ມີ 10,000 ກວ່າຄົນເຂົ້າຮ່ວມງານມະຫາກຳກິລາ SEA Games ຄັ້ງທີ 31

16:18 | 11/12/2021

ຍສໝ - ວັນທີ 7 ທັນວານີ້, ຫ້ອງການສະຫະພັນກິລາອາຊີຕາເວັນອອກສ່ຽງໃຕ້ (SEAGF) ໄດ້ສົມທົບກັບຄະນະກຳມະການໂອລິມປິກຫວຽດນາມ ຈັດຕັ້ງກອງປະຊຸມສະພາ SEAGF ດ້ວຍຮູບແບບອອນລາຍ.

	SEA Games 31 ຄາດວ່າຈະຈັດຂຶ້ນໃນເດືອນ ພຶດສະພາ 2022
	ຫວຽດນາມ ເປັນປະເທດເຈົ້າພາບຈັດ SEA Games 31 ໃນປີ 2021

ກ່າວຄຳເຫັນທີ່ກອງປະຊຸມ, ທ່ານ ຮ່ວາງດ່າວເກື່ອງ, ຮອງລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ - ຮອງຫົວໜ້າຄະນະຈັດຕັ້ງງານມະຫາກຳກິລາຊີເກມຄັ້ງທີ 31 ຢືນຢັນວ່າ: ຫວຽດນາມ ປາດຖະໜາຢາກຈັດຕັ້ງງານມະຫາກຳກິລາຊີເກມຄັ້ງທີ 31 ຢູ່ຮ່າໂນ້ຍ ຕາມແຜນການແຕ່ ວັນທີ 21 ເດືອນພະຈິກ - 2 ເດືອນທັນວາ 2021. ແຕ່ຍ້ອນການລະບາດຂອງພະຍາດໂຄວິດ-19 ຢູ່ຫວຽດນາມ ຫວ່າງມໍ່ໆມານີ້, ຄວາມຄືບໜ້າໃນການກະກຽມງານມະຫາກຳກິລາຊີເກມ ຄັ້ງທີ 31 ຖືກຊັກຊ້າ ແລະ ຫຼາຍສະຖານທີ່ກໍ່ຕ້ອງໄດ້ຢຸດການເຄື່ອນໄຫວ ເພື່ອປ້ອງກັນພະຍາດ. ຄະນະກຳມະການຈັດຕັ້ງງານມະຫາກຳກິລາຊີເກມຄັ້ງທີ 31 ໄດ້ລາຍງານຕໍ່ລັດຖະບານ ເພື່ອອະນຸຍາດໃຫ້ເລື່ອນເວລາຈັດງານມະຫາກຳກິລາ SEA Games…

ມີ 10,000 ກວ່າຄົນເຂົ້າຮ່ວມງານມະຫາກຳກິລາ SEA Games ຄັ້ງທີ 31. (ພາບ: laodong)

ພວກຂ້າພະເຈົ້າຫວັງວ່າ ຈະໄດ້ຮັບການໜູນຊ່ວຍ ແລະ ສະໜັບສະໜູນຂອງສະຫະພັນກິລາໂອລິມປິກອາຊີຕາເວັນອອກສ່ຽງໃຕ້, ຄະນະກຳມະການໂອລິມປິກບັນດາປະເທດອາຊີຕາເວັນອອກສ່ຽງໃຕ້, ບັນດາຜູ້ແທນ ເພື່ອຫວຽດນາມໄດ້ຈັດຕັ້ງງານມະຫາກຳກິລາຊີເກມຄັ້ງທີ 31 ຢ່າງຜົນສຳເລັດຕາມເວລາທີ່ປະກາດມາຂ້າງເທິງ, ປະກອບສ່ວນຊຸກຍູ້ການພັດທະນາກິລາ ໃນຂົງເຂດອາຊີຕາເວັນອອກສ່ຽງໃຕ້ຕື່ມອີກ ຕາມຄຳຂວັນຂອງງານມະຫາກຳກິລາຊີເກມ ຄັ້ງທີ 31 “ເພື່ອອາຊີຕາເວັນອອກສ່ຽງໃຕ້ທີ່ເຂັ້ມແຂງກວ່າ”.

ຄະນະຈັດຕັ້ງງານມະຫາກຳກິລາຊີເກມຄັ້ງທີ 31 ໄດ້ລາຍງານຄວາມຄືບໜ້າການກະກຽມຢ່າງລະອຽດພໍສົມຄວນ. ຕາມນັ້ນແລ້ວ, ງານມະຫະກຳກິລາອາຊີຕາເວັນອອກສ່ຽງໃຕ້ ຈະໄຂຂຶ້ນໃນວັນທີ 12/5/2022 ແລະ ສິ້ນສຸດລົງໃນວັນທີ 23/5/2022, ເຊິ່ງຈະຈັດຂຶ້ນຢູ່ນະຄອນ ຮ່າໂນ້ຍ, ບັກນິງ, ຫາຍເຢືອງ, ຫາຍຟອງ, ກວາງນິງ, ຮ່ານາມ, ນາມດິ້ງ, ນິງບິ່ງ, ຮວ່າບິ່ງ, ຫວີງຟຸກ, ຟູ໋ເຖາະ ແລະ ບັກຢາງ. SEA Games 2022 ຢູ່ ຫວຽດນາມ ຄາດວ່າຈະມີ 40 ປະເພດກິລາ ແລະ 526 ເນື້ອໃນ ດ້ວຍຈຳນວນຜູ້ເຂົ້າຮ່ວມເຖິງ 10.000 ຄົນ.

ກ່ຽວກັບມາດຕະການປ້ອງກັນພະຍາດໂຄວິດ-19 ໃນກອງປະຊຸມ, ທ່ານ ຫງວຽນວັນຟຸ, ຜູ້ຕາງໜ້າອະນຸກຳມະການການແພດ ແລະ ຕ້ານຢາ Doping ກໍ່ປະກາດບັນດາຂໍ້ກຳນົດທີ່ຈຳເປັນ ແລະ ຕອບຄຳຊັກຖາມໃຫ້ບັນດາຜູ້ເຂົ້າຮ່ວມກອງປະຊຸມ.

ຄະນະຈັດງານມະຫາກຳກິລາຊີເກມຄັ້ງທີ 31 ຕາມຄຳແນະນຳຂອງກະຊວງສາທາລະນະສຸກ ໃນການປ້ອງກັນພະຍາດໃນໄລຍະດຳເນີນງານມະຫະກຳກິລາວ່າ: ການປະຖົມພະຍາບານ, ວິເຄາະກວດພະຍາດໂຄວິດ-19 ຈະຈັດໃຫ້ຢູ່ສະຖານທີ່ແຂ່ງຂັນ. ບັນດານັກກິລາ, ຄູຝຶກ ແລະ ເຈົ້າໜ້າທີ່ທີມ ຈະໄດ້ຮັບການວິເຄາະກວດຫາ ໂຄວິດ-19 ຢ່າງເປັນປະຈຳ. ທີ່ກອງປະຊຸມ, ຄະນະກຳມະການໂອລິມປິກແຫ່ງຊາດກຳປູເຈຍ ໄດ້ແຈ້ງໃຫ້ຊາບກ່ຽວກັບຄວາມຄືບໜ້າຂອງການກະກຽມງານມະຫາກຳກິລາຊີເກມຄັ້ງທີ 32 ທີ່ຈະຈັດຂຶ້ນແຕ່ວັນທີ 5-17 ພຶດສະພາ 2023 ທີ່ນະຄອນຫຼວງພະນົມເປັນ (ກຳປູເຈຍ) ດ້ວຍຄຳຂວັນ "ກິລາ: ດຳລົງຊີວິດໃນສັນຕິພາບ".

ຄຳຮຸ່ງ