 |
| ມອບຂອງຂວັນໃຫ້ແກ່ນັກສຶກສາລາວ |
ໂຄງການໄດ້ສະໜອງເຂົ້າສານໜຽວ 150 ພູດ ແລະ ເຊື່ອມຕໍ່ບັນດາຜູ້ໃຈບຸນໃຈກຸສົນ ມອບເຂົ້າສານໜຽວ 600 ກີໂລກຼາມ, ໝາກໄມ້ 300 ກີໂລກຼາມ ໃຫ້ແກ່ນັກສຶກສາລາວ ຢູ່ ແຂວງ ກ໋ວາງນາມ.
ຕາມທ່ານ ຮອງສາດສະດາຈານ, ປ.ອ ຮ່ວຽນຈ້ອງເດືອງ, ອະທິການບໍດີ ມະຫາວິທະຍາໄລ ກ໋ວາງນາມ ແລ້ວ, ໃນໄລຍະກ່ວາ 2 ປີທີ່ຜ່ານມາ ນັກສຶກສາລາວ ຍັງບໍ່ທັນໄດ້ກັບບ້ານຍ້ອນໂລກລະບາດໂຄວິດ - 19, ເຂົາເຈົ້າປະສົບກັບຄວາມຫຍຸ້ງຍາກຫຼາຍຢ່າງເມື່ອຕ້ອງຮຽນແບບທາງໄກ. ດັ່ງນັ້ນ, ໂຮງຮຽນຍາມໃດກໍ່ສະໜິດຕິດແທດ, ໜູນຊ່ວຍບັນດານ້ອງໆນັກສຶກສາໃນການຮ່ຳຮຽນ, ດຳລົງຊີວິດ, ມີຫຼາຍກຸ່ມ, ອົງການຈັດຕັ້ງທຳການກຸສົນກໍ່ຄືບັນດາໜ່ວຍງານ, ຂະແໜງການ ມາຢ້ຽມຢາມ, ແບ່ງປັນ, ລະດົມກຳລັງໃຈບັນດານ້ອງໆ. ໂຄງການ “ເຊື່ອມຕໍ່ອ້ອມແຂນຫວຽດ” ທີ່ແທດຈິງ ແລະ ມີຄວາມໝາຍ ໄດ້ຊ່ວຍໃຫ້ພວກນ້ອງຜ່ານຜ່າໂລກລະບາດໂຄວິດ - 19 ສ່ວນໃດສ່ວນໜຶ່ງໃນການດຳລົງຊີວິດ, ສືບຕໍ່ຮ່ຳຮຽນໃຫ້ເປັນຢ່າງດີ.
ທ່ານ ເລວັນຍິ ປະທານສະມາຄົມນັກຂ່າວແຂວງ ກ໋ວາງນາມ ໃຫ້ຮູ້ວ່າ ສະມາຄົມຈະສືບຕໍ່ໜູນຊ່ວຍນັກສຶກສາລາວ ຢູ່ແຂວງ ກ໋ວາງນາມ ໃຫ້ຫຼາຍກ່ວາອີກ ໃນໄລຍະຈະມາເຖິງ ແລະ ປາດຖະໜາ ບັນດາໜ່ວຍງານ, ສ່ວນບຸກຄົນ ຈະສືບຕໍ່ມີການກະທຳຮ່ວມເດີນທາງພ້ອມກັບໂຄງການ ເພື່ອມີການໜູນຊ່ວຍຫຼາຍກ່ວາອີກ.
“ມູນເຊື້ອສັນຕິພາບ, ມິດຕະພາບ, ການຮ່ວມມືລະຫວ່າງ ແຂວງ ກ໋ວາງນາມ ແລະ ບັນດາແຂວງຂອງລາວ ເວົ້າສະເພາະ, ລະຫວ່າງສອງປະເທດ ຫວຽດນາມ - ລາວ ເວົ້າລວມ ໄດ້ຢັ້ງຢືນດ້ວຍຫຼາຍການເຄື່ອນໄຫວທີ່ມີຄວາມໝາຍທີ່ສຸດໃນຕະຫຼອດໄລຍະທີ່ຜ່ານມາ. ຜ່ານບັນດາການເຄື່ອນໄຫວຄືໂຄງການດັ່ງກ່າວ, ພວກຂ້າພະເຈົ້າຫວັງວ່າ ຈະເພີ່ມກຳລັງແຮງຢ່າງທັນການ, ຮ່ວມເດີນທາງກັບບັນດານັກສຶກສາ, ເພີ່ມພູນຄູນສ້າງນ້ຳໃຈລະຫວ່ງບັນດາເພື່ອນກັບເຂດດິນແດນກ໋ວາງນາມ, ກັບປະເທດຊາດ ແລະ ຊາວຫວຽດນາມ”. ນັກຂ່າວ ເລວັນຍີ ໃຫ້ຮູ້.
ນ້ອງ ມີນາ ທາລັງສີ (ຢູ່ແຂວງຈຳປາສັກລາວ) - ນັກສຶກສາພະແນກພາສາອັງກິດ K18 ຂອງມະຫາວິທະຍາໄລ ກ໋ວາງນາມ ແບ່ງປັນວ່າ: ນ້ອງມາກ໋ວາງນາມຮ່ຳຮຽນແຕ່ປີ 2018 ແລະ ເຄີຍກັບບ້ານຕອນຍາມພັກແລ້ງ. ເຖິງຢ່າງໃດກໍຕາມ, ຍ້ອນໂລກລະບາດໂຄວິດ - 19, ດັ່ງນັ້ນນັບແຕ່ ປີ 2020 ມາຮອດປັດຈຸບັນ, ນ້ອງຕ້ອງຢູ່ໂຮງຮຽນ, ບໍ່ໄດ້ກັບເມືອບ້ານ. ບາງຄັ້ງບາງຄາວກໍ່ຮູ້ສຶກຄິດຮອດບ້ານຫຼາຍ, ແຕ່ກໍ່ຮູ້ສຶກໂຊກດີ ຍ້ອນວ່າຢູ່ນີ້ໄດ້ຮັບຄວາມເອົາໃຈໃສ່ຢ່າງຫຼວງຫຼາຍຈາກໂຮງຮຽນ, ໝູ່ຄະນະ ແລະ ເພື່ອນໆ. ນັກສຶກສາໄດ້ສັກວັກຊິນກັນໂຄວິດ - 19, ໄດ້ຮັບການໜູນຊ່ວຍທັນຍາຫານ, ສະບຽງອາຫານ, ທຶນການສຶກສາ. ນ້ອງຮູ້ສຶກດີໃຈ ແລະ ຕື້ນຕັນໃຈທີ່ສຸດ.
ໂດຍໄດ້ຮູ້ວ່າ ພາຍຫຼັງໂຄງການ, ສະມາຄົມນັກຂ່າວແຂວງ ກ໋ວາງນາມ ຈະສືບຕໍ່ເຊື່ອມຕໍ່ເພື່ອມີແຫຼ່ງກຳລັງໜູນຊ່ວຍໃຫ້ຫຼາຍກ່ວາອີກ ເພື່ອໜູນຊ່ວຍໃຫ້ແກ່ນັກສຶກສາລາວ. ກ່ອນໜ້ານັ້ນ, ໂຄງການ “ເຊື່ອມຕໍ່ອ້ອມແຂນຫວຽດ” ກໍ່ໄດ້ມາຢ້ຽມຢາມບັນດານັກສຶກສາລາວ ຢູ່ມະຫາວິທະຍາໄລ ຟ້າມວັນດົ່ງ ແລະ ວິທະຍາໄລ ການແພດ ດັ້ງຖຸຍເຈິນ ຢູ່ ແຂວງ ກ໋ວາງງາຍ.
ບຸນຄົງ
