ມອບຫຼຽນກາ “ເພື່ອສັນຕິພາບ ແລະ ມິດຕະພາບລະຫວ່າງຊາດ” ໃຫ້ເອກອັກຄະລັດຖະທູດ ຮຸງກາຣີ ປະຈໍາ ຫວຽດນາມ

	ມອບຫຼຽນກາລະນຶກ “ເພື່ອສັນຕິພາບ, ມິດຕະພາບລະຫວ່າງຊາດຕ່າງໆ” ໃຫ້ເອກອັກຄະລັດຖະທູດເດນມາກ ປະຈໍາ ຫວຽດນາມ
	ສະຖານທູດ ຫວຽດນາມ ປະຈໍາ ປາຣີ ສົມທົບສະເຫຼີມສະຫຼອງ 50 ປີ ແຫ່ງວັນເຊັນສັນຍາປາຣີ

ທ່ານນາງ​ເອກ​ອັກຄະ​ລັດຖະທູດ ຫງວຽນ​ເຟືອງ​ງາ, ປະທານ​ສະຫະພັນ​ບັນດາ​ອົງການ​ຈັດ​ຕັ້ງມິດຕະພາບ​ຫວຽດນາມ ​ໄດ້​ມອບ​ຫຼຽນ​ໄຊ “​ເພື່ອ​ສັນຕິພາບ ​ແລະ ມິດຕະພາບ​ລະຫວ່າງຊາດ” ​ໃຫ້​ທ່ານ​ເອກ​ອັກຄະ​ລັດຖະທູດ​ວິສາມັນ​ຜູ້​ມີ​ອຳນາດ​ເຕັມ​ແຫ່ງ ຮຸງ​ກາຣີ ປະຈຳ ຫວຽດນາມ Ory Csaba (ພາ​ບ: dangcongsan.vn)

ວັນ​ທີ 28 ກໍລະກົດ 2022, ຢູ່​ຮ່າ​ໂນ້ຍ, ທ່ານນາງ​ເອກ​ອັກຄະ​ລັດຖະທູດ ຫງວຽນ​ເຟືອງ​ງາ, ປະທານ​ສະຫະພັນ​ບັນດາ​ອົງການ​ຈັດ​ຕັ້ງມິດຕະພາບ​ຫວຽດນາມ ​ໄດ້​ມອບ​ຫຼຽນ​ໄຊ “​ເພື່ອ​ສັນຕິພາບ ​ແລະ ມິດຕະພາບ​ລະຫວ່າງຊາດ” ​ໃຫ້​ທ່ານ​ເອກ​ອັກຄະ​ລັດຖະທູດ​ວິສາມັນ​ຜູ້​ມີ​ອຳນາດ​ເຕັມ​ແຫ່ງ ຮຸງ​ກາຣີ ປະຈຳ ຫວຽດນາມ Ory Csaba.

ນີ້​ແມ່ນ​ລາງວັນ​ສູງ​ສຸດ​ຂອງ​ສະຫະພັນ​ບັນດາ​ອົງການ​ມິດຕະພາບ ຫວຽດນາມ ​ເພື່ອ​ຮັບ​ຮູ້ ​ແລະ ຍ້ອງຍໍ​ບັນດາ​ການ​ປະກອບສ່ວນ​ອັນ​ລ້ຳ​ຄ່າ​ຂອງ​ທ່ານ​ເອກ​ອັກຄະ​ລັດຖະທູດ Ory Csaba.

ທີ່​ພິທີ​ມອບ​ລາງວັນ, ທ່ານນາງ​ເອກ​ອັກຄະ​ລັດຖະທູດ ຫງວຽນ​ເຟືອງ​ງາ ​ເນັ້ນ​ໜັກ​ວ່າ, ​ໃນ​ຖານະ​ເປັນ​ເອກ​ອັກຄະ​ລັດຖະທູດ ຮຸງ​ກາຣີ ປະຈຳ ຫວຽດນາມ ​ແຕ່​ປີ 2015 ຮອດ​ປະຈຸ​ບັນ, ດ້ວຍ​ປະສົບ​ການ ​ແລະ ຄວາມສຸດ​ໃຈຂອງ​ຕົນ, ທ່ານ​ ​ເອກ​ອັກຄະ​ລັດຖະທູດ Ory Csaba ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ການ​ພັດທະນາ​ການ​ພົວພັນ​ລະຫວ່າງ 2 ປະ​ເທດ​ໃນ​ຫຼາຍ​ຂົງ​ເຂດ.

​ໃນ​ໄລຍະ​ດຳລົງ​ຕຳ​ແໜ່​ງຂອງ​ທ່ານ​ເອກ​ອັກຄະ​ລັດຖະທູດ Ory Csaba, ວົງ​ເງິນ​ການ​ຄ້າ​ສອງ​ສົ້ນ​ລະຫວ່າງ ຫວຽດນາມ - ຮຸງ​ກາຣີ ບັນລຸ​ໄດ້ 1,3 ຕື້ USD ​ໃນ​ປີ 2020 (ສູງ​ກ່ວາ 4,7 ​ເທົ່າ​ເມື່ອ​ທຽບ​ໃສ່​ປີ 2017), ​ໃນ​ປີ 2021 ບັນລຸ 1,1 ຕື້ USD ​ເຖິງ​ວ່າ​ຈະ​ໄດ້​ຮັບ​ຜົນ​ກະທົບຈາກໂລກລະບາດ Covid-19.

​ໃນ​ຂົງ​ເຂດ​ຮ່ວມ​ມື​ພັດທະນາ, ບັນດາ​ໂຄງການ​ນຳ​ໃຊ້​ເງິນ​ກູ້ ODA ຂອງ​ຮຸງ​ກາຣີ ​ໄດ້​ນຳ​ມາ​ເຊິ່ງຜົນ​ປະ​ໂຫຍ​ດດ້ານ​ເສດຖະກິດ - ສັງຄົມ​ໃຫ້​ແກ່​ຊາວ ຫວຽດນາມ… ທ່ານ​ເອກ​ອັກ​ຄະ​ລັດ​ຖະ​ທູດ​ກໍ່​ສະ​ເໜີ​ເພີ່ມ​ທຶນ​ການ​ສຶກ​ສາ ຮຸງ​ກາ​ຣີ ໃຫ້​ນັກ​ສຶກ​ສາ​ຫວຽດ​ນາມ ຈາກ 100 ເປັນ 200 ທຶນຕໍ່​ປີ, ​ເລີ່ມຕົ້ນ ແລະ ຊຸກ​ຍູ້​ການ​ພົວ​ພັນ​ແຮກ​ສ່ຽວ​ລະ​ຫວ່າງ​ທ້ອງ​ຖິ່ນ​ຂອງ 2 ປະ​ເທດ.

ພິ​ເສດ​ແມ່ນ​ໃນ​ປີ 2021 ທີ່​ຜ່ານ​ມາ, ທ່ານ​ເອກ​ອັກຄະ​ລັດຖະທູດ Ory Csaba ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ການ​ໜູນ​ຊ່ວຍ​ຂອງ​ລັດຖະບານ ຮຸງ​ກາຣີ ​ໃຫ້​ແກ່ ຫວຽດນາມ ດ້ວຍ​ວັກ​ຊີນ AstraZeneca 256.000 ​ໂດ​ສ ​ແລະ ຊຸດກວດແບບ​ໄວ antigen 100.000 ຊຸດ, ຊ່ວຍ​ ຫວຽດນາມ ຮັບ​ມື​ກັບ​ໂລກ​ລະບາດ Covid-19.

ທ່ານ​ເອກ​ອັກຄະ​ລັດຖະທູດ Ory Csaba ​ເນັ້ນ​ໜັກ​ວ່າ: “ຂ້າພະ​ເຈົ້າ​ຢາກ​ກ່າວ​ວ່າ, ການ​ພົວພັນ​ມິດຕະພາບ​ຫວຽດນາມ - ຮຸງ​ກາຣີ ໄດ້​ຜ່ານ​ຜ່າສິ່ງ​ທົດ​ສອບ​ຫຼາຍ​ຢ່າງ ​ແລະ ພິສູດ​ໃຫ້​ເຫັນ​ໄດ້ເປັນ​ຢ່າງ​ດີ​ໃນ​ຊີວິດ​ຕົວ​ຈິງ, ສະນັ້ນ ຂ້າພະ​ເຈົ້າ​ມີ​ຄວາມ​ເຄົາ​ລົບຕໍ່​ການ​ພົວພັນ​ນີ້”.