| ສ້າງນະໂຍບາຍການເຈລະຈາ, ການລົງນາມສັນຍາວ່າດ້ວຍການຫຼີກລ້ຽງການເກັບພາສີຊ້ອນໃຫ້ສົມບູນແບບ | |
| ຫວຽດນາມ ພ້ອມກັບປະຊາຄົມສາກົນ ມານະພະຍາຍາມຮັບມືກັບການປ່ຽນແປງຂອງດິນຟ້າອາກາດ |
ບັນດາບາດກ້າວບຸກທະລຸໃນນະໂຍບາຍພົວພັນຕ່າງປະເທດຂອງຫວຽດນາມ ບົນພື້ນຖານການເປັນເຈົ້າຕົນເອງ, ຫັນການພົວພັນເປັນຫຼາຍຮູບຫຼາຍແບບ, ຫຼາຍຝ່າຍ; ເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ ແລະ ເລິກເຊິ່ງ ກວ້າງຂວາງ; ຍາມໃດກໍ່ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບໃນປະຊາຄົມສາກົນໄດ້ສ້າງຄວາມໄວ້ເນື້ອເຊື່ອໃຈ ແລະ ອິດທິພົນຊື່ສຽງຂອງຫວຽດນາມ ຕໍ່ເພື່ອນມິດ ແລະຄູ່ຮ່ວມມືໃນໂລກ.
ນັ້ນແມ່ນການຕີລາຄາຂອງນັກຂ່າວ Gaston Fiorda, ນັກຊ່ຽວຊານຄົ້ນຄວ້າກ່ຽວກັບບັນດາບັນຫາອາຊີຕາເວັນອອກສ່ຽງໃຕ້ຂອງວິທະຍຸກະຈາຍສຽງແຫ່ງຊາດ ອາກຊັງຕິນ ໃນການໃຫ້ສຳພາດຕໍ່ນັກຂ່າວຂອງສໍານັກຂ່າວສານຫວຽດນາມ ປະຈຳ Buenos Aires.
 |
| ນັກຂ່າວ Gaston Fiorda ຕອບສໍາພາດຕໍ່ນັກຂ່າວຂອງສໍານັກຂ່າວສານຫວຽດນາມ. ພາບ: TTXVN |
ຕາມທ່ານ Fiorda ແລ້ວ, ຫ່າງຈາກນີ້ 35 ປີ, ໂດຍປະຕິບັດຈິດໃຈມະຕິກອງປະຊຸມໃຫຍ່ຄັ້ງທີ 6 ຂອງພັກ, ຫວຽດນາມ ໄດ້ເລີ່ມຕົ້ນໄລຍະການຫັນປ່ຽນທີ່ໜ້າອັດສະຈັນໃຈ ດ້ວຍບັນດານະໂຍບາຍປ່ຽນໃໝ່ເສດຖະກິດ - ສັງຄົມຢ່າງຈະແຈ້ງ ແລະເປີດກ້ວາງອອກສູ່ໂລກເປັນເທື່ອລະກ້າວ, ກໍ່ສ້າງເສດຖະກິດຕະຫຼາດຕາມທິດສັງຄົມນິຍົມ.
ຫວຽດນາມ ໄດ້ກ້າວເຂົ້າສູ່ໂລກຫຼາຍຝ່າຍ ແລະຫຼາຍຮູບຫຼາຍແບບນັ້ນ ແຕ່ບໍ່ຍອມປະບັນດາຫຼັກການ, ອຸດົມການ ກໍ່ຄືເອກະລາດທີ່ປະຊາຊົນນັບລ້ານຄົນຕ້ອງເສຍສະຫຼະເຫື່ອແຮງ ແລະ ເລືອດເນື້ອເພື່ອຍາດມາໄດ້.
ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, ຫວຽດນາມ ບັນລຸໄດ້ ບັນດາຜົນງານດ້ານເສດຖະກິດ-ສັງຄົມທີ່ໜ້າຊົມເຊີຍເປັນເທື່ອລະກ້າວ, ລະດັບ ການເຕີບໂຕເສດຖະກິດຍາມໃດກໍ່ຢູ່ແຖວໜ້າຂອງພາກພື້ນ, ພິເສດແມ່ນໃນ 15 ປີຜ່ານມາດ້ວຍລະດັັບເຕີບໂຕລວມຍອດຜະລິດຕະພັນພາຍໃນ (GDP) ເພີ່ມຂຶ້ນສະເລ່ຍ 6 – 7%.
ຊ້ຳບໍ່ໜໍາ ປີ 2020, ເມື່ອເສດຖະກິດໂລກຕົກຢູ່ໃນວິກິດການຢ່າງຮ້າຍແຮງຍ້ອນຜົນກະທົບຈາກໂລກລະບາດໂຄວິດ-19, ຫວຽດນາມ ຍັງຄົງແມ່ນໜຶ່ງໃນຈຳນວນໜ້ອຍປະເທດທີ່ມີການເຕີບໂຕທາງບວກ. ອັດຕາຄວາມທຸກຍາກ, ການຫວ່າງງານ, ແລະອາດຊະຍາກຳໄດ້ຫຼຸດລົງຢ່າງແຮງ, ໃນຂະນະທີ່ການລົງທຶນຈາກຕ່າງປະເທດສືບຕໍ່ຫຼັ່ງໄຫຼເຂົ້າຫວຽດນາມ.
ບັນດາຜົນງານທີ່ບັນລຸໄດ້ ແມ່ນຄວາມສະຫຼາດສ່ອງໄສໃນຍຸດທະສາດທີ່ພັກກອມມູນິດຫວຽດນາມ ວາງອອກ, ການຂະຫຍັນຂັນເຄື່ອນ ແລະປະດິດສ້າງຂອງລັດຖະບານໃນການປະຕິບັດ ແລະຜັນຂະຫຍາຍບັນດານະໂຍບາຍທີ່ໄດ້ຮັບຮອງເອົາ, ຄວາມຢຶດໝັ້ນຕໍ່ເສັ້ນທາງເປີດປະຕູກັບໂລກ.
Fiorda ເນັ້ນໜັກວ່າ ຢູ່ທຸກແຫ່ງໃນໂລກ ຫວຽດນາມ ຍາມໃດກໍ່ສ້າງການພົວພັນທີ່ເຂັ້ມງວດ, ຈະແຈ້ງ, ກົງໄປກົງມາ, ຈິງໃຈ, ເປີດອົກເປີດໃຈ ແລະສະໜິດສະໜົມ. ໂດຍເລີ່ມຈາກຫຼັກໝັ້ນ ແລະນະໂຍບາຍທີ່ສະເໝີຕົ້ນສະເໝີປາຍຂອງຫວຽດນາມນັ້ນ ກໍໄດ້ສ້າງຕັ້ງການພົວພັນຄູ່ຮ່ວມມືທີ່ເຄົາລົບເຊິ່ງກັນ ແລະກັນ ເພື່ອຜົນປະໂຫຍດສອງຝ່າຍກັບປະເທດມະຫາອຳນາດໃນໂລກ, ໃນນັ້ນມີ ອາເມລິກາ.
ບົດບາດ ແລະຖານະທີ່ຕັ້ງຂອງ ຫວຽດນາມ ໃນອົງການຈັດຕັ້ງສາກົນນັບມື້ ນັບໄດ້ຮັບການຍົກສູງ, ຫຼັກຖານໃຫຍ່ທີ່ສຸດແມ່ນອາຍຸການເປັນສະມາຊິກບໍ່ຖາ ວອນຂອງສະພາຄວາມໝັ້ນຄົງສະຫະປະຊາຊາດ 2020 – 2021 ແລະ ນີ້ແມ່ນຄັ້ງທີ 2 ທີ່ຫວຽດນາມ ໄດ້ຮັບເລືອກຕັ້ງເຂົ້າອົງການນີ້.
ຕາມທ່ານ Fiorda ແລ້ວ, ບໍ່ອາດບໍ່ເວົ້າເຖິງບົດບາດຂອງ ຫວຽດນາມ ຢູ່ອາຊີຕາເວັນອອກສ່ຽງໃຕ້. ເຖິງວ່າບໍ່ແມ່ນໜຶ່ງໃນບັນດາປະເທດກໍ່ຕັ້ງ ອາຊຽນ ກໍ່ຕາມ, ແຕ່ນັບແຕ່ເມື່ອເຂົ້າຮ່ວມອົງການນີ້ໃນປີ 1995, ຫວຽດນາມ ສ້າງໄດ້ທີ່ຕັ້ງ ແລະ ອິດທິພົນຊື່ສຽງດ້ວຍນະໂຍບາຍພົວພັນຕ່າງປະເທດທີ່ຖືກຕ້ອງ ແລະ ມີຄວາມຮັບຜິດຊອບ.
ໃນໄລຍະຜັນຂະຫຍາຍນະໂຍບາຍພົວພັນຕ່າງປະເທດເປີດກວ້າງ ແລະເຊື່ອມໂຍງເຂົ້າກັບໂລກຢ່າງເລິກເຊິ່ງກວ້າງຂວາງ, ຫວຽດນາມ ໄດ້ເປັນເຈົ້າການເຈລະຈາກັບບັນດາຄູ່ຮ່ວມມືສຳຄັນ ແລະກາຍເປັນໜຶ່ງໃນບັນດາປະເທດລົງນາມໃນສັນຍາການຄ້າເສລີຫຼາຍສະບັບໃນໂລກໃນຊຸມປີມໍ່ໆມານີ້.
ພິເສດ, ໃນກາງປີ 2019, ຫວຽດນາມ ໄດ້ສຳເລັດການລົງນາມໃນສັນຍາການຄ້າເສລີກັບສະຫະພາບເອີລົບ (EVFTA) ແລະທ້າຍປີ 2020 ກັບ ອັງກິດ (UKVFTA), ສອງຄູ່ຮ່ວມມືທີ່ໃຫຍ່ ແລະສຳຄັນແຖວໜ້າສໍາລັບບໍ່ວ່າປະເທດໃດໜຶ່ງ.
ຢູ່ອາເມລິກາລາຕິນ, ຫວຽດນາມ ຍາມໃດກໍ່ແມ່ນແບບຢ່າງທີ່ໃສແຈ້ງກ່ຽວກັບຈິດໃຈກຽມພ້ອມ, ເຈດຈໍານົງຕັດສິນໃຈ, ການຂະຫຍັນຂັນເຄື່ອນ ແລະປະດິດຄິດສ້າງໃຫ້ບັນດາປະເທດໃນພາກພື້ນ. ເຖິງວ່າຢູ່ຫ່າງໄກກັນ, ແຕ່ ຫວຽດນາມ ຍາມໃດກໍ່ມີການພົວພັນແບບພິເສດກັບປະຊາຊົນອາເມລິກາລາຕິນບັນດາເຜົ່າ ແລະ ໃນຊຸມປີມໍ່ໆມານີ້, ການພົວພັນນີ້ນັບມື້ນັບໄດ້ຮັບການປັບປຸງ ແລະເປີດກວ້າງໄປໃນຫຼາຍຂົງເຂດ, ພິເສດແມ່ນໃນຂົງເຂດເສດຖະກິດ, ການຄ້າ ແລະ ການລົງທຶນ...
ຜົນສຳເລັດໃນການເຄື່ອນໄຫວດ້ານພົວພັນຕ່າງປະເທດຂອງຫວຽດນາມ ກໍ່ໄດ້ສະແດງໃຫ້ເຫັນໂດຍຜ່ານການພົວພັນທາງການທູດກັບ 196 ປະເທດ ແລະ ເຂດແຄວ້ນໃນທົ່ວໂລກ, ພັກກອມມູນິດຫວຽດນາມ ມີການພົວພັນກັບ 120 ພັກການເມືອງໃນບັນດາທະວີບ.
ດ້ວຍບັນດານະໂຍບາຍທີ່ໄດ້ຮັບການຮັບຮອງເອົາທີ່ກອງປະຊຸມໃຫຍ່ຄັ້ງທີ 13 ຂອງພັກ, ຫວຽດນາມ ຈະສືບຕໍ່ຍາດແຍ່ງໄດ້ຜົນສຳເລັດຫຼາຍຢ່າງຕື່ມອີກໃນພາລະກິດແຫ່ງການປ່ຽນແປງໃໝ່, ສ້າງສາ ແລະ ພັດທະນາປະເທດຊາດ ແລະ ແນ່ນອນວ່າ ໃນນັ້ນ ນະໂຍບາຍພົວພັນຕ່າງປະເທດຍາມໃດກໍ່ສວມບົດບາດສໍາຄັນແຖວໜ້າ.
ບູນມີ
