອງສອງປະເທດ, ພາກພື້ນ ແລະ ສາກົນ.
ສອງຄະນະກຳມະການຈະແລກປ່ຽນບັນດາປະສົບການທີ່ ກ່ຽວຂ້ອງເຖິງວຽກງານຂອງສອງຝ່າຍເຊັ່ນ: ການເຂົ້າຮ່ວມບັນດາການເຄື່ອນໄຫວຂອງອົງການຫຼາຍຝ່າຍ, ບັນດາອົງການສັງຄົມພົນລະເຮືອນ, ການພົວພັນກັບບັນດາອົງການບໍ່ຂຶ້ນກັບລັດຖະບານຕ່າງປະເທດ; ສະໜັບສະໜູນການຝຶກອົບຮົມ ແລະ ຍົກສູງລະດັບວິຊາສະເພາະ ໃຫ້ແກ່ພະນັກງານທີ່ເຮັດວຽກກ່ຽວກັບການທູດປະຊາຊົນ.
 |
| ບັນດາຜູ້ແທນຖ່າຍຮູບທີ່ລະນຶກ. |
ພິເສດ, ສອງຄະນະກຳມະການຈະພິຈາລະນາຜັນຂະຫຍາຍບັນດາໂຄງການລະອຽດເພື່ອແກ້ໄຂບັນຫາຜົນຮ້າຍຢ້ອນຫຼັງຈາກສົງຄາມ, ການທຳລາຍລູກລະເບີດທີ່ຍັງບໍ່ທັນແຕກ; ສົມທົບກັນຈັດຕັ້ງບັນດາການເຄື່ອນໄຫວແນະນຳວັດທະນະທຳ - ທ່ອງທ່ຽວຫວຽດນາມ ຢູ່ ລາວ ແລະ ກົງກັນຂ້າມ.
ໂດຍເຫັນດີເປັນເອກະພາບກັບຄຳສະເໜີຂອງທ່ານປະທານຄະນະກຳມະການສັນຕິພາບຫວຽດນາມ, ທ່ານ ສົມມາດ ພົນເສນາ ປະທານຄະນະກຳມະການສັນຕິພາບ ແລະ ສາມັກຄີ ລາວ ໃຫ້ຮູ້ວ່າ: ຝ່າຍລາວຈະສືບຕໍ່ໂຄສະນາ, ສຶກສາ ແລະ ຮັກສາຄວາມສາມັກຄີແບບພິເສດລະຫວ່າງສອງປະເທດ, ເພີ່ມທະວີການພົບປະແລກປ່ຽນວັດທະນະທຳ, ສົ່ງເສີມການຄ້າ ແລະ ການທ່ອງທ່ຽວ.... ທ່ານກໍ່ປາດຖະໜາວ່າສອງຄະນະກຳມະການຈະມີຫຼາຍການເຄື່ອນໄຫວພົບປະແລກປ່ຽນປະຊາຊົນຕື່ມອີກ ໃນໄລຍະຈະມາເຖິງ.
 |
ການນຳສອງຄະນະກຳມະການເຊື່ອໝັ້ນວ່າໝາກຜົນຂອງການເຄື່ອນໄຫວດັ່ງກ່າວ ຈະປະກອບສ່ວນເພີ່ມທະວີສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສອງຄະນະກຳມະການເວົ້າສະເພາະ ແລະ ປະຊາຊົນ ຫວຽດນາມ - ລາວ ເວົ້າລວມ.
ຄຳຮຸ່ງ
