 |
| ທ່ານຮອງລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວ ຮ່ວາງດ້າວເກືອງ ເຮັດວຽກກັບບັນດາການນຳອັງກິດ (ພາບ: bvhttdl.gov.vn) |
ໃນຂອບເຂດການຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມຄັ້ງທີ 26 ບັນດາຝ່າຍເຂົ້າຮ່ວມສົນທິສັນຍາແມ່ ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP26) ຂອງທ່ານນາຍົກລັດຖະມົນຕີ ຟ້າມມິງຈິງ ຢູ່ ລາຊະອານາຈັກອັງກິດ ໃນລະຫວ່າງວັນທີ 31 ຕຸລາ ຫາ ວັນທີ 3 ພະຈິກ, ທ່ານຮອງລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວ ຮ່ວາງດ້າວເກືອງ ໄດ້ມີການເຮັດວຽກກັບບັນດາການນຳຂອງສະພາອັງກິດ ຢູ່ Glasgow, ລວມມີທ່ານນາງ Alison Barrett - ຜູ້ອຳນວຍການຮ່ວມມືວັດທະນະທຳເຂດ, ທ່ານ Charlie Walker ຜູ້ອຳນວຍການເຄືອຂ່າຍທົ່ວໂລກ, ທ່ານ Christopher Wade - ຜູ້ອຳນວຍການຍຸດທະສາດຂອງ ສະພາອັງກິດ.
ເຂົ້າຮ່ວມການເຮັດວຽກ ຍັງມີທ່ານນາງ ຫງວຽນເຟືອງຮ່ວາ, ຫົວໜ້າກົມຮ່ວມມືສາກົນ, ກະຊວງວັດທະນະທຳ, ກິລາ ແລະ ການທ່ອງທ່ຽວ.
ທີ່ການເຮັດວຽກ, ທ່ານຮອງລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວ ຮ່ວາງດ້າວເກືອງ ຢັ້ງຢືນວ່າ ໃນໄລຍະຜ່ານມາ, ຫວຽດນາມ ແລະ ລາຊະອານາຈັກ ອັງກິດ ໄດ້ຊຸກຍູ້ ແລະ ບັນລຸໄດ້ບັນດາບາດກ້າວໃດໜຶ່ງ ໃນການຮ່ວມມືກ່ຽວກັບວັດທະນະທຳ, ພິເສດຮັບຮອງເອົາບັນດາການເຄື່ອນໄຫວຮ່ວມມື ກັບສະພາອັງກິດ.
ທ່ານຮອງລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວ ຮ່ວາງດ້າວເກືອງ ຕີລາຄາສູງການໜູນຊ່ວຍຂອງ ສະພາອັງກິດໃນການສົມທົບ ແລະ ໜູນຊ່ວຍ ຫວຽດນາມ ປະຕິບັດຍຸດທະສາດພັດທະນາຂະແໜງອຸດສາຫະກຳວັດທະນະທຳ.
ຜູ້ຕາງໜ້າສະພາອັງກິດ ແບ່ງປັນວ່າ ຫວຽດນາມ ມີທີ່ຕັ້ງສຳຄັນພິເສດໃນບັນດາການເຄື່ອນໄຫວຂອງສະພາອັງກິດ.
ສະພາອັງກິດມີຄວາມເອົາໃຈໃສ່ຍູ້ແຮງບັນດາການເຄື່ອນໄຫວມຸ່ງໄປເຖິງໄວໜຸ່ມ ໂດຍຜ່ານບັນດາໂຄງການກ່ຽວກັບສິລະປະເພື່ອແນໃສ່ສົ່ງເສີມໄວໜຸ່ມສະແດງແນວຄິດຈິດໃຈ ແລະ ສະເໜີວິທີການແກ້ໄຂຕໍ່ບັນດາບັນຫາສັງຄົມຄືການປ່ຽນແປງຂອງດິນຟ້າອາກາດ, ການອົບພະຍົບ…
ໄປຄຽງຄູ່ກັນນັ້ນ, ສະພາອັງກິດກໍ່ເອົາໃຈໃສ່ເຖິງການສ້າງຄູ່ມືໃຫ້ແກ່ບັນດາວິສາຫະກິດ ເລີ່ມດຳເນີນທຸລະກິດໃນຂົງເຂດວັດທະນະທຳ, ສິລະປະ, ປະດິດຄິດສ້າງ…
ບົນພື້ນຖານນັ້ນ, ສອງຝ່າຍໄດ້ເຫັນດີເປັນເອກະພາບຈັດຕັ້ງບັນດາໂຄງການ, ເຫດການສະເຫຼີມສະຫຼອງ ການສ້າງການພົວພັນທາງການທູດ ລະຫວ່າງ ຫວຽດນາມ ແລະ ລາຊະອານາຈັກອັງກິດ ຄົບຮອບ 50 ປີໃນປີ 2023, ສືບຕໍ່ເພີ່ມທະວີການຮ່ວມມືຢ່າງເລິກເຊິ່ງ ໃນຂົງເຂດວັດທະນະທຳ ແລະ ປະດິດຄິດສ້າງ, ປະກອບສ່ວນປັບປຸງ ແລະ ພັດທະນາການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ ໃນໄລຍະຈະມາຖິງ.
ບຸນຄົງ
