 |
| ສະຫະພັນບັນດາອົງການຈັດຕັ້ງມິດຕະພາບນະຄອນເກິ່ນເທີ ເຮັດວຽກກັບຜູ້ອຳນວຍການແຫ່ງຊາດ FNF ປະຈຳ ຫວຽດນາມ (ພາບ: baomoi.com) |
ທີ່ການເຮັດວຽກ, ທ່ານນາງ ເລທິແທັງຢາງ ໄດ້ແນະນຳຂໍ້ມູນເບື້ອງຕົ້ນກ່ຽວກັບຄວາມສາມາດບົ່ມຊ້ອນໃນການຮ່ວມມືລົງທຶນ ຂອງນະຄອນ ເກິນເທີ. ທ່ານນາງຢາງ ໃຫ້ຮູ້ວ່າ ວັນທີ 5 ສິງຫາ ປີ 2020 ກົມການເມືອງ ໄດ້ປະກາດໃຊ້ມະຕິເລກທີ 59 – NQ/TW ກ່ຽວກັບການສ້າງ ແລະ ພັດທະນານະຄອນ ເກິ່ນເທີ ດ້ວຍເປົ້າໝາຍຈົດຮອດປີ 2030 ເກິ່ນເທີ ຈະແມ່ນນະຄອນຊີວະພາບ, ສີວິໄລ, ທັນສະໄໝ ເຂັ້ມຂົ້ນໄປດ້ວຍສີສັດວັດທະນະທຳແມ່ນ້ຳເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ, ແມ່ນສູນກ່ຽວກັບການບໍລິການ, ການຄ້າ, ການທ່ອງທ່ຽວ, Logistic, ເຂດອຸດສາຫະກຳປຸງແຕ່ງ...
ສ່ວນທ່ານ ສຈ. ປອ. Andreas Stoffers ໄດ້ຕີລາຄາສູງຄວາມສາມາດບົ່ມຊ້ອນທ່າໄດ້ປຽບຂອງນະຄອນເກິ່ນເທີ, ໃຈກາງເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ເຊິ່ງແມ່ນສະຖານທີ່ທີ່ມີຄວາມສາມາດບົ່ມຊ້ອນດ້ານກະສິກຳ, ອຸດສາຫະກຳ ປຸງແຕ່ງ, ເຖິງຢ່າງໃດກໍ່ຕາມ ເຂດນີ້ພວມປະເຊີນໜ້າກັບບັນດາຜົນກະທົບຈາກການປ່ຽນແປງຂອງດິນຟ້າອາກາດ.
ທ່ານ ສຈ. ປອ. Andreas Stoffers ໃຫ້ຮູ້ຕື່ມອີກວ່າ FNF ຍາມໃດກໍ່ມີຄວາມເອົາໃຈໃສ່ໜູນຊ່ວຍບັນດາປະເທດ ຫາກໍ່ພັດທະນາ ກັບຄວາມປາດຖະໜາຢາກພັດທະນາເສດຖະກິດຕາມທິດເປັນມິດກັບສິ່ງແວດລ້ອມ, ພິເສດແມ່ນບັນດາເຂດທີ່ມີພວມມີອັດຕາຫັນເປັນຕົວເມືອງສູງ.
FNF ໄດ້ສະເໜີຜັນຂະຫຍາຍໂຄງການກ່ຽວກັບການປ່ຽນແປງຂອງດິນຟ້າອາກາດ ໄລຍະ 2021 – 2024 ຢູ່ນະຄອນເກິ່ນເທີ, ສຸມໃສ່ເຂົ້າບັນດາບັນຫາກ່ຽວກັບນ້ຳສະອາດ, ແກ້ໄຂບັນດາຂີ້ເຫຍື້ອ, ຄຸ້ມຄອງຄຸນນະພາບບັນຍາກາດ ແລະ ນຳໃຊ້ແຫຼ່ງພະລັງງານຢ່າງມີປະສິດທິຜົນ.
ໃນຂອບເຂດໂຄງການຈະຈັດຕັ້ງບັນດາກອງປະຊຸມວິທະຍາສາດປຶກສາຫາລືບັນດາຝ່າຍທີ່ກ່ຽວຂ້ອງກັບບັນຫາການປ່ຽນແປງຂອງດິນຟ້າອາກາດ, ຜັນຂະຫຍາຍບັນດາຊັບພະຍາກອນສະເພາະ, ຍົກອອກບັນດາຂໍ້ສະເໜີ ແລະ ສື່ສານຢ່າງກວ້າງຂວາງໄປຍັງປະຊາຊົນ...
ແລະໃນວັນດຽວກັນ, ສະຫະພັນ ເກິ່ນເທີ ພ້ອມກັບການນຳ FNF ກໍ່ໄດ້ ແລະ ມີການເຮັດວຽກກັບມະຫາວິທະຍາໄລ ເກິ່ນເທີ, ແລກປ່ຽນຂໍ້ມູນສະເໜີການຮ່ວມມືຜັນຂະຫຍາຍການປະຕິບັດໂຄງການ ການປ່ຽນແປງຂອງດິນຟ້າອາກາດຢູ່ ເກິ່ນເທີ.
ທີ່ການຕ້ອນຮັບ, ທ່ານ ຮສ. ປອ. ຫງວຽນຮຽວຈຸງ, ຮອງອະທິການບໍດີ- ຫົວໜ້າສະຖາບັນຄົ້ນຄ້ວາການປ່ຽນແປງຂອງດິນຟ້າອາກາດ ມະຫາວິທະຍາໄລເກິ່ນເທີ ໄດ້ຕີລາຄາສູງການສະເໜີຜັນຂະຫຍາຍການປະຕິບັດໂຄງການການປ່ຽນແປງຂອງດິນຟາອາກາດຢູ່ນະຄອນເກິ່ນ.
ທ່ານຈຸງໃຫ້ຮູ້ວ່າ ສະຖາບັນຄົ້ນຄ້ວາການປ່ຽນແປງຂອງດິນຟ້າອາກາດ ມະຫາວິທະຍາໄລ ເກິ່ນເທີ ພ້ອມແລ້ວທີ່ຈະຮ່ວມເດີນທາງໃນວິວັດການປະຕິບັດໂຄງການປ່ຽນແປງຂອງດິນຟ້າອາກາດຢູ່ນະຄອນເກິ່ນເທີ ໂດຍ FNF ອຸປະຖຳ, ປະກອບສ່ວນຊ່ວຍໃຫ້ນະຄອນເກິ່ນເທີຮັບມືກັບການປ່ຽນແປງຂອງດິນຟ້າອາກາດເປັນຢ່າງດີ, ນຳມາເຊິ່ງຜົນປະໂຫຍດອັນແທດຈິງໃຫ້ແກ່ປະຊາຊົນ.
ທີ່ການເຮັດວຽກ, ບັນດາຝ່າຍໄດ້ເຫັນດີເປັນເອກະພາບຈະສືບຕໍ່ແລກປ່ຽນ, ສົ່ງເສີມການປະຕິບັດບັນດາລະບຽນການເພື່ອຜັນຂະຫຍາຍໂຄງການໂດຍໄວໃນປີ 2022.
ບຸນຄົງ
