| ຫວຽດນາມ ເຂົ້າຮ່ວມ ກອງປະຊຸມລັດຖະມົນຕີການທ່ອງທ່ຽວ ອາຊຽນ ຄັ້ງທີ 27 | |
| ຊອກຈັ່ງ ຍາດໄດ້ຜົນງານສະຖິຕິ “ຮູບພາບ ທີ່ໃຫຍ່ທີ່ສຸດຂອງຫວຽດນາມ ເຊິ່ງເຮັດດ້ວຍເຂົ້າ ST” |
ຫວຽດນາມ ແມ່ນທ້ອງຕະຫຼາດສຳຄັນທີ່ສຸດຂອງ ອາກຊັງຕິນ ໃນສະມາຄົມປະຊາຊາດ ອາຊີຕາເວັນອອກສຽງໃຕ້ (ອາຊຽນ), ພ້ອມກັນນັ້ນ ກໍ່ແມ່ນທ້ອງຕະຫຼາດສຳຄັນໃນຍຸດທະສາດພັດທະນາການຄ້າຂອງປະເທດ ອາເມລິກາໃຕ້ ນີ້.
ນີ້ແມ່ນຄຳຢືນຢັນຂອງທ່ານ Fernando Vilella, ຮອງລັດຖະມົນຕີກະສິກຳ, ການລ້ຽງສັດ ແລະ ການຫາປາ, ກະຊວງເສດຖະກິດ ອາກຊັງຕິນ, ເມື່ອຕອບສຳພາດນັກຂ່າວສຳນັກຂ່າວສານຢູ່ Buenos, ຢູ່ນອກງານຕະຫຼາດນັດກະສິກຳ ອາກຊັງຕິນ ExpoAgro 2024.
ທ່ານເນັ້ນໜັກວ່າ ຫວຽດນາມ ແມ່ນຄູ່ຮ່ວມມືດ້ານການຄ້າທີ່ສຳຄັນ ແລະ ແມ່ນຄູ່ຄ້າຕົ້ນຕໍຂອງຂະແໜງອຸດສາຫະກຳກະສິກຳຂອງ ອາກຊັງຕິນ ດ້ວຍຖານະບົດບາດເປັນປະເທດນຳເຂົ້າໝາກຖົ່ວເຫຼືອງ ແລະ ສາລີແຖວໜ້າ.
ທ່ານ ກໍ່ສະແດງຄວາມປາດຖະໜາຢາກປັບປຸງການຮ່ວມມືດ້ານການຄ້າກັບ ຫວຽດນາມ ກ່ວາອີກ ແລະ ເປີດກວ້າງການແລກປ່ຽນສິນຄ້າທີ່ມີຄຸນນະພາບສູງ, ເພີ່ມທະວີການນຳເຂົ້າສິນຄ້າທີ່ ຫວຽດນາມ ຜະລິດ.
ໃນຂະນະນັ້ນ, ທ່ານ Mariano Winograd ນັກວິສະວະກອນກະສິກຳ ໄດ້ສະແດງຄວາມໃຫ້ເຫັນວ່າ ຫວຽດນາມ ແມ່ນປະເທດພວມພັດທະນາ ແລະ ຈະແມ່ນຫນຶ່ງໃນບັນດາປະເທດທີ່ມີຄວາມພັດທະນາທີ່ສຸດ ໃນຊຸມປີຈະມາເຖິງ.
 |
| ຫວຽດນາມ ແມ່ນທ້ອງຕະຫຼາດສຳຄັນທີ່ສຸດຂອງ ອາກຊັງຕິນ ຢູ່ ອາຊຽນ |
ຫວຽດນາມ ແມ່ນຄູ່ຮ່ວມມືການຄ້າໃຫຍ່, ພິເສດ ແມ່ນໃນຂະແໜງການອາຫານຂອງ ອາກຊັງຕິນ.
ທ່ານ Winograd ໃຫ້ຮູ້ວ່າ ພວມເຂົ້າຮ່ວມໂຄງການຊຸກຍູ້ການຮ່ວມມືລະຫວ່າງ ຫວຽດນາມ ແລະ ອາກຊັງຕິນ ໃນຂົງເຂດມູກລ້ຽງສິນໃນນ້ຳ, ຄ້າຍຄືກັບຮູບແບບການລ້ຽງປາປຶ່ງຢູ່ເຂດ ທົ່ງພຽງແມ່ນ້ຳຂອງ.
ຜູ້ຊ່ຽວຊານກະສິກຳເຂດຮ້ອນກຸ່ມໜຶ່ງຂອງ ຫວຽດນາມ ຈະໄປ ອາກຊັງຕິນ ໃນເດືອນໜ້າ ເພື່ອຜັນຂະຫຍາຍໂຄງການຮ່ວມມືກັບແຂວງ Misiones ທາງພາກເໜືອໃນການປູກໝາກມັງກອນ, ໝາກກ້ຽງນ້ອຍ ແລະ ໝາກສີດາ.
ທ່ານເນັ້ນໜັກວ່າ ອາກຊັງຕິນ ປາດຖະໜາຢາກຮ່ວມມືກັບ ຫວຽດນາມ ໃນຂົງເຂດກະສິກຳ ເພາະວ່າ ລະຫວ່າງ 2 ປະເທດຍັງມີຄວາມສາມາດບົ່ມຊ້ອນຫຼາຍຢ່າງ.
ທ່ານ ກໍໃຫ້ຮູ້ວ່າ ອາກຊັງຕິນ ແມ່ນປະເທດນຳໜ້າໂລກໃນການປູກຝັງໂດຍກົງ, ທັງເປັນຜູ້ນຳໜ້າໂລກກ່ຽວກັບກະສິກຳແບບຍືນຍົງ ເມື່ອພິຈາລະນາບົນມາດຖານກ່ຽວກັບການປ່ອຍອາຍພິດ ສິ່ງເສດເຫຼືອ. ອາກຊັງຕິນ ກໍ່ນຳໜ້າໂລກໃນການລ້ຽງສັດແບບປ່ອຍ ແລະ ກິນຫຍ້າທຳມະຊາດ.
ທ່ານ Eduardo Larocreus, ສະມາຊິກຄະນະທີ່ປຶກສາກ່ຽວກັບເສດຖະກິດຊີວະສາດ, ກະຊວງເສດຖະກິດ ອາກຊັງຕິນ ໄດ້ສະແດງຄວາມປາດຖະໜາຢາກຮ່ວມມື, ແລກປ່ຽນປະສົບການ, ຄວາມຮູ້, ເຄື່ອງມື, ເຕັກໂນໂລຢີ ເພື່ອພັດທະນາເສດຖະກິດຊີວະສາດຊານເມືອງກັບ ຫວຽດນາມ, ມຸ່ງໄປເຖິງການພັດທະນາແບບຍືນຍົງ ແລະ ປົກປັກຮັກສາສິ່ງແວດລ້ອມ.
ອາກຊັງຕິນ ແມ່ນໜຶ່ງໃນບັນດາຄູ່ຮ່ວມມືແຖວໜ້າຂອງ ຫວຽດນາມ ຢູ່ທະວີບ ອາເມລິກາ.
ໃນໄລຍະ 2007-2022, ການແລກປ່ຽນການຄ້າ ຫວຽດນາມ - ອາກຊັງຕິນ ໄດ້ເພີ່ມຂຶ້ນເກືອບ 13 ເທົ່າ, ຈາກ 378 ລ້ານ USD ຂຶ້ນເປັນ 4,88 ຕື້ USD, ເຮັດໃຫ້ ອາກຊັງຕິນ ກາຍເປັນຄູ່ຮ່ວມມືການຄ້າໃຫຍ່ອັນດັບ 5 ຂອງ ຫວຽດນາມ ຢູ່ ອາເມລິກາ ແລະ ກົງກັນຂ້າມ, ຫວຽດນາມ ກໍ່ແມ່ນຄູ່ຮ່ວມມືການຄ້າໃຫຍ່ອັນດັບທີ 6 ຂອງ ອາກຊັງຕິນ ໃນຂອບເຂດທົ່ວໂລກ.
ປະຈຸບັນ, ອາກຊັງຕິນ ແມ່ນໜຶ່ງໃນບັນດາຜູ້ສະໜອງສາລີ ແລະ ອາຫານສັດແຖວໜ້າໃຫ້ ຫວຽດນາມ.
ໃນໂຄງປະກອບການນຳເຂົ້າຂອງ ຫວຽດນາມ ຈາກ ອາກຊັງຕິນ, 92% ມູນຄ່ານຳເຂົ້າ ແມ່ນຜະລິດຕະພັນກະເສດ.
ບັນດາປະເພດສິນຄ້າສົ່ງອອກຕົ້ນຕໍຂອງ ຫວຽດນາມ ໄປ ອາກຊັງຕິນ ລວມມີໂທລະສັບ ແລະ ເຄື່ອງອາໄຫຼ່; ຄອມພິວເຕີ, ຜະລິດຕະພັນເອເລັກໂຕນິກ ແລະ ເຄື່ອງອາໄຫຼ່; ເກີບ; ເຄື່ອງຈັກ, ອຸປະກອນ, ອາໄຫຼ່; ວັດຖຸດິບສໍາລັບເຄື່ອງຕັດຫຍິບ ແລະ ໜັງເກີບ.
ໃນຂະນະນັ້ນ, ສາລີ; ອາຫານສັດ ແລະ ວັດຖຸດິບ; ຝ້າຍ; ຖົ່ວເຫຼືອງ; ນ້ຳມັນສັດ ແລະ ນ້ຳມັນພືດ ແມ່ນຜະລິດຕະພັນນຳເຂົ້າຫຼັກຂອງ ຫວຽດນາມ ຈາກປະເທດ ອາເມລິກາໃຕ້ ນີ້.
ມິງດຶກ
