ກອງປະຊຸມໜ່ວຍງານຜູ້ຊ່ຽວຊານດ້ານການເກັບກູ້ລະເບີດເພື່ອມະນຸດສະທຳ ພາຍໃຕ້ການເປັນປະທານຮ່ວມລະຫວ່າງກອງທັບປະຊາຊົນລາວ ນໍາໂດຍ ທ່ານພັນເອກ ໄພວັນ ຈັນທະພົມມາຮອງຫົວໜ້າ ຫ້ອງວ່າການກະຊວງປ້ອງກັນປະເທດ, ຫົວໜ້າໜ່ວຍງານວິຊາການເຈົ້າໜ້າທີ່ອາວຸໂສ ປ້ອງກັນປະເທດອາຊຽນແຫ່ງ ສປປ ລາວ ພ້ອມຄະນະ; ຝ່າຍຣັດເຊຍ ນໍາໂດຍ ທ່ານ ພັນເອກ ເຊິເກ ອະບຣາມ໋ອບ ຫົວໜ້າເຫຼົ່າຮົບຊ່າງແສງ ກໍາລັງປະກອບອາວຸດກອງທັບແຫ່ງ ຣັດເຊຍ ພ້ອມຄະນະ, ໂດຍເປັນກຽດເຂົ້າຮ່ວມກ່າວຕ້ອນຮັບຂອງ ທ່ານພົນຕີ ອ່ອນສີ ແສນສຸກ ຮອງລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ປະທານຊີ້ນຳລວມ, ມີບັນດາຜູ້ຊ່ຽວຊານດ້ານການເກັບກູ້ລະເບີດເພື່ອມະນຸດສະທຳໃນຂອບກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ເຂົ້າຮ່ວມ.
ທ່ານ ພັນເອກ ໄພວັນ ຈັນທະພົມມາ ກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້ ເພື່ອເປັນການສະຫຼຸບວຽກງານທີ່ໄດ້ຈັດຕັ້ງປະຕິບັດໃນການເປັນປະທານຮ່ວມໃນໄລຍະ 3 ປີ ຜ່ານມາ; ການແລກປ່ຽນບົດຮຽນ ແລະ ປະສົບການດ້ານວຽກງານເກັບກູ້ລະເບີດເພື່ອມະນຸດສະທໍາ ແລະ ເພື່ອເປັນສັກຂີພະຍານໃນການມອບໂອນປະທານຮ່ວມຄູ່ໃໝ່ຂອງໜ່ວຍງານຜູ້ຊ່ຽວຊານດ້ານການເກັບກູ້ລະເບີດເພື່ອມະນຸດສະທຳໃນຂອບກອງປະຊຸມລັດຖະມົນຕີປ້ອງກັນປະເທດອາຊຽນ-ບວກໃຫ້ແກ່ກອງທັບແຫ່ງ ຣາຊະອານາຈັກກຳປູເຈຍ ແລະ ກອງທັບປົດປ່ອຍປະຊາຊົນຈີນ ໃນຮອບວຽນຕໍ່ໄປໃນປີ 2020-2023.
 |
ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ຄັ້ງທີ 9. (ພາບ: Lao's Army News)
ທ່ານພົນຕີ ອ່ອນສີ ແສນສຸກ ໄດ້ຕາງໜ້າກະຊວງປ້ອງກັນປະເທດ ແຫ່ງ ສປປ ລາວ ສະແດງຄວາມຂອບໃຈຕໍ່ບັນດາຜູ້ແທນທີ່ເຂົ້າຮ່ວມກອງປະຊຸມ ແລະ ຍິນດີຕ້ອນຮັບສູ່ນະຄອນຫຼວງວຽງຈັນ ສປປ ລາວ, ກອງທັບປະຊາ ຊົນລາວມີຄວາມຍິນດີ ແລະ ຮູ້ສຶກເປັນກຽດທີ່ໄດ້ເປັນປະທານຮ່ວມກັບກອງທັບຣັດເຊຍ ໃນໜ່ວຍງານຜູ້ຊ່ຽວຊານດ້ານການເກັບກູ້ລະເບີດເພື່ອມະນຸດສະທໍາ ໃນຮອບວຽນປີ 2017-2020 ແລະ ການເປັນປະທານຮ່ວມນີ້ ແມ່ນມີຄວາມໝາຍ ແລະ ຄວາມສໍາຄັນສໍາລັບພວກເຮົາ, ເນື່ອງຈາກວ່າມັນໄດ້ເຮັດໃຫ້ພວກເຮົາເຫັນໄດ້ເຖິງຜົນກະທົບ ແລະ ໄພອັນຕະລາຍຂອງລະເບີດທີ່ບໍ່ທັນແຕກ. ພ້ອມດຽວກັນນັ້ນກໍຍັງເປັນໂອກາດໃຫ້ບັນດາປະເທດ ສະມາຊິກ ADMM ບວກໄດ້ປຶກສາຫາລືເພື່ອຫາຊ່ອງທາງໃນການເສີມຂະຫຍາຍການຮ່ວມມື ແລະ ໄດ້ແລກປ່ຽນບົດຮຽນ, ປະສົບການກ່ຽວກັບການແກ້ໄຂບັນຫາລະເບີດບໍ່ທັນແຕກ ເປັນການປະກອບສ່ວນອັນສໍາຄັນເຂົ້າໃນການສ້າງຂີດຄວາມສາມາດຂອງບຸກຄະລາກອນພວກເຮົາ.
ສະນັ້ນ, ການມາເຂົ້າຮ່ວມກອງປະຊຸມຂອງບັນດາທ່ານໄດ້ສະແດງໃຫ້ເຫັນເຖິງຄວາມພະຍາຍາມ ໃນການຮ່ວມກັນແກ້ໄຂບັນຫາລະເບີດບໍ່ທັນແຕກໃຫ້ຫຼຸດໜ້ອຍຖອຍລົງ ແລະ ໝົດໄປໃນອະນາຄົດ. ຮອງລັດຖະມົນຕີກະຊວງປ້ອງກັນປະເທດຍັງໄດ້ກ່າວສະແດງຄວາມຊົມເຊີຍ ແລະ ຂອບໃຈຢ່າງຈິງໃຈມາຍັງບັນດາປະເທດສະມາຊິກ ADMM+ ສໍາລັບການປະກອບສ່ວນ ແລະ ສະໜັບສະໜູນໃຫ້ແກ່ກອງທັບປະຊາຊົນລາວ ແລະ ກອງທັບຣັດເຊຍ ຕະຫຼອດໄລຍະຂອງການເປັນປະທານຮ່ວມໃນຮອບວຽນທີສອງຈົນໄດ້ຮັບຜົນສຳເລັດດ້ວຍດີຕະຫຼອດມາ.
ພິເສດ, ສະແດງຄວາມຂອບໃຈມາຍັງກອງທັບ ແຫ່ງ ຣັດເຊຍ ທີ່ໄດ້ເອົາໃຈໃສ່ເຮັດວຽກຢ່າງຕັ້ງໜ້າຮ່ວມກັບ ໜ່ວຍງານວິຊາການກອງທັບປະຊາຊົນລາວຕະຫຼອດໄລຍະຂອງການເປັນປະທານຮ່ວມ. ຫວັງວ່າຜົນຂອງການເປັນປະທານຮ່ວມໃນຮອບວຽນທີສອງນີ້, ຈະເປັນປະໂຫຍດໃຫ້ແກ່ບັນດາປະເທດສະມາຊິກ ADMM+ ແລະ ຫວັງວ່າປະທານຮ່ວມຄູ່ຕໍ່ໄປ, ກໍາປູເຈຍ ແລະ ຈີນ ຈະສືບຕໍ່ນໍາເອົາຄວາມຮູ້ ແລະ ບົດຮຽນໃໝ່ໆມາແລກປ່ຽນເພື່ອເຮັດໃຫ້ຂົງເຂດວຽກງານການເກັບກູ້ລະເບີດເພື່ອມະນຸດສະທໍາໄດ້ຮັບການພັດທະນາສູງຂຶ້ນໄປເລື້ອຍໆ.
ກອງປະຊຸມໄດ້ມອບໂອນປະທານຮ່ວມຄູ່ໃໝ່ຂອງໜ່ວຍງານຜູ້ຊ່ຽວຊານດ້ານການເກັບກູ້ລະເບີດເພື່ອມະນຸດສະທຳໃນຮອບວຽນທີ 3 ໃນປີ 2020-2023 ໃຫ້ແກ່ກອງທັບກຳປູເຈຍ ແລະ ກອງທັບປົດປ່ອຍປະຊາຊົນຈີນ ສຳລັບວັນທີ 5 ທັນວາ 2019, ຜູ້ແທນກອງປະຊຸມຍັງຈະ ໄດ້ໄປຢ້ຽມຢາມສູນເຝິກອົບຮົມເກັບກູ້ລະເບີດເພື່ອສຶກສາ ແລະ ສັງເກດກ່ຽວກັບຫຼັກສູດ ແລະ ການເຝິກ ອົບຮົມ ແລະ ຫຼັງຈາກນັ້ນຈະໄປຢ້ຽມຢາມເຂື່ອນໄຟຟ້ານໍ້າງື່ມ ຕື່ມອີກ.
（ຄຳຮຸ່ງ）
