 | ||||
| ທ່ານນາງ ຫງວຽນເຟືອງງາ ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ແລະ ທ່ານ ຫງວຽນວັນເທີ ຮອງປະທານສະມາຄົມມິດຕະພາບ ຫວຽດ ຈີນ ເຂົ້າຮ່ວມກອງປະຊຸມ (ພາບ: TV) |
ຜູ້ແທນບັນດາອົງການຈັດຕັ້ງມິດຕະພາບປະຊາຊົນບັນດາປະເທດ ອາຊຽນ ກັບຈີນ ໄດ້ແບ່ງປັນຂໍ້ມູນກ່ຽວກັບສະພາບການໂລກລະບາດໂຄວິດ - 19, ຕີລາຄາສູງບັນດາການໜູນຊ່ວຍ, ຊ່ວຍເຫຼືອ, ແບ່ງປັນຂໍ້ມູນ ແລະ ບົດຮຽນປະສົບການຂອງຈີນ ກັບບັນດາປະເທດ, ໂດຍເນັ້ນໜັກວ່າ ຕ້ອງເສີມຂະຫຍາຍຈິດໃຈຄວາມສາມັກຄີ, ປະດິດຄິດສ້າງ, ຂຸດຄົ້ນແຫຼ່ງກຳລັງໃນປະຊາຊົນ ເພື່ອພ້ອມກັນຜ່ານຜ່າຄວາມຫຍຸ້ງຍາກ, ສືບຕໍ່ພັດທະນາ.
ເຫັນດີຕີລາຄາສູງການພົວພັນແລກປ່ຽນປະຊາຊົນລະຫ່ວາງອາຊຽນ ກັບ ຈີນ ໃນໄລຍະເວລາ 30 ປີຜ່ານມາ ເຊິ່ງບັນລຸໄດ້ໝາກຜົນດີງາມຫຼາຍຢ່າງ, ບັນດາຜູ້ແທນໄດ້ແລກປ່ຽນກ່ຽວກັບບັນດາມາດຕະການຮ່ວມມືໃນໄລຍະທີ່ຜ່ານມາ ແລະ ຮຽກຮ້ອງສືບຕໍ່ສາມັກຄີກັນ, ໜູນຊ່ວຍກັນຜ່ານຜ່າໂລກລະບາດໂຄວິດ - 19, ຟື້ນຟູເສດຖະກິດ, ຍູ້ແຮງບັນດາການເຄື່ອນໄຫວພົວພັນແລກປ່ຽນປະຊາຊົນ, ເພື່ອແນໃສ່ເພີ່ມທະວີນ້ຳໃຈມິດຕະພາບ ແລະ ເຂົ້າໃຈເຊິ່ງກັນແລະກັນ ລະຫວ່າງປະຊາຊົນ ບັນດາປະເທດ ອາຊຽນ ແລະ ຈີນ.
ກ່າວຄຳເຫັນທີ່ກອງປະຊຸມ, ທ່ານຮອງປະທານສະມາຄົມມິດຕະພາບ ຫວຽດນາມ ຈີນ ຫງວຽນວັນເທີ ຊີ້ແຈ້ງວ່າ: ໃນສະພາບການບັນດາການແກ້ງແຍ່ງຂອງບັນດາປະເທດໃຫຍ່, ແກ້ງແຍ່ງທາງການຄ້າ, ເຕັກໂນໂລຢີ, ການຂັດແຍ່ງທາງອະທິປະໄຕຜືນແຜ່ນດິນ, ບັນດາການຜັນແປຢ່າງສັບສົນຢູ່ທະເລຕາເວັນອອກ ແລະ ສະພາບການໂລກໃນປັດຈຸບັນ... ຄວາມສາມັກຄີ ແລະ ການຮ່ວມມືຢ່າງຮອບດ້ານບົນຈິດໃຈໄວ້ວາງໃຈ ແລະ ເຄົາລົບເຊິ່ງກັນແລະກັນ, ເຄົາລົບກົດໝາຍສາກົນ ແມ່ນກຸນແຈຂອງຜົນສຳເລັດ ເພື່ອຍູ້ໂລກລະບາດໂຄວິດ - 19 ໃຫ້ຖອຍໄປ, ຊຸກຍູ້ການຟື້ນຟູເສດຖະກິດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ. ສະຫະພັນບັນດາອົງການມິດຕະພາບຫວຽດນາມ ແລະ ສະມາຄົມມິດຕະພາບ ຫວຽດນາມ - ຈີນ ຈະສືບຕໍ່ຮ່ວມມືຢ່າງແໜ້ນແຟ້ນ ກັບບັນດາອົງການຈັດຕັ້ງມິດຕະພາບຂອງ ຈີນ ແລະ ບັນດາປະເທດ ອາຊຽນ ເພື່ອເພີ່ມທະວີນ້ຳໃຈມິດຕະພາບ, ພ້ອມກັນປະກອບສ່ວນເຂົ້າໃນການປະຕິບັດບັນດາເປົ້າໝາຍດັ່ງກ່າວ.
ບຸນຄົງ
