ຄັງແຮອາຊຽນ+3 ມອບເຂົ້າຫຼາຍກວ່າ 2 ພັນໂຕນ ຊ່ວຍເຫຼືອຜູ້ໄດ້ຮັບຜົນກະທົບແຂວງອັດຕະປື

00:54 | 15/05/2019

ກະຊວງການເງິນ ຈັດພິທີມອບ-ຮັບເຂົ້າສານຈ້າວ ຄັງແຮເຂົ້າອາຊຽນ+3 ຕາມພັນທະຂອງລັດຖະບານ ສປປ ລາວ ຈຳນວນ 2.221,40 ໂຕນ ລວມມູນຄ່າທັງໝົດ 16,66 ຕື້ກີບ ໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດ ຢູ່ເມືອງສະໜາມໄຊ ແຂວງອັດຕະປື ທີ່ກະຊວງການເງິນ ເປັນກຽດມອບ-ຮັບໃນຄັ້ງນີ້ ໂດຍທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ເປັນຜູ້ມອບ ແລະ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທັງເປັນປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດເປັນຜູ້ຮັບ.

ເຂົ້າສານຈ້າວຄັງແຮເຂົ້າອາຊຽນ+3 ແມ່ນພັນທະໜຶ່ງຂອງລັດຖະບານ ສປປ ລາວ ໃນໂຄງການສຳຮອງເຂົ້າສຸກເສີນອາຊຽນ+3 ຊຶ່ງແມ່ນການຮ່ວມມືໃນພາກພື້ນ ແລະ ແມ່ນສ່ວນໜຶ່ງຂອງເຂົ້າສະສົມແຫ່ງລັດ ເຊິ່ງກົມສະສົມແຫ່ງລັດ ກະຊວງການເງິນເປັນຜູ້ຄຸ້ມຄອງຕາມການມອບໝາຍຂອງລັດຖະບານ ເພື່ອຕອບສະໜອງຄວາມຮຽກຮ້ອງຕ້ອງການອັນຈຳເປັນ ໃນເວລາປະສົບບັນຫາສຸກເສີນດ້ານສະບຽງອາຫານ ຫຼື ເກີດໄພພິບັດທຳມະຊາດ ແລະ ມີເປົ້າໝາຍເພື່ອຊ່ວຍເຫຼືອສຸກເສີນ ປະຊາຊົນທີ່ໄດ້ຮັບຜົນກະທົບຈາກໄພພິບັດ ປະກອບສ່ວນໃນການປົວແປງຈິດໃຈ ແລະ ແກ້ໄຂຊີວິດການເປັນຢູ່ຂອງປະຊາຊົນ ໃຫ້ກັບຄືນສູ່ສະພາບປົກກະຕິ ຕາມເວລາອັນເໝາະສົມ.

ລັດຖະບານ ສປປ ລາວ ເລີ່ມສະສົມເຂົ້າຄັງແຮອາຊຽນ+3 ໃນປີ 2015 ຈຳນວນ 3 ພັນໂຕນ ໄດ້ກຳນົດເປັນປະເພດເຂົ້າຈ້າວ ເກັບຮັກສາຢູ່ນະຄອນຫຼວງວຽງຈັນ ຍ້ອນບໍ່ທັນມີຄວາມພ້ອມດ້ານພື້ນຖານໂຄງລ່າງການສະສົມ ຈຶ່ງໄດ້ກຳນົດເງື່ອນໄຂເຊົ່າສາງນຳຜູ້ປະກອບການ ທີ່ຊະນະການປະມູນແບບເປີດກວ້າງ ຊຶ່ງຜູ້ປະກອບການຕ້ອງມີເງື່ອນໄຂ ໃນການຕອບສະໜອງເຂົ້າ ມີສາງເພື່ອເກັບຮັກສາ ມີການປະກັນໄພເຂົ້າ ແລະ ສາງຮັບຜິດຊອບການປ່ຽນຖ່າຍ ພາຍໃນກຳນົດເວລາ 6 ເດືອນ ແລະ ຮັບຜິດຊອບຕະຫຼາດຮອງຮັບ ໃນເວລາເຂົ້າໃກ້ຈະໝົດອາຍຸຊົມໃຊ້ ເຂົ້າສານຈ້າວ ຈຳນວນ 3 ພັນໂຕນນີ້ ໄດ້ເບີກຈ່າຍອອກຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມໃນປີ 2017 ຈຳນວນ 664,5 ໂຕນ ລວມມີ 6 ແຂວງ ຄື: ແຂວງອຸດົມໄຊ ແຂວງຫົວພັນ ແຂວງຊຽງຂວາງ ແຂວງໄຊຍະບູລີ ແຂວງວຽງຈັນ ແລະ ແຂວງບໍລິຄຳໄຊ ໃນປີ 2018 ໄດ້ເບີກຈ່າຍອອກ ຈຳນວນ 114,1 ໂຕນ ເພື່ອຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມ ຢູ່ແຂວງວຽງຈັນ ມີ 3 ເມືອງ ຄື: ເມືອງເຟືອງ ເມືອງກາສີ ແລະ ເມືອງໝື່ນ ເຂົ້າຍັງເຫຼືອຈຳນວນ 2.221,4 ໂຕນ ແລະ ໃນມື້ນີ້ ຈະມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດ ຢູ່ເມືອງສະໜາມໄຊ ແຂວງອັດຕະປື.

ການເບີກຈ່າຍເຂົ້າສະສົມແຫ່ງລັດ ອອກຊ່ວຍເຫຼືອຜູ້ປະສົບໄພພິບັດໃນຄັ້ງນີ້ ເປັນຄັ້ງທີ 4 ຊຶ່ງເປັນບົດບາດສຳຄັນຂອງວຽກງານສະສົມແຫ່ງລັດ ແລະ ສອດຄ່ອງກັບແນວທາງນະໂຍບາຍຂອງພັກ-ລັດ ທັງເປັນການສະແດງໃຫ້ເຫັນເຖິງຄວາມເປັນຫ່ວງເປັນໄຍເອົາໃຈໃສ່ຂອງພັກ ແລະ ລັດຖະບານ ໃນການແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າ ນັບມື້ນັບດີຂຶ້ນເລື້ອຍໆ.

（ແຫຼ່ງຂໍ້ມູນ： vientianemai.net）