| ປະທານປະເທດຫວຽດນາມ ສົ່ງຈົດໝາຍຢ້ືຢາມຖາມຂ່າວຜູ້ຖືກເຄາະຮ້າຍຈາກທາດພິດສີສົ້ມ/ດິໂອຊີນ | |
| ການໂທດກຳສົງຄາມທີ່ເຮັດຜິດກັບທຳມະຄະຕິຄື ທາດພິດສີສົ້ມ ຈະບໍ່ໄດ້ປິດບັງໄວ້ |
ໃນວັນທີ 4 ສິງຫາ, VAVA ແລະ Gensuikyo ໄດ້ຈັດກອງປະຊຸມອອນໄລ ດ້ວຍຫົວຂໍ້ “ເປັນຫຍັງພວກເຮົາຕ້ອງປະສານສົມທົບ ເພື່ອໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມຢູ່ຫວຽດນາມ ແລະ ຕໍ່ສູ້ເພື່ອທຳລາຍອາວຸດນິວເຄຼຍ ແລະ ອາວຸດລ້າງຜານອື່ນໆ", ເຊິ່ງໄດ້ດຶງດູດການເຂົ້າຮ່ວມຂອງຜູ້ແທນ 165 ຄົນຈາກຍີ່ປຸ່ນ ແລະ ຫວຽດນາມ. ຢູ່ທີ່ກອງປະຊຸມ, Gensuikyo ໄດ້ຮຽກຮ້ອງໃຫ້ສະໜັບສະໜູນ ຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ ແລະ ເພີ່ມທະວີຄວາມສາມັກຄີລະຫວ່າງ VAVA ແລະ Gensuikyo.
 |
| Gensuikyo ຮຽກຮ້ອງໃຫ້ການຊ່ວຍເຫຼືອ ຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ. |
ທີ່ກອງປະຊຸມ, ຜູ້ປະສົບເຄາະຮ້າຍຈາກທາດພິດສີສົ້ມ 4 ຄົນຢູ່ຫາຍຟອງ, ກວາງບິ່ງ, ຖ໊າຍຫງວຽນ ແລະ ນະຄອນໂຮ່ຈີມິນ ໄດ້ແບ່ງປັນສະພາບການຂອງເຂົາເຈົ້າ. ຜູ້ປະສົບເຄາະຮ້າຍຈາກທາດພິດສີສົ້ມ ໄດ້ສະແດງຄວາມຫວັງ ແລະ ຢາກໃຫ້ທຸກຄົນພ້ອມກັນຕໍ່ຄ້ານສົງຄາມ, ໂດຍສະເພາະ ແມ່ນສົງຄາມເຄມີ ແລະ ສົງຄາມນິວເຄຼຍໃນທົ່ວໂລກ, ເພື່ອພວກເຮົາຈະບໍ່ຕ້ອງເຫັນຄວາມທຸກທໍລະມານ, ການສູນເສຍ, ຄວາມພິການ, ການພັດພາກຈາກກັນກັບຍາດພີ່ນ້ອງແບບນີ້ອີກຕໍ່ໄປ, ເພື່ອໃຫ້ຄົນລຸ້ນຕໍ່ໄປໄດ້ຮັບສິດທິມະນຸດທີ່ແທ້ຈິງ, ສິດທີ່ຈະມີຄວາມຜາສຸກ... ຜູ້ປະສົບເຄາະຮ້າຍ ປາດຖະໜາຢາກໄດ້ຮັບຄວາມເອົາໃຈໃສ່ ແລະ ການໜູນຊ່ວຍຫຼາຍຂຶ້ນ ເພື່ອໃຫ້ເຂົາເຈົ້າສາມາດເຊື່ອມໂຍງເຂົ້າກັບການດຳລົງຊີວິດຮ່ວມກັບທຸກຄົນໄດ້.
ປ້າ Tamiko Nishimoto, ຜູ້ທີ່ລອດຕາຍຈາກເຫດຖິ້ມລະເບີດປະລະມານູຢູ່ Hiroshima (ຫ່າງຈາກເຮືອນຂອງລາວ ກ່ວາ 2 ກິໂລແມັດ, ຕອນນັ້ນ ລາວມີອາຍຸພຽງແຕ່ 4 ປີ) ແລະ ລຸງ Oonaka Shinichi ທີ່ພໍ່ຂອງລາວເສຍຊີວິດຍ້ອນເຫດລະເບີດປະລະມານູຢູ່ Hiroshima ໄດ້ໂອ້ລົມ, ສະແດງໃຫ້ເຫັນເຖິງຄວາມສາມັກຄີ ແລະ ການໜູນຊ່ວຍຂອງຜູ້ປະສົບເຄາະຮ້າຍຈາກລູກລະເບີດປະລະມານູຍີ່ປຸ່ນ (Hibakusha) ທີ່ມີຕໍ່ຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ.
ທ່ານ Goro Nakamura, ນັກຂ່າວພາບ, ສາດສະດາຈານ Hajime Suzuki ໄດ້ສະເໜີກ່ຽວກັບວຽກງານທີ່ໄດ້ເຮັດ ແລະ ການຄາດຄະເນຂອງເພື່ອນມິດຍີ່ປຸ່ນ ທີ່ຈະໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ.
ກອງປະຊຸມໄດ້ຮັບຟັງຜູ້ຕາງໜ້າສະພາ Gensuikyo ອ່ານຄຳຮຽກຮ້ອງການສະໜັບສະໜູນຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ ແລະ ເພີ່ມທະວີຄວາມສາມັກຄີລະຫວ່າງ VAVA ແລະ Gensuikyo, ລະຫວ່າງປະຊາຊົນຫວຽດນາມ - ຍີ່ປຸ່ນ ແລະ ປະຊາຊົນທົ່ວໂລກ ໃນການຕໍ່ສູ້ຕ້ານສົງຄາມ, ສະກັດກັ້ນການນຳໃຊ້ອາວຸດທຳລາຍລ້າງເພື່ອຮັກສາສັນຕິພາບ.
ຄຳຮຸ່ງ
