ຕອນບ່າຍວັນທີ 1 ມິຖຸນາ, ທ່ານ ເຢືອງກວກແທງ ເອກອັກຄະລັດຖະທູດ ຫວຽດນາມ ປະຈໍາ ອາກຊັງຕິນ ໄດ້ເຮັດວຽກກັບ ທ່ານນາງ Bernada Llorente ປະທານສໍານັກຂ່າວສານແຫ່ງຊາດ ອາກຊັງຕິນ (Telam) ເພື່ອປຶກສາຫາລືບັນດາມາດຕະການເພີ່ມທະວີການພົວພັນຮ່ວມມືດ້ານສື່ມວນຊົນລະຫວ່າງສອງປະເທດ.
 |
| ທ່ານ ເຢືອງກວກແທງ ເອກອັກຄະລັດຖະທູດ ຫວຽດນາມ ປະຈໍາ ອາກຊັງຕິນ ແລະທ່ານນາງ Bernada Llorente ປະທານສໍານັກຂ່າວສານແຫ່ງຊາດ ອາກຊັງຕິນ. ພາບ: baoquocte.vn |
ທີ່ການພົບປະ, ທ່ານນາງ Bernada Llorente ໄດ້ແບ່ງປັນວ່າ ຍາມໃດກໍມີຄວາມຮູ້ສຶກອັນດີງາມຕໍ່ປະເທດ, ປະຊາຊົນ ແລະ ຕີລາຄາສູງບັນດາຜົນງານດ້ານເສດຖະກິດຂອງ ຫວຽດນາມ; ພ້ອມກັນນັ້ນ, ທ່ານນາງກໍເນັ້ນໜັກວ່າ: ຫວຽດນາມ ຍາມໃດກໍ່ແມ່ນຄູ່ຮ່ວມມືບຸລິມະສິດສຳຄັນຂອງ ອາກຊັງຕິນ ຢູ່ ອາຊີ.
ເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ອາກຊັງຕິນ, ທ່ານເອກອັກຄະລັດຖະທູດ ເຢືອງກວກແທງ ແລະ ທ່ານນາງ Bernarda Llorente ໄດ້ເຫັນດີຍົກສູງຄຸນນະພາບ ແລະ ເນື້ອໃນຂອງການແລກປ່ຽນຂ່າວສານ, ສຸມໃສ່ບັນດາຂົງເຂດທີ່ໄດ້ຮັບຄວາມສົນໃຈ ແລະ ແທດຈິງຕໍ່ປະຊາຊົນສອງປະເທດ ຄື: ໂອກາດດໍາເນີນທຸລະກິດ, ການລົງທຶນ ແລະ ຂໍ້ມູນຂ່າວສານກ່ຽວກັບການ ທ່ອງທ່ຽວ, ວັດທະນະທຳ, ອາຫານການກິນ ແລະ ການປົກປັກຮັກສາ ສິ່ງແວດລ້ອມ.
ສິ້ນສຸດການພົບປະ, ທ່ານນາງ Bernarda Llorente ຢືນຢັນຈະສົມທົບກັບສຳນັກຂ່າວສານຫວຽດນາມ ໂດຍໄວ ເພື່ອລົງນາມໃນສັນຍາຮ່ວມມືໃໝ່ລະຫວ່າງ 2 ສໍານັກຂ່າວແຫ່ງຊາດ ເພື່ອແນໃສ່ເພີ່ມທະວີການແລກປ່ຽນຂໍ້ມູນຂ່າວສານ ແລະ ສົມທົບກັນຜະລິດບັນດາລາຍການທີ່ເໝາະສົມແນະນຳ ກ່ຽວກັບວັດທະນະທຳ, ຄວາມສາມາດບົ່ມຊ້ອນດ້ານເສດຖະກິດ, ການລົງທຶນ ແລະ ການຄ້າຂອງແຕ່ລະປະເທດອອກອາກາດຢູ່ໃນຊ່ອງຂອງຕົນ.
ບູນມີ
