| ໜັງສືພິມເຢຍລະມັນ: ຫວຽດນາມ ພັດທະນາໃນພື້ນຖານທີ່ໝັ້ນຄົງ | |
| ທະນາຄານ HSBC ໃຫ້ຄຳໝັ້ນສັນຍາຈັດແບ່ງຈຳນວນເງິນ 12 ຕື້ USD ໜູນຊ່ວຍການພັດທະນາແບບຍືນຍົງຢູ່ ຫວຽດນາມ |
ບັນດາຜູ້ຊ່ຽວຊານທະນາຄານ UOB ໃຫ້ຮູ້ວ່າ: ການເຕີບໂຕຢ່າງເຂັ້ມແຂງໃນປີ 2022 ໄດ້ສະແດງໃຫ້ເຫັນ ຄວາມຢືດຢຸ່ນ ແລະ ຄວາມໜຽວແໜ້ນຂອງຫວຽດນາມ ພາຍຫຼັງຜົນເສຍຫາຍຈາກໂລກລະບາດໂຄວິດ-19, ໂດຍສະເພາະແມ່ນໃນທ້າຍປີ 2021, ສ່ວນຫຼາຍແມ່ນອີງໃສ່ຂົງເຂດເສດຖະກິດທີ່ຫຼາກຫຼາຍໃນຂະແໜງອຸດສາຫະກຳການຜະລິດ ແລະ ການບໍລິການ.
 |
ທະນາຄານ UOB: ການເຕີບໂຕຂອງ GDP ຫວຽດນາມຈະບັນລຸ 6,6% ໃນປີ 2023. (ພາບ: vietnamplus) |
“ທະນາຄານແຫ່ງລັດຫວຽດນາມ ກໍໄດ້ຮັດແໜ້ນນະໂຍບາຍເພື່ອຮັບມືກັບຄວາມກົດດັນຂອງໄພເງິນເຟີ້ ແລະ ເງິນດົງອ່ອນຄ່າ, ເຖິງແມ່ນວ່າ ຄວາມຕ້ອງການພາຍໃນປະເທດ ໃນປີ 2023 ຈະນຳໜ້າການເຕີບໂຕຂອງລາຍຮັບ ແລະ ແງ່ຫວັງດຳເນີນທຸລະກິດໄດ້ຮັບການປັບປຸງ. ດັ່ງນັ້ນ, ພວກເຮົາຮັກສາການຄາດຄະເນການເຕີບໂຕ GDP ຂອງຫວຽດນາມສໍາລັບປີ 2023 ຢູ່ລະດັບ 6,6%, ເຊິ່ງແທດເໝາະກັບການຄາດຄະເນຢ່າງເປັນທາງການແມ່ນ 6,5%", ນັກຊ່ຽວຊານ UOB ເນັ້ນໜັກ.
ກໍຕາມບົດລາຍງານຂອງທະນາຄານ UOB, ດ້ວຍອັດຕາເງິນເຟີ້ອາດຈະຍັງຮັກສາເປັນປົກກະຕິ, ໂດຍສະເພາະໃນເຄິ່ງທໍາອິດຂອງປີ 2023, ທະນາຄານແຫ່ງລັດຄາດວ່າ ຈະດຸ່ນດ່ຽງນະໂຍບາຍເງິນຕາ ເພື່ອຫນູນຊ່ວຍການເຕີບໂຕ, ພ້ອມກັນນັ້ນ ກໍຮັກສາສະຖຽນລະພາບຂອງລາຄາ ແລະ ຮັບປະກັນຄວາມປອດໄພຂອງການເຄື່ອນໄຫວຂອງທະນາຄານ.
ທວນຄືນໝາກຜົນການເຕີບໂຕຂອງເສດຖະກິດໃນປີ 2022, ບັນດານັກຊ່ຽວຊານ UOB ຕີລາຄາວ່າ: ການເຕີບໂຕ GDP ຕົວຈິງຂອງຫວຽດນາມ ໃນໄຕມາດທີ 4 ປີ 2022 ບັນລຸ 5,92% ເມື່ອທຽບໃສ່ໄລຍະດຽວກັນຂອງປີກາຍ ເນື່ອງຈາກມີສັນຍານຫຼຸດລົງຂອງຄວາມຕ້ອງການຈາກພາຍນອກ, ພາຍຫຼັງການເພີ່ມຂຶ້ນຢ່າງແຮງ 13,67% ໃນໄຕມາດທີ 3 ຜ່ານມາ.
ຂະແໜງການຜະລິດທັງໝົດລ້ວນແຕ່ເຕີບໂຕດີໃນປີນີ້, ພິເສດແມ່ນ: ກະສິກຳເພີ່ມຂຶ້ນ 3,36%/ປີ, ຂະແໜງອຸດສາຫະກຳ ແລະ ການກໍ່ສ້າງເພີ່ມຂຶ້ນ 7,78% ແລະ ຂະແໜງການບໍລິການເພີ່ມຂຶ້ນ 9,99%. ອີງຕາມກົມໃຫຍ່ສະຖິຕິ, ບັນດາຂະແໜງການເຫຼົ່ານີ້ ໄດ້ປະກອບສ່ວນ 5,11%, 38,24% ແລະ 56,65% ຕາມລໍາດັບເຂົ້າໃນການເຕີບໂຕລວມ; ຍອດປະລິມານການຜະລິດທັງໝົດຂອງປີ 2022 ໄດ້ເພີ່ມຂຶ້ນ 8,10% ເມື່ອທຽບໃສ່ໄລຍະດຽວກັນຂອງປີ 2021, ໂດຍໄດ້ຮັບການຊຸກຍູ້ຍ້ອນຄວາມຕ້ອງການຈາກພາຍນອກຢ່າງແຮງ, ເພີ່ມຂຶ້ນ 6,37% ໃນປີ 2021.
ຄຳຮຸ່ງ
